| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
১০. ভদ্দজিসুত্তং
10. Bhaddajisuttaṃ
১৭০. একং সমযং আযস্মা আনন্দো কোসম্বিযং ৰিহরতি ঘোসিতারামে। অথ খো আযস্মা ভদ্দজি যেনাযস্মা আনন্দো তেনুপসঙ্কমি; উপসঙ্কমিত্ৰা আযস্মতা আনন্দেন সদ্ধিং সম্মোদি। সম্মোদনীযং কথং সারণীযং ৰীতিসারেত্ৰা একমন্তং নিসীদি। একমন্তং নিসিন্নং খো আযস্মন্তং ভদ্দজিং আযস্মা আনন্দো এতদৰোচ – ‘‘কিং নু খো, আৰুসো ভদ্দজি, দস্সনানং অগ্গং, কিং সৰনানং অগ্গং, কিং সুখানং অগ্গং, কিং সঞ্ঞানং অগ্গং, কিং ভৰানং অগ্গ’’ন্তি?
170. Ekaṃ samayaṃ āyasmā ānando kosambiyaṃ viharati ghositārāme. Atha kho āyasmā bhaddaji yenāyasmā ānando tenupasaṅkami; upasaṅkamitvā āyasmatā ānandena saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinnaṃ kho āyasmantaṃ bhaddajiṃ āyasmā ānando etadavoca – ‘‘kiṃ nu kho, āvuso bhaddaji, dassanānaṃ aggaṃ, kiṃ savanānaṃ aggaṃ, kiṃ sukhānaṃ aggaṃ, kiṃ saññānaṃ aggaṃ, kiṃ bhavānaṃ agga’’nti?
‘‘অত্থাৰুসো, ব্রহ্মা অভিভূ অনভিভূতো অঞ্ঞদত্থুদসো ৰসৰত্তী, যো তং ব্রহ্মানং পস্সতি, ইদং দস্সনানং অগ্গং। অত্থাৰুসো, আভস্সরা নাম দেৰা সুখেন অভিসন্না পরিসন্না। তে কদাচি করহচি উদানং উদানেন্তি – ‘অহো সুখং, অহো সুখ’ন্তি! যো তং সদ্দং সুণাতি, ইদং সৰনানং অগ্গং। অত্থাৰুসো, সুভকিণ্হা নাম দেৰা। তে সন্তংযেৰ তুসিতা সুখং পটিৰেদেন্তি, ইদং সুখানং অগ্গং। অত্থাৰুসো, আকিঞ্চঞ্ঞাযতনূপগা দেৰা, ইদং সঞ্ঞানং অগ্গং। অত্থাৰুসো, নেৰসঞ্ঞানাসঞ্ঞাযতনূপগা দেৰা, ইদং ভৰানং অগ্গ’’ন্তি। ‘‘সমেতি খো ইদং আযস্মতো ভদ্দজিস্স, যদিদং বহুনা জনেনা’’তি?
‘‘Atthāvuso, brahmā abhibhū anabhibhūto aññadatthudaso vasavattī, yo taṃ brahmānaṃ passati, idaṃ dassanānaṃ aggaṃ. Atthāvuso, ābhassarā nāma devā sukhena abhisannā parisannā. Te kadāci karahaci udānaṃ udānenti – ‘aho sukhaṃ, aho sukha’nti! Yo taṃ saddaṃ suṇāti, idaṃ savanānaṃ aggaṃ. Atthāvuso, subhakiṇhā nāma devā. Te santaṃyeva tusitā sukhaṃ paṭivedenti, idaṃ sukhānaṃ aggaṃ. Atthāvuso, ākiñcaññāyatanūpagā devā, idaṃ saññānaṃ aggaṃ. Atthāvuso, nevasaññānāsaññāyatanūpagā devā, idaṃ bhavānaṃ agga’’nti. ‘‘Sameti kho idaṃ āyasmato bhaddajissa, yadidaṃ bahunā janenā’’ti?
‘‘আযস্মা খো, আনন্দো, বহুস্সুতো। পটিভাতু আযস্মন্তংযেৰ আনন্দ’’ন্তি। ‘‘তেনহাৰুসো ভদ্দজি, সুণাহি, সাধুকং মনসি করোহি; ভাসিস্সামী’’তি। ‘‘এৰমাৰুসো’’তি খো আযস্মা ভদ্দজি আযস্মতো আনন্দস্স পচ্চস্সোসি। আযস্মা আনন্দো এতদৰোচ –
‘‘Āyasmā kho, ānando, bahussuto. Paṭibhātu āyasmantaṃyeva ānanda’’nti. ‘‘Tenahāvuso bhaddaji, suṇāhi, sādhukaṃ manasi karohi; bhāsissāmī’’ti. ‘‘Evamāvuso’’ti kho āyasmā bhaddaji āyasmato ānandassa paccassosi. Āyasmā ānando etadavoca –
‘‘যথা পস্সতো খো, আৰুসো, অনন্তরা আসৰানং খযো হোতি, ইদং দস্সনানং অগ্গং। যথা সুণতো অনন্তরা আসৰানং খযো হোতি, ইদং সৰনানং অগ্গং। যথা সুখিতস্স অনন্তরা আসৰানং খযো হোতি, ইদং সুখানং অগ্গং। যথা সঞ্ঞিস্স অনন্তরা আসৰানং খযো হোতি, ইদং সঞ্ঞানং অগ্গং। যথা ভূতস্স অনন্তরা আসৰানং খযো হোতি, ইদং ভৰানং অগ্গ’’ন্তি। দসমং।
‘‘Yathā passato kho, āvuso, anantarā āsavānaṃ khayo hoti, idaṃ dassanānaṃ aggaṃ. Yathā suṇato anantarā āsavānaṃ khayo hoti, idaṃ savanānaṃ aggaṃ. Yathā sukhitassa anantarā āsavānaṃ khayo hoti, idaṃ sukhānaṃ aggaṃ. Yathā saññissa anantarā āsavānaṃ khayo hoti, idaṃ saññānaṃ aggaṃ. Yathā bhūtassa anantarā āsavānaṃ khayo hoti, idaṃ bhavānaṃ agga’’nti. Dasamaṃ.
আঘাতৰগ্গো দুতিযো।
Āghātavaggo dutiyo.
তস্সুদ্দানং –
Tassuddānaṃ –
দ্ৰে আঘাতৰিনযা, সাকচ্ছা সাজীৰতো পঞ্হং।
Dve āghātavinayā, sākacchā sājīvato pañhaṃ;
পুচ্ছা নিরোধো চোদনা, সীলং নিসন্তি ভদ্দজীতি॥
Pucchā nirodho codanā, sīlaṃ nisanti bhaddajīti.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ১০. ভদ্দজিসুত্তৰণ্ণনা • 10. Bhaddajisuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ১০. ভদ্দজিসুত্তৰণ্ণনা • 10. Bhaddajisuttavaṇṇanā
