| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) |
10. භද්‌දජිසුත්‌තවණ්‌ණනා
10. Bhaddajisuttavaṇṇanā
170. දසමෙ අභිභූති අභිභවිත්‌වා ඨිතො ජෙට්‌ඨකො. අනභිභූතොති අඤ්‌ඤෙහි අනභිභූතො. අඤ්‌ඤදත්‌ථූති එකංසවචනෙ නිපාතො. දස්‌සනවසෙන දසො, සබ්‌බං පස්‌සතීති අධිප්‌පායො. වසවත්‌තීති සබ්‌බං ජනං වසෙ වත්‌තෙති. යථා පස්‌සතොති ඉට්‌ඨාරම්‌මණං වා හොතු අනිට්‌ඨාරම්‌මණං වා , යෙනාකාරෙන තං පස්‌සන්‌තස්‌ස. අනන්‌තරා ආසවානං ඛයො හොතීති අනන්‌තරායෙව අරහත්‌තං උප්‌පජ්‌ජති. යථා සුණතොති එත්‌ථාපි එසෙව නයො. අථ වා යං චක්‌ඛුනා රූපං දිස්‌වා නිරන්‌තරමෙව විපස්‌සනං පට්‌ඨපෙත්‌වා අරහත්‌තං පාපුණාති, තං තස්‌ස අරහත්‌තං චක්‌ඛුවිඤ්‌ඤාණානන්‌තරං නාම හොති. තං සන්‌ධාය වුත්‌තං – ඉදං දස්‌සනානං අග්‌ගන්‌ති. දුතියපදෙපි එසෙව නයො.
170. Dasame abhibhūti abhibhavitvā ṭhito jeṭṭhako. Anabhibhūtoti aññehi anabhibhūto. Aññadatthūti ekaṃsavacane nipāto. Dassanavasena daso, sabbaṃ passatīti adhippāyo. Vasavattīti sabbaṃ janaṃ vase vatteti. Yathā passatoti iṭṭhārammaṇaṃ vā hotu aniṭṭhārammaṇaṃ vā , yenākārena taṃ passantassa. Anantarā āsavānaṃ khayo hotīti anantarāyeva arahattaṃ uppajjati. Yathā suṇatoti etthāpi eseva nayo. Atha vā yaṃ cakkhunā rūpaṃ disvā nirantarameva vipassanaṃ paṭṭhapetvā arahattaṃ pāpuṇāti, taṃ tassa arahattaṃ cakkhuviññāṇānantaraṃ nāma hoti. Taṃ sandhāya vuttaṃ – idaṃ dassanānaṃ agganti. Dutiyapadepi eseva nayo.
යථා සුඛිතස්‌සාති යෙන මග්‌ගසුඛෙන සුඛිතස්‌ස. අනන්‌තරා ආසවානං ඛයො හොතීති සමනන්‌තරමෙව අරහත්‌තං උප්‌පජ්‌ජති. ඉදං සුඛානං අග්‌ගන්‌ති ඉදං මග්‌ගසුඛං සුඛානං උත්‌තමං. යථා සඤ්‌ඤිස්‌සාති ඉධාපි මග්‌ගසඤ්‌ඤාව අධිප්‌පෙතා. යථා භූතස්‌සාති යස්‌මිං භවෙ යස්‌මිං අත්‌තභාවෙ ඨිතස්‌ස. අනන්‌තරාති අනන්‌තරායෙන අරහත්‌තං උප්‌පජ්‌ජති. ඉදං භවානං අග්‌ගන්‌ති අයං පච්‌ඡිමො අත්‌තභාවො භවානං අග්‌ගං නාම. අථ වා යථා භූතස්‌සාති යෙහි ඛන්‌ධෙහි මග්‌ගක්‌ඛණෙ භූතස්‌ස විජ්‌ජමානස්‌ස. අනන්‌තරා ආසවානං ඛයො හොතීති මග්‌ගානන්‌තරමෙව ඵලං උප්‌පජ්‌ජති. ඉදං භවානං අග්‌ගන්‌ති ඉදං මග්‌ගක්‌ඛණෙ ඛන්‌ධපඤ්‌චකං භවානං අග්‌ගං නාමාති.
Yathā sukhitassāti yena maggasukhena sukhitassa. Anantarā āsavānaṃ khayo hotīti samanantarameva arahattaṃ uppajjati. Idaṃ sukhānaṃ agganti idaṃ maggasukhaṃ sukhānaṃ uttamaṃ. Yathā saññissāti idhāpi maggasaññāva adhippetā. Yathā bhūtassāti yasmiṃ bhave yasmiṃ attabhāve ṭhitassa. Anantarāti anantarāyena arahattaṃ uppajjati. idaṃ bhavānaṃ agganti ayaṃ pacchimo attabhāvo bhavānaṃ aggaṃ nāma. Atha vā yathā bhūtassāti yehi khandhehi maggakkhaṇe bhūtassa vijjamānassa. Anantarā āsavānaṃ khayo hotīti maggānantarameva phalaṃ uppajjati. Idaṃ bhavānaṃ agganti idaṃ maggakkhaṇe khandhapañcakaṃ bhavānaṃ aggaṃ nāmāti.
ආඝාතවග්‌ගො දුතියො.
Āghātavaggo dutiyo.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya / 10. භද්‌දජිසුත්‌තං • 10. Bhaddajisuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 10. භද්‌දජිසුත්‌තවණ්‌ණනා • 10. Bhaddajisuttavaṇṇanā
