| Library / Tipiṭaka / តិបិដក • Tipiṭaka / អង្គុត្តរនិកាយ • Aṅguttaranikāya |
១០. ភទ្ទជិសុត្តំ
10. Bhaddajisuttaṃ
១៧០. ឯកំ សមយំ អាយស្មា អានន្ទោ កោសម្ពិយំ វិហរតិ ឃោសិតារាមេ។ អថ ខោ អាយស្មា ភទ្ទជិ យេនាយស្មា អានន្ទោ តេនុបសង្កមិ; ឧបសង្កមិត្វា អាយស្មតា អានន្ទេន សទ្ធិំ សម្មោទិ។ សម្មោទនីយំ កថំ សារណីយំ វីតិសារេត្វា ឯកមន្តំ និសីទិ។ ឯកមន្តំ និសិន្នំ ខោ អាយស្មន្តំ ភទ្ទជិំ អាយស្មា អានន្ទោ ឯតទវោច – ‘‘កិំ នុ ខោ, អាវុសោ ភទ្ទជិ, ទស្សនានំ អគ្គំ, កិំ សវនានំ អគ្គំ, កិំ សុខានំ អគ្គំ, កិំ សញ្ញានំ អគ្គំ, កិំ ភវានំ អគ្គ’’ន្តិ?
170. Ekaṃ samayaṃ āyasmā ānando kosambiyaṃ viharati ghositārāme. Atha kho āyasmā bhaddaji yenāyasmā ānando tenupasaṅkami; upasaṅkamitvā āyasmatā ānandena saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinnaṃ kho āyasmantaṃ bhaddajiṃ āyasmā ānando etadavoca – ‘‘kiṃ nu kho, āvuso bhaddaji, dassanānaṃ aggaṃ, kiṃ savanānaṃ aggaṃ, kiṃ sukhānaṃ aggaṃ, kiṃ saññānaṃ aggaṃ, kiṃ bhavānaṃ agga’’nti?
‘‘អត្ថាវុសោ, ព្រហ្មា អភិភូ អនភិភូតោ អញ្ញទត្ថុទសោ វសវត្តី, យោ តំ ព្រហ្មានំ បស្សតិ, ឥទំ ទស្សនានំ អគ្គំ។ អត្ថាវុសោ, អាភស្សរា នាម ទេវា សុខេន អភិសន្នា បរិសន្នា។ តេ កទាចិ ករហចិ ឧទានំ ឧទានេន្តិ – ‘អហោ សុខំ, អហោ សុខ’ន្តិ! យោ តំ សទ្ទំ សុណាតិ, ឥទំ សវនានំ អគ្គំ។ អត្ថាវុសោ, សុភកិណ្ហា នាម ទេវា។ តេ សន្តំយេវ តុសិតា សុខំ បដិវេទេន្តិ, ឥទំ សុខានំ អគ្គំ។ អត្ថាវុសោ, អាកិញ្ចញ្ញាយតនូបគា ទេវា, ឥទំ សញ្ញានំ អគ្គំ។ អត្ថាវុសោ, នេវសញ្ញានាសញ្ញាយតនូបគា ទេវា, ឥទំ ភវានំ អគ្គ’’ន្តិ។ ‘‘សមេតិ ខោ ឥទំ អាយស្មតោ ភទ្ទជិស្ស, យទិទំ ពហុនា ជនេនា’’តិ?
‘‘Atthāvuso, brahmā abhibhū anabhibhūto aññadatthudaso vasavattī, yo taṃ brahmānaṃ passati, idaṃ dassanānaṃ aggaṃ. Atthāvuso, ābhassarā nāma devā sukhena abhisannā parisannā. Te kadāci karahaci udānaṃ udānenti – ‘aho sukhaṃ, aho sukha’nti! Yo taṃ saddaṃ suṇāti, idaṃ savanānaṃ aggaṃ. Atthāvuso, subhakiṇhā nāma devā. Te santaṃyeva tusitā sukhaṃ paṭivedenti, idaṃ sukhānaṃ aggaṃ. Atthāvuso, ākiñcaññāyatanūpagā devā, idaṃ saññānaṃ aggaṃ. Atthāvuso, nevasaññānāsaññāyatanūpagā devā, idaṃ bhavānaṃ agga’’nti. ‘‘Sameti kho idaṃ āyasmato bhaddajissa, yadidaṃ bahunā janenā’’ti?
‘‘អាយស្មា ខោ, អានន្ទោ, ពហុស្សុតោ។ បដិភាតុ អាយស្មន្តំយេវ អានន្ទ’’ន្តិ។ ‘‘តេនហាវុសោ ភទ្ទជិ, សុណាហិ, សាធុកំ មនសិ ករោហិ; ភាសិស្សាមី’’តិ។ ‘‘ឯវមាវុសោ’’តិ ខោ អាយស្មា ភទ្ទជិ អាយស្មតោ អានន្ទស្ស បច្ចស្សោសិ។ អាយស្មា អានន្ទោ ឯតទវោច –
‘‘Āyasmā kho, ānando, bahussuto. Paṭibhātu āyasmantaṃyeva ānanda’’nti. ‘‘Tenahāvuso bhaddaji, suṇāhi, sādhukaṃ manasi karohi; bhāsissāmī’’ti. ‘‘Evamāvuso’’ti kho āyasmā bhaddaji āyasmato ānandassa paccassosi. Āyasmā ānando etadavoca –
‘‘យថា បស្សតោ ខោ, អាវុសោ, អនន្តរា អាសវានំ ខយោ ហោតិ, ឥទំ ទស្សនានំ អគ្គំ។ យថា សុណតោ អនន្តរា អាសវានំ ខយោ ហោតិ, ឥទំ សវនានំ អគ្គំ។ យថា សុខិតស្ស អនន្តរា អាសវានំ ខយោ ហោតិ, ឥទំ សុខានំ អគ្គំ។ យថា សញ្ញិស្ស អនន្តរា អាសវានំ ខយោ ហោតិ, ឥទំ សញ្ញានំ អគ្គំ។ យថា ភូតស្ស អនន្តរា អាសវានំ ខយោ ហោតិ, ឥទំ ភវានំ អគ្គ’’ន្តិ។ ទសមំ។
‘‘Yathā passato kho, āvuso, anantarā āsavānaṃ khayo hoti, idaṃ dassanānaṃ aggaṃ. Yathā suṇato anantarā āsavānaṃ khayo hoti, idaṃ savanānaṃ aggaṃ. Yathā sukhitassa anantarā āsavānaṃ khayo hoti, idaṃ sukhānaṃ aggaṃ. Yathā saññissa anantarā āsavānaṃ khayo hoti, idaṃ saññānaṃ aggaṃ. Yathā bhūtassa anantarā āsavānaṃ khayo hoti, idaṃ bhavānaṃ agga’’nti. Dasamaṃ.
អាឃាតវគ្គោ ទុតិយោ។
Āghātavaggo dutiyo.
តស្សុទ្ទានំ –
Tassuddānaṃ –
ទ្វេ អាឃាតវិនយា, សាកច្ឆា សាជីវតោ បញ្ហំ;
Dve āghātavinayā, sākacchā sājīvato pañhaṃ;
បុច្ឆា និរោធោ ចោទនា, សីលំ និសន្តិ ភទ្ទជីតិ។
Pucchā nirodho codanā, sīlaṃ nisanti bhaddajīti.
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā) / ១០. ភទ្ទជិសុត្តវណ្ណនា • 10. Bhaddajisuttavaṇṇanā
ដីកា • Tīkā / សុត្តបិដក (ដីកា) • Suttapiṭaka (ṭīkā) / អង្គុត្តរនិកាយ (ដីកា) • Aṅguttaranikāya (ṭīkā) / ១០. ភទ្ទជិសុត្តវណ្ណនា • 10. Bhaddajisuttavaṇṇanā
