| Library / Tipiṭaka / তিপিটক • Tipiṭaka / অঙ্গুত্তরনিকায (টীকা) • Aṅguttaranikāya (ṭīkā) |
৩. বালৰগ্গৰণ্ণনা
3. Bālavaggavaṇṇanā
২২-২৪. ততিযস্স পঠমদুতিযততিযানি উত্তানত্থানেৰ।
22-24. Tatiyassa paṭhamadutiyatatiyāni uttānatthāneva.
২৫. চতুত্থে নেতব্বোতি অঞ্ঞতো আহরিত্ৰা বোধেতব্বো, ঞাপেতব্বোতি অত্থো।
25. Catutthe netabboti aññato āharitvā bodhetabbo, ñāpetabboti attho.
২৭. ছট্ঠে নো চেপি পটিচ্ছাদেত্ৰা করোন্তীতি পাণাতিপাতাদীনি করোন্তো সচেপি অপ্পটিচ্ছাদেত্ৰা করোন্তি। পটিচ্ছন্নমেৰাতি ৰিঞ্ঞূহি গরহিতব্বভাৰতো পটিচ্ছাদনারহত্তা পটিচ্ছন্নমেৰাতি ৰুচ্চতি। অৰীচিআদযো পদেসৰিসেসা তত্থূপপন্না সত্তা চ নিরযগ্গহণেন গহিতাতি আহ ‘‘নিরযোতি সহোকাসকা খন্ধা’’তি। তিরচ্ছানযোনি নাম ৰিসুং পদেসৰিসেসো নত্থীতি আহ ‘‘তিরচ্ছানযোনিযং খন্ধাৰ লব্ভন্তী’’তি।
27. Chaṭṭhe no cepi paṭicchādetvā karontīti pāṇātipātādīni karonto sacepi appaṭicchādetvā karonti. Paṭicchannamevāti viññūhi garahitabbabhāvato paṭicchādanārahattā paṭicchannamevāti vuccati. Avīciādayo padesavisesā tatthūpapannā sattā ca nirayaggahaṇena gahitāti āha ‘‘nirayoti sahokāsakā khandhā’’ti. Tiracchānayoni nāma visuṃ padesaviseso natthīti āha ‘‘tiracchānayoniyaṃ khandhāva labbhantī’’ti.
৩১. দসমে অত্থো ফলং তদধীনৰুত্তিতায ৰসো এতস্সাতি অত্থৰসো, হেতূতি আহ ‘‘অত্থৰসেতি কারণানী’’তি। অরঞ্ঞৰনপত্থানীতি অরঞ্ঞলক্খণপ্পত্তানি ৰনপত্থানি। ৰনপত্থ-সদ্দো হি সণ্ডভূতে রুক্খসমূহেপি ৰত্ততীতি অরঞ্ঞগ্গহণং। ৰনীযতি ৰিৰেককামেহি ভজীযতি, ৰনুতে ৰা তে অত্তসম্পত্তিযা ৰসনত্থায যাচন্তো ৰিয হোতীতি ৰনং, পতিট্ঠহন্তি এত্থ ৰিৰেককামা যথাধিপ্পেতৰিসেসাধিগমেনাতি পত্থং, ৰনেসু পত্থং গহনট্ঠানে সেনাসনং ৰনপত্থং। কিঞ্চাপীতি অনুজাননসম্ভাৰনত্থে নিপাতো। কিং অনুজানাতি? নিপ্পরিযাযতো অরঞ্ঞভাৰং গামতো বহি অরঞ্ঞন্তি। তেনাহ ‘‘নিপ্পরিযাযেনা’’তিআদি। কিং সম্ভাৰেতি? আরঞ্ঞকঙ্গনিপ্ফাদকত্তং। যঞ্হি আরঞ্ঞকঙ্গনিপ্ফাদকং, তং ৰিসেসতো অরঞ্ঞন্তি ৰত্তব্বন্তি। তেনাহ ‘‘যং তং পঞ্চধনুসতিক’’ন্তিআদি। নিক্খমিত্ৰা বহি ইন্দখীলাতি ইন্দখীলতো বহি নিক্খমিত্ৰা, ততো বহি পট্ঠাযাতি অত্থো। বহি ইন্দখীলাতি ৰা যত্থ দ্ৰে তীণি ইন্দখীলানি, তত্থ বহিদ্ধা ইন্দখীলতো পট্ঠায। যত্থ তং নত্থি, তদরহট্ঠানতো পট্ঠাযাতি ৰদন্তি। গামন্তন্তি গামসমীপং। অনুপচারট্ঠানন্তি নিচ্চকিচ্চৰসেন ন উপচরিতব্বট্ঠানং। তেনাহ ‘‘যত্থ ন কসীযতি ন ৰপীযতী’’তি।
31. Dasame attho phalaṃ tadadhīnavuttitāya vaso etassāti atthavaso, hetūti āha ‘‘atthavaseti kāraṇānī’’ti. Araññavanapatthānīti araññalakkhaṇappattāni vanapatthāni. Vanapattha-saddo hi saṇḍabhūte rukkhasamūhepi vattatīti araññaggahaṇaṃ. Vanīyati vivekakāmehi bhajīyati, vanute vā te attasampattiyā vasanatthāya yācanto viya hotīti vanaṃ, patiṭṭhahanti ettha vivekakāmā yathādhippetavisesādhigamenāti patthaṃ, vanesu patthaṃ gahanaṭṭhāne senāsanaṃ vanapatthaṃ. Kiñcāpīti anujānanasambhāvanatthe nipāto. Kiṃ anujānāti? Nippariyāyato araññabhāvaṃ gāmato bahi araññanti. Tenāha ‘‘nippariyāyenā’’tiādi. Kiṃ sambhāveti? Āraññakaṅganipphādakattaṃ. Yañhi āraññakaṅganipphādakaṃ, taṃ visesato araññanti vattabbanti. Tenāha ‘‘yaṃ taṃ pañcadhanusatika’’ntiādi. Nikkhamitvā bahi indakhīlāti indakhīlato bahi nikkhamitvā, tato bahi paṭṭhāyāti attho. Bahi indakhīlāti vā yattha dve tīṇi indakhīlāni, tattha bahiddhā indakhīlato paṭṭhāya. Yattha taṃ natthi, tadarahaṭṭhānato paṭṭhāyāti vadanti. Gāmantanti gāmasamīpaṃ. Anupacāraṭṭhānanti niccakiccavasena na upacaritabbaṭṭhānaṃ. Tenāha ‘‘yattha na kasīyati na vapīyatī’’ti.
অত্তনো চ দিট্ঠধম্মসুখৰিহারন্তি এতেন সত্থা অত্তনো ৰিৰেকাভিরতিং পকাসেতি। তত্থ দিট্ঠধম্মো নাম অযং পচ্চক্খো অত্তভাৰো, সুখৰিহারো নাম চতুন্নং ইরিযাপথৰিহারানং ফাসুতা। এককস্স হি অরঞ্ঞে অন্তমসো উচ্চারৰস্সাৰকিচ্চং উপাদায সব্বে ইরিযাপথা ফাসুকা হোন্তি, তস্মা দিট্ঠধম্মে সুখৰিহারং দিট্ঠধম্মসুখৰিহারন্তি এৰং ৰা এত্থ অত্থো দট্ঠব্বো।
Attano ca diṭṭhadhammasukhavihāranti etena satthā attano vivekābhiratiṃ pakāseti. Tattha diṭṭhadhammo nāma ayaṃ paccakkho attabhāvo, sukhavihāro nāma catunnaṃ iriyāpathavihārānaṃ phāsutā. Ekakassa hi araññe antamaso uccāravassāvakiccaṃ upādāya sabbe iriyāpathā phāsukā honti, tasmā diṭṭhadhamme sukhavihāraṃ diṭṭhadhammasukhavihāranti evaṃ vā ettha attho daṭṭhabbo.
পচ্ছিমঞ্চ জনতং অনুকম্পমানোতি কথং অরঞ্ঞৰাসেন পচ্ছিমা জনতা অনুকম্পিতা হোতি? সদ্ধাপব্বজিতা হি কুলপুত্তা ভগৰতো অরঞ্ঞৰাসং দিস্ৰা ‘‘ভগৰাপি নাম অরঞ্ঞসেনাসনানি ন মুঞ্চতি, যস্স নেৰত্থি পরিঞ্ঞাতব্বং ন পহাতব্বং ন ভাৰেতব্বং ন সচ্ছিকাতব্বং, কিমঙ্গং পন ময’’ন্তি চিন্তেত্ৰা তত্থ ৰসিতব্বমেৰ মঞ্ঞিস্সন্তি, এৰং খিপ্পমেৰ দুক্খস্সন্তকরা ভৰিস্সন্তি। এৰং পচ্ছিমা জনতা অনুকম্পিতা হোতি। এতমত্থং দস্সেন্তো আহ ‘‘পচ্ছিমে মম সাৰকে অনুকম্পন্তো’’তি।
Pacchimañca janataṃ anukampamānoti kathaṃ araññavāsena pacchimā janatā anukampitā hoti? Saddhāpabbajitā hi kulaputtā bhagavato araññavāsaṃ disvā ‘‘bhagavāpi nāma araññasenāsanāni na muñcati, yassa nevatthi pariññātabbaṃ na pahātabbaṃ na bhāvetabbaṃ na sacchikātabbaṃ, kimaṅgaṃ pana maya’’nti cintetvā tattha vasitabbameva maññissanti, evaṃ khippameva dukkhassantakarā bhavissanti. Evaṃ pacchimā janatā anukampitā hoti. Etamatthaṃ dassento āha ‘‘pacchime mama sāvake anukampanto’’ti.
৩২. একাদসমে ৰিজ্জং ভজন্তীতি ৰিজ্জাভাগিযা, ৰিজ্জাভাগে ৰিজ্জাকোট্ঠাসে ৰত্তন্তীতিপি ৰিজ্জাভাগিযা। পদং পচ্ছিন্দতীতি মগ্গচিত্তস্স পতিট্ঠং উপচ্ছিন্দতি, মগ্গচিত্তং পতিট্ঠাপেতুং ন দেতীতি অত্থো। উব্বট্টেত্ৰাতি সমুচ্ছেদৰসেন সমূলং উদ্ধরিত্ৰা। অট্ঠসু ঠানেসূতি বুদ্ধাদীসু অট্ঠসু ঠানেসু। রাগস্স খযৰিরাগেনাতি রাগস্স খযসঙ্খাতেন ৰিরাগেন, রাগস্স অনুপ্পত্তিধম্মতাপাদনেনাতি ৰুত্তং হোতি।
32. Ekādasame vijjaṃ bhajantīti vijjābhāgiyā, vijjābhāge vijjākoṭṭhāse vattantītipi vijjābhāgiyā. Padaṃ pacchindatīti maggacittassa patiṭṭhaṃ upacchindati, maggacittaṃ patiṭṭhāpetuṃ na detīti attho. Ubbaṭṭetvāti samucchedavasena samūlaṃ uddharitvā. Aṭṭhasu ṭhānesūti buddhādīsu aṭṭhasu ṭhānesu. Rāgassa khayavirāgenāti rāgassa khayasaṅkhātena virāgena, rāgassa anuppattidhammatāpādanenāti vuttaṃ hoti.
বালৰগ্গৰণ্ণনা নিট্ঠিতা।
Bālavaggavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya / ৩. বালৰগ্গো • 3. Bālavaggo
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ৩. বালৰগ্গৰণ্ণনা • 3. Bālavaggavaṇṇanā
