| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ • Saṃyuttanikāya |
೫. ಬನ್ಧನಸುತ್ತಂ
5. Bandhanasuttaṃ
೧೧೭. ಸಾವತ್ಥಿನಿದಾನಂ । ‘‘ಇಧ ಭಿಕ್ಖವೇ ಅಸ್ಸುತವಾ ಪುಥುಜ್ಜನೋ ಅರಿಯಾನಂ ಅದಸ್ಸಾವೀ…ಪೇ॰… ಸಪ್ಪುರಿಸಧಮ್ಮೇ ಅವಿನೀತೋ ರೂಪಂ ಅತ್ತತೋ ಸಮನುಪಸ್ಸತಿ, ರೂಪವನ್ತಂ ವಾ ಅತ್ತಾನಂ; ಅತ್ತನಿ ವಾ ರೂಪಂ, ರೂಪಸ್ಮಿಂ ವಾ ಅತ್ತಾನಂ। ಅಯಂ ವುಚ್ಚತಿ, ಭಿಕ್ಖವೇ, ಅಸ್ಸುತವಾ ಪುಥುಜ್ಜನೋ ರೂಪಬನ್ಧನಬದ್ಧೋ ಸನ್ತರಬಾಹಿರಬನ್ಧನಬದ್ಧೋ ಅತೀರದಸ್ಸೀ ಅಪಾರದಸ್ಸೀ, ಬದ್ಧೋ ಜೀಯತಿ 1 ಬದ್ಧೋ ಮೀಯತಿ ಬದ್ಧೋ ಅಸ್ಮಾ ಲೋಕಾ ಪರಂ ಲೋಕಂ ಗಚ್ಛತಿ। ವೇದನಂ ಅತ್ತತೋ ಸಮನುಪಸ್ಸತಿ…ಪೇ॰… ವೇದನಾಯ ವಾ ಅತ್ತಾನಂ। ಅಯಂ ವುಚ್ಚತಿ, ಭಿಕ್ಖವೇ, ಅಸ್ಸುತವಾ ಪುಥುಜ್ಜನೋ ವೇದನಾಬನ್ಧನಬದ್ಧೋ ಸನ್ತರಬಾಹಿರಬನ್ಧನಬದ್ಧೋ ಅತೀರದಸ್ಸೀ ಅಪಾರದಸ್ಸೀ, ಬದ್ಧೋ ಜೀಯತಿ ಬದ್ಧೋ ಮೀಯತಿ ಬದ್ಧೋ ಅಸ್ಮಾ ಲೋಕಾ ಪರಂ ಲೋಕಂ ಗಚ್ಛತಿ। ಸಞ್ಞಂ… ಸಙ್ಖಾರೇ… ವಿಞ್ಞಾಣಂ ಅತ್ತತೋ ಸಮನುಪಸ್ಸತಿ…ಪೇ॰… ಅಯಂ ವುಚ್ಚತಿ, ಭಿಕ್ಖವೇ, ಅಸ್ಸುತವಾ ಪುಥುಜ್ಜನೋ ವಿಞ್ಞಾಣಬನ್ಧನಬದ್ಧೋ ಸನ್ತರಬಾಹಿರಬನ್ಧನಬದ್ಧೋ ಅತೀರದಸ್ಸೀ ಅಪಾರದಸ್ಸೀ, ಬದ್ಧೋ ಜೀಯತಿ ಬದ್ಧೋ ಮೀಯತಿ ಬದ್ಧೋ ಅಸ್ಮಾ ಲೋಕಾ ಪರಂ ಲೋಕಂ ಗಚ್ಛತಿ’’।
117. Sāvatthinidānaṃ . ‘‘Idha bhikkhave assutavā puthujjano ariyānaṃ adassāvī…pe… sappurisadhamme avinīto rūpaṃ attato samanupassati, rūpavantaṃ vā attānaṃ; attani vā rūpaṃ, rūpasmiṃ vā attānaṃ. Ayaṃ vuccati, bhikkhave, assutavā puthujjano rūpabandhanabaddho santarabāhirabandhanabaddho atīradassī apāradassī, baddho jīyati 2 baddho mīyati baddho asmā lokā paraṃ lokaṃ gacchati. Vedanaṃ attato samanupassati…pe… vedanāya vā attānaṃ. Ayaṃ vuccati, bhikkhave, assutavā puthujjano vedanābandhanabaddho santarabāhirabandhanabaddho atīradassī apāradassī, baddho jīyati baddho mīyati baddho asmā lokā paraṃ lokaṃ gacchati. Saññaṃ… saṅkhāre… viññāṇaṃ attato samanupassati…pe… ayaṃ vuccati, bhikkhave, assutavā puthujjano viññāṇabandhanabaddho santarabāhirabandhanabaddho atīradassī apāradassī, baddho jīyati baddho mīyati baddho asmā lokā paraṃ lokaṃ gacchati’’.
‘‘ಸುತವಾ ಚ ಖೋ, ಭಿಕ್ಖವೇ, ಅರಿಯಸಾವಕೋ ಅರಿಯಾನಂ ದಸ್ಸಾವೀ…ಪೇ॰… ಸಪ್ಪುರಿಸಧಮ್ಮೇ ಸುವಿನೀತೋ ನ ರೂಪಂ ಅತ್ತತೋ ಸಮನುಪಸ್ಸತಿ, ನ ರೂಪವನ್ತಂ ವಾ ಅತ್ತಾನಂ; ನ ಅತ್ತನಿ ವಾ ರೂಪಂ, ನ ರೂಪಸ್ಮಿಂ ವಾ ಅತ್ತಾನಂ। ಅಯಂ ವುಚ್ಚತಿ, ಭಿಕ್ಖವೇ, ಸುತವಾ ಅರಿಯಸಾವಕೋ ನ ರೂಪಬನ್ಧನಬದ್ಧೋ, ನ ಸನ್ತರಬಾಹಿರಬನ್ಧನಬದ್ಧೋ, ತೀರದಸ್ಸೀ, ಪಾರದಸ್ಸೀ; ‘ಪರಿಮುತ್ತೋ ಸೋ ದುಕ್ಖಸ್ಮಾ’ತಿ ವದಾಮಿ। ನ ವೇದನಂ ಅತ್ತತೋ…ಪೇ॰… ನ ಸಞ್ಞಂ ಅತ್ತತೋ…ಪೇ॰… ನ ಸಙ್ಖಾರೇ ಅತ್ತತೋ…ಪೇ॰… ನ ವಿಞ್ಞಾಣಂ ಅತ್ತತೋ ಸಮನುಪಸ್ಸತಿ…ಪೇ॰… ಅಯಂ ವುಚ್ಚತಿ, ಭಿಕ್ಖವೇ, ಸುತವಾ ಅರಿಯಸಾವಕೋ ನ ವಿಞ್ಞಾಣಬನ್ಧನಬದ್ಧೋ, ನ ಸನ್ತರಬಾಹಿರಬನ್ಧನಬದ್ಧೋ, ತೀರದಸ್ಸೀ, ಪಾರದಸ್ಸೀ, ‘ಪರಿಮುತ್ತೋ ಸೋ ದುಕ್ಖಸ್ಮಾ’ತಿ ವದಾಮೀ’’ತಿ। ಪಞ್ಚಮಂ।
‘‘Sutavā ca kho, bhikkhave, ariyasāvako ariyānaṃ dassāvī…pe… sappurisadhamme suvinīto na rūpaṃ attato samanupassati, na rūpavantaṃ vā attānaṃ; na attani vā rūpaṃ, na rūpasmiṃ vā attānaṃ. Ayaṃ vuccati, bhikkhave, sutavā ariyasāvako na rūpabandhanabaddho, na santarabāhirabandhanabaddho, tīradassī, pāradassī; ‘parimutto so dukkhasmā’ti vadāmi. Na vedanaṃ attato…pe… na saññaṃ attato…pe… na saṅkhāre attato…pe… na viññāṇaṃ attato samanupassati…pe… ayaṃ vuccati, bhikkhave, sutavā ariyasāvako na viññāṇabandhanabaddho, na santarabāhirabandhanabaddho, tīradassī, pāradassī, ‘parimutto so dukkhasmā’ti vadāmī’’ti. Pañcamaṃ.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) / ೫-೯. ಬನ್ಧನಸುತ್ತಾದಿವಣ್ಣನಾ • 5-9. Bandhanasuttādivaṇṇanā
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) / ೫-೯. ಬನ್ಧನಸುತ್ತಾದಿವಣ್ಣನಾ • 5-9. Bandhanasuttādivaṇṇanā
