| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
10. බාළ්‌හගිලානසුත්‌තං
10. Bāḷhagilānasuttaṃ
908. එකං සමයං ආයස්‌මා අනුරුද්‌ධො සාවත්‌ථියං විහරති අන්‌ධවනස්‌මිං ආබාධිකො දුක්‌ඛිතො බාළ්‌හගිලානො. අථ ඛො සම්‌බහුලා භික්‌ඛූ යෙනායස්‌මා අනුරුද්‌ධො තෙනුපසඞ්‌කමිංසු; උපසඞ්‌කමිත්‌වා ආයස්‌මන්‌තං අනුරුද්‌ධං එතදවොචුං –
908. Ekaṃ samayaṃ āyasmā anuruddho sāvatthiyaṃ viharati andhavanasmiṃ ābādhiko dukkhito bāḷhagilāno. Atha kho sambahulā bhikkhū yenāyasmā anuruddho tenupasaṅkamiṃsu; upasaṅkamitvā āyasmantaṃ anuruddhaṃ etadavocuṃ –
‘‘කතමෙනායස්‌මතො අනුරුද්‌ධස්‌ස විහාරෙන විහරතො උප්‌පන්‌නා සාරීරිකා දුක්‌ඛා වෙදනා චිත්‌තං න පරියාදාය තිට්‌ඨන්‌තී’’ති? ‘‘චතූසු ඛො මෙ, ආවුසො, සතිපට්‌ඨානෙසු සුප්‌පතිට්‌ඨිතචිත්‌තස්‌ස විහරතො උප්‌පන්‌නා සාරීරිකා දුක්‌ඛා වෙදනා චිත්‌තං න පරියාදාය තිට්‌ඨන්‌ති. කතමෙසු චතූසු? ඉධාහං, ආවුසො, කායෙ කායානුපස්‌සී විහරාමි…පෙ.… වෙදනාසු…පෙ.… චිත්‌තෙ…පෙ.… ධම්‌මෙසු ධම්‌මානුපස්‌සී විහරාමි ආතාපී සම්‌පජානො සතිමා, විනෙය්‍ය ලොකෙ අභිජ්‌ඣාදොමනස්‌සං – ඉමෙසු ඛො මෙ, ආවුසො, චතූසු සතිපට්‌ඨානෙසු සුප්‌පතිට්‌ඨිතචිත්‌තස්‌ස විහරතො උප්‌පන්‌නා සාරීරිකා දුක්‌ඛා වෙදනා චිත්‌තං න පරියාදාය තිට්‌ඨන්‌තී’’ති. දසමං.
‘‘Katamenāyasmato anuruddhassa vihārena viharato uppannā sārīrikā dukkhā vedanā cittaṃ na pariyādāya tiṭṭhantī’’ti? ‘‘Catūsu kho me, āvuso, satipaṭṭhānesu suppatiṭṭhitacittassa viharato uppannā sārīrikā dukkhā vedanā cittaṃ na pariyādāya tiṭṭhanti. Katamesu catūsu? Idhāhaṃ, āvuso, kāye kāyānupassī viharāmi…pe… vedanāsu…pe… citte…pe… dhammesu dhammānupassī viharāmi ātāpī sampajāno satimā, vineyya loke abhijjhādomanassaṃ – imesu kho me, āvuso, catūsu satipaṭṭhānesu suppatiṭṭhitacittassa viharato uppannā sārīrikā dukkhā vedanā cittaṃ na pariyādāya tiṭṭhantī’’ti. Dasamaṃ.
රහොගතවග්‌ගො පඨමො.
Rahogatavaggo paṭhamo.
තස්‌සුද්‌දානං –
Tassuddānaṃ –
රහොගතෙන ද්‌වෙ වුත්‌තා, සුතනු කණ්‌ඩකී තයො;
Rahogatena dve vuttā, sutanu kaṇḍakī tayo;
තණ්‌හක්‌ඛයසලළාගාරං, අම්‌බපාලි ච ගිලානන්‌ති.
Taṇhakkhayasalaḷāgāraṃ, ambapāli ca gilānanti.
