| Library / Tipiṭaka / ติปิฎก • Tipiṭaka / สํยุตฺตนิกาย (ฎีกา) • Saṃyuttanikāya (ṭīkā) |
๑๐. พนฺธนสุตฺตวณฺณนา
10. Bandhanasuttavaṇṇanā
๑๒๑. อิทนฺติ ‘‘อิธ, ภเนฺต’’ติอาทิกํ วจนํฯ เต ภิกฺขู อาโรเจสุนฺติ สมฺพโนฺธฯ เตสูติ เตสุ รญฺญา พนฺธาปิตมนุเสฺสสุฯ สุกตการณนฺติ สุการณกิริยํ อาโรเจสุํ, น เกวลํ เตสํ มนุสฺสานํ พนฺธาปิตภาวํ ฯ อิทานิ ตมตฺถํ วิตฺถารโต ทเสฺสตุํ ‘‘รโญฺญ กิรา’’ติอาทิ วุตฺตํฯ อฎฺฐวโงฺกติ อฎฺฐํโสฯ อโนฺตฆรจาริโนติ อเนฺตปุรวาสิโนฯ
121.Idanti ‘‘idha, bhante’’tiādikaṃ vacanaṃ. Te bhikkhū ārocesunti sambandho. Tesūti tesu raññā bandhāpitamanussesu. Sukatakāraṇanti sukāraṇakiriyaṃ ārocesuṃ, na kevalaṃ tesaṃ manussānaṃ bandhāpitabhāvaṃ . Idāni tamatthaṃ vitthārato dassetuṃ ‘‘rañño kirā’’tiādi vuttaṃ. Aṭṭhavaṅkoti aṭṭhaṃso. Antogharacārinoti antepuravāsino.
อุกฺกเฎฺฐติ ยุเทฺธฯ มนฺตีสูติ คุตฺตมนฺตีสุฯ อกุตูหลนฺติ สญฺญตํฯ ปิยนฺติ ปิยายิตพฺพํฯ อนฺนปานมฺหิ มธุเร อภุเตฺต อุปฺปเนฺนฯ อเตฺถติ อเตฺถ กิเจฺจ ชาเต ถิรนฺติ น กเถนฺติ กายพลมเตฺตน อปเนตุํ สกฺกุเณยฺยตฺตาฯ สุฎฺฐุ รตฺตรตฺตาติ อติวิย รตฺตา เอว หุตฺวา รตฺตาฯ สารเตฺตนาติ สารภาเวน สารภาวสญฺญายฯ โอหารินนฺติ เหฎฺฐา หรณสีลนฺติ อาห ‘‘จตูสุ อปาเยสุ อากฑฺฒนก’’นฺติฯ สิถิลนฺติ สิถิลาการํ, น ปน สิถิลํฯ เตนาห ภควา ‘‘ทุปฺปมุญฺจ’’นฺติฯ
Ukkaṭṭheti yuddhe. Mantīsūti guttamantīsu. Akutūhalanti saññataṃ. Piyanti piyāyitabbaṃ. Annapānamhi madhure abhutte uppanne. Attheti atthe kicce jāte thiranti na kathenti kāyabalamattena apanetuṃ sakkuṇeyyattā. Suṭṭhu rattarattāti ativiya rattā eva hutvā rattā. Sārattenāti sārabhāvena sārabhāvasaññāya. Ohārinanti heṭṭhā haraṇasīlanti āha ‘‘catūsu apāyesu ākaḍḍhanaka’’nti. Sithilanti sithilākāraṃ, na pana sithilaṃ. Tenāha bhagavā ‘‘duppamuñca’’nti.
พนฺธนสุตฺตวณฺณนา นิฎฺฐิตาฯ
Bandhanasuttavaṇṇanā niṭṭhitā.
ปฐมวคฺควณฺณนา นิฎฺฐิตาฯ
Paṭhamavaggavaṇṇanā niṭṭhitā.
Related texts:
ติปิฎก (มูล) • Tipiṭaka (Mūla) / สุตฺตปิฎก • Suttapiṭaka / สํยุตฺตนิกาย • Saṃyuttanikāya / ๑๐. พนฺธนสุตฺตํ • 10. Bandhanasuttaṃ
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / สํยุตฺตนิกาย (อฎฺฐกถา) • Saṃyuttanikāya (aṭṭhakathā) / ๑๐. พนฺธนสุตฺตวณฺณนา • 10. Bandhanasuttavaṇṇanā
