| Library / Tipiṭaka / ติปิฎก • Tipiṭaka / สํยุตฺตนิกาย • Saṃyuttanikāya |
๕. พนฺธนสุตฺตํ
5. Bandhanasuttaṃ
๑๑๗. สาวตฺถินิทานํ ฯ ‘‘อิธ ภิกฺขเว อสฺสุตวา ปุถุชฺชโน อริยานํ อทสฺสาวี…เป.… สปฺปุริสธเมฺม อวินีโต รูปํ อตฺตโต สมนุปสฺสติ, รูปวนฺตํ วา อตฺตานํ; อตฺตนิ วา รูปํ, รูปสฺมิํ วา อตฺตานํฯ อยํ วุจฺจติ, ภิกฺขเว, อสฺสุตวา ปุถุชฺชโน รูปพนฺธนพโทฺธ สนฺตรพาหิรพนฺธนพโทฺธ อตีรทสฺสี อปารทสฺสี, พโทฺธ ชียติ 1 พโทฺธ มียติ พโทฺธ อสฺมา โลกา ปรํ โลกํ คจฺฉติฯ เวทนํ อตฺตโต สมนุปสฺสติ…เป.… เวทนาย วา อตฺตานํฯ อยํ วุจฺจติ, ภิกฺขเว, อสฺสุตวา ปุถุชฺชโน เวทนาพนฺธนพโทฺธ สนฺตรพาหิรพนฺธนพโทฺธ อตีรทสฺสี อปารทสฺสี, พโทฺธ ชียติ พโทฺธ มียติ พโทฺธ อสฺมา โลกา ปรํ โลกํ คจฺฉติฯ สญฺญํ… สงฺขาเร… วิญฺญาณํ อตฺตโต สมนุปสฺสติ…เป.… อยํ วุจฺจติ, ภิกฺขเว, อสฺสุตวา ปุถุชฺชโน วิญฺญาณพนฺธนพโทฺธ สนฺตรพาหิรพนฺธนพโทฺธ อตีรทสฺสี อปารทสฺสี, พโทฺธ ชียติ พโทฺธ มียติ พโทฺธ อสฺมา โลกา ปรํ โลกํ คจฺฉติ’’ฯ
117. Sāvatthinidānaṃ . ‘‘Idha bhikkhave assutavā puthujjano ariyānaṃ adassāvī…pe… sappurisadhamme avinīto rūpaṃ attato samanupassati, rūpavantaṃ vā attānaṃ; attani vā rūpaṃ, rūpasmiṃ vā attānaṃ. Ayaṃ vuccati, bhikkhave, assutavā puthujjano rūpabandhanabaddho santarabāhirabandhanabaddho atīradassī apāradassī, baddho jīyati 2 baddho mīyati baddho asmā lokā paraṃ lokaṃ gacchati. Vedanaṃ attato samanupassati…pe… vedanāya vā attānaṃ. Ayaṃ vuccati, bhikkhave, assutavā puthujjano vedanābandhanabaddho santarabāhirabandhanabaddho atīradassī apāradassī, baddho jīyati baddho mīyati baddho asmā lokā paraṃ lokaṃ gacchati. Saññaṃ… saṅkhāre… viññāṇaṃ attato samanupassati…pe… ayaṃ vuccati, bhikkhave, assutavā puthujjano viññāṇabandhanabaddho santarabāhirabandhanabaddho atīradassī apāradassī, baddho jīyati baddho mīyati baddho asmā lokā paraṃ lokaṃ gacchati’’.
‘‘สุตวา จ โข, ภิกฺขเว, อริยสาวโก อริยานํ ทสฺสาวี…เป.… สปฺปุริสธเมฺม สุวินีโต น รูปํ อตฺตโต สมนุปสฺสติ, น รูปวนฺตํ วา อตฺตานํ; น อตฺตนิ วา รูปํ, น รูปสฺมิํ วา อตฺตานํฯ อยํ วุจฺจติ, ภิกฺขเว, สุตวา อริยสาวโก น รูปพนฺธนพโทฺธ, น สนฺตรพาหิรพนฺธนพโทฺธ, ตีรทสฺสี, ปารทสฺสี; ‘ปริมุโตฺต โส ทุกฺขสฺมา’ติ วทามิฯ น เวทนํ อตฺตโต…เป.… น สญฺญํ อตฺตโต…เป.… น สงฺขาเร อตฺตโต…เป.… น วิญฺญาณํ อตฺตโต สมนุปสฺสติ…เป.… อยํ วุจฺจติ, ภิกฺขเว, สุตวา อริยสาวโก น วิญฺญาณพนฺธนพโทฺธ, น สนฺตรพาหิรพนฺธนพโทฺธ, ตีรทสฺสี, ปารทสฺสี, ‘ปริมุโตฺต โส ทุกฺขสฺมา’ติ วทามี’’ติฯ ปญฺจมํฯ
‘‘Sutavā ca kho, bhikkhave, ariyasāvako ariyānaṃ dassāvī…pe… sappurisadhamme suvinīto na rūpaṃ attato samanupassati, na rūpavantaṃ vā attānaṃ; na attani vā rūpaṃ, na rūpasmiṃ vā attānaṃ. Ayaṃ vuccati, bhikkhave, sutavā ariyasāvako na rūpabandhanabaddho, na santarabāhirabandhanabaddho, tīradassī, pāradassī; ‘parimutto so dukkhasmā’ti vadāmi. Na vedanaṃ attato…pe… na saññaṃ attato…pe… na saṅkhāre attato…pe… na viññāṇaṃ attato samanupassati…pe… ayaṃ vuccati, bhikkhave, sutavā ariyasāvako na viññāṇabandhanabaddho, na santarabāhirabandhanabaddho, tīradassī, pāradassī, ‘parimutto so dukkhasmā’ti vadāmī’’ti. Pañcamaṃ.
Footnotes:
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / สํยุตฺตนิกาย (อฎฺฐกถา) • Saṃyuttanikāya (aṭṭhakathā) / ๕-๙. พนฺธนสุตฺตาทิวณฺณนา • 5-9. Bandhanasuttādivaṇṇanā
ฎีกา • Tīkā / สุตฺตปิฎก (ฎีกา) • Suttapiṭaka (ṭīkā) / สํยุตฺตนิกาย (ฎีกา) • Saṃyuttanikāya (ṭīkā) / ๕-๙. พนฺธนสุตฺตาทิวณฺณนา • 5-9. Bandhanasuttādivaṇṇanā
