| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
3. பா³ளிஸிகோபமஸுத்தங்
3. Bāḷisikopamasuttaṃ
230. ‘‘ஸெய்யதா²பி, பி⁴க்க²வே, பா³ளிஸிகோ ஆமிஸக³தப³ளிஸங் க³ம்பீ⁴ரே உத³கரஹதே³ பக்கி²பெய்ய. தமேனங் அஞ்ஞதரோ ஆமிஸசக்கு² மச்சோ² கி³லெய்ய. ஏவஞ்ஹி ஸோ, பி⁴க்க²வே, மச்சோ² கி³லிதப³ளிஸோ பா³ளிஸிகஸ்ஸ அனயங் ஆபன்னோ ப்³யஸனங் ஆபன்னோ யதா²காமகரணீயோ பா³ளிஸிகஸ்ஸ.
230. ‘‘Seyyathāpi, bhikkhave, bāḷisiko āmisagatabaḷisaṃ gambhīre udakarahade pakkhipeyya. Tamenaṃ aññataro āmisacakkhu maccho gileyya. Evañhi so, bhikkhave, maccho gilitabaḷiso bāḷisikassa anayaṃ āpanno byasanaṃ āpanno yathākāmakaraṇīyo bāḷisikassa.
ஏவமேவ கோ², பி⁴க்க²வே, ச²யிமே ப³ளிஸா லோகஸ்மிங் அனயாய ஸத்தானங் வதா⁴ய 1 பாணினங். கதமே ச²? ஸந்தி, பி⁴க்க²வே, சக்கு²விஞ்ஞெய்யா ரூபா இட்டா² கந்தா மனாபா பியரூபா காமூபஸங்ஹிதா ரஜனீயா. தஞ்சே, பி⁴க்கு², அபி⁴னந்த³தி அபி⁴வத³தி அஜ்ஜோ²ஸாய திட்ட²தி. அயங் வுச்சதி, பி⁴க்க²வே, பி⁴க்கு² கி³லிதப³ளிஸோ, மாரஸ்ஸ அனயங் ஆபன்னோ ப்³யஸனங் ஆபன்னோ யதா²காமகரணீயோ பாபிமதோ…பே॰… ஸந்தி, பி⁴க்க²வே, ஜிவ்ஹாவிஞ்ஞெய்யா ரஸா…பே॰….
Evameva kho, bhikkhave, chayime baḷisā lokasmiṃ anayāya sattānaṃ vadhāya 2 pāṇinaṃ. Katame cha? Santi, bhikkhave, cakkhuviññeyyā rūpā iṭṭhā kantā manāpā piyarūpā kāmūpasaṃhitā rajanīyā. Tañce, bhikkhu, abhinandati abhivadati ajjhosāya tiṭṭhati. Ayaṃ vuccati, bhikkhave, bhikkhu gilitabaḷiso, mārassa anayaṃ āpanno byasanaṃ āpanno yathākāmakaraṇīyo pāpimato…pe… santi, bhikkhave, jivhāviññeyyā rasā…pe….
ஸந்தி, பி⁴க்க²வே, மனோவிஞ்ஞெய்யா த⁴ம்மா இட்டா² கந்தா மனாபா பியரூபா காமூபஸங்ஹிதா ரஜனீயா. தஞ்சே, பி⁴க்கு², அபி⁴னந்த³தி அபி⁴வத³தி அஜ்ஜோ²ஸாய திட்ட²தி. அயங் வுச்சதி, பி⁴க்க²வே, பி⁴க்கு² கி³லிதப³ளிஸோ மாரஸ்ஸ அனயங் ஆபன்னோ ப்³யஸனங் ஆபன்னோ யதா²காமகரணீயோ பாபிமதோ.
Santi, bhikkhave, manoviññeyyā dhammā iṭṭhā kantā manāpā piyarūpā kāmūpasaṃhitā rajanīyā. Tañce, bhikkhu, abhinandati abhivadati ajjhosāya tiṭṭhati. Ayaṃ vuccati, bhikkhave, bhikkhu gilitabaḷiso mārassa anayaṃ āpanno byasanaṃ āpanno yathākāmakaraṇīyo pāpimato.
‘‘ஸந்தி ச, பி⁴க்க²வே, சக்கு²விஞ்ஞெய்யா ரூபா இட்டா² கந்தா மனாபா பியரூபா காமூபஸங்ஹிதா ரஜனீயா. தஞ்சே பி⁴க்கு² நாபி⁴னந்த³தி நாபி⁴வத³தி நாஜ்ஜோ²ஸாய திட்ட²தி. அயங் வுச்சதி, பி⁴க்க²வே, பி⁴க்கு² ந கி³லிதப³ளிஸோ மாரஸ்ஸ அபே⁴தி³ ப³ளிஸங் பரிபே⁴தி³ ப³ளிஸங் ந அனயங் ஆபன்னோ ந ப்³யஸனங் ஆபன்னோ ந யதா²காமகரணீயோ பாபிமதோ…பே॰….
‘‘Santi ca, bhikkhave, cakkhuviññeyyā rūpā iṭṭhā kantā manāpā piyarūpā kāmūpasaṃhitā rajanīyā. Tañce bhikkhu nābhinandati nābhivadati nājjhosāya tiṭṭhati. Ayaṃ vuccati, bhikkhave, bhikkhu na gilitabaḷiso mārassa abhedi baḷisaṃ paribhedi baḷisaṃ na anayaṃ āpanno na byasanaṃ āpanno na yathākāmakaraṇīyo pāpimato…pe….
‘‘ஸந்தி , பி⁴க்க²வே, ஜிவ்ஹாவிஞ்ஞெய்யா ரஸா…பே॰…. ஸந்தி, பி⁴க்க²வே, மனோவிஞ்ஞெய்யா த⁴ம்மா இட்டா² கந்தா மனாபா பியரூபா காமூபஸங்ஹிதா ரஜனீயா. தஞ்சே பி⁴க்கு² நாபி⁴னந்த³தி நாபி⁴வத³தி நாஜ்ஜோ²ஸாய திட்ட²தி, அயங் வுச்சதி, பி⁴க்க²வே, பி⁴க்கு² ந கி³லிதப³ளிஸோ மாரஸ்ஸ அபே⁴தி³ ப³ளிஸங் பரிபே⁴தி³ ப³ளிஸங் ந அனயங் ஆபன்னோ ந ப்³யஸனங் ஆபன்னோ ந யதா²காமகரணீயோ பாபிமதோ’’தி. ததியங்.
‘‘Santi , bhikkhave, jivhāviññeyyā rasā…pe…. Santi, bhikkhave, manoviññeyyā dhammā iṭṭhā kantā manāpā piyarūpā kāmūpasaṃhitā rajanīyā. Tañce bhikkhu nābhinandati nābhivadati nājjhosāya tiṭṭhati, ayaṃ vuccati, bhikkhave, bhikkhu na gilitabaḷiso mārassa abhedi baḷisaṃ paribhedi baḷisaṃ na anayaṃ āpanno na byasanaṃ āpanno na yathākāmakaraṇīyo pāpimato’’ti. Tatiyaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 2-3. து³தியஸமுத்³த³ஸுத்தாதி³வண்ணனா • 2-3. Dutiyasamuddasuttādivaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 2-3. து³தியஸமுத்³த³ஸுத்தாதி³வண்ணனா • 2-3. Dutiyasamuddasuttādivaṇṇanā
