| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ • Saṃyuttanikāya |
༣. བཱལི༹སིཀོཔམསུཏྟཾ
3. Bāḷisikopamasuttaṃ
༢༣༠. ‘‘སེཡྻཐཱཔི, བྷིཀྑཝེ, བཱལི༹སིཀོ ཨཱམིསགཏབལི༹སཾ གམྦྷཱིརེ ཨུདཀརཧདེ པཀྑིཔེཡྻ། ཏམེནཾ ཨཉྙཏརོ ཨཱམིསཙཀྑུ མཙྪོ གིལེཡྻ། ཨེཝཉྷི སོ, བྷིཀྑཝེ, མཙྪོ གིལིཏབལི༹སོ བཱལི༹སིཀསྶ ཨནཡཾ ཨཱཔནྣོ བྱསནཾ ཨཱཔནྣོ ཡཐཱཀཱམཀརཎཱིཡོ བཱལི༹སིཀསྶ།
230. ‘‘Seyyathāpi, bhikkhave, bāḷisiko āmisagatabaḷisaṃ gambhīre udakarahade pakkhipeyya. Tamenaṃ aññataro āmisacakkhu maccho gileyya. Evañhi so, bhikkhave, maccho gilitabaḷiso bāḷisikassa anayaṃ āpanno byasanaṃ āpanno yathākāmakaraṇīyo bāḷisikassa.
ཨེཝམེཝ ཁོ, བྷིཀྑཝེ, ཚཡིམེ བལི༹སཱ ལོཀསྨིཾ ཨནཡཱཡ སཏྟཱནཾ ཝདྷཱཡ 1 པཱཎིནཾ། ཀཏམེ ཚ? སནྟི, བྷིཀྑཝེ, ཙཀྑུཝིཉྙེཡྻཱ རཱུཔཱ ཨིཊྛཱ ཀནྟཱ མནཱཔཱ པིཡརཱུཔཱ ཀཱམཱུཔསཾཧིཏཱ རཛནཱིཡཱ། ཏཉྩེ, བྷིཀྑུ, ཨབྷིནནྡཏི ཨབྷིཝདཏི ཨཛ྄ཛྷོསཱཡ ཏིཊྛཏི། ཨཡཾ ཝུཙྩཏི, བྷིཀྑཝེ, བྷིཀྑུ གིལིཏབལི༹སོ, མཱརསྶ ཨནཡཾ ཨཱཔནྣོ བྱསནཾ ཨཱཔནྣོ ཡཐཱཀཱམཀརཎཱིཡོ པཱཔིམཏོ…པེ॰… སནྟི, བྷིཀྑཝེ, ཛིཝ྄ཧཱཝིཉྙེཡྻཱ རསཱ…པེ॰…།
Evameva kho, bhikkhave, chayime baḷisā lokasmiṃ anayāya sattānaṃ vadhāya 2 pāṇinaṃ. Katame cha? Santi, bhikkhave, cakkhuviññeyyā rūpā iṭṭhā kantā manāpā piyarūpā kāmūpasaṃhitā rajanīyā. Tañce, bhikkhu, abhinandati abhivadati ajjhosāya tiṭṭhati. Ayaṃ vuccati, bhikkhave, bhikkhu gilitabaḷiso, mārassa anayaṃ āpanno byasanaṃ āpanno yathākāmakaraṇīyo pāpimato…pe… santi, bhikkhave, jivhāviññeyyā rasā…pe….
སནྟི, བྷིཀྑཝེ, མནོཝིཉྙེཡྻཱ དྷམྨཱ ཨིཊྛཱ ཀནྟཱ མནཱཔཱ པིཡརཱུཔཱ ཀཱམཱུཔསཾཧིཏཱ རཛནཱིཡཱ། ཏཉྩེ, བྷིཀྑུ, ཨབྷིནནྡཏི ཨབྷིཝདཏི ཨཛ྄ཛྷོསཱཡ ཏིཊྛཏི། ཨཡཾ ཝུཙྩཏི, བྷིཀྑཝེ, བྷིཀྑུ གིལིཏབལི༹སོ མཱརསྶ ཨནཡཾ ཨཱཔནྣོ བྱསནཾ ཨཱཔནྣོ ཡཐཱཀཱམཀརཎཱིཡོ པཱཔིམཏོ།
Santi, bhikkhave, manoviññeyyā dhammā iṭṭhā kantā manāpā piyarūpā kāmūpasaṃhitā rajanīyā. Tañce, bhikkhu, abhinandati abhivadati ajjhosāya tiṭṭhati. Ayaṃ vuccati, bhikkhave, bhikkhu gilitabaḷiso mārassa anayaṃ āpanno byasanaṃ āpanno yathākāmakaraṇīyo pāpimato.
‘‘སནྟི ཙ, བྷིཀྑཝེ, ཙཀྑུཝིཉྙེཡྻཱ རཱུཔཱ ཨིཊྛཱ ཀནྟཱ མནཱཔཱ པིཡརཱུཔཱ ཀཱམཱུཔསཾཧིཏཱ རཛནཱིཡཱ། ཏཉྩེ བྷིཀྑུ ནཱབྷིནནྡཏི ནཱབྷིཝདཏི ནཱཛ྄ཛྷོསཱཡ ཏིཊྛཏི། ཨཡཾ ཝུཙྩཏི, བྷིཀྑཝེ, བྷིཀྑུ ན གིལིཏབལི༹སོ མཱརསྶ ཨབྷེདི བལི༹སཾ པརིབྷེདི བལི༹སཾ ན ཨནཡཾ ཨཱཔནྣོ ན བྱསནཾ ཨཱཔནྣོ ན ཡཐཱཀཱམཀརཎཱིཡོ པཱཔིམཏོ…པེ॰…།
‘‘Santi ca, bhikkhave, cakkhuviññeyyā rūpā iṭṭhā kantā manāpā piyarūpā kāmūpasaṃhitā rajanīyā. Tañce bhikkhu nābhinandati nābhivadati nājjhosāya tiṭṭhati. Ayaṃ vuccati, bhikkhave, bhikkhu na gilitabaḷiso mārassa abhedi baḷisaṃ paribhedi baḷisaṃ na anayaṃ āpanno na byasanaṃ āpanno na yathākāmakaraṇīyo pāpimato…pe….
‘‘སནྟི , བྷིཀྑཝེ, ཛིཝ྄ཧཱཝིཉྙེཡྻཱ རསཱ…པེ॰…། སནྟི, བྷིཀྑཝེ, མནོཝིཉྙེཡྻཱ དྷམྨཱ ཨིཊྛཱ ཀནྟཱ མནཱཔཱ པིཡརཱུཔཱ ཀཱམཱུཔསཾཧིཏཱ རཛནཱིཡཱ། ཏཉྩེ བྷིཀྑུ ནཱབྷིནནྡཏི ནཱབྷིཝདཏི ནཱཛ྄ཛྷོསཱཡ ཏིཊྛཏི, ཨཡཾ ཝུཙྩཏི, བྷིཀྑཝེ, བྷིཀྑུ ན གིལིཏབལི༹སོ མཱརསྶ ཨབྷེདི བལི༹སཾ པརིབྷེདི བལི༹སཾ ན ཨནཡཾ ཨཱཔནྣོ ན བྱསནཾ ཨཱཔནྣོ ན ཡཐཱཀཱམཀརཎཱིཡོ པཱཔིམཏོ’’ཏི། ཏཏིཡཾ།
‘‘Santi , bhikkhave, jivhāviññeyyā rasā…pe…. Santi, bhikkhave, manoviññeyyā dhammā iṭṭhā kantā manāpā piyarūpā kāmūpasaṃhitā rajanīyā. Tañce bhikkhu nābhinandati nābhivadati nājjhosāya tiṭṭhati, ayaṃ vuccati, bhikkhave, bhikkhu na gilitabaḷiso mārassa abhedi baḷisaṃ paribhedi baḷisaṃ na anayaṃ āpanno na byasanaṃ āpanno na yathākāmakaraṇīyo pāpimato’’ti. Tatiyaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༢-༣. དུཏིཡསམུདྡསུཏྟཱདིཝཎྞནཱ • 2-3. Dutiyasamuddasuttādivaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) / ༢-༣. དུཏིཡསམུདྡསུཏྟཱདིཝཎྞནཱ • 2-3. Dutiyasamuddasuttādivaṇṇanā
