| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
16. ப³ந்து⁴ஜீவகவக்³கோ³
16. Bandhujīvakavaggo
1. ப³ந்து⁴ஜீவகத்தே²ரஅபதா³னவண்ணனா
1. Bandhujīvakattheraapadānavaṇṇanā
சந்த³ங்வ விமலங் ஸுத்³த⁴ந்திஆதி³கங் ஆயஸ்மதோ ப³ந்து⁴ஜீவகத்தே²ரஸ்ஸ அபதா³னங். அயம்பாயஸ்மா புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ ஸிகி²ஸ்ஸ ப⁴க³வதோ காலே குலகே³ஹே நிப்³ப³த்தோ விஞ்ஞுதங் பத்தோ க⁴ராவாஸங் ஸண்ட²பெத்வா வஸந்தோ ஸிகி²ஸ்ஸ ப⁴க³வதோ ரூபகாயஸம்பத்திங் தி³ஸ்வா பஸன்னமானஸோ ப³ந்து⁴ஜீவகபுப்பா²னி க³ஹெத்வா ப⁴க³வதோ பாத³மூலே பூஜேஸி. ப⁴க³வா தஸ்ஸ சித்தப்பஸாத³வட்³ட⁴னத்தா²ய அனுமோத³னமகாஸி. ஸோ யாவதாயுதங் ட²த்வா தேனேவ புஞ்ஞேன தே³வலோகே நிப்³ப³த்தோ ச² காமாவசரஸம்பத்தியோ அனுப⁴வித்வா மனுஸ்ஸேஸு ச சக்கவத்திஆதி³ஸம்பத்தியோ அனுப⁴வித்வா இமஸ்ஸ அம்ஹாகங் ஸம்மாஸம்பு³த்³த⁴ஸ்ஸ உப்பன்னகாலே க³ஹபதிகுலே நிப்³ப³த்தோ ரூபக்³க³யஸக்³க³ப்பத்தோ ஸத்து² த⁴ம்மதே³ஸனங் ஸுத்வா ஸத்³தா⁴ஜாதோ கே³ஹங் பஹாய பப்³ப³ஜிதோ அரஹத்தங் பாபுணி.
Candaṃvavimalaṃ suddhantiādikaṃ āyasmato bandhujīvakattherassa apadānaṃ. Ayampāyasmā purimabuddhesu katādhikāro tattha tattha bhave vivaṭṭūpanissayāni puññāni upacinanto sikhissa bhagavato kāle kulagehe nibbatto viññutaṃ patto gharāvāsaṃ saṇṭhapetvā vasanto sikhissa bhagavato rūpakāyasampattiṃ disvā pasannamānaso bandhujīvakapupphāni gahetvā bhagavato pādamūle pūjesi. Bhagavā tassa cittappasādavaḍḍhanatthāya anumodanamakāsi. So yāvatāyutaṃ ṭhatvā teneva puññena devaloke nibbatto cha kāmāvacarasampattiyo anubhavitvā manussesu ca cakkavattiādisampattiyo anubhavitvā imassa amhākaṃ sammāsambuddhassa uppannakāle gahapatikule nibbatto rūpaggayasaggappatto satthu dhammadesanaṃ sutvā saddhājāto gehaṃ pahāya pabbajito arahattaṃ pāpuṇi.
1. ஸோ புப்³பே³னிவாஸஞாணேன புப்³பே³ கதகுஸலகம்மங் அனுஸ்ஸரித்வா ஸோமனஸ்ஸஜாதோ புப்³ப³சரிதாபதா³னங் பகாஸெந்தோ சந்த³ங்வ விமலங் ஸுத்³த⁴ந்திஆதி³மாஹ. தத்த² சந்த³ங்வ விமலங் ஸுத்³த⁴ந்தி அப்³பா⁴, மஹிகா, து⁴மோ, ரஜோ, ராஹூதி இமேஹி உபக்கிலேஸமலேஹி விமுத்தங் சந்த³ங் இவ தி³யட்³ட⁴ஸஹஸ்ஸுபக்கிலேஸமலானங் பஹீனத்தா விமலங் நிக்கிலேஸத்தா ஸுத்³த⁴ங் பஸன்னங் ஸிகி²ங் ஸம்பு³த்³த⁴ந்தி ஸம்ப³ந்தோ⁴. கிலேஸகத்³த³மானங் அபா⁴வேன அனாவிலங். நந்தீ³ப⁴வஸங்கா²தாய ப³லவஸ்னேஹாய பரிஸமந்ததோ கீ²ணத்தா நந்தீ³ப⁴வபரிக்கீ²ணங். திண்ணங் லோகேதி லோகத்தயதோ திண்ணங் உத்திண்ணங் அதிக்கந்தங். விஸத்திகந்தி விஸத்திகங் வுச்சதி தண்ஹா, நித்தண்ஹந்தி அத்தோ².
1. So pubbenivāsañāṇena pubbe katakusalakammaṃ anussaritvā somanassajāto pubbacaritāpadānaṃ pakāsento candaṃva vimalaṃ suddhantiādimāha. Tattha candaṃva vimalaṃ suddhanti abbhā, mahikā, dhumo, rajo, rāhūti imehi upakkilesamalehi vimuttaṃ candaṃ iva diyaḍḍhasahassupakkilesamalānaṃ pahīnattā vimalaṃ nikkilesattā suddhaṃ pasannaṃ sikhiṃ sambuddhanti sambandho. Kilesakaddamānaṃ abhāvena anāvilaṃ. Nandībhavasaṅkhātāya balavasnehāya parisamantato khīṇattā nandībhavaparikkhīṇaṃ. Tiṇṇaṃ loketi lokattayato tiṇṇaṃ uttiṇṇaṃ atikkantaṃ. Visattikanti visattikaṃ vuccati taṇhā, nittaṇhanti attho.
2. நிப்³பா³பயந்தங் ஜனதந்தி த⁴ம்மவஸ்ஸங் வஸ்ஸந்தோ ஜனதங் ஜனஸமூஹங் கிலேஸபரிளாஹாபா⁴வேன நிப்³பா³பயந்தங் வூபஸமெந்தங். ஸயங் ஸங்ஸாரதோ திண்ணங், ஸப்³ப³ஸத்தே ஸங்ஸாரதோ தாரயந்தங் அதிக்கமெந்தங் சதுன்னங் ஸச்சானங் முனநதோ ஜானநதோ முனிங் ஸிகி²ங் ஸம்பு³த்³த⁴ந்தி ஸம்ப³ந்தோ⁴. வனஸ்மிங் ஜா²யமானந்தி ஆரம்மணூபனிஜ்ஜா²னலக்க²ணூபனிஜ்ஜா²னேஹி ஜா²யந்தங் சிந்தெந்தங் சித்தேன பா⁴வெந்தங் வனமஜ்ஜே²தி அத்தோ². ஏகக்³க³ங் ஏகக்³க³சித்தங் ஸுஸமாஹிதங் ஸுட்டு² ஆரம்மணே ஆஹிதங் ட²பிதசித்தங் ஸிகி²ங் முனிங் தி³ஸ்வாதி ஸம்ப³ந்தோ⁴.
2.Nibbāpayantaṃ janatanti dhammavassaṃ vassanto janataṃ janasamūhaṃ kilesapariḷāhābhāvena nibbāpayantaṃ vūpasamentaṃ. Sayaṃ saṃsārato tiṇṇaṃ, sabbasatte saṃsārato tārayantaṃ atikkamentaṃ catunnaṃ saccānaṃ munanato jānanato muniṃ sikhiṃ sambuddhanti sambandho. Vanasmiṃ jhāyamānanti ārammaṇūpanijjhānalakkhaṇūpanijjhānehi jhāyantaṃ cintentaṃ cittena bhāventaṃ vanamajjheti attho. Ekaggaṃ ekaggacittaṃ susamāhitaṃ suṭṭhu ārammaṇe āhitaṃ ṭhapitacittaṃ sikhiṃ muniṃ disvāti sambandho.
3. ப³ந்து⁴ஜீவகபுப்பா²னீதி ப³ந்தூ⁴னங் ஞாதீனங் ஜீவகங் ஜீவிதனிஸ்ஸயங் ஹத³யமங்ஸலோஹிதங் ப³ந்து⁴ஜீவகங் ஹத³யமங்ஸலோஹிதஸமானவண்ணங் புப்ப²ங் ப³ந்து⁴ஜீவகபுப்ப²ங் க³ஹெத்வா ஸிகி²னோ லோகப³ந்து⁴னோ பூஜேஸிந்தி அத்தோ². ஸேஸங் உத்தானத்த²மேவாதி.
3.Bandhujīvakapupphānīti bandhūnaṃ ñātīnaṃ jīvakaṃ jīvitanissayaṃ hadayamaṃsalohitaṃ bandhujīvakaṃ hadayamaṃsalohitasamānavaṇṇaṃ pupphaṃ bandhujīvakapupphaṃ gahetvā sikhino lokabandhuno pūjesinti attho. Sesaṃ uttānatthamevāti.
ப³ந்து⁴ஜீவகத்தே²ரஅபதா³னவண்ணனா ஸமத்தா.
Bandhujīvakattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 1. ப³ந்து⁴ஜீவகத்தே²ரஅபதா³னங் • 1. Bandhujīvakattheraapadānaṃ
