| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
10. ப³ந்த⁴னஸுத்தவண்ணனா
10. Bandhanasuttavaṇṇanā
121. த³ஸமே இத⁴, ப⁴ந்தே, ரஞ்ஞாதி இத³ங் தே பி⁴க்கூ² தேஸு மனுஸ்ஸேஸு ஆனந்த³த்தே²ரஸ்ஸ ஸுகதகாரணங் ஆரோசெந்தா ஆரோசேஸுங். ரஞ்ஞோ கிர ஸக்கேன குஸராஜஸ்ஸ தி³ன்னோ அட்ட²வங்கோ மணி பவேணியா ஆக³தோ. ராஜா அலங்கரணகாலே தங் மணிங் ஆஹரதா²தி ஆஹ. மனுஸ்ஸா ‘‘ட²பிதட்டா²னே ந பஸ்ஸாமா’’தி ஆரோசேஸுங். ராஜா அந்தோக⁴ரசாரினோ ‘‘மணிங் பரியேஸித்வா தே³தா²’’தி ப³ந்தா⁴பேஸி. ஆனந்த³த்தே²ரோ தே தி³ஸ்வா மணிபடிஸாமகானங் ஏகங் உபாயங் ஆசிக்கி² . தே ரஞ்ஞோ ஆரோசேஸுங். ராஜா ‘‘பண்டி³தோ தே²ரோ, தே²ரஸ்ஸ வசனங் கரோதா²’’தி. படிஸாமகமனுஸ்ஸா ராஜங்க³ணே உத³கசாடிங் ட²பெத்வா ஸாணியா பரிக்கி²பாபெத்வா தே மனுஸ்ஸே ஆஹங்ஸு – ‘‘ஸாடகங் பாருபித்வா எத்த² க³ந்த்வா ஹத்த²ங் ஓதாரேதா²’’தி. மணிசோரோ சிந்தேஸி – ‘‘ராஜப⁴ண்ட³ங் விஸ்ஸஜ்ஜேதுங் வா வலஞ்ஜேதுங் வா ந ஸக்கா’’தி. ஸோ கே³ஹங் க³ந்த்வா மணிங் உபகச்ச²கே ட²பெத்வா ஸாடகங் பாருபித்வா ஆக³ம்ம உத³கசாடியங் பக்கி²பித்வா பக்காமி. மஹாஜனே படிக்கந்தே ராஜமனுஸ்ஸா சாடியங் ஹத்த²ங் ஓதாரெத்வா மணிங் தி³ஸ்வா ஆஹரித்வா ரஞ்ஞோ அத³ங்ஸு. ‘‘ஆனந்த³த்தே²ரேன கிர த³ஸ்ஸிதனயேன மணி தி³ட்டோ²’’தி மஹாஜனோ கோலாஹலங் அகாஸி. தே பி⁴க்கூ² தங் காரணங் ததா²க³தஸ்ஸ ஆரோசெந்தா இமங் பவத்திங் ஆரோசேஸுங். ஸத்தா² – ‘‘அனச்ச²ரியங், பி⁴க்க²வே, யங் ஆனந்தோ³ மனுஸ்ஸானங் ஹத்தா²ருள்ஹமணிங் ஆஹராபெய்ய , யத்த² புப்³பே³ பண்டி³தா அத்தனோ ஞாணே ட²த்வா அஹேதுகபடிஸந்தி⁴யங் நிப்³ப³த்தானங் திரச்சா²னக³தானம்பி ஹத்தா²ருள்ஹங் ப⁴ண்ட³ங் ஆஹராபெத்வா ரஞ்ஞோ அத³ங்ஸூ’’தி வத்வா –
121. Dasame idha, bhante, raññāti idaṃ te bhikkhū tesu manussesu ānandattherassa sukatakāraṇaṃ ārocentā ārocesuṃ. Rañño kira sakkena kusarājassa dinno aṭṭhavaṅko maṇi paveṇiyā āgato. Rājā alaṅkaraṇakāle taṃ maṇiṃ āharathāti āha. Manussā ‘‘ṭhapitaṭṭhāne na passāmā’’ti ārocesuṃ. Rājā antogharacārino ‘‘maṇiṃ pariyesitvā dethā’’ti bandhāpesi. Ānandatthero te disvā maṇipaṭisāmakānaṃ ekaṃ upāyaṃ ācikkhi . Te rañño ārocesuṃ. Rājā ‘‘paṇḍito thero, therassa vacanaṃ karothā’’ti. Paṭisāmakamanussā rājaṅgaṇe udakacāṭiṃ ṭhapetvā sāṇiyā parikkhipāpetvā te manusse āhaṃsu – ‘‘sāṭakaṃ pārupitvā ettha gantvā hatthaṃ otārethā’’ti. Maṇicoro cintesi – ‘‘rājabhaṇḍaṃ vissajjetuṃ vā valañjetuṃ vā na sakkā’’ti. So gehaṃ gantvā maṇiṃ upakacchake ṭhapetvā sāṭakaṃ pārupitvā āgamma udakacāṭiyaṃ pakkhipitvā pakkāmi. Mahājane paṭikkante rājamanussā cāṭiyaṃ hatthaṃ otāretvā maṇiṃ disvā āharitvā rañño adaṃsu. ‘‘Ānandattherena kira dassitanayena maṇi diṭṭho’’ti mahājano kolāhalaṃ akāsi. Te bhikkhū taṃ kāraṇaṃ tathāgatassa ārocentā imaṃ pavattiṃ ārocesuṃ. Satthā – ‘‘anacchariyaṃ, bhikkhave, yaṃ ānando manussānaṃ hatthāruḷhamaṇiṃ āharāpeyya , yattha pubbe paṇḍitā attano ñāṇe ṭhatvā ahetukapaṭisandhiyaṃ nibbattānaṃ tiracchānagatānampi hatthāruḷhaṃ bhaṇḍaṃ āharāpetvā rañño adaṃsū’’ti vatvā –
‘‘உக்கட்டே² ஸூரமிச்ச²ந்தி, மந்தீஸு அகுதூஹலங்;
‘‘Ukkaṭṭhe sūramicchanti, mantīsu akutūhalaṃ;
பியஞ்ச அன்னபானம்ஹி, அத்தே² ஜாதே ச பண்டி³த’’ந்தி. (ஜா॰ 1.1.92) –
Piyañca annapānamhi, atthe jāte ca paṇḍita’’nti. (jā. 1.1.92) –
மஹாஸாரஜாதகங் கதே²ஸி.
Mahāsārajātakaṃ kathesi.
ந தங் த³ள்ஹந்தி தங் ப³ந்த⁴னங் தி²ரந்தி ந கதெ²ந்தி. யதா³யஸந்தி யங் ஆயஸா கதங். ஸாரத்தரத்தாதி ஸுட்டு² ரத்தரத்தா, ஸாரத்தேன வா ரத்தா ஸாரத்தரத்தா, ஸாரங் இத³ந்தி மஞ்ஞனாய ரத்தாதி அத்தோ². அபெக்கா²தி ஆலயோ நிகந்தி. ஆஹூதி கதெ²ந்தி. ஓஹாரினந்தி சதூஸு அபாயேஸு ஆகட்³ட⁴னகங். ஸிதி²லந்தி ந ஆயஸாதி³ப³ந்த⁴னங் விய இரியாபத²ங் நிவாரெத்வா டி²தங். தேன ஹி ப³ந்த⁴னேன ப³த்³தா⁴ பரதே³ஸம்பி க³ச்ச²ந்தியேவ. து³ப்பமுஞ்சந்தி அஞ்ஞத்ர லோகுத்தரஞாணேன முஞ்சிதுங் அஸக்குணெய்யந்தி. த³ஸமங்.
Na taṃ daḷhanti taṃ bandhanaṃ thiranti na kathenti. Yadāyasanti yaṃ āyasā kataṃ. Sārattarattāti suṭṭhu rattarattā, sārattena vā rattā sārattarattā, sāraṃ idanti maññanāya rattāti attho. Apekkhāti ālayo nikanti. Āhūti kathenti. Ohārinanti catūsu apāyesu ākaḍḍhanakaṃ. Sithilanti na āyasādibandhanaṃ viya iriyāpathaṃ nivāretvā ṭhitaṃ. Tena hi bandhanena baddhā paradesampi gacchantiyeva. Duppamuñcanti aññatra lokuttarañāṇena muñcituṃ asakkuṇeyyanti. Dasamaṃ.
பட²மோ வக்³கோ³.
Paṭhamo vaggo.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 10. ப³ந்த⁴னஸுத்தங் • 10. Bandhanasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 10. ப³ந்த⁴னஸுத்தவண்ணனா • 10. Bandhanasuttavaṇṇanā
