| Library / Tipiṭaka / तिपिटक • Tipiṭaka / संयुत्तनिकाय • Saṃyuttanikāya |
१०. बन्धनसुत्तं
10. Bandhanasuttaṃ
१२१. तेन खो पन समयेन रञ्ञा पसेनदिना कोसलेन महाजनकायो बन्धापितो होति, अप्पेकच्चे रज्जूहि अप्पेकच्चे अन्दूहि अप्पेकच्चे सङ्खलिकाहि।
121. Tena kho pana samayena raññā pasenadinā kosalena mahājanakāyo bandhāpito hoti, appekacce rajjūhi appekacce andūhi appekacce saṅkhalikāhi.
अथ खो सम्बहुला भिक्खू पुब्बण्हसमयं निवासेत्वा पत्तचीवरमादाय सावत्थिं पिण्डाय पविसिंसु। सावत्थियं पिण्डाय चरित्वा पच्छाभत्तं पिण्डपातपटिक्कन्ता येन भगवा तेनुपसङ्कमिंसु; उपसङ्कमित्वा भगवन्तं अभिवादेत्वा एकमन्तं निसीदिंसु। एकमन्तं निसिन्ना खो ते भिक्खू भगवन्तं एतदवोचुं – ‘‘इध, भन्ते, रञ्ञा पसेनदिना कोसलेन महाजनकायो बन्धापितो, अप्पेकच्चे रज्जूहि अप्पेकच्चे अन्दूहि अप्पेकच्चे सङ्खलिकाही’’ति।
Atha kho sambahulā bhikkhū pubbaṇhasamayaṃ nivāsetvā pattacīvaramādāya sāvatthiṃ piṇḍāya pavisiṃsu. Sāvatthiyaṃ piṇḍāya caritvā pacchābhattaṃ piṇḍapātapaṭikkantā yena bhagavā tenupasaṅkamiṃsu; upasaṅkamitvā bhagavantaṃ abhivādetvā ekamantaṃ nisīdiṃsu. Ekamantaṃ nisinnā kho te bhikkhū bhagavantaṃ etadavocuṃ – ‘‘idha, bhante, raññā pasenadinā kosalena mahājanakāyo bandhāpito, appekacce rajjūhi appekacce andūhi appekacce saṅkhalikāhī’’ti.
अथ खो भगवा एतमत्थं विदित्वा तायं वेलायं इमा गाथायो अभासि –
Atha kho bhagavā etamatthaṃ viditvā tāyaṃ velāyaṃ imā gāthāyo abhāsi –
‘‘न तं दळ्हं बन्धनमाहु धीरा,
‘‘Na taṃ daḷhaṃ bandhanamāhu dhīrā,
यदायसं दारुजं पब्बजञ्च।
Yadāyasaṃ dārujaṃ pabbajañca;
सारत्तरत्ता मणिकुण्डलेसु,
Sārattarattā maṇikuṇḍalesu,
पुत्तेसु दारेसु च या अपेक्खा॥
Puttesu dāresu ca yā apekkhā.
‘‘एतं दळ्हं बन्धनमाहु धीरा,
‘‘Etaṃ daḷhaṃ bandhanamāhu dhīrā,
ओहारिनं सिथिलं दुप्पमुञ्चं।
Ohārinaṃ sithilaṃ duppamuñcaṃ;
एतम्पि छेत्वान परिब्बजन्ति,
Etampi chetvāna paribbajanti,
अनपेक्खिनो कामसुखं पहाया’’ति॥
Anapekkhino kāmasukhaṃ pahāyā’’ti.
पठमो वग्गो।
Paṭhamo vaggo.
तस्सुद्दानं –
Tassuddānaṃ –
दहरो पुरिसो जरा, पियं अत्तानरक्खितो।
Daharo puriso jarā, piyaṃ attānarakkhito;
अप्पका अड्डकरणं, मल्लिका यञ्ञबन्धनन्ति॥
Appakā aḍḍakaraṇaṃ, mallikā yaññabandhananti.
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / संयुत्तनिकाय (अट्ठकथा) • Saṃyuttanikāya (aṭṭhakathā) / १०. बन्धनसुत्तवण्णना • 10. Bandhanasuttavaṇṇanā
टीका • Tīkā / सुत्तपिटक (टीका) • Suttapiṭaka (ṭīkā) / संयुत्तनिकाय (टीका) • Saṃyuttanikāya (ṭīkā) / १०. बन्धनसुत्तवण्णना • 10. Bandhanasuttavaṇṇanā
