| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
2. බළිසසුත්‌තං
2. Baḷisasuttaṃ
158. සාවත්‌ථියං විහරති…පෙ.… ‘‘දාරුණො, භික්‌ඛවෙ, ලාභසක්‌කාරසිලොකො කටුකො ඵරුසො අන්‌තරායිකො අනුත්‌තරස්‌ස යොගක්‌ඛෙමස්‌ස අධිගමාය. සෙය්‍යථාපි, භික්‌ඛවෙ, බාළිසිකො ආමිසගතං බළිසං ගම්‌භීරෙ උදකරහදෙ පක්‌ඛිපෙය්‍ය. තමෙනං අඤ්‌ඤතරො ආමිසචක්‌ඛු මච්‌ඡො ගිලෙය්‍ය. එවඤ්‌හි සො, භික්‌ඛවෙ, මච්‌ඡො ගිලබළිසො බාළිසිකස්‌ස අනයං ආපන්‌නො බ්‍යසනං ආපන්‌නො යථාකාමකරණීයො බාළිසිකස්‌ස’’.
158. Sāvatthiyaṃ viharati…pe… ‘‘dāruṇo, bhikkhave, lābhasakkārasiloko kaṭuko pharuso antarāyiko anuttarassa yogakkhemassa adhigamāya. Seyyathāpi, bhikkhave, bāḷisiko āmisagataṃ baḷisaṃ gambhīre udakarahade pakkhipeyya. Tamenaṃ aññataro āmisacakkhu maccho gileyya. Evañhi so, bhikkhave, maccho gilabaḷiso bāḷisikassa anayaṃ āpanno byasanaṃ āpanno yathākāmakaraṇīyo bāḷisikassa’’.
‘‘බාළිසිකොති ඛො, භික්‌ඛවෙ, මාරස්‌සෙතං පාපිමතො අධිවචනං. බළිසන්‌ති ඛො, භික්‌ඛවෙ , ලාභසක්‌කාරසිලොකස්‌සෙතං අධිවචනං. යො හි කොචි , භික්‌ඛවෙ, භික්‌ඛු උප්‌පන්‌නං ලාභසක්‌කාරසිලොකං අස්‌සාදෙති නිකාමෙති, අයං වුච්‌චති, භික්‌ඛවෙ, භික්‌ඛු ගිලබළිසො මාරස්‌ස අනයං ආපන්‌නො බ්‍යසනං ආපන්‌නො යථාකාමකරණීයො පාපිමතො. එවං දාරුණො ඛො, භික්‌ඛවෙ , ලාභසක්‌කාරසිලොකො කටුකො ඵරුසො අන්‌තරායිකො අනුත්‌තරස්‌ස යොගක්‌ඛෙමස්‌ස අධිගමාය. තස්‌මාතිහ, භික්‌ඛවෙ, එවං සික්‌ඛිතබ්‌බං – ‘උප්‌පන්‌නං ලාභසක්‌කාරසිලොකං පජහිස්‌සාම, න ච නො උප්‌පන්‌නො ලාභසක්‌කාරසිලොකො චිත්‌තං පරියාදාය ඨස්‌සතී’ති. එවඤ්‌හි වො, භික්‌ඛවෙ, සික්‌ඛිතබ්‌බ’’න්‌ති. දුතියං.
‘‘Bāḷisikoti kho, bhikkhave, mārassetaṃ pāpimato adhivacanaṃ. Baḷisanti kho, bhikkhave , lābhasakkārasilokassetaṃ adhivacanaṃ. Yo hi koci , bhikkhave, bhikkhu uppannaṃ lābhasakkārasilokaṃ assādeti nikāmeti, ayaṃ vuccati, bhikkhave, bhikkhu gilabaḷiso mārassa anayaṃ āpanno byasanaṃ āpanno yathākāmakaraṇīyo pāpimato. Evaṃ dāruṇo kho, bhikkhave , lābhasakkārasiloko kaṭuko pharuso antarāyiko anuttarassa yogakkhemassa adhigamāya. Tasmātiha, bhikkhave, evaṃ sikkhitabbaṃ – ‘uppannaṃ lābhasakkārasilokaṃ pajahissāma, na ca no uppanno lābhasakkārasiloko cittaṃ pariyādāya ṭhassatī’ti. Evañhi vo, bhikkhave, sikkhitabba’’nti. Dutiyaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 2. බළිසසුත්‌තවණ්‌ණනා • 2. Baḷisasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 2. බළිසසුත්‌තවණ්‌ණනා • 2. Baḷisasuttavaṇṇanā
