| Library / Tipiṭaka / တိပိဋက • Tipiṭaka / မိလိန္ဒပဉ္ဟပာဠိ • Milindapañhapāḷi |
၉. ဗာဠိသိကင္ဂပဉ္ဟော
9. Bāḷisikaṅgapañho
၉. ‘‘ဘန္တေ နာဂသေန, ‘ဗာဠိသိကသ္သ ဒ္ဝေ အင္ဂာနိ ဂဟေတဗ္ဗာနီ’တိ ယံ ဝဒေသိ, ကတမာနိ တာနိ ဒ္ဝေ အင္ဂာနိ ဂဟေတဗ္ဗာနီ’’တိ? ‘‘ယထာ, မဟာရာဇ, ဗာဠိသိကော ဗဠိသေန မစ္ဆေ ဥဒ္ဓရတိ, ဧဝမေဝ ခော, မဟာရာဇ, ယောဂိနာ ယောဂာဝစရေန ဉာဏေန ဥတ္တရိံ သာမညဖလာနိ ဥဒ္ဓရိတဗ္ဗာနိ။ ဣဒံ, မဟာရာဇ, ဗာဠိသိကသ္သ ပဌမံ အင္ဂံ ဂဟေတဗ္ဗံ။
9. ‘‘Bhante nāgasena, ‘bāḷisikassa dve aṅgāni gahetabbānī’ti yaṃ vadesi, katamāni tāni dve aṅgāni gahetabbānī’’ti? ‘‘Yathā, mahārāja, bāḷisiko baḷisena macche uddharati, evameva kho, mahārāja, yoginā yogāvacarena ñāṇena uttariṃ sāmaññaphalāni uddharitabbāni. Idaṃ, mahārāja, bāḷisikassa paṭhamaṃ aṅgaṃ gahetabbaṃ.
‘‘ပုန စပရံ, မဟာရာဇ, ဗာဠိသိကော ပရိတ္တကံ ဝဓိတ္ဝာ ဝိပုလံ လာဘမဓိဂစ္ဆတိ, ဧဝမေဝ ခော, မဟာရာဇ, ယောဂိနာ ယောဂာဝစရေန ပရိတ္တလောကာမိသမတ္တံ ပရိစ္စဇိတဗ္ဗံ။ လောကာမိသမတ္တံ, မဟာရာဇ, ပရိစ္စဇိတ္ဝာ ယောဂီ ယောဂာဝစရော ဝိပုလံ သာမညဖလံ အဓိဂစ္ဆတိ။ ဣဒံ, မဟာရာဇ, ဗာဠိသိကသ္သ ဒုတိယံ အင္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ထေရေန ရာဟုလေန –
‘‘Puna caparaṃ, mahārāja, bāḷisiko parittakaṃ vadhitvā vipulaṃ lābhamadhigacchati, evameva kho, mahārāja, yoginā yogāvacarena parittalokāmisamattaṃ pariccajitabbaṃ. Lokāmisamattaṃ, mahārāja, pariccajitvā yogī yogāvacaro vipulaṃ sāmaññaphalaṃ adhigacchati. Idaṃ, mahārāja, bāḷisikassa dutiyaṃ aṅgaṃ gahetabbaṃ. Bhāsitampetaṃ, mahārāja, therena rāhulena –
‘‘‘သုညတဉ္စာနိမိတ္တဉ္စ၊ ဝိမောက္ခဉ္စာပ္ပဏိဟိတံ။
‘‘‘Suññatañcānimittañca, vimokkhañcāppaṇihitaṃ;
စတုရော ဖလေ ဆဠဘိညာ၊ စဇိတ္ဝာ လောကာမိသံ လဘေ’’’တိ။
Caturo phale chaḷabhiññā, cajitvā lokāmisaṃ labhe’’’ti.
ဗာဠိသိကင္ဂပဉ္ဟော နဝမော။
Bāḷisikaṅgapañho navamo.
