| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
3. බාළිසිකොපමසුත්‌තං
3. Bāḷisikopamasuttaṃ
230. ‘‘සෙය්‍යථාපි, භික්‌ඛවෙ, බාළිසිකො ආමිසගතබළිසං ගම්‌භීරෙ උදකරහදෙ පක්‌ඛිපෙය්‍ය. තමෙනං අඤ්‌ඤතරො ආමිසචක්‌ඛු මච්‌ඡො ගිලෙය්‍ය. එවඤ්‌හි සො, භික්‌ඛවෙ, මච්‌ඡො ගිලිතබළිසො බාළිසිකස්‌ස අනයං ආපන්‌නො බ්‍යසනං ආපන්‌නො යථාකාමකරණීයො බාළිසිකස්‌ස.
230. ‘‘Seyyathāpi, bhikkhave, bāḷisiko āmisagatabaḷisaṃ gambhīre udakarahade pakkhipeyya. Tamenaṃ aññataro āmisacakkhu maccho gileyya. Evañhi so, bhikkhave, maccho gilitabaḷiso bāḷisikassa anayaṃ āpanno byasanaṃ āpanno yathākāmakaraṇīyo bāḷisikassa.
එවමෙව ඛො, භික්‌ඛවෙ, ඡයිමෙ බළිසා ලොකස්‌මිං අනයාය සත්‌තානං වධාය 1 පාණිනං. කතමෙ ඡ? සන්‌ති, භික්‌ඛවෙ, චක්‌ඛුවිඤ්‌ඤෙය්‍යා රූපා ඉට්‌ඨා කන්‌තා මනාපා පියරූපා කාමූපසංහිතා රජනීයා. තඤ්‌චෙ, භික්‌ඛු, අභිනන්‌දති අභිවදති අජ්‌ඣොසාය තිට්‌ඨති. අයං වුච්‌චති, භික්‌ඛවෙ, භික්‌ඛු ගිලිතබළිසො, මාරස්‌ස අනයං ආපන්‌නො බ්‍යසනං ආපන්‌නො යථාකාමකරණීයො පාපිමතො…පෙ.… සන්‌ති, භික්‌ඛවෙ, ජිව්‌හාවිඤ්‌ඤෙය්‍යා රසා…පෙ.….
Evameva kho, bhikkhave, chayime baḷisā lokasmiṃ anayāya sattānaṃ vadhāya 2 pāṇinaṃ. Katame cha? Santi, bhikkhave, cakkhuviññeyyā rūpā iṭṭhā kantā manāpā piyarūpā kāmūpasaṃhitā rajanīyā. Tañce, bhikkhu, abhinandati abhivadati ajjhosāya tiṭṭhati. Ayaṃ vuccati, bhikkhave, bhikkhu gilitabaḷiso, mārassa anayaṃ āpanno byasanaṃ āpanno yathākāmakaraṇīyo pāpimato…pe… santi, bhikkhave, jivhāviññeyyā rasā…pe….
සන්‌ති, භික්‌ඛවෙ, මනොවිඤ්‌ඤෙය්‍යා ධම්‌මා ඉට්‌ඨා කන්‌තා මනාපා පියරූපා කාමූපසංහිතා රජනීයා. තඤ්‌චෙ, භික්‌ඛු, අභිනන්‌දති අභිවදති අජ්‌ඣොසාය තිට්‌ඨති. අයං වුච්‌චති, භික්‌ඛවෙ, භික්‌ඛු ගිලිතබළිසො මාරස්‌ස අනයං ආපන්‌නො බ්‍යසනං ආපන්‌නො යථාකාමකරණීයො පාපිමතො.
Santi, bhikkhave, manoviññeyyā dhammā iṭṭhā kantā manāpā piyarūpā kāmūpasaṃhitā rajanīyā. Tañce, bhikkhu, abhinandati abhivadati ajjhosāya tiṭṭhati. Ayaṃ vuccati, bhikkhave, bhikkhu gilitabaḷiso mārassa anayaṃ āpanno byasanaṃ āpanno yathākāmakaraṇīyo pāpimato.
‘‘සන්‌ති ච, භික්‌ඛවෙ, චක්‌ඛුවිඤ්‌ඤෙය්‍යා රූපා ඉට්‌ඨා කන්‌තා මනාපා පියරූපා කාමූපසංහිතා රජනීයා. තඤ්‌චෙ භික්‌ඛු නාභිනන්‌දති නාභිවදති නාජ්‌ඣොසාය තිට්‌ඨති. අයං වුච්‌චති, භික්‌ඛවෙ, භික්‌ඛු න ගිලිතබළිසො මාරස්‌ස අභෙදි බළිසං පරිභෙදි බළිසං න අනයං ආපන්‌නො න බ්‍යසනං ආපන්‌නො න යථාකාමකරණීයො පාපිමතො…පෙ.….
‘‘Santi ca, bhikkhave, cakkhuviññeyyā rūpā iṭṭhā kantā manāpā piyarūpā kāmūpasaṃhitā rajanīyā. Tañce bhikkhu nābhinandati nābhivadati nājjhosāya tiṭṭhati. Ayaṃ vuccati, bhikkhave, bhikkhu na gilitabaḷiso mārassa abhedi baḷisaṃ paribhedi baḷisaṃ na anayaṃ āpanno na byasanaṃ āpanno na yathākāmakaraṇīyo pāpimato…pe….
‘‘සන්‌ති , භික්‌ඛවෙ, ජිව්‌හාවිඤ්‌ඤෙය්‍යා රසා…පෙ.…. සන්‌ති, භික්‌ඛවෙ, මනොවිඤ්‌ඤෙය්‍යා ධම්‌මා ඉට්‌ඨා කන්‌තා මනාපා පියරූපා කාමූපසංහිතා රජනීයා. තඤ්‌චෙ භික්‌ඛු නාභිනන්‌දති නාභිවදති නාජ්‌ඣොසාය තිට්‌ඨති, අයං වුච්‌චති, භික්‌ඛවෙ, භික්‌ඛු න ගිලිතබළිසො මාරස්‌ස අභෙදි බළිසං පරිභෙදි බළිසං න අනයං ආපන්‌නො න බ්‍යසනං ආපන්‌නො න යථාකාමකරණීයො පාපිමතො’’ති. තතියං.
‘‘Santi , bhikkhave, jivhāviññeyyā rasā…pe…. Santi, bhikkhave, manoviññeyyā dhammā iṭṭhā kantā manāpā piyarūpā kāmūpasaṃhitā rajanīyā. Tañce bhikkhu nābhinandati nābhivadati nājjhosāya tiṭṭhati, ayaṃ vuccati, bhikkhave, bhikkhu na gilitabaḷiso mārassa abhedi baḷisaṃ paribhedi baḷisaṃ na anayaṃ āpanno na byasanaṃ āpanno na yathākāmakaraṇīyo pāpimato’’ti. Tatiyaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 2-3. දුතියසමුද්‌දසුත්‌තාදිවණ්‌ණනා • 2-3. Dutiyasamuddasuttādivaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 2-3. දුතියසමුද්‌දසුත්‌තාදිවණ්‌ණනා • 2-3. Dutiyasamuddasuttādivaṇṇanā
