| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
১০. বন্ধনসুত্তৰণ্ণনা
10. Bandhanasuttavaṇṇanā
১২১. ইদন্তি ‘‘ইধ, ভন্তে’’তিআদিকং ৰচনং। তে ভিক্খূ আরোচেসুন্তি সম্বন্ধো। তেসূতি তেসু রঞ্ঞা বন্ধাপিতমনুস্সেসু। সুকতকারণন্তি সুকারণকিরিযং আরোচেসুং, ন কেৰলং তেসং মনুস্সানং বন্ধাপিতভাৰং । ইদানি তমত্থং ৰিত্থারতো দস্সেতুং ‘‘রঞ্ঞো কিরা’’তিআদি ৰুত্তং। অট্ঠৰঙ্কোতি অট্ঠংসো। অন্তোঘরচারিনোতি অন্তেপুরৰাসিনো।
121.Idanti ‘‘idha, bhante’’tiādikaṃ vacanaṃ. Te bhikkhū ārocesunti sambandho. Tesūti tesu raññā bandhāpitamanussesu. Sukatakāraṇanti sukāraṇakiriyaṃ ārocesuṃ, na kevalaṃ tesaṃ manussānaṃ bandhāpitabhāvaṃ . Idāni tamatthaṃ vitthārato dassetuṃ ‘‘rañño kirā’’tiādi vuttaṃ. Aṭṭhavaṅkoti aṭṭhaṃso. Antogharacārinoti antepuravāsino.
উক্কট্ঠেতি যুদ্ধে। মন্তীসূতি গুত্তমন্তীসু। অকুতূহলন্তি সঞ্ঞতং। পিযন্তি পিযাযিতব্বং। অন্নপানম্হি মধুরে অভুত্তে উপ্পন্নে। অত্থেতি অত্থে কিচ্চে জাতে থিরন্তি ন কথেন্তি কাযবলমত্তেন অপনেতুং সক্কুণেয্যত্তা। সুট্ঠু রত্তরত্তাতি অতিৰিয রত্তা এৰ হুত্ৰা রত্তা। সারত্তেনাতি সারভাৰেন সারভাৰসঞ্ঞায। ওহারিনন্তি হেট্ঠা হরণসীলন্তি আহ ‘‘চতূসু অপাযেসু আকড্ঢনক’’ন্তি। সিথিলন্তি সিথিলাকারং, ন পন সিথিলং। তেনাহ ভগৰা ‘‘দুপ্পমুঞ্চ’’ন্তি।
Ukkaṭṭheti yuddhe. Mantīsūti guttamantīsu. Akutūhalanti saññataṃ. Piyanti piyāyitabbaṃ. Annapānamhi madhure abhutte uppanne. Attheti atthe kicce jāte thiranti na kathenti kāyabalamattena apanetuṃ sakkuṇeyyattā. Suṭṭhu rattarattāti ativiya rattā eva hutvā rattā. Sārattenāti sārabhāvena sārabhāvasaññāya. Ohārinanti heṭṭhā haraṇasīlanti āha ‘‘catūsu apāyesu ākaḍḍhanaka’’nti. Sithilanti sithilākāraṃ, na pana sithilaṃ. Tenāha bhagavā ‘‘duppamuñca’’nti.
বন্ধনসুত্তৰণ্ণনা নিট্ঠিতা।
Bandhanasuttavaṇṇanā niṭṭhitā.
পঠমৰগ্গৰণ্ণনা নিট্ঠিতা।
Paṭhamavaggavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ১০. বন্ধনসুত্তং • 10. Bandhanasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ১০. বন্ধনসুত্তৰণ্ণনা • 10. Bandhanasuttavaṇṇanā
