| Library / Tipiṭaka / तिपिटक • Tipiṭaka / अपदानपाळि • Apadānapāḷi |
८. भद्दजित्थेरअपदानं
8. Bhaddajittheraapadānaṃ
९८.
98.
‘‘ओगय्ह यं पोक्खरणिं, नानाकुञ्जरसेवितं।
‘‘Ogayha yaṃ pokkharaṇiṃ, nānākuñjarasevitaṃ;
उद्धरामि भिसं तत्थ, घासहेतु अहं तदा॥
Uddharāmi bhisaṃ tattha, ghāsahetu ahaṃ tadā.
९९.
99.
‘‘भगवा तम्हि समये, पदुमुत्तरसव्हयो।
‘‘Bhagavā tamhi samaye, padumuttarasavhayo;
रत्तम्बरधरो बुद्धो, गच्छते अनिलञ्जसे॥
Rattambaradharo buddho, gacchate anilañjase.
१००.
100.
‘‘धुनन्तो पंसुकूलानि, सद्दं अस्सोसहं तदा।
‘‘Dhunanto paṃsukūlāni, saddaṃ assosahaṃ tadā;
उद्धं निज्झायमानोहं, अद्दसं लोकनायकं॥
Uddhaṃ nijjhāyamānohaṃ, addasaṃ lokanāyakaṃ.
१०१.
101.
‘‘तत्थेव ठितको सन्तो, आयाचिं लोकनायकं।
‘‘Tattheva ṭhitako santo, āyāciṃ lokanāyakaṃ;
१०२.
102.
‘‘पटिग्गण्हातु मे बुद्धो, अनुकम्पाय चक्खुमा।
‘‘Paṭiggaṇhātu me buddho, anukampāya cakkhumā;
ततो कारुणिको सत्था, ओरोहित्वा महायसो॥
Tato kāruṇiko satthā, orohitvā mahāyaso.
१०३.
103.
‘‘पटिग्गण्हि मम भिक्खं, अनुकम्पाय चक्खुमा।
‘‘Paṭiggaṇhi mama bhikkhaṃ, anukampāya cakkhumā;
पटिग्गहेत्वा सम्बुद्धो, अका मे अनुमोदनं॥
Paṭiggahetvā sambuddho, akā me anumodanaṃ.
१०४.
104.
‘‘‘सुखी होतु महापुञ्ञ, गति तुय्हं समिज्झतु।
‘‘‘Sukhī hotu mahāpuñña, gati tuyhaṃ samijjhatu;
इमिना भिसदानेन, लभस्सु विपुलं सुखं’॥
Iminā bhisadānena, labhassu vipulaṃ sukhaṃ’.
१०५.
105.
‘‘इदं वत्वान सम्बुद्धो, जलजुत्तमनामको।
‘‘Idaṃ vatvāna sambuddho, jalajuttamanāmako;
भिक्खमादाय सम्बुद्धो, आकासेनागमा जिनो॥
Bhikkhamādāya sambuddho, ākāsenāgamā jino.
१०६.
106.
‘‘ततो भिसं गहेत्वान, अगच्छिं मम अस्समं।
‘‘Tato bhisaṃ gahetvāna, agacchiṃ mama assamaṃ;
भिसं रुक्खे लग्गेत्वान, मम दानं अनुस्सरिं॥
Bhisaṃ rukkhe laggetvāna, mama dānaṃ anussariṃ.
१०७.
107.
‘‘महावातो उट्ठहित्वा, सञ्चालेसि वनं तदा।
‘‘Mahāvāto uṭṭhahitvā, sañcālesi vanaṃ tadā;
आकासो अभिनादित्थ, असनी च फली तदा॥
Ākāso abhinādittha, asanī ca phalī tadā.
१०८.
108.
‘‘ततो मे असनीपातो, मत्थके निपती तदा।
‘‘Tato me asanīpāto, matthake nipatī tadā;
सोहं निसिन्नको सन्तो, तत्थ कालङ्कतो अहं॥
Sohaṃ nisinnako santo, tattha kālaṅkato ahaṃ.
१०९.
109.
‘‘पुञ्ञकम्मेन सञ्ञुत्तो, तुसितं उपपज्जहं।
‘‘Puññakammena saññutto, tusitaṃ upapajjahaṃ;
कळेवरं मे पतितं, देवलोके रमामहं॥
Kaḷevaraṃ me patitaṃ, devaloke ramāmahaṃ.
११०.
110.
‘‘छळसीतिसहस्सानि, नारियो समलङ्कता।
‘‘Chaḷasītisahassāni, nāriyo samalaṅkatā;
सायं पातं उपट्ठन्ति, भिसदानस्सिदं फलं॥
Sāyaṃ pātaṃ upaṭṭhanti, bhisadānassidaṃ phalaṃ.
१११.
111.
‘‘मनुस्सयोनिमागन्त्वा, सुखितो होमहं तदा।
‘‘Manussayonimāgantvā, sukhito homahaṃ tadā;
भोगा मे ऊनता नत्थि, भिसदानस्सिदं फलं॥
Bhogā me ūnatā natthi, bhisadānassidaṃ phalaṃ.
११२.
112.
‘‘अनुकम्पितको तेन, देवदेवेन तादिना।
‘‘Anukampitako tena, devadevena tādinā;
सब्बासवपरिक्खीणा, नत्थि दानि पुनब्भवो॥
Sabbāsavaparikkhīṇā, natthi dāni punabbhavo.
११३.
113.
‘‘सतसहस्सितो कप्पे, यं भिसं अददिं तदा।
‘‘Satasahassito kappe, yaṃ bhisaṃ adadiṃ tadā;
दुग्गतिं नाभिजानामि, भिसदानस्सिदं फलं॥
Duggatiṃ nābhijānāmi, bhisadānassidaṃ phalaṃ.
११४.
114.
‘‘किलेसा झापिता मय्हं…पे॰… विहरामि अनासवो॥
‘‘Kilesā jhāpitā mayhaṃ…pe… viharāmi anāsavo.
११५.
115.
‘‘स्वागतं वत मे आसि…पे॰… कतं बुद्धस्स सासनं॥
‘‘Svāgataṃ vata me āsi…pe… kataṃ buddhassa sāsanaṃ.
११६.
116.
‘‘पटिसम्भिदा चतस्सो…पे॰… कतं बुद्धस्स सासनं’’॥
‘‘Paṭisambhidā catasso…pe… kataṃ buddhassa sāsanaṃ’’.
इत्थं सुदं आयस्मा भद्दजित्थेरो इमा गाथायो
Itthaṃ sudaṃ āyasmā bhaddajitthero imā gāthāyo
अभासित्थाति।
Abhāsitthāti.
भद्दजित्थेरस्सापदानं अट्ठमं।
Bhaddajittherassāpadānaṃ aṭṭhamaṃ.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / अपदान-अट्ठकथा • Apadāna-aṭṭhakathā / ८. भद्दजित्थेरअपदानवण्णना • 8. Bhaddajittheraapadānavaṇṇanā
