| Library / Tipiṭaka / តិបិដក • Tipiṭaka / សំយុត្តនិកាយ • Saṃyuttanikāya |
១០. ពន្ធនសុត្តំ
10. Bandhanasuttaṃ
១២១. តេន ខោ បន សមយេន រញ្ញា បសេនទិនា កោសលេន មហាជនកាយោ ពន្ធាបិតោ ហោតិ, អប្បេកច្ចេ រជ្ជូហិ អប្បេកច្ចេ អន្ទូហិ អប្បេកច្ចេ សង្ខលិកាហិ។
121. Tena kho pana samayena raññā pasenadinā kosalena mahājanakāyo bandhāpito hoti, appekacce rajjūhi appekacce andūhi appekacce saṅkhalikāhi.
អថ ខោ សម្ពហុលា ភិក្ខូ បុព្ពណ្ហសមយំ និវាសេត្វា បត្តចីវរមាទាយ សាវត្ថិំ បិណ្ឌាយ បវិសិំសុ។ សាវត្ថិយំ បិណ្ឌាយ ចរិត្វា បច្ឆាភត្តំ បិណ្ឌបាតបដិក្កន្តា យេន ភគវា តេនុបសង្កមិំសុ; ឧបសង្កមិត្វា ភគវន្តំ អភិវាទេត្វា ឯកមន្តំ និសីទិំសុ។ ឯកមន្តំ និសិន្នា ខោ តេ ភិក្ខូ ភគវន្តំ ឯតទវោចុំ – ‘‘ឥធ, ភន្តេ, រញ្ញា បសេនទិនា កោសលេន មហាជនកាយោ ពន្ធាបិតោ, អប្បេកច្ចេ រជ្ជូហិ អប្បេកច្ចេ អន្ទូហិ អប្បេកច្ចេ សង្ខលិកាហី’’តិ។
Atha kho sambahulā bhikkhū pubbaṇhasamayaṃ nivāsetvā pattacīvaramādāya sāvatthiṃ piṇḍāya pavisiṃsu. Sāvatthiyaṃ piṇḍāya caritvā pacchābhattaṃ piṇḍapātapaṭikkantā yena bhagavā tenupasaṅkamiṃsu; upasaṅkamitvā bhagavantaṃ abhivādetvā ekamantaṃ nisīdiṃsu. Ekamantaṃ nisinnā kho te bhikkhū bhagavantaṃ etadavocuṃ – ‘‘idha, bhante, raññā pasenadinā kosalena mahājanakāyo bandhāpito, appekacce rajjūhi appekacce andūhi appekacce saṅkhalikāhī’’ti.
អថ ខោ ភគវា ឯតមត្ថំ វិទិត្វា តាយំ វេលាយំ ឥមា គាថាយោ អភាសិ –
Atha kho bhagavā etamatthaṃ viditvā tāyaṃ velāyaṃ imā gāthāyo abhāsi –
‘‘ន តំ ទឡ្ហំ ពន្ធនមាហុ ធីរា,
‘‘Na taṃ daḷhaṃ bandhanamāhu dhīrā,
យទាយសំ ទារុជំ បព្ពជញ្ច;
Yadāyasaṃ dārujaṃ pabbajañca;
សារត្តរត្តា មណិកុណ្ឌលេសុ,
Sārattarattā maṇikuṇḍalesu,
បុត្តេសុ ទារេសុ ច យា អបេក្ខា។
Puttesu dāresu ca yā apekkhā.
‘‘ឯតំ ទឡ្ហំ ពន្ធនមាហុ ធីរា,
‘‘Etaṃ daḷhaṃ bandhanamāhu dhīrā,
ឱហារិនំ សិថិលំ ទុប្បមុញ្ចំ;
Ohārinaṃ sithilaṃ duppamuñcaṃ;
ឯតម្បិ ឆេត្វាន បរិព្ពជន្តិ,
Etampi chetvāna paribbajanti,
អនបេក្ខិនោ កាមសុខំ បហាយា’’តិ។
Anapekkhino kāmasukhaṃ pahāyā’’ti.
បឋមោ វគ្គោ។
Paṭhamo vaggo.
តស្សុទ្ទានំ –
Tassuddānaṃ –
ទហរោ បុរិសោ ជរា, បិយំ អត្តានរក្ខិតោ;
Daharo puriso jarā, piyaṃ attānarakkhito;
អប្បកា អឌ្ឌករណំ, មល្លិកា យញ្ញពន្ធនន្តិ។
Appakā aḍḍakaraṇaṃ, mallikā yaññabandhananti.
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ១០. ពន្ធនសុត្តវណ្ណនា • 10. Bandhanasuttavaṇṇanā
ដីកា • Tīkā / សុត្តបិដក (ដីកា) • Suttapiṭaka (ṭīkā) / សំយុត្តនិកាយ (ដីកា) • Saṃyuttanikāya (ṭīkā) / ១០. ពន្ធនសុត្តវណ្ណនា • 10. Bandhanasuttavaṇṇanā
