| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
2. ப³ளிஸஸுத்தங்
2. Baḷisasuttaṃ
158. ஸாவத்தி²யங் விஹரதி…பே॰… ‘‘தா³ருணோ, பி⁴க்க²வே, லாப⁴ஸக்காரஸிலோகோ கடுகோ ப²ருஸோ அந்தராயிகோ அனுத்தரஸ்ஸ யோக³க்கே²மஸ்ஸ அதி⁴க³மாய. ஸெய்யதா²பி, பி⁴க்க²வே, பா³ளிஸிகோ ஆமிஸக³தங் ப³ளிஸங் க³ம்பீ⁴ரே உத³கரஹதே³ பக்கி²பெய்ய. தமேனங் அஞ்ஞதரோ ஆமிஸசக்கு² மச்சோ² கி³லெய்ய. ஏவஞ்ஹி ஸோ, பி⁴க்க²வே, மச்சோ² கி³லப³ளிஸோ பா³ளிஸிகஸ்ஸ அனயங் ஆபன்னோ ப்³யஸனங் ஆபன்னோ யதா²காமகரணீயோ பா³ளிஸிகஸ்ஸ’’.
158. Sāvatthiyaṃ viharati…pe… ‘‘dāruṇo, bhikkhave, lābhasakkārasiloko kaṭuko pharuso antarāyiko anuttarassa yogakkhemassa adhigamāya. Seyyathāpi, bhikkhave, bāḷisiko āmisagataṃ baḷisaṃ gambhīre udakarahade pakkhipeyya. Tamenaṃ aññataro āmisacakkhu maccho gileyya. Evañhi so, bhikkhave, maccho gilabaḷiso bāḷisikassa anayaṃ āpanno byasanaṃ āpanno yathākāmakaraṇīyo bāḷisikassa’’.
‘‘பா³ளிஸிகோதி கோ², பி⁴க்க²வே, மாரஸ்ஸேதங் பாபிமதோ அதி⁴வசனங். ப³ளிஸந்தி கோ², பி⁴க்க²வே , லாப⁴ஸக்காரஸிலோகஸ்ஸேதங் அதி⁴வசனங். யோ ஹி கோசி , பி⁴க்க²வே, பி⁴க்கு² உப்பன்னங் லாப⁴ஸக்காரஸிலோகங் அஸ்ஸாதே³தி நிகாமேதி, அயங் வுச்சதி, பி⁴க்க²வே, பி⁴க்கு² கி³லப³ளிஸோ மாரஸ்ஸ அனயங் ஆபன்னோ ப்³யஸனங் ஆபன்னோ யதா²காமகரணீயோ பாபிமதோ. ஏவங் தா³ருணோ கோ², பி⁴க்க²வே , லாப⁴ஸக்காரஸிலோகோ கடுகோ ப²ருஸோ அந்தராயிகோ அனுத்தரஸ்ஸ யோக³க்கே²மஸ்ஸ அதி⁴க³மாய. தஸ்மாதிஹ, பி⁴க்க²வே, ஏவங் ஸிக்கி²தப்³ப³ங் – ‘உப்பன்னங் லாப⁴ஸக்காரஸிலோகங் பஜஹிஸ்ஸாம, ந ச நோ உப்பன்னோ லாப⁴ஸக்காரஸிலோகோ சித்தங் பரியாதா³ய ட²ஸ்ஸதீ’தி. ஏவஞ்ஹி வோ, பி⁴க்க²வே, ஸிக்கி²தப்³ப³’’ந்தி. து³தியங்.
‘‘Bāḷisikoti kho, bhikkhave, mārassetaṃ pāpimato adhivacanaṃ. Baḷisanti kho, bhikkhave , lābhasakkārasilokassetaṃ adhivacanaṃ. Yo hi koci , bhikkhave, bhikkhu uppannaṃ lābhasakkārasilokaṃ assādeti nikāmeti, ayaṃ vuccati, bhikkhave, bhikkhu gilabaḷiso mārassa anayaṃ āpanno byasanaṃ āpanno yathākāmakaraṇīyo pāpimato. Evaṃ dāruṇo kho, bhikkhave , lābhasakkārasiloko kaṭuko pharuso antarāyiko anuttarassa yogakkhemassa adhigamāya. Tasmātiha, bhikkhave, evaṃ sikkhitabbaṃ – ‘uppannaṃ lābhasakkārasilokaṃ pajahissāma, na ca no uppanno lābhasakkārasiloko cittaṃ pariyādāya ṭhassatī’ti. Evañhi vo, bhikkhave, sikkhitabba’’nti. Dutiyaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 2. ப³ளிஸஸுத்தவண்ணனா • 2. Baḷisasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 2. ப³ளிஸஸுத்தவண்ணனா • 2. Baḷisasuttavaṇṇanā
