| Library / Tipiṭaka / တိပိဋက • Tipiṭaka / မဟာဝဂ္ဂပာဠိ • Mahāvaggapāḷi |
၁၇၂. ဗေလဋ္ဌကစ္စာနဝတ္ထု
172. Belaṭṭhakaccānavatthu
၂၈၄. အထ ခော ဘဂဝာ အန္ဓကဝိန္ဒေ ယထာဘိရန္တံ ဝိဟရိတ္ဝာ ယေန ရာဇဂဟံ တေန စာရိကံ ပက္ကာမိ, မဟတာ ဘိက္ခုသင္ဃေန သဒ္ဓိံ, အဍ္ဎတေလသေဟိ ဘိက္ခုသတေဟိ။ တေန ခော ပန သမယေန ဗေလဋ္ဌော ကစ္စာနော ရာဇဂဟာ အန္ဓကဝိန္ဒံ အဒ္ဓာနမဂ္ဂပ္ပဋိပန္နော ဟောတိ, ပဉ္စမတ္တေဟိ သကဋသတေဟိ, သဗ္ဗေဟေဝ ဂုဠကုမ္ဘပူရေဟိ။ အဒ္ဒသာ ခော ဘဂဝာ ဗေလဋ္ဌံ ကစ္စာနံ ဒူရတောဝ အာဂစ္ဆန္တံ, ဒိသ္ဝာန မဂ္ဂာ ဩက္ကမ္မ အညတရသ္မိံ ရုက္ခမူလေ နိသီဒိ။ အထ ခော ဗေလဋ္ဌော ကစ္စာနော ယေန ဘဂဝာ တေနုပသင္ကမိ, ဥပသင္ကမိတ္ဝာ ဘဂဝန္တံ အဘိဝာဒေတ္ဝာ ဧကမန္တံ အဋ္ဌာသိ။ ဧကမန္တံ ဌိတော ခော ဗေလဋ္ဌော ကစ္စာနော ဘဂဝန္တံ ဧတဒဝောစ – ‘‘ဣစ္ဆာမဟံ, ဘန္တေ, ဧကမေကသ္သ ဘိက္ခုနော ဧကမေကံ ဂုဠကုမ္ဘံ ဒာတု’’န္တိ။ ‘‘တေန ဟိ တ္ဝံ, ကစ္စာန, ဧကံယေဝ ဂုဠကုမ္ဘံ အာဟရာ’’တိ။ ‘‘ဧဝံ, ဘန္တေ’’တိ ခော ဗေလဋ္ဌော ကစ္စာနော ဘဂဝတော ပဋိသ္သုဏိတ္ဝာ ဧကံယေဝ ဂုဠကုမ္ဘံ အာဒာယ ယေန ဘဂဝာ တေနုပသင္ကမိ, ဥပသင္ကမိတ္ဝာ ဘဂဝန္တံ ဧတဒဝောစ – ‘‘အာဘတော 1, ဘန္တေ, ဂုဠကုမ္ဘော; ကထာဟံ, ဘန္တေ, ပဋိပဇ္ဇာမီ’’တိ? ‘‘တေန ဟိ တ္ဝံ, ကစ္စာန, ဘိက္ခူနံ ဂုဠံ ဒေဟီ’’တိ။ ‘‘ဧဝံ, ဘန္တေ’’တိ ခော ဗေလဋ္ဌော ကစ္စာနော ဘဂဝတော ပဋိသ္သုဏိတ္ဝာ ဘိက္ခူနံ ဂုဠံ ဒတ္ဝာ ဘဂဝန္တံ ဧတဒဝောစ – ‘‘ဒိန္နော, ဘန္တေ, ဘိက္ခူနံ ဂုဠော, ဗဟု စာယံ ဂုဠော အဝသိဋ္ဌော။ ကထာဟံ, ဘန္တေ, ပဋိပဇ္ဇာမီ’’တိ? ‘‘တေန ဟိ တ္ဝံ, ကစ္စာန, ဘိက္ခူနံ ဂုဠံ ယာဝဒတ္ထံ ဒေဟီ’’တိ။ ‘‘ဧဝံ, ဘန္တေ’’တိ ခော ဗေလဋ္ဌော ကစ္စာနော ဘဂဝတော ပဋိသ္သုဏိတ္ဝာ ဘိက္ခူနံ ဂုဠံ ယာဝဒတ္ထံ ဒတ္ဝာ ဘဂဝန္တံ ဧတဒဝောစ – ‘‘ဒိန္နော, ဘန္တေ, ဘိက္ခူနံ ဂုဠော ယာဝဒတ္ထော, ဗဟု စာယံ ဂုဠော အဝသိဋ္ဌော။ ကထာဟံ, ဘန္တေ, ပဋိပဇ္ဇာမီ’’တိ? ‘‘တေန ဟိ တ္ဝံ, ကစ္စာန, ဘိက္ခူ ဂုဠေဟိ သန္တပ္ပေဟီ’’တိ။ ‘‘ဧဝံ, ဘန္တေ’’တိ ခော ဗေလဋ္ဌော ကစ္စာနော ဘဂဝတော ပဋိသ္သုဏိတ္ဝာ ဘိက္ခူ ဂုဠေဟိ သန္တပ္ပေသိ။ ဧကစ္စေ ဘိက္ခူ ပတ္တေပိ ပူရေသုံ ပရိသ္သာဝနာနိပိ ထဝိကာယောပိ ပူရေသုံ။ အထ ခော ဗေလဋ္ဌော ကစ္စာနော ဘိက္ခူ ဂုဠေဟိ သန္တပ္ပေတ္ဝာ ဘဂဝန္တံ ဧတဒဝောစ – ‘‘သန္တပ္ပိတာ, ဘန္တေ, ဘိက္ခူ ဂုဠေဟိ, ဗဟု စာယံ ဂုဠော အဝသိဋ္ဌော။ ကထာဟံ, ဘန္တေ, ပဋိပဇ္ဇာမီ’’တိ? ‘‘တေန ဟိ တ္ဝံ, ကစ္စာန, ဝိဃာသာဒာနံ ဂုဠံ ဒေဟီ’’တိ။ ‘‘ဧဝံ, ဘန္တေ’’တိ ခော ဗေလဋ္ဌော ကစ္စာနော ဘဂဝတော ပဋိသ္သုဏိတ္ဝာ ဝိဃာသာဒာနံ ဂုဠံ ဒတ္ဝာ ဘဂဝန္တံ ဧတဒဝောစ – ‘‘ဒိန္နော, ဘန္တေ , ဝိဃာသာဒာနံ ဂုဠော, ဗဟု စာယံ ဂုဠော အဝသိဋ္ဌော။ ကထာဟံ, ဘန္တေ, ပဋိပဇ္ဇာမီ’’တိ? ‘‘တေန ဟိ တ္ဝံ, ကစ္စာန, ဝိဃာသာဒာနံ ဂုဠံ ယာဝဒတ္ထံ ဒေဟီ’’တိ။ ‘‘ဧဝံ, ဘန္တေ’’တိ ခော ဗေလဋ္ဌော ကစ္စာနော ဘဂဝတော ပဋိသ္သုဏိတ္ဝာ ဝိဃာသာဒာနံ ဂုဠံ ယာဝဒတ္ထံ ဒတ္ဝာ ဘဂဝန္တံ ဧတဒဝောစ – ‘‘ဒိန္နော, ဘန္တေ, ဝိဃာသာဒာနံ ဂုဠော ယာဝဒတ္ထော, ဗဟု စာယံ ဂုဠော အဝသိဋ္ဌော။ ကထာဟံ, ဘန္တေ, ပဋိပဇ္ဇာမီ’’တိ? ‘‘တေန ဟိ တ္ဝံ, ကစ္စာန, ဝိဃာသာဒေ ဂုဠေဟိ သန္တပ္ပေဟီ’’တိ။ ‘‘ဧဝံ, ဘန္တေ’’တိ ခော ဗေလဋ္ဌော ကစ္စာနော ဘဂဝတော ပဋိသ္သုဏိတ္ဝာ ဝိဃာသာဒေ ဂုဠေဟိ သန္တပ္ပေသိ။ ဧကစ္စေ ဝိဃာသာဒာ ကောလမ္ဗေပိ ဃဋေပိ ပူရေသုံ, ပိဋကာနိပိ ဥစ္ဆင္ဂေပိ ပူရေသုံ။ အထ ခော ဗေလဋ္ဌော ကစ္စာနော ဝိဃာသာဒေ ဂုဠေဟိ သန္တပ္ပေတ္ဝာ ဘဂဝန္တံ ဧတဒဝောစ – ‘‘သန္တပ္ပိတာ, ဘန္တေ, ဝိဃာသာဒာ ဂုဠေဟိ, ဗဟု စာယံ ဂုဠော အဝသိဋ္ဌော။ ကထာဟံ, ဘန္တေ, ပဋိပဇ္ဇာမီ’’တိ? ‘‘နာဟံ တံ, ကစ္စာန, ပသ္သာမိ သဒေဝကေ လောကေ သမာရကေ သဗ္ရဟ္မကေ သသ္သမဏဗ္ရာဟ္မဏိယာ ပဇာယ သဒေဝမနုသ္သာယ ယသ္သ သော ဂုဠော ပရိဘုတ္တော သမ္မာ ပရိဏာမံ ဂစ္ဆေယ္ယ, အညတ္ရ တထာဂတသ္သ ဝာ တထာဂတသာဝကသ္သ ဝာ။ တေန ဟိ တ္ဝံ, ကစ္စာန, တံ ဂုဠံ အပ္ပဟရိတေ ဝာ ဆဍ္ဍေဟိ, အပ္ပာဏကေ ဝာ ဥဒကေ ဩပိလာပေဟီ’’တိ။ ‘‘ဧဝံ, ဘန္တေ’’တိ ခော ဗေလဋ္ဌော ကစ္စာနော ဘဂဝတော ပဋိသ္သုဏိတ္ဝာ တံ ဂုဠံ အပ္ပာဏကေ ဥဒကေ ဩပိလာပေတိ။ အထ ခော သော ဂုဠော ဥဒကေ ပက္ခိတ္တော စိစ္စိဋာယတိ စိဋိစိဋာယတိ ပဓူပာယတိ 2 သမ္ပဓူပာယတိ။ သေယ္ယထာပိ နာမ ဖာလော ဒိဝသံသန္တတ္တော ဥဒကေ ပက္ခိတ္တော စိစ္စိဋာယတိ စိဋိစိဋာယတိ ပဓူပာယတိ သမ္ပဓူပာယတိ, ဧဝမေဝ သော ဂုဠော ဥဒကေ ပက္ခိတ္တော စိစ္စိဋာယတိ စိဋိစိဋာယတိ ပဓူပာယတိ သမ္ပဓူပာယတိ။
284. Atha kho bhagavā andhakavinde yathābhirantaṃ viharitvā yena rājagahaṃ tena cārikaṃ pakkāmi, mahatā bhikkhusaṅghena saddhiṃ, aḍḍhatelasehi bhikkhusatehi. Tena kho pana samayena belaṭṭho kaccāno rājagahā andhakavindaṃ addhānamaggappaṭipanno hoti, pañcamattehi sakaṭasatehi, sabbeheva guḷakumbhapūrehi. Addasā kho bhagavā belaṭṭhaṃ kaccānaṃ dūratova āgacchantaṃ, disvāna maggā okkamma aññatarasmiṃ rukkhamūle nisīdi. Atha kho belaṭṭho kaccāno yena bhagavā tenupasaṅkami, upasaṅkamitvā bhagavantaṃ abhivādetvā ekamantaṃ aṭṭhāsi. Ekamantaṃ ṭhito kho belaṭṭho kaccāno bhagavantaṃ etadavoca – ‘‘icchāmahaṃ, bhante, ekamekassa bhikkhuno ekamekaṃ guḷakumbhaṃ dātu’’nti. ‘‘Tena hi tvaṃ, kaccāna, ekaṃyeva guḷakumbhaṃ āharā’’ti. ‘‘Evaṃ, bhante’’ti kho belaṭṭho kaccāno bhagavato paṭissuṇitvā ekaṃyeva guḷakumbhaṃ ādāya yena bhagavā tenupasaṅkami, upasaṅkamitvā bhagavantaṃ etadavoca – ‘‘ābhato 3, bhante, guḷakumbho; kathāhaṃ, bhante, paṭipajjāmī’’ti? ‘‘Tena hi tvaṃ, kaccāna, bhikkhūnaṃ guḷaṃ dehī’’ti. ‘‘Evaṃ, bhante’’ti kho belaṭṭho kaccāno bhagavato paṭissuṇitvā bhikkhūnaṃ guḷaṃ datvā bhagavantaṃ etadavoca – ‘‘dinno, bhante, bhikkhūnaṃ guḷo, bahu cāyaṃ guḷo avasiṭṭho. Kathāhaṃ, bhante, paṭipajjāmī’’ti? ‘‘Tena hi tvaṃ, kaccāna, bhikkhūnaṃ guḷaṃ yāvadatthaṃ dehī’’ti. ‘‘Evaṃ, bhante’’ti kho belaṭṭho kaccāno bhagavato paṭissuṇitvā bhikkhūnaṃ guḷaṃ yāvadatthaṃ datvā bhagavantaṃ etadavoca – ‘‘dinno, bhante, bhikkhūnaṃ guḷo yāvadattho, bahu cāyaṃ guḷo avasiṭṭho. Kathāhaṃ, bhante, paṭipajjāmī’’ti? ‘‘Tena hi tvaṃ, kaccāna, bhikkhū guḷehi santappehī’’ti. ‘‘Evaṃ, bhante’’ti kho belaṭṭho kaccāno bhagavato paṭissuṇitvā bhikkhū guḷehi santappesi. Ekacce bhikkhū pattepi pūresuṃ parissāvanānipi thavikāyopi pūresuṃ. Atha kho belaṭṭho kaccāno bhikkhū guḷehi santappetvā bhagavantaṃ etadavoca – ‘‘santappitā, bhante, bhikkhū guḷehi, bahu cāyaṃ guḷo avasiṭṭho. Kathāhaṃ, bhante, paṭipajjāmī’’ti? ‘‘Tena hi tvaṃ, kaccāna, vighāsādānaṃ guḷaṃ dehī’’ti. ‘‘Evaṃ, bhante’’ti kho belaṭṭho kaccāno bhagavato paṭissuṇitvā vighāsādānaṃ guḷaṃ datvā bhagavantaṃ etadavoca – ‘‘dinno, bhante , vighāsādānaṃ guḷo, bahu cāyaṃ guḷo avasiṭṭho. Kathāhaṃ, bhante, paṭipajjāmī’’ti? ‘‘Tena hi tvaṃ, kaccāna, vighāsādānaṃ guḷaṃ yāvadatthaṃ dehī’’ti. ‘‘Evaṃ, bhante’’ti kho belaṭṭho kaccāno bhagavato paṭissuṇitvā vighāsādānaṃ guḷaṃ yāvadatthaṃ datvā bhagavantaṃ etadavoca – ‘‘dinno, bhante, vighāsādānaṃ guḷo yāvadattho, bahu cāyaṃ guḷo avasiṭṭho. Kathāhaṃ, bhante, paṭipajjāmī’’ti? ‘‘Tena hi tvaṃ, kaccāna, vighāsāde guḷehi santappehī’’ti. ‘‘Evaṃ, bhante’’ti kho belaṭṭho kaccāno bhagavato paṭissuṇitvā vighāsāde guḷehi santappesi. Ekacce vighāsādā kolambepi ghaṭepi pūresuṃ, piṭakānipi ucchaṅgepi pūresuṃ. Atha kho belaṭṭho kaccāno vighāsāde guḷehi santappetvā bhagavantaṃ etadavoca – ‘‘santappitā, bhante, vighāsādā guḷehi, bahu cāyaṃ guḷo avasiṭṭho. Kathāhaṃ, bhante, paṭipajjāmī’’ti? ‘‘Nāhaṃ taṃ, kaccāna, passāmi sadevake loke samārake sabrahmake sassamaṇabrāhmaṇiyā pajāya sadevamanussāya yassa so guḷo paribhutto sammā pariṇāmaṃ gaccheyya, aññatra tathāgatassa vā tathāgatasāvakassa vā. Tena hi tvaṃ, kaccāna, taṃ guḷaṃ appaharite vā chaḍḍehi, appāṇake vā udake opilāpehī’’ti. ‘‘Evaṃ, bhante’’ti kho belaṭṭho kaccāno bhagavato paṭissuṇitvā taṃ guḷaṃ appāṇake udake opilāpeti. Atha kho so guḷo udake pakkhitto cicciṭāyati ciṭiciṭāyati padhūpāyati 4 sampadhūpāyati. Seyyathāpi nāma phālo divasaṃsantatto udake pakkhitto cicciṭāyati ciṭiciṭāyati padhūpāyati sampadhūpāyati, evameva so guḷo udake pakkhitto cicciṭāyati ciṭiciṭāyati padhūpāyati sampadhūpāyati.
အထ ခော ဗေလဋ္ဌော ကစ္စာနော သံဝိဂ္ဂော လောမဟဋ္ဌဇာတော ယေန ဘဂဝာ တေနုပသင္ကမိ, ဥပသင္ကမိတ္ဝာ ဘဂဝန္တံ အဘိဝာဒေတ္ဝာ ဧကမန္တံ နိသီဒိ။ ဧကမန္တံ နိသိန္နသ္သ ခော ဗေလဋ္ဌသ္သ ကစ္စာနသ္သ ဘဂဝာ အနုပုဗ္ဗိံ ကထံ ကထေသိ, သေယ္ယထိဒံ – ‘‘ဒာနကထံ သီလကထံ သဂ္ဂကထံ, ကာမာနံ အာဒီနဝံ ဩကာရံ သံကိလေသံ, နေက္ခမ္မေ အာနိသံသံ ပကာသေသိ။ ယဒာ ဘဂဝာ အညာသိ ဗေလဋ္ဌံ ကစ္စာနံ ကလ္လစိတ္တံ, မုဒုစိတ္တံ, ဝိနီဝရဏစိတ္တံ, ဥဒဂ္ဂစိတ္တံ, ပသန္နစိတ္တံ, အထ ယာ ဗုဒ္ဓာနံ သာမုက္ကံသိကာ ဓမ္မဒေသနာ, တံ ပကာသေသိ။ပေ.။ ဧဝမေဝ ဗေလဋ္ဌသ္သ ကစ္စာနသ္သ တသ္မိံယေဝ အာသနေ ဝိရဇံ ဝီတမလံ ဓမ္မစက္ခုံ ဥဒပာဒိ – ယံ ကိဉ္စိ သမုဒယဓမ္မံ သဗ္ဗံ တံ နိရောဓဓမ္မန္တိ။ အထ ခော ဗေလဋ္ဌော ကစ္စာနော ဒိဋ္ဌဓမ္မော ပတ္တဓမ္မော ဝိဒိတဓမ္မော ပရိယောဂာဠ္ဟဓမ္မော တိဏ္ဏဝိစိကိစ္ဆော ဝိဂတကထံကထော ဝေသာရဇ္ဇပ္ပတ္တော အပရပ္ပစ္စယော သတ္ထုသာသနေ ဘဂဝန္တံ ဧတဒဝောစ – ‘‘အဘိက္ကန္တံ, ဘန္တေ။ အဘိက္ကန္တံ, ဘန္တေ။ သေယ္ယထာပိ, ဘန္တေ, နိက္ကုဇ္ဇိတံ ဝာ ဥက္ကုဇ္ဇေယ္ယ။ပေ.။ ဧဝမေဝံ ခော ဘဂဝတာ အနေကပရိယာယေန ဓမ္မော ပကာသိတော။ ဧသာဟံ, ဘန္တေ, ဘဂဝန္တံ သရဏံ ဂစ္ဆာမိ, ဓမ္မဉ္စ, ဘိက္ခုသင္ဃဉ္စ။ ဥပာသကံ မံ ဘဂဝာ ဓာရေတု အဇ္ဇတဂ္ဂေ ပာဏုပေတံ သရဏဂတ’’န္တိ။
Atha kho belaṭṭho kaccāno saṃviggo lomahaṭṭhajāto yena bhagavā tenupasaṅkami, upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinnassa kho belaṭṭhassa kaccānassa bhagavā anupubbiṃ kathaṃ kathesi, seyyathidaṃ – ‘‘dānakathaṃ sīlakathaṃ saggakathaṃ, kāmānaṃ ādīnavaṃ okāraṃ saṃkilesaṃ, nekkhamme ānisaṃsaṃ pakāsesi. Yadā bhagavā aññāsi belaṭṭhaṃ kaccānaṃ kallacittaṃ, muducittaṃ, vinīvaraṇacittaṃ, udaggacittaṃ, pasannacittaṃ, atha yā buddhānaṃ sāmukkaṃsikā dhammadesanā, taṃ pakāsesi…pe… evameva belaṭṭhassa kaccānassa tasmiṃyeva āsane virajaṃ vītamalaṃ dhammacakkhuṃ udapādi – yaṃ kiñci samudayadhammaṃ sabbaṃ taṃ nirodhadhammanti. Atha kho belaṭṭho kaccāno diṭṭhadhammo pattadhammo viditadhammo pariyogāḷhadhammo tiṇṇavicikiccho vigatakathaṃkatho vesārajjappatto aparappaccayo satthusāsane bhagavantaṃ etadavoca – ‘‘abhikkantaṃ, bhante. Abhikkantaṃ, bhante. Seyyathāpi, bhante, nikkujjitaṃ vā ukkujjeyya…pe… evamevaṃ kho bhagavatā anekapariyāyena dhammo pakāsito. Esāhaṃ, bhante, bhagavantaṃ saraṇaṃ gacchāmi, dhammañca, bhikkhusaṅghañca. Upāsakaṃ maṃ bhagavā dhāretu ajjatagge pāṇupetaṃ saraṇagata’’nti.
အထ ခော ဘဂဝာ အနုပုဗ္ဗေန စာရိကံ စရမာနော ယေန ရာဇဂဟံ တဒဝသရိ။ တတ္ရ သုဒံ ဘဂဝာ ရာဇဂဟေ ဝိဟရတိ ဝေဠုဝနေ ကလန္ဒကနိဝာပေ။ တေန ခော ပန သမယေန ရာဇဂဟေ ဂုဠော ဥသ္သန္နော ဟောတိ။ ဘိက္ခူ – ဂိလာနသ္သေဝ ဘဂဝတာ ဂုဠော အနုညာတော, နော အဂိလာနသ္သာတိ – ကုက္ကုစ္စာယန္တာ ဂုဠံ န ဘုဉ္ဇန္တိ။ ဘဂဝတော ဧတမတ္ထံ အာရောစေသုံ။ အနုဇာနာမိ, ဘိက္ခဝေ, ဂိလာနသ္သ ဂုဠံ, အဂိလာနသ္သ ဂုဠောဒကန္တိ။
Atha kho bhagavā anupubbena cārikaṃ caramāno yena rājagahaṃ tadavasari. Tatra sudaṃ bhagavā rājagahe viharati veḷuvane kalandakanivāpe. Tena kho pana samayena rājagahe guḷo ussanno hoti. Bhikkhū – gilānasseva bhagavatā guḷo anuññāto, no agilānassāti – kukkuccāyantā guḷaṃ na bhuñjanti. Bhagavato etamatthaṃ ārocesuṃ. Anujānāmi, bhikkhave, gilānassa guḷaṃ, agilānassa guḷodakanti.
ဗေလဋ္ဌကစ္စာနဝတ္ထု နိဋ္ဌိတံ။
Belaṭṭhakaccānavatthu niṭṭhitaṃ.
Footnotes:
Related texts:
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / မဟာဝဂ္ဂ-အဋ္ဌကထာ • Mahāvagga-aṭṭhakathā / ယာဂုမဓုဂောဠကာဒိကထာ • Yāgumadhugoḷakādikathā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / ယာဂုမဓုဂောဠကာဒိကထာဝဏ္ဏနာ • Yāgumadhugoḷakādikathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / ယာဂုမဓုဂောဠကာဒိကထာဝဏ္ဏနာ • Yāgumadhugoḷakādikathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ၁၇၀. ယာဂုမဓုဂောဠကာဒိကထာ • 170. Yāgumadhugoḷakādikathā
