| Library / Tipiṭaka / तिपिटक • Tipiṭaka / पटिसम्भिदामग्गपाळि • Paṭisambhidāmaggapāḷi |
२. बलवारो
2. Balavāro
२४. सब्बे सत्ता अवेरिनो होन्तु, खेमिनो होन्तु, सुखिनो होन्तूति – अस्सद्धिये न कम्पति। सद्धाबलपरिभाविता होति मेत्ताचेतोविमुत्ति।
24. Sabbe sattā averino hontu, khemino hontu, sukhino hontūti – assaddhiye na kampati. Saddhābalaparibhāvitā hoti mettācetovimutti.
सब्बे सत्ता अवेरिनो होन्तु, खेमिनो होन्तु, सुखिनो होन्तूति – कोसज्जे न कम्पति। वीरियबलपरिभाविता होति मेत्ताचेतोविमुत्ति।
Sabbe sattā averino hontu, khemino hontu, sukhino hontūti – kosajje na kampati. Vīriyabalaparibhāvitā hoti mettācetovimutti.
सब्बे सत्ता अवेरिनो होन्तु, खेमिनो होन्तु, सुखिनो होन्तूति – पमादे न कम्पति। सतिबलपरिभाविता होति मेत्ताचेतोविमुत्ति।
Sabbe sattā averino hontu, khemino hontu, sukhino hontūti – pamāde na kampati. Satibalaparibhāvitā hoti mettācetovimutti.
सब्बे सत्ता अवेरिनो होन्तु, खेमिनो होन्तु, सुखिनो होन्तूति – उद्धच्चे न कम्पति। समाधिबलपरिभाविता होति मेत्ताचेतोविमुत्ति।
Sabbe sattā averino hontu, khemino hontu, sukhino hontūti – uddhacce na kampati. Samādhibalaparibhāvitā hoti mettācetovimutti.
सब्बे सत्ता अवेरिनो होन्तु, खेमिनो होन्तु, सुखिनो होन्तूति – अविज्जाय न कम्पति। पञ्ञाबलपरिभाविता होति मेत्ताचेतोविमुत्ति।
Sabbe sattā averino hontu, khemino hontu, sukhino hontūti – avijjāya na kampati. Paññābalaparibhāvitā hoti mettācetovimutti.
इमानि पञ्च बलानि मेत्ताय चेतोविमुत्तिया आसेवना होन्ति। इमेहि पञ्चहि बलेहि मेत्ताचेतोविमुत्ति आसेवीयति। इमानि पञ्च बलानि मेत्ताय चेतोविमुत्तिया भावना होन्ति। इमेहि पञ्चहि बलेहि मेत्ताचेतोविमुत्ति भावीयति। इमानि पञ्च बलानि मेत्ताय चेतोविमुत्तिया बहुलीकता होन्ति। इमेहि पञ्चहि बलेहि मेत्ताचेतोविमुत्ति बहुलीकरीयति। इमानि पञ्च बलानि मेत्ताय चेतोविमुत्तिया अलङ्कारा होन्ति। इमेहि पञ्चहि बलेहि मेत्ताचेतोविमुत्ति स्वालङ्कता होति। इमानि पञ्च बलानि मेत्ताय चेतोविमुत्तिया परिक्खारा होन्ति। इमेहि पञ्चहि बलेहि मेत्ताचेतोविमुत्ति सुपरिक्खता होति। इमानि पञ्च बलानि मेत्ताय चेतोविमुत्तिया परिवारा होन्ति। इमेहि पञ्चहि बलेहि मेत्ताचेतोविमुत्ति सुपरिवुता होति। इमानि पञ्च बलानि मेत्ताय चेतोविमुत्तिया आसेवना होन्ति, भावना होन्ति, बहुलीकता होन्ति, अलङ्कारा होन्ति, परिक्खारा होन्ति, परिवारा होन्ति, पारिपूरी होन्ति, सहगता होन्ति, सहजाता होन्ति, संसट्ठा होन्ति, सम्पयुत्ता होन्ति, पक्खन्दना होन्ति, पसीदना होन्ति, सन्तिट्ठना होन्ति, विमुच्चना होन्ति, ‘‘एतं सन्त’’न्ति फस्सना होन्ति, यानीकता होन्ति, वत्थुकता होन्ति, अनुट्ठिता होन्ति, परिचिता होन्ति, सुसमारद्धा होन्ति, सुभाविता होन्ति, स्वाधिट्ठिता होन्ति, सुसमुग्गता होन्ति, सुविमुत्ता होन्ति निब्बत्तेन्ति जोतेन्ति पतापेन्ति।
Imāni pañca balāni mettāya cetovimuttiyā āsevanā honti. Imehi pañcahi balehi mettācetovimutti āsevīyati. Imāni pañca balāni mettāya cetovimuttiyā bhāvanā honti. Imehi pañcahi balehi mettācetovimutti bhāvīyati. Imāni pañca balāni mettāya cetovimuttiyā bahulīkatā honti. Imehi pañcahi balehi mettācetovimutti bahulīkarīyati. Imāni pañca balāni mettāya cetovimuttiyā alaṅkārā honti. Imehi pañcahi balehi mettācetovimutti svālaṅkatā hoti. Imāni pañca balāni mettāya cetovimuttiyā parikkhārā honti. Imehi pañcahi balehi mettācetovimutti suparikkhatā hoti. Imāni pañca balāni mettāya cetovimuttiyā parivārā honti. Imehi pañcahi balehi mettācetovimutti suparivutā hoti. Imāni pañca balāni mettāya cetovimuttiyā āsevanā honti, bhāvanā honti, bahulīkatā honti, alaṅkārā honti, parikkhārā honti, parivārā honti, pāripūrī honti, sahagatā honti, sahajātā honti, saṃsaṭṭhā honti, sampayuttā honti, pakkhandanā honti, pasīdanā honti, santiṭṭhanā honti, vimuccanā honti, ‘‘etaṃ santa’’nti phassanā honti, yānīkatā honti, vatthukatā honti, anuṭṭhitā honti, paricitā honti, susamāraddhā honti, subhāvitā honti, svādhiṭṭhitā honti, susamuggatā honti, suvimuttā honti nibbattenti jotenti patāpenti.
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / पटिसम्भिदामग्ग-अट्ठकथा • Paṭisambhidāmagga-aṭṭhakathā / २-४. बलादिवारत्तयवण्णना • 2-4. Balādivārattayavaṇṇanā
