| Library / Tipiṭaka / තිපිටක • Tipiṭaka / මිලින්‌දපඤ්‌හපාළි • Milindapañhapāḷi |
9. බාළිසිකඞ්‌ගපඤ්‌හො
9. Bāḷisikaṅgapañho
9. ‘‘භන්‌තෙ නාගසෙන, ‘බාළිසිකස්‌ස ද්‌වෙ අඞ්‌ගානි ගහෙතබ්‌බානී’ති යං වදෙසි, කතමානි තානි ද්‌වෙ අඞ්‌ගානි ගහෙතබ්‌බානී’’ති? ‘‘යථා, මහාරාජ, බාළිසිකො බළිසෙන මච්‌ඡෙ උද්‌ධරති, එවමෙව ඛො, මහාරාජ, යොගිනා යොගාවචරෙන ඤාණෙන උත්‌තරිං සාමඤ්‌ඤඵලානි උද්‌ධරිතබ්‌බානි. ඉදං, මහාරාජ, බාළිසිකස්‌ස පඨමං අඞ්‌ගං ගහෙතබ්‌බං.
9. ‘‘Bhante nāgasena, ‘bāḷisikassa dve aṅgāni gahetabbānī’ti yaṃ vadesi, katamāni tāni dve aṅgāni gahetabbānī’’ti? ‘‘Yathā, mahārāja, bāḷisiko baḷisena macche uddharati, evameva kho, mahārāja, yoginā yogāvacarena ñāṇena uttariṃ sāmaññaphalāni uddharitabbāni. Idaṃ, mahārāja, bāḷisikassa paṭhamaṃ aṅgaṃ gahetabbaṃ.
‘‘පුන චපරං, මහාරාජ, බාළිසිකො පරිත්‌තකං වධිත්‌වා විපුලං ලාභමධිගච්‌ඡති, එවමෙව ඛො, මහාරාජ, යොගිනා යොගාවචරෙන පරිත්‌තලොකාමිසමත්‌තං පරිච්‌චජිතබ්‌බං. ලොකාමිසමත්‌තං, මහාරාජ, පරිච්‌චජිත්‌වා යොගී යොගාවචරො විපුලං සාමඤ්‌ඤඵලං අධිගච්‌ඡති. ඉදං, මහාරාජ, බාළිසිකස්‌ස දුතියං අඞ්‌ගං ගහෙතබ්‌බං. භාසිතම්‌පෙතං, මහාරාජ, ථෙරෙන රාහුලෙන –
‘‘Puna caparaṃ, mahārāja, bāḷisiko parittakaṃ vadhitvā vipulaṃ lābhamadhigacchati, evameva kho, mahārāja, yoginā yogāvacarena parittalokāmisamattaṃ pariccajitabbaṃ. Lokāmisamattaṃ, mahārāja, pariccajitvā yogī yogāvacaro vipulaṃ sāmaññaphalaṃ adhigacchati. Idaṃ, mahārāja, bāḷisikassa dutiyaṃ aṅgaṃ gahetabbaṃ. Bhāsitampetaṃ, mahārāja, therena rāhulena –
‘‘‘සුඤ්‌ඤතඤ්‌චානිමිත්‌තඤ්‌ච, විමොක්‌ඛඤ්‌චාප්‌පණිහිතං;
‘‘‘Suññatañcānimittañca, vimokkhañcāppaṇihitaṃ;
චතුරො ඵලෙ ඡළභිඤ්‌ඤා, චජිත්‌වා ලොකාමිසං ලභෙ’’’ති.
Caturo phale chaḷabhiññā, cajitvā lokāmisaṃ labhe’’’ti.
බාළිසිකඞ්‌ගපඤ්‌හො නවමො.
Bāḷisikaṅgapañho navamo.
