| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
5. ப³ந்த⁴னஸுத்தங்
5. Bandhanasuttaṃ
117. ஸாவத்தி²னிதா³னங் . ‘‘இத⁴ பி⁴க்க²வே அஸ்ஸுதவா புது²ஜ்ஜனோ அரியானங் அத³ஸ்ஸாவீ…பே॰… ஸப்புரிஸத⁴ம்மே அவினீதோ ரூபங் அத்ததோ ஸமனுபஸ்ஸதி, ரூபவந்தங் வா அத்தானங்; அத்தனி வா ரூபங், ரூபஸ்மிங் வா அத்தானங். அயங் வுச்சதி, பி⁴க்க²வே, அஸ்ஸுதவா புது²ஜ்ஜனோ ரூபப³ந்த⁴னப³த்³தோ⁴ ஸந்தரபா³ஹிரப³ந்த⁴னப³த்³தோ⁴ அதீரத³ஸ்ஸீ அபாரத³ஸ்ஸீ, ப³த்³தோ⁴ ஜீயதி 1 ப³த்³தோ⁴ மீயதி ப³த்³தோ⁴ அஸ்மா லோகா பரங் லோகங் க³ச்ச²தி. வேத³னங் அத்ததோ ஸமனுபஸ்ஸதி…பே॰… வேத³னாய வா அத்தானங். அயங் வுச்சதி, பி⁴க்க²வே, அஸ்ஸுதவா புது²ஜ்ஜனோ வேத³னாப³ந்த⁴னப³த்³தோ⁴ ஸந்தரபா³ஹிரப³ந்த⁴னப³த்³தோ⁴ அதீரத³ஸ்ஸீ அபாரத³ஸ்ஸீ, ப³த்³தோ⁴ ஜீயதி ப³த்³தோ⁴ மீயதி ப³த்³தோ⁴ அஸ்மா லோகா பரங் லோகங் க³ச்ச²தி. ஸஞ்ஞங்… ஸங்கா²ரே… விஞ்ஞாணங் அத்ததோ ஸமனுபஸ்ஸதி…பே॰… அயங் வுச்சதி, பி⁴க்க²வே, அஸ்ஸுதவா புது²ஜ்ஜனோ விஞ்ஞாணப³ந்த⁴னப³த்³தோ⁴ ஸந்தரபா³ஹிரப³ந்த⁴னப³த்³தோ⁴ அதீரத³ஸ்ஸீ அபாரத³ஸ்ஸீ, ப³த்³தோ⁴ ஜீயதி ப³த்³தோ⁴ மீயதி ப³த்³தோ⁴ அஸ்மா லோகா பரங் லோகங் க³ச்ச²தி’’.
117. Sāvatthinidānaṃ . ‘‘Idha bhikkhave assutavā puthujjano ariyānaṃ adassāvī…pe… sappurisadhamme avinīto rūpaṃ attato samanupassati, rūpavantaṃ vā attānaṃ; attani vā rūpaṃ, rūpasmiṃ vā attānaṃ. Ayaṃ vuccati, bhikkhave, assutavā puthujjano rūpabandhanabaddho santarabāhirabandhanabaddho atīradassī apāradassī, baddho jīyati 2 baddho mīyati baddho asmā lokā paraṃ lokaṃ gacchati. Vedanaṃ attato samanupassati…pe… vedanāya vā attānaṃ. Ayaṃ vuccati, bhikkhave, assutavā puthujjano vedanābandhanabaddho santarabāhirabandhanabaddho atīradassī apāradassī, baddho jīyati baddho mīyati baddho asmā lokā paraṃ lokaṃ gacchati. Saññaṃ… saṅkhāre… viññāṇaṃ attato samanupassati…pe… ayaṃ vuccati, bhikkhave, assutavā puthujjano viññāṇabandhanabaddho santarabāhirabandhanabaddho atīradassī apāradassī, baddho jīyati baddho mīyati baddho asmā lokā paraṃ lokaṃ gacchati’’.
‘‘ஸுதவா ச கோ², பி⁴க்க²வே, அரியஸாவகோ அரியானங் த³ஸ்ஸாவீ…பே॰… ஸப்புரிஸத⁴ம்மே ஸுவினீதோ ந ரூபங் அத்ததோ ஸமனுபஸ்ஸதி, ந ரூபவந்தங் வா அத்தானங்; ந அத்தனி வா ரூபங், ந ரூபஸ்மிங் வா அத்தானங். அயங் வுச்சதி, பி⁴க்க²வே, ஸுதவா அரியஸாவகோ ந ரூபப³ந்த⁴னப³த்³தோ⁴, ந ஸந்தரபா³ஹிரப³ந்த⁴னப³த்³தோ⁴, தீரத³ஸ்ஸீ, பாரத³ஸ்ஸீ; ‘பரிமுத்தோ ஸோ து³க்க²ஸ்மா’தி வதா³மி. ந வேத³னங் அத்ததோ…பே॰… ந ஸஞ்ஞங் அத்ததோ…பே॰… ந ஸங்கா²ரே அத்ததோ…பே॰… ந விஞ்ஞாணங் அத்ததோ ஸமனுபஸ்ஸதி…பே॰… அயங் வுச்சதி, பி⁴க்க²வே, ஸுதவா அரியஸாவகோ ந விஞ்ஞாணப³ந்த⁴னப³த்³தோ⁴, ந ஸந்தரபா³ஹிரப³ந்த⁴னப³த்³தோ⁴, தீரத³ஸ்ஸீ, பாரத³ஸ்ஸீ, ‘பரிமுத்தோ ஸோ து³க்க²ஸ்மா’தி வதா³மீ’’தி. பஞ்சமங்.
‘‘Sutavā ca kho, bhikkhave, ariyasāvako ariyānaṃ dassāvī…pe… sappurisadhamme suvinīto na rūpaṃ attato samanupassati, na rūpavantaṃ vā attānaṃ; na attani vā rūpaṃ, na rūpasmiṃ vā attānaṃ. Ayaṃ vuccati, bhikkhave, sutavā ariyasāvako na rūpabandhanabaddho, na santarabāhirabandhanabaddho, tīradassī, pāradassī; ‘parimutto so dukkhasmā’ti vadāmi. Na vedanaṃ attato…pe… na saññaṃ attato…pe… na saṅkhāre attato…pe… na viññāṇaṃ attato samanupassati…pe… ayaṃ vuccati, bhikkhave, sutavā ariyasāvako na viññāṇabandhanabaddho, na santarabāhirabandhanabaddho, tīradassī, pāradassī, ‘parimutto so dukkhasmā’ti vadāmī’’ti. Pañcamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 5-9. ப³ந்த⁴னஸுத்தாதி³வண்ணனா • 5-9. Bandhanasuttādivaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 5-9. ப³ந்த⁴னஸுத்தாதி³வண்ணனா • 5-9. Bandhanasuttādivaṇṇanā
