| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
5. බන්‌ධනසුත්‌තං
5. Bandhanasuttaṃ
117. සාවත්‌ථිනිදානං . ‘‘ඉධ භික්‌ඛවෙ අස්‌සුතවා පුථුජ්‌ජනො අරියානං අදස්‌සාවී…පෙ.… සප්‌පුරිසධම්‌මෙ අවිනීතො රූපං අත්‌තතො සමනුපස්‌සති, රූපවන්‌තං වා අත්‌තානං; අත්‌තනි වා රූපං, රූපස්‌මිං වා අත්‌තානං. අයං වුච්‌චති, භික්‌ඛවෙ, අස්‌සුතවා පුථුජ්‌ජනො රූපබන්‌ධනබද්‌ධො සන්‌තරබාහිරබන්‌ධනබද්‌ධො අතීරදස්‌සී අපාරදස්‌සී, බද්‌ධො ජීයති 1 බද්‌ධො මීයති බද්‌ධො අස්‌මා ලොකා පරං ලොකං ගච්‌ඡති. වෙදනං අත්‌තතො සමනුපස්‌සති…පෙ.… වෙදනාය වා අත්‌තානං. අයං වුච්‌චති, භික්‌ඛවෙ, අස්‌සුතවා පුථුජ්‌ජනො වෙදනාබන්‌ධනබද්‌ධො සන්‌තරබාහිරබන්‌ධනබද්‌ධො අතීරදස්‌සී අපාරදස්‌සී, බද්‌ධො ජීයති බද්‌ධො මීයති බද්‌ධො අස්‌මා ලොකා පරං ලොකං ගච්‌ඡති. සඤ්‌ඤං… සඞ්‌ඛාරෙ… විඤ්‌ඤාණං අත්‌තතො සමනුපස්‌සති…පෙ.… අයං වුච්‌චති, භික්‌ඛවෙ, අස්‌සුතවා පුථුජ්‌ජනො විඤ්‌ඤාණබන්‌ධනබද්‌ධො සන්‌තරබාහිරබන්‌ධනබද්‌ධො අතීරදස්‌සී අපාරදස්‌සී, බද්‌ධො ජීයති බද්‌ධො මීයති බද්‌ධො අස්‌මා ලොකා පරං ලොකං ගච්‌ඡති’’.
117. Sāvatthinidānaṃ . ‘‘Idha bhikkhave assutavā puthujjano ariyānaṃ adassāvī…pe… sappurisadhamme avinīto rūpaṃ attato samanupassati, rūpavantaṃ vā attānaṃ; attani vā rūpaṃ, rūpasmiṃ vā attānaṃ. Ayaṃ vuccati, bhikkhave, assutavā puthujjano rūpabandhanabaddho santarabāhirabandhanabaddho atīradassī apāradassī, baddho jīyati 2 baddho mīyati baddho asmā lokā paraṃ lokaṃ gacchati. Vedanaṃ attato samanupassati…pe… vedanāya vā attānaṃ. Ayaṃ vuccati, bhikkhave, assutavā puthujjano vedanābandhanabaddho santarabāhirabandhanabaddho atīradassī apāradassī, baddho jīyati baddho mīyati baddho asmā lokā paraṃ lokaṃ gacchati. Saññaṃ… saṅkhāre… viññāṇaṃ attato samanupassati…pe… ayaṃ vuccati, bhikkhave, assutavā puthujjano viññāṇabandhanabaddho santarabāhirabandhanabaddho atīradassī apāradassī, baddho jīyati baddho mīyati baddho asmā lokā paraṃ lokaṃ gacchati’’.
‘‘සුතවා ච ඛො, භික්‌ඛවෙ, අරියසාවකො අරියානං දස්‌සාවී…පෙ.… සප්‌පුරිසධම්‌මෙ සුවිනීතො න රූපං අත්‌තතො සමනුපස්‌සති, න රූපවන්‌තං වා අත්‌තානං; න අත්‌තනි වා රූපං, න රූපස්‌මිං වා අත්‌තානං. අයං වුච්‌චති, භික්‌ඛවෙ, සුතවා අරියසාවකො න රූපබන්‌ධනබද්‌ධො, න සන්‌තරබාහිරබන්‌ධනබද්‌ධො, තීරදස්‌සී, පාරදස්‌සී; ‘පරිමුත්‌තො සො දුක්‌ඛස්‌මා’ති වදාමි. න වෙදනං අත්‌තතො…පෙ.… න සඤ්‌ඤං අත්‌තතො…පෙ.… න සඞ්‌ඛාරෙ අත්‌තතො…පෙ.… න විඤ්‌ඤාණං අත්‌තතො සමනුපස්‌සති…පෙ.… අයං වුච්‌චති, භික්‌ඛවෙ, සුතවා අරියසාවකො න විඤ්‌ඤාණබන්‌ධනබද්‌ධො, න සන්‌තරබාහිරබන්‌ධනබද්‌ධො, තීරදස්‌සී, පාරදස්‌සී, ‘පරිමුත්‌තො සො දුක්‌ඛස්‌මා’ති වදාමී’’ති. පඤ්‌චමං.
‘‘Sutavā ca kho, bhikkhave, ariyasāvako ariyānaṃ dassāvī…pe… sappurisadhamme suvinīto na rūpaṃ attato samanupassati, na rūpavantaṃ vā attānaṃ; na attani vā rūpaṃ, na rūpasmiṃ vā attānaṃ. Ayaṃ vuccati, bhikkhave, sutavā ariyasāvako na rūpabandhanabaddho, na santarabāhirabandhanabaddho, tīradassī, pāradassī; ‘parimutto so dukkhasmā’ti vadāmi. Na vedanaṃ attato…pe… na saññaṃ attato…pe… na saṅkhāre attato…pe… na viññāṇaṃ attato samanupassati…pe… ayaṃ vuccati, bhikkhave, sutavā ariyasāvako na viññāṇabandhanabaddho, na santarabāhirabandhanabaddho, tīradassī, pāradassī, ‘parimutto so dukkhasmā’ti vadāmī’’ti. Pañcamaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 5-9. බන්‌ධනසුත්‌තාදිවණ්‌ණනා • 5-9. Bandhanasuttādivaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 5-9. බන්‌ධනසුත්‌තාදිවණ්‌ණනා • 5-9. Bandhanasuttādivaṇṇanā
