| Library / Tipiṭaka / តិបិដក • Tipiṭaka / សំយុត្តនិកាយ • Saṃyuttanikāya |
៥. ពន្ធនសុត្តំ
5. Bandhanasuttaṃ
១១៧. សាវត្ថិនិទានំ ។ ‘‘ឥធ ភិក្ខវេ អស្សុតវា បុថុជ្ជនោ អរិយានំ អទស្សាវី…បេ.… សប្បុរិសធម្មេ អវិនីតោ រូបំ អត្តតោ សមនុបស្សតិ, រូបវន្តំ វា អត្តានំ; អត្តនិ វា រូបំ, រូបស្មិំ វា អត្តានំ។ អយំ វុច្ចតិ, ភិក្ខវេ, អស្សុតវា បុថុជ្ជនោ រូបពន្ធនពទ្ធោ សន្តរពាហិរពន្ធនពទ្ធោ អតីរទស្សី អបារទស្សី, ពទ្ធោ ជីយតិ 1 ពទ្ធោ មីយតិ ពទ្ធោ អស្មា លោកា បរំ លោកំ គច្ឆតិ។ វេទនំ អត្តតោ សមនុបស្សតិ…បេ.… វេទនាយ វា អត្តានំ។ អយំ វុច្ចតិ, ភិក្ខវេ, អស្សុតវា បុថុជ្ជនោ វេទនាពន្ធនពទ្ធោ សន្តរពាហិរពន្ធនពទ្ធោ អតីរទស្សី អបារទស្សី, ពទ្ធោ ជីយតិ ពទ្ធោ មីយតិ ពទ្ធោ អស្មា លោកា បរំ លោកំ គច្ឆតិ។ សញ្ញំ… សង្ខារេ… វិញ្ញាណំ អត្តតោ សមនុបស្សតិ…បេ.… អយំ វុច្ចតិ, ភិក្ខវេ, អស្សុតវា បុថុជ្ជនោ វិញ្ញាណពន្ធនពទ្ធោ សន្តរពាហិរពន្ធនពទ្ធោ អតីរទស្សី អបារទស្សី, ពទ្ធោ ជីយតិ ពទ្ធោ មីយតិ ពទ្ធោ អស្មា លោកា បរំ លោកំ គច្ឆតិ’’។
117. Sāvatthinidānaṃ . ‘‘Idha bhikkhave assutavā puthujjano ariyānaṃ adassāvī…pe… sappurisadhamme avinīto rūpaṃ attato samanupassati, rūpavantaṃ vā attānaṃ; attani vā rūpaṃ, rūpasmiṃ vā attānaṃ. Ayaṃ vuccati, bhikkhave, assutavā puthujjano rūpabandhanabaddho santarabāhirabandhanabaddho atīradassī apāradassī, baddho jīyati 2 baddho mīyati baddho asmā lokā paraṃ lokaṃ gacchati. Vedanaṃ attato samanupassati…pe… vedanāya vā attānaṃ. Ayaṃ vuccati, bhikkhave, assutavā puthujjano vedanābandhanabaddho santarabāhirabandhanabaddho atīradassī apāradassī, baddho jīyati baddho mīyati baddho asmā lokā paraṃ lokaṃ gacchati. Saññaṃ… saṅkhāre… viññāṇaṃ attato samanupassati…pe… ayaṃ vuccati, bhikkhave, assutavā puthujjano viññāṇabandhanabaddho santarabāhirabandhanabaddho atīradassī apāradassī, baddho jīyati baddho mīyati baddho asmā lokā paraṃ lokaṃ gacchati’’.
‘‘សុតវា ច ខោ, ភិក្ខវេ, អរិយសាវកោ អរិយានំ ទស្សាវី…បេ.… សប្បុរិសធម្មេ សុវិនីតោ ន រូបំ អត្តតោ សមនុបស្សតិ, ន រូបវន្តំ វា អត្តានំ; ន អត្តនិ វា រូបំ, ន រូបស្មិំ វា អត្តានំ។ អយំ វុច្ចតិ, ភិក្ខវេ, សុតវា អរិយសាវកោ ន រូបពន្ធនពទ្ធោ, ន សន្តរពាហិរពន្ធនពទ្ធោ, តីរទស្សី, បារទស្សី; ‘បរិមុត្តោ សោ ទុក្ខស្មា’តិ វទាមិ។ ន វេទនំ អត្តតោ…បេ.… ន សញ្ញំ អត្តតោ…បេ.… ន សង្ខារេ អត្តតោ…បេ.… ន វិញ្ញាណំ អត្តតោ សមនុបស្សតិ…បេ.… អយំ វុច្ចតិ, ភិក្ខវេ, សុតវា អរិយសាវកោ ន វិញ្ញាណពន្ធនពទ្ធោ, ន សន្តរពាហិរពន្ធនពទ្ធោ, តីរទស្សី, បារទស្សី, ‘បរិមុត្តោ សោ ទុក្ខស្មា’តិ វទាមី’’តិ។ បញ្ចមំ។
‘‘Sutavā ca kho, bhikkhave, ariyasāvako ariyānaṃ dassāvī…pe… sappurisadhamme suvinīto na rūpaṃ attato samanupassati, na rūpavantaṃ vā attānaṃ; na attani vā rūpaṃ, na rūpasmiṃ vā attānaṃ. Ayaṃ vuccati, bhikkhave, sutavā ariyasāvako na rūpabandhanabaddho, na santarabāhirabandhanabaddho, tīradassī, pāradassī; ‘parimutto so dukkhasmā’ti vadāmi. Na vedanaṃ attato…pe… na saññaṃ attato…pe… na saṅkhāre attato…pe… na viññāṇaṃ attato samanupassati…pe… ayaṃ vuccati, bhikkhave, sutavā ariyasāvako na viññāṇabandhanabaddho, na santarabāhirabandhanabaddho, tīradassī, pāradassī, ‘parimutto so dukkhasmā’ti vadāmī’’ti. Pañcamaṃ.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ៥-៩. ពន្ធនសុត្តាទិវណ្ណនា • 5-9. Bandhanasuttādivaṇṇanā
ដីកា • Tīkā / សុត្តបិដក (ដីកា) • Suttapiṭaka (ṭīkā) / សំយុត្តនិកាយ (ដីកា) • Saṃyuttanikāya (ṭīkā) / ៥-៩. ពន្ធនសុត្តាទិវណ្ណនា • 5-9. Bandhanasuttādivaṇṇanā
