| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
10. ப⁴த்³த³ஜிஸுத்தவண்ணனா
10. Bhaddajisuttavaṇṇanā
170. த³ஸமே அபி⁴பூ⁴தி அபி⁴ப⁴வித்வா டி²தோ ஜெட்ட²கோ. அனபி⁴பூ⁴தோதி அஞ்ஞேஹி அனபி⁴பூ⁴தோ. அஞ்ஞத³த்தூ²தி ஏகங்ஸவசனே நிபாதோ. த³ஸ்ஸனவஸேன த³ஸோ, ஸப்³ப³ங் பஸ்ஸதீதி அதி⁴ப்பாயோ. வஸவத்தீதி ஸப்³ப³ங் ஜனங் வஸே வத்தேதி. யதா² பஸ்ஸதோதி இட்டா²ரம்மணங் வா ஹோது அனிட்டா²ரம்மணங் வா , யேனாகாரேன தங் பஸ்ஸந்தஸ்ஸ. அனந்தரா ஆஸவானங் க²யோ ஹோதீதி அனந்தராயேவ அரஹத்தங் உப்பஜ்ஜதி. யதா² ஸுணதோதி எத்தா²பி ஏஸேவ நயோ. அத² வா யங் சக்கு²னா ரூபங் தி³ஸ்வா நிரந்தரமேவ விபஸ்ஸனங் பட்ட²பெத்வா அரஹத்தங் பாபுணாதி, தங் தஸ்ஸ அரஹத்தங் சக்கு²விஞ்ஞாணானந்தரங் நாம ஹோதி. தங் ஸந்தா⁴ய வுத்தங் – இத³ங் த³ஸ்ஸனானங் அக்³க³ந்தி. து³தியபதே³பி ஏஸேவ நயோ.
170. Dasame abhibhūti abhibhavitvā ṭhito jeṭṭhako. Anabhibhūtoti aññehi anabhibhūto. Aññadatthūti ekaṃsavacane nipāto. Dassanavasena daso, sabbaṃ passatīti adhippāyo. Vasavattīti sabbaṃ janaṃ vase vatteti. Yathā passatoti iṭṭhārammaṇaṃ vā hotu aniṭṭhārammaṇaṃ vā , yenākārena taṃ passantassa. Anantarā āsavānaṃ khayo hotīti anantarāyeva arahattaṃ uppajjati. Yathā suṇatoti etthāpi eseva nayo. Atha vā yaṃ cakkhunā rūpaṃ disvā nirantarameva vipassanaṃ paṭṭhapetvā arahattaṃ pāpuṇāti, taṃ tassa arahattaṃ cakkhuviññāṇānantaraṃ nāma hoti. Taṃ sandhāya vuttaṃ – idaṃ dassanānaṃ agganti. Dutiyapadepi eseva nayo.
யதா² ஸுகி²தஸ்ஸாதி யேன மக்³க³ஸுகே²ன ஸுகி²தஸ்ஸ. அனந்தரா ஆஸவானங் க²யோ ஹோதீதி ஸமனந்தரமேவ அரஹத்தங் உப்பஜ்ஜதி. இத³ங் ஸுகா²னங் அக்³க³ந்தி இத³ங் மக்³க³ஸுக²ங் ஸுகா²னங் உத்தமங். யதா² ஸஞ்ஞிஸ்ஸாதி இதா⁴பி மக்³க³ஸஞ்ஞாவ அதி⁴ப்பேதா. யதா² பூ⁴தஸ்ஸாதி யஸ்மிங் ப⁴வே யஸ்மிங் அத்தபா⁴வே டி²தஸ்ஸ. அனந்தராதி அனந்தராயேன அரஹத்தங் உப்பஜ்ஜதி. இத³ங் ப⁴வானங் அக்³க³ந்தி அயங் பச்சி²மோ அத்தபா⁴வோ ப⁴வானங் அக்³க³ங் நாம. அத² வா யதா² பூ⁴தஸ்ஸாதி யேஹி க²ந்தே⁴ஹி மக்³க³க்க²ணே பூ⁴தஸ்ஸ விஜ்ஜமானஸ்ஸ. அனந்தரா ஆஸவானங் க²யோ ஹோதீதி மக்³கா³னந்தரமேவ ப²லங் உப்பஜ்ஜதி. இத³ங் ப⁴வானங் அக்³க³ந்தி இத³ங் மக்³க³க்க²ணே க²ந்த⁴பஞ்சகங் ப⁴வானங் அக்³க³ங் நாமாதி.
Yathā sukhitassāti yena maggasukhena sukhitassa. Anantarā āsavānaṃ khayo hotīti samanantarameva arahattaṃ uppajjati. Idaṃ sukhānaṃ agganti idaṃ maggasukhaṃ sukhānaṃ uttamaṃ. Yathā saññissāti idhāpi maggasaññāva adhippetā. Yathā bhūtassāti yasmiṃ bhave yasmiṃ attabhāve ṭhitassa. Anantarāti anantarāyena arahattaṃ uppajjati. idaṃ bhavānaṃ agganti ayaṃ pacchimo attabhāvo bhavānaṃ aggaṃ nāma. Atha vā yathā bhūtassāti yehi khandhehi maggakkhaṇe bhūtassa vijjamānassa. Anantarā āsavānaṃ khayo hotīti maggānantarameva phalaṃ uppajjati. Idaṃ bhavānaṃ agganti idaṃ maggakkhaṇe khandhapañcakaṃ bhavānaṃ aggaṃ nāmāti.
ஆகா⁴தவக்³கோ³ து³தியோ.
Āghātavaggo dutiyo.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 10. ப⁴த்³த³ஜிஸுத்தங் • 10. Bhaddajisuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 10. ப⁴த்³த³ஜிஸுத்தவண்ணனா • 10. Bhaddajisuttavaṇṇanā
