| Library / Tipiṭaka / តិបិដក • Tipiṭaka / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā) |
(១០) ៥. ពាលវគ្គវណ្ណនា
(10) 5. Bālavaggavaṇṇanā
៩៩. បញ្ចមស្ស បឋមេ អនាគតំ ភារំ វហតីតិ ‘‘សម្មជ្ជនី បទីបោ ច, ឧទកំ អាសនេន ច, ឆន្ទបារិសុទ្ធិឧតុក្ខានំ, ភិក្ខុគណនា ច ឱវាទោ, បាតិមោក្ខំ ថេរភារោតិ វុច្ចតី’’តិ ឥមំ ទសវិធំ ថេរភារំ នវកោ ហុត្វា ថេរេន អនជ្ឈិដ្ឋោ ករោន្តោ អនាគតំ ភារំ វហតិ នាម។ អាគតំ ភារំ ន វហតីតិ ថេរោ សមានោ តមេវ ទសវិធំ ភារំ អត្តនា វា អករោន្តោ បរំ វា អសមាទបេន្តោ អាគតំ ភារំ ន វហតិ នាម។ ទុតិយសុត្តេបិ ឥមិនាវ នយេន អត្ថោ វេទិតព្ពោ។
99. Pañcamassa paṭhame anāgataṃ bhāraṃ vahatīti ‘‘sammajjanī padīpo ca, udakaṃ āsanena ca, chandapārisuddhiutukkhānaṃ, bhikkhugaṇanā ca ovādo, pātimokkhaṃ therabhāroti vuccatī’’ti imaṃ dasavidhaṃ therabhāraṃ navako hutvā therena anajjhiṭṭho karonto anāgataṃ bhāraṃ vahati nāma. Āgataṃ bhāraṃ na vahatīti thero samāno tameva dasavidhaṃ bhāraṃ attanā vā akaronto paraṃ vā asamādapento āgataṃ bhāraṃ na vahati nāma. Dutiyasuttepi imināva nayena attho veditabbo.
១០១. តតិយេ អកប្បិយេ កប្បិយសញ្ញីតិ អកប្បិយេ សីហមំសាទិម្ហិ ‘‘កប្បិយំ ឥទ’’ន្តិ ឯវំសញ្ញី។ កប្បិយេ អកប្បិយសញ្ញីតិ កុម្ភីលមំសពិឡារមំសាទិម្ហិ កប្បិយេ ‘‘អកប្បិយំ ឥទ’’ន្តិ ឯវំសញ្ញី។ ចតុត្ថំ វុត្តនយេនេវ វេទិតព្ពំ។
101. Tatiye akappiye kappiyasaññīti akappiye sīhamaṃsādimhi ‘‘kappiyaṃ ida’’nti evaṃsaññī. Kappiye akappiyasaññīti kumbhīlamaṃsabiḷāramaṃsādimhi kappiye ‘‘akappiyaṃ ida’’nti evaṃsaññī. Catutthaṃ vuttanayeneva veditabbaṃ.
១០៣. បញ្ចមេ អនាបត្តិយា អាបត្តិសញ្ញីតិ អាបុច្ឆិត្វា ភណ្ឌកំ ធោវន្តស្ស, បត្តំ បចន្តស្ស, កេសេ ឆិន្ទន្តស្ស, គាមំ បវិសន្តស្សាតិអាទីសុ អនាបត្តិ, តត្ថ ‘‘អាបត្តិ អយ’’ន្តិ ឯវំសញ្ញី។ អាបត្តិយា អនាបត្តិសញ្ញីតិ តេសញ្ញេវ វត្ថូនំ អនាបុច្ឆាករណេ អាបត្តិ, តត្ថ ‘‘អនាបត្តី’’តិ ឯវំសញ្ញី។ ឆដ្ឋេបិ វុត្តនយេនេវ អត្ថោ វេទិតព្ពោ។ សត្តមាទីនិ ឧត្តានត្ថានេវ។
103. Pañcame anāpattiyā āpattisaññīti āpucchitvā bhaṇḍakaṃ dhovantassa, pattaṃ pacantassa, kese chindantassa, gāmaṃ pavisantassātiādīsu anāpatti, tattha ‘‘āpatti aya’’nti evaṃsaññī. Āpattiyā anāpattisaññīti tesaññeva vatthūnaṃ anāpucchākaraṇe āpatti, tattha ‘‘anāpattī’’ti evaṃsaññī. Chaṭṭhepi vuttanayeneva attho veditabbo. Sattamādīni uttānatthāneva.
១០៩. ឯកាទសមេ អាសវាតិ កិលេសា។ ន កុក្កុច្ចាយិតព្ពន្តិ សង្ឃភោគស្ស អបដ្ឋបនំ អវិចារណំ ន កុក្កុច្ចាយិតព្ពំ នាម, តំ កុក្កុច្ចាយតិ។ កុក្កុច្ចាយិតព្ពន្តិ តស្សេវ បដ្ឋបនំ វិចារណំ, តំ ន កុក្កុច្ចាយតិ។ ទ្វាទសមាទីនិ ហេដ្ឋា វុត្តនយេនេវ វេទិតព្ពានីតិ។
109. Ekādasame āsavāti kilesā. Na kukkuccāyitabbanti saṅghabhogassa apaṭṭhapanaṃ avicāraṇaṃ na kukkuccāyitabbaṃ nāma, taṃ kukkuccāyati. Kukkuccāyitabbanti tasseva paṭṭhapanaṃ vicāraṇaṃ, taṃ na kukkuccāyati. Dvādasamādīni heṭṭhā vuttanayeneva veditabbānīti.
ពាលវគ្គោ បញ្ចមោ។
Bālavaggo pañcamo.
ទុតិយបណ្ណាសកំ និដ្ឋិតំ។
Dutiyapaṇṇāsakaṃ niṭṭhitaṃ.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / អង្គុត្តរនិកាយ • Aṅguttaranikāya / (១០) ៥. ពាលវគ្គោ • (10) 5. Bālavaggo
ដីកា • Tīkā / សុត្តបិដក (ដីកា) • Suttapiṭaka (ṭīkā) / អង្គុត្តរនិកាយ (ដីកា) • Aṅguttaranikāya (ṭīkā) / (១០) ៥. ពាលវគ្គវណ្ណនា • (10) 5. Bālavaggavaṇṇanā
