| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၁၀. ဗန္ဓနသုတ္တဝဏ္ဏနာ
10. Bandhanasuttavaṇṇanā
၁၂၁. ဣဒန္တိ ‘‘ဣဓ, ဘန္တေ’’တိအာဒိကံ ဝစနံ။ တေ ဘိက္ခူ အာရောစေသုန္တိ သမ္ဗန္ဓော။ တေသူတိ တေသု ရညာ ဗန္ဓာပိတမနုသ္သေသု။ သုကတကာရဏန္တိ သုကာရဏကိရိယံ အာရောစေသုံ, န ကေဝလံ တေသံ မနုသ္သာနံ ဗန္ဓာပိတဘာဝံ ။ ဣဒာနိ တမတ္ထံ ဝိတ္ထာရတော ဒသ္သေတုံ ‘‘ရညော ကိရာ’’တိအာဒိ ဝုတ္တံ။ အဋ္ဌဝင္ကောတိ အဋ္ဌံသော။ အန္တောဃရစာရိနောတိ အန္တေပုရဝာသိနော။
121.Idanti ‘‘idha, bhante’’tiādikaṃ vacanaṃ. Te bhikkhū ārocesunti sambandho. Tesūti tesu raññā bandhāpitamanussesu. Sukatakāraṇanti sukāraṇakiriyaṃ ārocesuṃ, na kevalaṃ tesaṃ manussānaṃ bandhāpitabhāvaṃ . Idāni tamatthaṃ vitthārato dassetuṃ ‘‘rañño kirā’’tiādi vuttaṃ. Aṭṭhavaṅkoti aṭṭhaṃso. Antogharacārinoti antepuravāsino.
ဥက္ကဋ္ဌေတိ ယုဒ္ဓေ။ မန္တီသူတိ ဂုတ္တမန္တီသု။ အကုတူဟလန္တိ သညတံ။ ပိယန္တိ ပိယာယိတဗ္ဗံ။ အန္နပာနမ္ဟိ မဓုရေ အဘုတ္တေ ဥပ္ပန္နေ။ အတ္ထေတိ အတ္ထေ ကိစ္စေ ဇာတေ ထိရန္တိ န ကထေန္တိ ကာယဗလမတ္တေန အပနေတုံ သက္ကုဏေယ္ယတ္တာ။ သုဋ္ဌု ရတ္တရတ္တာတိ အတိဝိယ ရတ္တာ ဧဝ ဟုတ္ဝာ ရတ္တာ။ သာရတ္တေနာတိ သာရဘာဝေန သာရဘာဝသညာယ။ ဩဟာရိနန္တိ ဟေဋ္ဌာ ဟရဏသီလန္တိ အာဟ ‘‘စတူသု အပာယေသု အာကဍ္ဎနက’’န္တိ။ သိထိလန္တိ သိထိလာကာရံ, န ပန သိထိလံ။ တေနာဟ ဘဂဝာ ‘‘ဒုပ္ပမုဉ္စ’’န္တိ။
Ukkaṭṭheti yuddhe. Mantīsūti guttamantīsu. Akutūhalanti saññataṃ. Piyanti piyāyitabbaṃ. Annapānamhi madhure abhutte uppanne. Attheti atthe kicce jāte thiranti na kathenti kāyabalamattena apanetuṃ sakkuṇeyyattā. Suṭṭhu rattarattāti ativiya rattā eva hutvā rattā. Sārattenāti sārabhāvena sārabhāvasaññāya. Ohārinanti heṭṭhā haraṇasīlanti āha ‘‘catūsu apāyesu ākaḍḍhanaka’’nti. Sithilanti sithilākāraṃ, na pana sithilaṃ. Tenāha bhagavā ‘‘duppamuñca’’nti.
ဗန္ဓနသုတ္တဝဏ္ဏနာ နိဋ္ဌိတာ။
Bandhanasuttavaṇṇanā niṭṭhitā.
ပဌမဝဂ္ဂဝဏ္ဏနာ နိဋ္ဌိတာ။
Paṭhamavaggavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၁၀. ဗန္ဓနသုတ္တံ • 10. Bandhanasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၁၀. ဗန္ဓနသုတ္တဝဏ္ဏနာ • 10. Bandhanasuttavaṇṇanā
