| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৩. বাল়িসিকোপমসুত্তং
3. Bāḷisikopamasuttaṃ
২৩০. ‘‘সেয্যথাপি, ভিক্খৰে, বাল়িসিকো আমিসগতবল়িসং গম্ভীরে উদকরহদে পক্খিপেয্য। তমেনং অঞ্ঞতরো আমিসচক্খু মচ্ছো গিলেয্য। এৰঞ্হি সো, ভিক্খৰে, মচ্ছো গিলিতবল়িসো বাল়িসিকস্স অনযং আপন্নো ব্যসনং আপন্নো যথাকামকরণীযো বাল়িসিকস্স।
230. ‘‘Seyyathāpi, bhikkhave, bāḷisiko āmisagatabaḷisaṃ gambhīre udakarahade pakkhipeyya. Tamenaṃ aññataro āmisacakkhu maccho gileyya. Evañhi so, bhikkhave, maccho gilitabaḷiso bāḷisikassa anayaṃ āpanno byasanaṃ āpanno yathākāmakaraṇīyo bāḷisikassa.
এৰমেৰ খো, ভিক্খৰে, ছযিমে বল়িসা লোকস্মিং অনযায সত্তানং ৰধায 1 পাণিনং। কতমে ছ? সন্তি, ভিক্খৰে, চক্খুৰিঞ্ঞেয্যা রূপা ইট্ঠা কন্তা মনাপা পিযরূপা কামূপসংহিতা রজনীযা। তঞ্চে, ভিক্খু, অভিনন্দতি অভিৰদতি অজ্ঝোসায তিট্ঠতি। অযং ৰুচ্চতি, ভিক্খৰে, ভিক্খু গিলিতবল়িসো, মারস্স অনযং আপন্নো ব্যসনং আপন্নো যথাকামকরণীযো পাপিমতো…পে॰… সন্তি, ভিক্খৰে, জিৰ্হাৰিঞ্ঞেয্যা রসা…পে॰…।
Evameva kho, bhikkhave, chayime baḷisā lokasmiṃ anayāya sattānaṃ vadhāya 2 pāṇinaṃ. Katame cha? Santi, bhikkhave, cakkhuviññeyyā rūpā iṭṭhā kantā manāpā piyarūpā kāmūpasaṃhitā rajanīyā. Tañce, bhikkhu, abhinandati abhivadati ajjhosāya tiṭṭhati. Ayaṃ vuccati, bhikkhave, bhikkhu gilitabaḷiso, mārassa anayaṃ āpanno byasanaṃ āpanno yathākāmakaraṇīyo pāpimato…pe… santi, bhikkhave, jivhāviññeyyā rasā…pe….
সন্তি, ভিক্খৰে, মনোৰিঞ্ঞেয্যা ধম্মা ইট্ঠা কন্তা মনাপা পিযরূপা কামূপসংহিতা রজনীযা। তঞ্চে, ভিক্খু, অভিনন্দতি অভিৰদতি অজ্ঝোসায তিট্ঠতি। অযং ৰুচ্চতি, ভিক্খৰে, ভিক্খু গিলিতবল়িসো মারস্স অনযং আপন্নো ব্যসনং আপন্নো যথাকামকরণীযো পাপিমতো।
Santi, bhikkhave, manoviññeyyā dhammā iṭṭhā kantā manāpā piyarūpā kāmūpasaṃhitā rajanīyā. Tañce, bhikkhu, abhinandati abhivadati ajjhosāya tiṭṭhati. Ayaṃ vuccati, bhikkhave, bhikkhu gilitabaḷiso mārassa anayaṃ āpanno byasanaṃ āpanno yathākāmakaraṇīyo pāpimato.
‘‘সন্তি চ, ভিক্খৰে, চক্খুৰিঞ্ঞেয্যা রূপা ইট্ঠা কন্তা মনাপা পিযরূপা কামূপসংহিতা রজনীযা। তঞ্চে ভিক্খু নাভিনন্দতি নাভিৰদতি নাজ্ঝোসায তিট্ঠতি। অযং ৰুচ্চতি, ভিক্খৰে, ভিক্খু ন গিলিতবল়িসো মারস্স অভেদি বল়িসং পরিভেদি বল়িসং ন অনযং আপন্নো ন ব্যসনং আপন্নো ন যথাকামকরণীযো পাপিমতো…পে॰…।
‘‘Santi ca, bhikkhave, cakkhuviññeyyā rūpā iṭṭhā kantā manāpā piyarūpā kāmūpasaṃhitā rajanīyā. Tañce bhikkhu nābhinandati nābhivadati nājjhosāya tiṭṭhati. Ayaṃ vuccati, bhikkhave, bhikkhu na gilitabaḷiso mārassa abhedi baḷisaṃ paribhedi baḷisaṃ na anayaṃ āpanno na byasanaṃ āpanno na yathākāmakaraṇīyo pāpimato…pe….
‘‘সন্তি , ভিক্খৰে, জিৰ্হাৰিঞ্ঞেয্যা রসা…পে॰…। সন্তি, ভিক্খৰে, মনোৰিঞ্ঞেয্যা ধম্মা ইট্ঠা কন্তা মনাপা পিযরূপা কামূপসংহিতা রজনীযা। তঞ্চে ভিক্খু নাভিনন্দতি নাভিৰদতি নাজ্ঝোসায তিট্ঠতি, অযং ৰুচ্চতি, ভিক্খৰে, ভিক্খু ন গিলিতবল়িসো মারস্স অভেদি বল়িসং পরিভেদি বল়িসং ন অনযং আপন্নো ন ব্যসনং আপন্নো ন যথাকামকরণীযো পাপিমতো’’তি। ততিযং।
‘‘Santi , bhikkhave, jivhāviññeyyā rasā…pe…. Santi, bhikkhave, manoviññeyyā dhammā iṭṭhā kantā manāpā piyarūpā kāmūpasaṃhitā rajanīyā. Tañce bhikkhu nābhinandati nābhivadati nājjhosāya tiṭṭhati, ayaṃ vuccati, bhikkhave, bhikkhu na gilitabaḷiso mārassa abhedi baḷisaṃ paribhedi baḷisaṃ na anayaṃ āpanno na byasanaṃ āpanno na yathākāmakaraṇīyo pāpimato’’ti. Tatiyaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ২-৩. দুতিযসমুদ্দসুত্তাদিৰণ্ণনা • 2-3. Dutiyasamuddasuttādivaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ২-৩. দুতিযসমুদ্দসুত্তাদিৰণ্ণনা • 2-3. Dutiyasamuddasuttādivaṇṇanā
