| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৫. বন্ধনসুত্তং
5. Bandhanasuttaṃ
১১৭. সাৰত্থিনিদানং । ‘‘ইধ ভিক্খৰে অস্সুতৰা পুথুজ্জনো অরিযানং অদস্সাৰী…পে॰… সপ্পুরিসধম্মে অৰিনীতো রূপং অত্ততো সমনুপস্সতি, রূপৰন্তং ৰা অত্তানং; অত্তনি ৰা রূপং, রূপস্মিং ৰা অত্তানং। অযং ৰুচ্চতি, ভিক্খৰে, অস্সুতৰা পুথুজ্জনো রূপবন্ধনবদ্ধো সন্তরবাহিরবন্ধনবদ্ধো অতীরদস্সী অপারদস্সী, বদ্ধো জীযতি 1 বদ্ধো মীযতি বদ্ধো অস্মা লোকা পরং লোকং গচ্ছতি। ৰেদনং অত্ততো সমনুপস্সতি…পে॰… ৰেদনায ৰা অত্তানং। অযং ৰুচ্চতি, ভিক্খৰে, অস্সুতৰা পুথুজ্জনো ৰেদনাবন্ধনবদ্ধো সন্তরবাহিরবন্ধনবদ্ধো অতীরদস্সী অপারদস্সী, বদ্ধো জীযতি বদ্ধো মীযতি বদ্ধো অস্মা লোকা পরং লোকং গচ্ছতি। সঞ্ঞং… সঙ্খারে… ৰিঞ্ঞাণং অত্ততো সমনুপস্সতি…পে॰… অযং ৰুচ্চতি, ভিক্খৰে, অস্সুতৰা পুথুজ্জনো ৰিঞ্ঞাণবন্ধনবদ্ধো সন্তরবাহিরবন্ধনবদ্ধো অতীরদস্সী অপারদস্সী, বদ্ধো জীযতি বদ্ধো মীযতি বদ্ধো অস্মা লোকা পরং লোকং গচ্ছতি’’।
117. Sāvatthinidānaṃ . ‘‘Idha bhikkhave assutavā puthujjano ariyānaṃ adassāvī…pe… sappurisadhamme avinīto rūpaṃ attato samanupassati, rūpavantaṃ vā attānaṃ; attani vā rūpaṃ, rūpasmiṃ vā attānaṃ. Ayaṃ vuccati, bhikkhave, assutavā puthujjano rūpabandhanabaddho santarabāhirabandhanabaddho atīradassī apāradassī, baddho jīyati 2 baddho mīyati baddho asmā lokā paraṃ lokaṃ gacchati. Vedanaṃ attato samanupassati…pe… vedanāya vā attānaṃ. Ayaṃ vuccati, bhikkhave, assutavā puthujjano vedanābandhanabaddho santarabāhirabandhanabaddho atīradassī apāradassī, baddho jīyati baddho mīyati baddho asmā lokā paraṃ lokaṃ gacchati. Saññaṃ… saṅkhāre… viññāṇaṃ attato samanupassati…pe… ayaṃ vuccati, bhikkhave, assutavā puthujjano viññāṇabandhanabaddho santarabāhirabandhanabaddho atīradassī apāradassī, baddho jīyati baddho mīyati baddho asmā lokā paraṃ lokaṃ gacchati’’.
‘‘সুতৰা চ খো, ভিক্খৰে, অরিযসাৰকো অরিযানং দস্সাৰী…পে॰… সপ্পুরিসধম্মে সুৰিনীতো ন রূপং অত্ততো সমনুপস্সতি, ন রূপৰন্তং ৰা অত্তানং; ন অত্তনি ৰা রূপং, ন রূপস্মিং ৰা অত্তানং। অযং ৰুচ্চতি, ভিক্খৰে, সুতৰা অরিযসাৰকো ন রূপবন্ধনবদ্ধো, ন সন্তরবাহিরবন্ধনবদ্ধো, তীরদস্সী, পারদস্সী; ‘পরিমুত্তো সো দুক্খস্মা’তি ৰদামি। ন ৰেদনং অত্ততো…পে॰… ন সঞ্ঞং অত্ততো…পে॰… ন সঙ্খারে অত্ততো…পে॰… ন ৰিঞ্ঞাণং অত্ততো সমনুপস্সতি…পে॰… অযং ৰুচ্চতি, ভিক্খৰে, সুতৰা অরিযসাৰকো ন ৰিঞ্ঞাণবন্ধনবদ্ধো, ন সন্তরবাহিরবন্ধনবদ্ধো, তীরদস্সী, পারদস্সী, ‘পরিমুত্তো সো দুক্খস্মা’তি ৰদামী’’তি। পঞ্চমং।
‘‘Sutavā ca kho, bhikkhave, ariyasāvako ariyānaṃ dassāvī…pe… sappurisadhamme suvinīto na rūpaṃ attato samanupassati, na rūpavantaṃ vā attānaṃ; na attani vā rūpaṃ, na rūpasmiṃ vā attānaṃ. Ayaṃ vuccati, bhikkhave, sutavā ariyasāvako na rūpabandhanabaddho, na santarabāhirabandhanabaddho, tīradassī, pāradassī; ‘parimutto so dukkhasmā’ti vadāmi. Na vedanaṃ attato…pe… na saññaṃ attato…pe… na saṅkhāre attato…pe… na viññāṇaṃ attato samanupassati…pe… ayaṃ vuccati, bhikkhave, sutavā ariyasāvako na viññāṇabandhanabaddho, na santarabāhirabandhanabaddho, tīradassī, pāradassī, ‘parimutto so dukkhasmā’ti vadāmī’’ti. Pañcamaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৫-৯. বন্ধনসুত্তাদিৰণ্ণনা • 5-9. Bandhanasuttādivaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৫-৯. বন্ধনসুত্তাদিৰণ্ণনা • 5-9. Bandhanasuttādivaṇṇanā
