| Library / Tipiṭaka / ติปิฎก • Tipiṭaka / สํยุตฺตนิกาย • Saṃyuttanikāya |
๑๐. พนฺธนสุตฺตํ
10. Bandhanasuttaṃ
๑๒๑. เตน โข ปน สมเยน รญฺญา ปเสนทินา โกสเลน มหาชนกาโย พนฺธาปิโต โหติ, อเปฺปกเจฺจ รชฺชูหิ อเปฺปกเจฺจ อนฺทูหิ อเปฺปกเจฺจ สงฺขลิกาหิฯ
121. Tena kho pana samayena raññā pasenadinā kosalena mahājanakāyo bandhāpito hoti, appekacce rajjūhi appekacce andūhi appekacce saṅkhalikāhi.
อถ โข สมฺพหุลา ภิกฺขู ปุพฺพณฺหสมยํ นิวาเสตฺวา ปตฺตจีวรมาทาย สาวตฺถิํ ปิณฺฑาย ปวิสิํสุฯ สาวตฺถิยํ ปิณฺฑาย จริตฺวา ปจฺฉาภตฺตํ ปิณฺฑปาตปฎิกฺกนฺตา เยน ภควา เตนุปสงฺกมิํสุ; อุปสงฺกมิตฺวา ภควนฺตํ อภิวาเทตฺวา เอกมนฺตํ นิสีทิํสุฯ เอกมนฺตํ นิสินฺนา โข เต ภิกฺขู ภควนฺตํ เอตทโวจุํ – ‘‘อิธ, ภเนฺต, รญฺญา ปเสนทินา โกสเลน มหาชนกาโย พนฺธาปิโต, อเปฺปกเจฺจ รชฺชูหิ อเปฺปกเจฺจ อนฺทูหิ อเปฺปกเจฺจ สงฺขลิกาหี’’ติฯ
Atha kho sambahulā bhikkhū pubbaṇhasamayaṃ nivāsetvā pattacīvaramādāya sāvatthiṃ piṇḍāya pavisiṃsu. Sāvatthiyaṃ piṇḍāya caritvā pacchābhattaṃ piṇḍapātapaṭikkantā yena bhagavā tenupasaṅkamiṃsu; upasaṅkamitvā bhagavantaṃ abhivādetvā ekamantaṃ nisīdiṃsu. Ekamantaṃ nisinnā kho te bhikkhū bhagavantaṃ etadavocuṃ – ‘‘idha, bhante, raññā pasenadinā kosalena mahājanakāyo bandhāpito, appekacce rajjūhi appekacce andūhi appekacce saṅkhalikāhī’’ti.
อถ โข ภควา เอตมตฺถํ วิทิตฺวา ตายํ เวลายํ อิมา คาถาโย อภาสิ –
Atha kho bhagavā etamatthaṃ viditvā tāyaṃ velāyaṃ imā gāthāyo abhāsi –
‘‘น ตํ ทฬฺหํ พนฺธนมาหุ ธีรา,
‘‘Na taṃ daḷhaṃ bandhanamāhu dhīrā,
ยทายสํ ทารุชํ ปพฺพชญฺจ;
Yadāyasaṃ dārujaṃ pabbajañca;
สารตฺตรตฺตา มณิกุณฺฑเลสุ,
Sārattarattā maṇikuṇḍalesu,
ปุเตฺตสุ ทาเรสุ จ ยา อเปกฺขาฯ
Puttesu dāresu ca yā apekkhā.
‘‘เอตํ ทฬฺหํ พนฺธนมาหุ ธีรา,
‘‘Etaṃ daḷhaṃ bandhanamāhu dhīrā,
โอหารินํ สิถิลํ ทุปฺปมุญฺจํ;
Ohārinaṃ sithilaṃ duppamuñcaṃ;
เอตมฺปิ เฉตฺวาน ปริพฺพชนฺติ,
Etampi chetvāna paribbajanti,
อนเปกฺขิโน กามสุขํ ปหายา’’ติฯ
Anapekkhino kāmasukhaṃ pahāyā’’ti.
ปฐโม วโคฺคฯ
Paṭhamo vaggo.
ตสฺสุทฺทานํ –
Tassuddānaṃ –
ทหโร ปุริโส ชรา, ปิยํ อตฺตานรกฺขิโต;
Daharo puriso jarā, piyaṃ attānarakkhito;
อปฺปกา อฑฺฑกรณํ, มลฺลิกา ยญฺญพนฺธนนฺติฯ
Appakā aḍḍakaraṇaṃ, mallikā yaññabandhananti.
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / สํยุตฺตนิกาย (อฎฺฐกถา) • Saṃyuttanikāya (aṭṭhakathā) / ๑๐. พนฺธนสุตฺตวณฺณนา • 10. Bandhanasuttavaṇṇanā
ฎีกา • Tīkā / สุตฺตปิฎก (ฎีกา) • Suttapiṭaka (ṭīkā) / สํยุตฺตนิกาย (ฎีกา) • Saṃyuttanikāya (ṭīkā) / ๑๐. พนฺธนสุตฺตวณฺณนา • 10. Bandhanasuttavaṇṇanā
