| Library / Tipiṭaka / திபிடக • Tipiṭaka / ஜாதக-அட்ட²கதா² • Jātaka-aṭṭhakathā |
[246] 6. பா³லோவாத³ஜாதகவண்ணனா
[246] 6. Bālovādajātakavaṇṇanā
ஹந்த்வா செ²த்வா வதி⁴த்வா சாதி இத³ங் ஸத்தா² வேஸாலிங் உபனிஸ்ஸாய கூடாகா³ரஸாலாயங் விஹரந்தோ ஸீஹஸேனாபதிங் ஆரப்³ப⁴ கதே²ஸி. ஸோ ஹி ப⁴க³வந்தங் ஸரணங் க³ந்த்வா நிமந்தெத்வா புனதி³வஸே ஸமங்ஸகப⁴த்தங் அதா³ஸி. நிக³ண்டா² தங் ஸுத்வா குபிதா அனத்தமனா ததா²க³தங் விஹேடே²துகாமா ‘‘ஸமணோ கோ³தமோ ஜானங் உத்³தி³ஸ்ஸகதங் மங்ஸங் பு⁴ஞ்ஜதீ’’தி அக்கோஸிங்ஸு. பி⁴க்கூ² த⁴ம்மஸபா⁴யங் கத²ங் ஸமுட்டா²பேஸுங் – ‘‘ஆவுஸோ, நிக³ண்டோ² நாடபுத்தோ ‘ஸமணோ கோ³தமோ ஜானங் உத்³தி³ஸ்ஸகதங் மங்ஸங் பு⁴ஞ்ஜதீ’தி ஸத்³தி⁴ங் பரிஸாய அக்கோஸந்தோ ஆஹிண்ட³தீ’’தி. தங் ஸுத்வா ஸத்தா² ‘‘ந, பி⁴க்க²வே, நிக³ண்டோ² நாடபுத்தோ இதா³னேவ மங் உத்³தி³ஸ்ஸகதமங்ஸகா²த³னேன க³ரஹதி, புப்³பே³பி க³ரஹியேவா’’தி வத்வா அதீதங் ஆஹரி.
Hantvāchetvā vadhitvā cāti idaṃ satthā vesāliṃ upanissāya kūṭāgārasālāyaṃ viharanto sīhasenāpatiṃ ārabbha kathesi. So hi bhagavantaṃ saraṇaṃ gantvā nimantetvā punadivase samaṃsakabhattaṃ adāsi. Nigaṇṭhā taṃ sutvā kupitā anattamanā tathāgataṃ viheṭhetukāmā ‘‘samaṇo gotamo jānaṃ uddissakataṃ maṃsaṃ bhuñjatī’’ti akkosiṃsu. Bhikkhū dhammasabhāyaṃ kathaṃ samuṭṭhāpesuṃ – ‘‘āvuso, nigaṇṭho nāṭaputto ‘samaṇo gotamo jānaṃ uddissakataṃ maṃsaṃ bhuñjatī’ti saddhiṃ parisāya akkosanto āhiṇḍatī’’ti. Taṃ sutvā satthā ‘‘na, bhikkhave, nigaṇṭho nāṭaputto idāneva maṃ uddissakatamaṃsakhādanena garahati, pubbepi garahiyevā’’ti vatvā atītaṃ āhari.
அதீதே பா³ராணஸியங் ப்³ரஹ்மத³த்தே ரஜ்ஜங் காரெந்தே போ³தி⁴ஸத்தோ ப்³ராஹ்மணகுலே நிப்³ப³த்தித்வா வயப்பத்தோ இஸிபப்³ப³ஜ்ஜங் பப்³ப³ஜித்வா லோணம்பி³லஸேவனத்தா²ய ஹிமவந்ததோ பா³ராணஸிங் க³ந்த்வா புனதி³வஸே நக³ரங் பி⁴க்கா²ய பாவிஸி. அதே²கோ குடும்பி³கோ ‘‘தாபஸங் விஹேடெ²ஸ்ஸாமீ’’தி க⁴ரங் பவேஸெத்வா பஞ்ஞத்தாஸனே நிஸீதா³பெத்வா மச்ச²மங்ஸேன பரிவிஸித்வா ப⁴த்தகிச்சாவஸானே ஏகமந்தங் நிஸீதி³த்வா ‘‘இமங் மங்ஸங் தும்ஹேயேவ உத்³தி³ஸ்ஸ பாணே மாரெத்வா கதங், இத³ங் அகுஸலங் மா அம்ஹாகமேவ, தும்ஹாகம்பி ஹோதூ’’தி வத்வா பட²மங் கா³த²மாஹ –
Atīte bārāṇasiyaṃ brahmadatte rajjaṃ kārente bodhisatto brāhmaṇakule nibbattitvā vayappatto isipabbajjaṃ pabbajitvā loṇambilasevanatthāya himavantato bārāṇasiṃ gantvā punadivase nagaraṃ bhikkhāya pāvisi. Atheko kuṭumbiko ‘‘tāpasaṃ viheṭhessāmī’’ti gharaṃ pavesetvā paññattāsane nisīdāpetvā macchamaṃsena parivisitvā bhattakiccāvasāne ekamantaṃ nisīditvā ‘‘imaṃ maṃsaṃ tumheyeva uddissa pāṇe māretvā kataṃ, idaṃ akusalaṃ mā amhākameva, tumhākampi hotū’’ti vatvā paṭhamaṃ gāthamāha –
192.
192.
‘‘ஹந்த்வா செ²த்வா வதி⁴த்வா ச, தே³தி தா³னங் அஸஞ்ஞதோ;
‘‘Hantvā chetvā vadhitvā ca, deti dānaṃ asaññato;
ஏதி³ஸங் ப⁴த்தங் பு⁴ஞ்ஜமானோ, ஸ பாபேன உபலிப்பதீ’’தி.
Edisaṃ bhattaṃ bhuñjamāno, sa pāpena upalippatī’’ti.
தத்த² ஹந்த்வாதி பஹரித்வா. செ²த்வாதி கிலமெத்வா. வதி⁴த்வாதி மாரெத்வா. தே³தி தா³னங் அஸஞ்ஞதோதி அஸஞ்ஞதோ து³ஸ்ஸீலோ ஏவங் கத்வா தா³னங் தே³தி. ஏதி³ஸங் ப⁴த்தங் பு⁴ஞ்ஜமானோ, ஸ பாபேன உபலிப்பதீதி ஏதி³ஸங் உத்³தி³ஸ்ஸகதப⁴த்தங் பு⁴ஞ்ஜமானோ ஸோ ஸமணோபி பாபேன உபலிப்பதி ஸங்யுஜ்ஜதியேவாதி.
Tattha hantvāti paharitvā. Chetvāti kilametvā. Vadhitvāti māretvā. Deti dānaṃ asaññatoti asaññato dussīlo evaṃ katvā dānaṃ deti. Edisaṃ bhattaṃ bhuñjamāno, sa pāpena upalippatīti edisaṃ uddissakatabhattaṃ bhuñjamāno so samaṇopi pāpena upalippati saṃyujjatiyevāti.
தங் ஸுத்வா போ³தி⁴ஸத்தோ து³தியங் கா³த²மாஹ –
Taṃ sutvā bodhisatto dutiyaṃ gāthamāha –
193.
193.
‘‘புத்ததா³ரம்பி சே ஹந்த்வா, தே³தி தா³னங் அஸஞ்ஞதோ;
‘‘Puttadārampi ce hantvā, deti dānaṃ asaññato;
பு⁴ஞ்ஜமானோபி ஸப்பஞ்ஞோ, ந பாபேன உபலிப்பதீ’’தி.
Bhuñjamānopi sappañño, na pāpena upalippatī’’ti.
தத்த² பு⁴ஞ்ஜமானோபி ஸப்பஞ்ஞோதி திட்ட²து அஞ்ஞங் மங்ஸங், புத்ததா³ரங் வதி⁴த்வாபி து³ஸ்ஸீலேன தி³ன்னங் ஸப்பஞ்ஞோ க²ந்திமெத்தாதி³கு³ணஸம்பன்னோ தங் பு⁴ஞ்ஜமானோபி பாபேன ந உபலிப்பதீதி. ஏவமஸ்ஸ போ³தி⁴ஸத்தோ த⁴ம்மங் கதெ²த்வா உட்டா²யாஸனா பக்காமி.
Tattha bhuñjamānopi sappaññoti tiṭṭhatu aññaṃ maṃsaṃ, puttadāraṃ vadhitvāpi dussīlena dinnaṃ sappañño khantimettādiguṇasampanno taṃ bhuñjamānopi pāpena na upalippatīti. Evamassa bodhisatto dhammaṃ kathetvā uṭṭhāyāsanā pakkāmi.
ஸத்தா² இமங் த⁴ம்மதே³ஸனங் ஆஹரித்வா ஜாதகங் ஸமோதா⁴னேஸி – ‘‘ததா³ குடும்பி³கோ நிக³ண்டோ² நாடபுத்தோ அஹோஸி, தாபஸோ பன அஹமேவ அஹோஸி’’ந்தி.
Satthā imaṃ dhammadesanaṃ āharitvā jātakaṃ samodhānesi – ‘‘tadā kuṭumbiko nigaṇṭho nāṭaputto ahosi, tāpaso pana ahameva ahosi’’nti.
பா³லோவாத³ஜாதகவண்ணனா ச²ட்டா².
Bālovādajātakavaṇṇanā chaṭṭhā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / ஜாதகபாளி • Jātakapāḷi / 246. பா³லோவாத³ஜாதகங் • 246. Bālovādajātakaṃ
