| Library / Tipiṭaka / திபிடக • Tipiṭaka / ஜாதக-அட்ட²கதா² • Jātaka-aṭṭhakathā |
6. நதங்த³ள்ஹவக்³கோ³
6. Nataṃdaḷhavaggo
[201] 1. ப³ந்த⁴னாகா³ரஜாதகவண்ணனா
[201] 1. Bandhanāgārajātakavaṇṇanā
ந தங் த³ள்ஹங் ப³ந்த⁴னமாஹு தீ⁴ராதி இத³ங் ஸத்தா² ஜேதவனே விஹரந்தோ ப³ந்த⁴னாகா³ரங் ஆரப்³ப⁴ கதே²ஸி. தஸ்மிங் கிர காலே ப³ஹூ ஸந்தி⁴ச்சே²த³கபந்த²கா⁴தகசோரே ஆனெத்வா கோஸலரஞ்ஞோ த³ஸ்ஸேஸுங். தே ராஜா அத்³து³ப³ந்த⁴னரஜ்ஜுப³ந்த⁴னஸங்க²லிகப³ந்த⁴னேஹி ப³ந்தா⁴பேஸி. திங்ஸமத்தா ஜானபதா³ பி⁴க்கூ² ஸத்தா²ரங் த³ட்டு²காமா ஆக³ந்த்வா தி³ஸ்வா வந்தி³த்வா புனதி³வஸே பிண்டா³ய சரந்தா ப³ந்த⁴னாகா³ரங் க³ந்த்வா தே சோரே தி³ஸ்வா பிண்ட³பாதபடிக்கந்தா ஸாயன்ஹஸமயே ததா²க³தங் உபஸங்கமித்வா ‘‘ப⁴ந்தே, அஜ்ஜ அம்ஹேஹி பிண்டா³ய சரந்தேஹி ப³ந்த⁴னாகா³ரே ப³ஹூ சோரா அத்³து³ப³ந்த⁴னாதீ³ஹி ப³த்³தா⁴ மஹாது³க்க²ங் அனுப⁴வந்தா தி³ட்டா², தே தானி ப³ந்த⁴னானி சி²ந்தி³த்வா பலாயிதுங் ந ஸக்கொந்தி, அத்தி² நு கோ² தேஹி ப³ந்த⁴னேஹி தி²ரதரங் நாம அஞ்ஞங் ப³ந்த⁴ன’’ந்தி புச்சி²ங்ஸு. ஸத்தா² ‘‘பி⁴க்க²வே, கிங் ப³ந்த⁴னானி நாமேதானி, யங் பனேதங் த⁴னத⁴ஞ்ஞபுத்ததா³ராதீ³ஸு தண்ஹாஸங்கா²தங் கிலேஸப³ந்த⁴னங், ஏதங் ஏதேஹி ப³ந்த⁴னேஹி ஸதகு³ணேன ஸஹஸ்ஸகு³ணேன தி²ரதரங், ஏவங் மஹந்தம்பி பனேதங் து³ச்சி²ந்த³னியங் ப³ந்த⁴னங் போராணகபண்டி³தா சி²ந்தி³த்வா ஹிமவந்தங் பவிஸித்வா பப்³ப³ஜிங்ஸூ’’தி வத்வா அதீதங் ஆஹரி.
Nataṃ daḷhaṃ bandhanamāhu dhīrāti idaṃ satthā jetavane viharanto bandhanāgāraṃ ārabbha kathesi. Tasmiṃ kira kāle bahū sandhicchedakapanthaghātakacore ānetvā kosalarañño dassesuṃ. Te rājā addubandhanarajjubandhanasaṅkhalikabandhanehi bandhāpesi. Tiṃsamattā jānapadā bhikkhū satthāraṃ daṭṭhukāmā āgantvā disvā vanditvā punadivase piṇḍāya carantā bandhanāgāraṃ gantvā te core disvā piṇḍapātapaṭikkantā sāyanhasamaye tathāgataṃ upasaṅkamitvā ‘‘bhante, ajja amhehi piṇḍāya carantehi bandhanāgāre bahū corā addubandhanādīhi baddhā mahādukkhaṃ anubhavantā diṭṭhā, te tāni bandhanāni chinditvā palāyituṃ na sakkonti, atthi nu kho tehi bandhanehi thirataraṃ nāma aññaṃ bandhana’’nti pucchiṃsu. Satthā ‘‘bhikkhave, kiṃ bandhanāni nāmetāni, yaṃ panetaṃ dhanadhaññaputtadārādīsu taṇhāsaṅkhātaṃ kilesabandhanaṃ, etaṃ etehi bandhanehi sataguṇena sahassaguṇena thirataraṃ, evaṃ mahantampi panetaṃ ducchindaniyaṃ bandhanaṃ porāṇakapaṇḍitā chinditvā himavantaṃ pavisitvā pabbajiṃsū’’ti vatvā atītaṃ āhari.
அதீதே பா³ராணஸியங் ப்³ரஹ்மத³த்தே ரஜ்ஜங் காரெந்தே போ³தி⁴ஸத்தோ ஏகஸ்மிங் து³க்³க³தக³ஹபதிகுலே நிப்³ப³த்தி, தஸ்ஸ வயப்பத்தஸ்ஸ பிதா காலமகாஸி. ஸோ ப⁴திங் கத்வா மாதரங் போஸேஸி, அத²ஸ்ஸ மாதா அனிச்ச²மானஸ்ஸேவ ஏகங் குலதீ⁴தரங் கே³ஹே கத்வா அபரபா⁴கே³ காலமகாஸி. ப⁴ரியாயபிஸ்ஸ குச்சி²யங் க³ப்³போ⁴ பதிட்டா²ஸி. ஸோ க³ப்³ப⁴ஸ்ஸ பதிட்டி²தபா⁴வங் அஜானந்தோ ‘‘ப⁴த்³தே³, த்வங் ப⁴திங் கத்வா ஜீவாஹி, அஹங் பப்³ப³ஜிஸ்ஸாமீ’’தி ஆஹ . ஸாபி ‘‘க³ப்³போ⁴ மே பதிட்டி²தோ, மயி விஜாதாய தா³ரகங் தி³ஸ்வா பப்³ப³ஜிஸ்ஸஸீ’’தி ஆஹ. ஸோ ‘‘ஸாதூ⁴’’தி ஸம்படிச்சி²த்வா தஸ்ஸா விஜாதகாலே ‘‘ப⁴த்³தே³, த்வங் ஸொத்தி²னா விஜாதா, இதா³னாஹங் பப்³ப³ஜிஸ்ஸாமீ’’தி ஆபுச்சி². அத² நங் ஸா ‘‘புத்தகஸ்ஸ தாவ த²னபானதோ அபக³மனகாலங் ஆக³மேஹீ’’தி வத்வா புன க³ப்³ப⁴ங் க³ண்ஹி.
Atīte bārāṇasiyaṃ brahmadatte rajjaṃ kārente bodhisatto ekasmiṃ duggatagahapatikule nibbatti, tassa vayappattassa pitā kālamakāsi. So bhatiṃ katvā mātaraṃ posesi, athassa mātā anicchamānasseva ekaṃ kuladhītaraṃ gehe katvā aparabhāge kālamakāsi. Bhariyāyapissa kucchiyaṃ gabbho patiṭṭhāsi. So gabbhassa patiṭṭhitabhāvaṃ ajānanto ‘‘bhadde, tvaṃ bhatiṃ katvā jīvāhi, ahaṃ pabbajissāmī’’ti āha . Sāpi ‘‘gabbho me patiṭṭhito, mayi vijātāya dārakaṃ disvā pabbajissasī’’ti āha. So ‘‘sādhū’’ti sampaṭicchitvā tassā vijātakāle ‘‘bhadde, tvaṃ sotthinā vijātā, idānāhaṃ pabbajissāmī’’ti āpucchi. Atha naṃ sā ‘‘puttakassa tāva thanapānato apagamanakālaṃ āgamehī’’ti vatvā puna gabbhaṃ gaṇhi.
ஸோ சிந்தேஸி – ‘‘இமங் ஸம்படிச்சா²பெத்வா க³ந்துங் ந ஸக்கா, இமிஸ்ஸா அனாசிக்கி²த்வாவ பலாயித்வா பப்³ப³ஜிஸ்ஸாமீ’’தி. ஸோ தஸ்ஸா அனாசிக்கி²த்வா ரத்தி²பா⁴கே³ உட்டா²ய பலாயி. அத² நங் நக³ரகு³த்திகா அக்³க³ஹேஸுங். ஸோ ‘‘அஹங், ஸாமி, மாதுபோஸகோ நாம, விஸ்ஸஜ்ஜேத² ம’’ந்தி தேஹி அத்தானங் விஸ்ஸஜ்ஜாபெத்வா ஏகஸ்மிங் டா²னே வஸித்வா அக்³க³த்³வாரேனேவ நிக்க²மித்வா ஹிமவந்தங் பவிஸித்வா இஸிபப்³ப³ஜ்ஜங் பப்³ப³ஜித்வா அபி⁴ஞ்ஞா ச ஸமாபத்தியோ ச நிப்³ப³த்தெத்வா ஜா²னகீளங் கீளந்தோ விஹாஸி. ஸோ தத்த² வஸந்தோ ‘‘ஏவரூபம்பி நாம மே து³ச்சி²ந்த³னியங் புத்ததா³ரப³ந்த⁴னங் கிலேஸப³ந்த⁴னங் சி²ந்தி³த’’ந்தி உதா³னங் உதா³னெந்தோ இமா கா³தா² அவோச –
So cintesi – ‘‘imaṃ sampaṭicchāpetvā gantuṃ na sakkā, imissā anācikkhitvāva palāyitvā pabbajissāmī’’ti. So tassā anācikkhitvā ratthibhāge uṭṭhāya palāyi. Atha naṃ nagaraguttikā aggahesuṃ. So ‘‘ahaṃ, sāmi, mātuposako nāma, vissajjetha ma’’nti tehi attānaṃ vissajjāpetvā ekasmiṃ ṭhāne vasitvā aggadvāreneva nikkhamitvā himavantaṃ pavisitvā isipabbajjaṃ pabbajitvā abhiññā ca samāpattiyo ca nibbattetvā jhānakīḷaṃ kīḷanto vihāsi. So tattha vasanto ‘‘evarūpampi nāma me ducchindaniyaṃ puttadārabandhanaṃ kilesabandhanaṃ chindita’’nti udānaṃ udānento imā gāthā avoca –
101.
101.
‘‘ந தங் த³ள்ஹங் ப³ந்த⁴னமாஹு தீ⁴ரா, யதா³யஸங் தா³ருஜபப்³ப³ஜஞ்ச;
‘‘Na taṃ daḷhaṃ bandhanamāhu dhīrā, yadāyasaṃ dārujapabbajañca;
ஸாரத்தரத்தா மணிகுண்ட³லேஸு, புத்தேஸு தா³ரேஸு ச யா அபெக்கா².
Sārattarattā maṇikuṇḍalesu, puttesu dāresu ca yā apekkhā.
102.
102.
‘‘ஏதங் த³ள்ஹங் ப³ந்த⁴னமாஹு தீ⁴ரா, ஓஹாரினங் ஸீதி²லங் து³ப்பமுஞ்சங்;
‘‘Etaṃ daḷhaṃ bandhanamāhu dhīrā, ohārinaṃ sīthilaṃ duppamuñcaṃ;
ஏதம்பி செ²த்வான வஜந்தி தீ⁴ரா, அனபெக்கி²னோ காமஸுக²ங் பஹாயா’’தி.
Etampi chetvāna vajanti dhīrā, anapekkhino kāmasukhaṃ pahāyā’’ti.
தத்த² தீ⁴ராதி தி⁴திமந்தா, தி⁴க்கதபாபாதி தீ⁴ரா. அத² வா தீ⁴ வுச்சதி பஞ்ஞா, தாய பஞ்ஞாய ஸமன்னாக³தாதி தீ⁴ரா, பு³த்³தா⁴ பச்சேகபு³த்³தா⁴ பு³த்³த⁴ஸாவகா போ³தி⁴ஸத்தா ச இமே தீ⁴ரா நாம. யதா³யஸந்திஆதீ³ஸு யங் ஸங்க²லிகஸங்கா²தங் அயஸா நிப்³ப³த்தங் ஆயஸங், யங் அத்³து³ப³ந்த⁴னஸங்கா²தங் தா³ருஜங், யஞ்ச பப்³ப³ஜதிணேஹி வா அஞ்ஞேஹி வா வாகாதீ³ஹி ரஜ்ஜுங் கத்வா கதரஜ்ஜுப³ந்த⁴னங், தங் ஆயஸாதி³ங் சி²ந்தி³துங் ஸக்குணெய்யபா⁴வேன தீ⁴ரா த³ள்ஹங் தி²ரந்தி நாஹு ந கதெ²ந்தி. ஸாரத்தரத்தாதி ஸாரத்தா ஹுத்வா ரத்தா, ப³லவராக³ரத்தாதி அத்தோ². மணிகுண்ட³லேஸூதி மணீஸு ச குண்ட³லேஸு ச, மணியுத்தேஸு வா குண்ட³லேஸு.
Tattha dhīrāti dhitimantā, dhikkatapāpāti dhīrā. Atha vā dhī vuccati paññā, tāya paññāya samannāgatāti dhīrā, buddhā paccekabuddhā buddhasāvakā bodhisattā ca ime dhīrā nāma. Yadāyasantiādīsu yaṃ saṅkhalikasaṅkhātaṃ ayasā nibbattaṃ āyasaṃ, yaṃ addubandhanasaṅkhātaṃ dārujaṃ, yañca pabbajatiṇehi vā aññehi vā vākādīhi rajjuṃ katvā katarajjubandhanaṃ, taṃ āyasādiṃ chindituṃ sakkuṇeyyabhāvena dhīrā daḷhaṃ thiranti nāhu na kathenti. Sārattarattāti sārattā hutvā rattā, balavarāgarattāti attho. Maṇikuṇḍalesūti maṇīsu ca kuṇḍalesu ca, maṇiyuttesu vā kuṇḍalesu.
ஏதங் த³ள்ஹந்தி யே மணிகுண்ட³லேஸு ஸாரத்தரத்தா, தேஸங் யோ ச ஸாராகோ³, யா ச தேஸங் புத்ததா³ரேஸு அபெக்கா² தண்ஹா, ஏதங் கிலேஸமயங் ப³ந்த⁴னங் த³ள்ஹங் தி²ரந்தி தீ⁴ரா ஆஹு. ஓஹாரினந்தி ஆகட்³டி⁴த்வா சதூஸு அபாயேஸு பாதனதோ அவஹரதி ஹெட்டா² ஹரதீதி ஓஹாரினங். ஸிதி²லந்தி ப³ந்த⁴னட்டா²னே ச²விசம்மமங்ஸானி ந சி²ந்த³தி, லோஹிதங் ந நீஹரதி, ப³ந்த⁴னபா⁴வம்பி ந ஜானாபேதி, த²லபத²ஜலபதா²தீ³ஸு கம்மானி காதுங் தே³தீதி ஸிதி²லங். து³ப்பமுஞ்சந்தி தண்ஹாலோப⁴வஸேன ஹி ஏகவாரம்பி உப்பன்னங் கிலேஸப³ந்த⁴னங் த³ட்ட²ட்டா²னதோ கச்ச²போ விய து³ம்மோசயங் ஹோதீதி து³ப்பமுஞ்சங். ஏதம்பி செ²த்வானாதி ஏதங் ஏவங் த³ள்ஹம்பி கிலேஸப³ந்த⁴னங் ஞாணக²க்³கே³ன சி²ந்தி³த்வா அயதா³மானி சி²ந்தி³த்வா மத்தவரவாரணா விய பஞ்ஜரே சி²ந்தி³த்வா ஸீஹபோதகா விய ச தீ⁴ரா வத்து²காமகிலேஸகாமே உக்காரபூ⁴மிங் விய ஜிகு³ச்ச²மானா அனபெக்கி²னோ ஹுத்வா காமஸுக²ங் பஹாய வஜந்தி பக்கமந்தி, பக்கமித்வா ச பன ஹிமவந்தங் பவிஸித்வா இஸிபப்³ப³ஜ்ஜங் பப்³ப³ஜித்வா ஜா²னஸுகே²ன வீதினாமெந்தீதி.
Etaṃdaḷhanti ye maṇikuṇḍalesu sārattarattā, tesaṃ yo ca sārāgo, yā ca tesaṃ puttadāresu apekkhā taṇhā, etaṃ kilesamayaṃ bandhanaṃ daḷhaṃ thiranti dhīrā āhu. Ohārinanti ākaḍḍhitvā catūsu apāyesu pātanato avaharati heṭṭhā haratīti ohārinaṃ. Sithilanti bandhanaṭṭhāne chavicammamaṃsāni na chindati, lohitaṃ na nīharati, bandhanabhāvampi na jānāpeti, thalapathajalapathādīsu kammāni kātuṃ detīti sithilaṃ. Duppamuñcanti taṇhālobhavasena hi ekavārampi uppannaṃ kilesabandhanaṃ daṭṭhaṭṭhānato kacchapo viya dummocayaṃ hotīti duppamuñcaṃ. Etampi chetvānāti etaṃ evaṃ daḷhampi kilesabandhanaṃ ñāṇakhaggena chinditvā ayadāmāni chinditvā mattavaravāraṇā viya pañjare chinditvā sīhapotakā viya ca dhīrā vatthukāmakilesakāme ukkārabhūmiṃ viya jigucchamānā anapekkhino hutvā kāmasukhaṃ pahāya vajanti pakkamanti, pakkamitvā ca pana himavantaṃ pavisitvā isipabbajjaṃ pabbajitvā jhānasukhena vītināmentīti.
ஏவங் போ³தி⁴ஸத்தோ இமங் உதா³னங் உதா³னெத்வா அபரிஹீனஜ்ஜா²னோ ப்³ரஹ்மலோகபராயணோ அஹோஸி.
Evaṃ bodhisatto imaṃ udānaṃ udānetvā aparihīnajjhāno brahmalokaparāyaṇo ahosi.
ஸத்தா² இமங் த⁴ம்மதே³ஸனங் ஆஹரித்வா ஸச்சானி பகாஸெத்வா ஜாதகங் ஸமோதா⁴னேஸி, ஸச்சபரியோஸானே கேசி ஸோதாபன்னா, கேசி ஸகதா³கா³மினோ, கேசி அனாகா³மினோ, கேசி அரஹந்தோ அஹேஸுங். ‘‘ததா³ மாதா மஹாமாயா அஹோஸி, பிதா ஸுத்³தோ⁴த³னமஹாராஜா, ப⁴ரியா ராஹுலமாதா, புத்தோ ராஹுலோ, புத்ததா³ரங் பஹாய நிக்க²மித்வா பப்³ப³ஜிதோ புரிஸோ பன அஹமேவ அஹோஸி’’ந்தி.
Satthā imaṃ dhammadesanaṃ āharitvā saccāni pakāsetvā jātakaṃ samodhānesi, saccapariyosāne keci sotāpannā, keci sakadāgāmino, keci anāgāmino, keci arahanto ahesuṃ. ‘‘Tadā mātā mahāmāyā ahosi, pitā suddhodanamahārājā, bhariyā rāhulamātā, putto rāhulo, puttadāraṃ pahāya nikkhamitvā pabbajito puriso pana ahameva ahosi’’nti.
ப³ந்த⁴னாகா³ரஜாதகவண்ணனா பட²மா.
Bandhanāgārajātakavaṇṇanā paṭhamā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / ஜாதகபாளி • Jātakapāḷi / 201. ப³ந்த⁴னாகா³ரஜாதகங் • 201. Bandhanāgārajātakaṃ
