| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
8. ப⁴த்³த³ஜித்தே²ரஅபதா³னவண்ணனா
8. Bhaddajittheraapadānavaṇṇanā
அட்ட²மாபதா³னே ஓக³ய்ஹாஹங் பொக்க²ரணிந்திஆதி³கங் ஆயஸ்மதோ ப⁴த்³த³ஜித்தே²ரஸ்ஸ அபதா³னங். அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ பது³முத்தரஸ்ஸ ப⁴க³வதோ காலே ப்³ராஹ்மணகுலே நிப்³ப³த்தித்வா விஞ்ஞுதங் பத்தோ ப்³ராஹ்மணானங் விஜ்ஜாஸிப்பேஸு பாரங் க³ந்த்வா காமே பஹாய தாபஸபப்³ப³ஜ்ஜங் பப்³ப³ஜித்வா அரஞ்ஞாயதனே அஸ்ஸமங் காரெத்வா வஸந்தோ ஏகதி³வஸங் ஸத்தா²ரங் ஆகாஸேன க³ச்ச²ந்தங் தி³ஸ்வா பஸன்னமானஸோ அஞ்ஜலிங் பக்³க³ய்ஹ அட்டா²ஸி. ஸத்தா² தஸ்ஸ அஜ்ஜா²ஸயங் தி³ஸ்வா ஆகாஸதோ ஓதரி. ஓதிண்ணஸ்ஸ பன ப⁴க³வதோ மது⁴ஞ்ச பி⁴ஸமுளாலஞ்ச ஸப்பிகீ²ரஞ்ச உபனாமேஸி, தஸ்ஸ தங் ப⁴க³வா அனுகம்மங் உபாதா³ய படிக்³க³ஹெத்வா அனுமோத³னங் கத்வா பக்காமி. ஸோ தேன புஞ்ஞகம்மேன துஸிதேஸு நிப்³ப³த்தோ தத்த² யாவதாயுகங் ட²த்வா ததோ சுதோ அபராபரங் ஸுக³தீஸுயேவ ஸங்ஸரந்தோ விபஸ்ஸிஸ்ஸ ப⁴க³வதோ காலே மஹத்³த⁴னோ ஸெட்டி² ஹுத்வா அட்ட²ஸட்டி²பி⁴க்கு²ஸதஸஹஸ்ஸங் போ⁴ஜெத்வா திசீவரேன அச்சா²தே³ஸி.
Aṭṭhamāpadāne ogayhāhaṃ pokkharaṇintiādikaṃ āyasmato bhaddajittherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto padumuttarassa bhagavato kāle brāhmaṇakule nibbattitvā viññutaṃ patto brāhmaṇānaṃ vijjāsippesu pāraṃ gantvā kāme pahāya tāpasapabbajjaṃ pabbajitvā araññāyatane assamaṃ kāretvā vasanto ekadivasaṃ satthāraṃ ākāsena gacchantaṃ disvā pasannamānaso añjaliṃ paggayha aṭṭhāsi. Satthā tassa ajjhāsayaṃ disvā ākāsato otari. Otiṇṇassa pana bhagavato madhuñca bhisamuḷālañca sappikhīrañca upanāmesi, tassa taṃ bhagavā anukammaṃ upādāya paṭiggahetvā anumodanaṃ katvā pakkāmi. So tena puññakammena tusitesu nibbatto tattha yāvatāyukaṃ ṭhatvā tato cuto aparāparaṃ sugatīsuyeva saṃsaranto vipassissa bhagavato kāle mahaddhano seṭṭhi hutvā aṭṭhasaṭṭhibhikkhusatasahassaṃ bhojetvā ticīvarena acchādesi.
ஏவங் ப³ஹுங் குஸலங் கத்வா தே³வலோகே நிப்³ப³த்தி. தத்த² யாவதாயுகங் ட²த்வா ததோ சவித்வா மனுஸ்ஸலோகேஸு உப்பன்னோ பு³த்³த⁴ஸுஞ்ஞே லோகே பஞ்ச பச்சேகபு³த்³த⁴ஸதானி சதூஹி பச்சயேஹி உபட்ட²ஹித்வா ததோ சுதோ ராஜகுலே நிப்³ப³த்தித்வா ரஜ்ஜங் அனுஸாஸந்தோ அத்தனோ புத்தங் பச்சேகபோ³தி⁴ங் அதி⁴க³ந்த்வா டி²தங் உபட்ட²ஹித்வா தஸ்ஸ பரினிப்³பு³தஸ்ஸ தா⁴துயோ க³ஹெத்வா சேதியங் கத்வா பூஜேஸி. ஏவங் தத்த² தத்த² தானி தானி புஞ்ஞானி கத்வா இமஸ்மிங் பு³த்³து⁴ப்பாதே³ ப⁴த்³தி³யனக³ரே அஸீதிகோடிவிப⁴வஸ்ஸ ப⁴த்³தி³யஸெட்டி²ஸ்ஸ ஏகபுத்தகோ ஹுத்வா நிப்³ப³த்தி, ப⁴த்³த³ஜீதிஸ்ஸ நாமங் அஹோஸி. தஸ்ஸ கிர இஸ்ஸரியபோ⁴க³பரிவாரஸம்பத்தி சரிமப⁴வே போ³தி⁴ஸத்தஸ்ஸ விய அஹோஸி.
Evaṃ bahuṃ kusalaṃ katvā devaloke nibbatti. Tattha yāvatāyukaṃ ṭhatvā tato cavitvā manussalokesu uppanno buddhasuññe loke pañca paccekabuddhasatāni catūhi paccayehi upaṭṭhahitvā tato cuto rājakule nibbattitvā rajjaṃ anusāsanto attano puttaṃ paccekabodhiṃ adhigantvā ṭhitaṃ upaṭṭhahitvā tassa parinibbutassa dhātuyo gahetvā cetiyaṃ katvā pūjesi. Evaṃ tattha tattha tāni tāni puññāni katvā imasmiṃ buddhuppāde bhaddiyanagare asītikoṭivibhavassa bhaddiyaseṭṭhissa ekaputtako hutvā nibbatti, bhaddajītissa nāmaṃ ahosi. Tassa kira issariyabhogaparivārasampatti carimabhave bodhisattassa viya ahosi.
ததா³ ஸத்தா² ஸாவத்தி²யங் வஸித்வா ப⁴த்³த³ஜிகுமாரங் ஸங்க³ண்ஹனத்தா²ய மஹதா பி⁴க்கு²ஸங்கே⁴ன ஸத்³தி⁴ங் ப⁴த்³தி³யனக³ரங் க³ந்த்வா ஜாதியாவனே வஸி தஸ்ஸ ஞாணபரிபாகங் ஆக³மயமானோ. ஸோபி உபரிபாஸாதே³ நிஸின்னோ ஸீஹபஞ்ஜரங் விவரித்வா ஓலோகெந்தோ ப⁴க³வதோ ஸந்திகே த⁴ம்மங் ஸோதுங் க³ச்ச²ந்தங் மஹாஜனங் தி³ஸ்வா, ‘‘கத்தா²யங் மஹாஜனோ க³ச்ச²தீ’’தி புச்சி²த்வா தங் காரணங் ஸுத்வா ஸயம்பி மஹதா பரிவாரேன ஸத்து² ஸந்திகங் க³ந்த்வா த⁴ம்மங் ஸுணந்தோ ஸப்³பா³ப⁴ரணபடிமண்டி³தோவ ஸப்³ப³கிலேஸே கே²பெத்வா அரஹத்தங் பாபுணி. அரஹத்தே பன தேன அதி⁴க³தே ஸத்தா² ப⁴த்³தி³யஸெட்டி²ங் ஆமந்தேஸி – ‘‘தவ புத்தோ அலங்கதபடியத்தோ த⁴ம்மங் ஸுணந்தோ அரஹத்தே பதிட்டா²ஸி, தேனஸ்ஸ இதா³னேவ பப்³ப³ஜிதுங் யுத்தங், நோ சே பப்³ப³ஜிஸ்ஸதி, பரினிப்³பா³யிஸ்ஸதீ’’தி. ஸெட்டி² ‘‘ந மய்ஹங் புத்தஸ்ஸ த³ஹரஸ்ஸேவ ஸதோ பரினிப்³பா³னேன கிச்சங் அத்தி², பப்³பா³ஜேத² ந’’ந்தி ஆஹ. தங் ஸத்தா² பப்³பா³ஜெத்வா உபஸம்பாதெ³த்வா தத்த² ஸத்தாஹங் வஸித்வா கோடிகா³மங் பாபுணி, ஸோ ச கா³மோ க³ங்கா³தீரே அஹோஸி . கோடிகா³மவாஸினோ ச பு³த்³த⁴ப்பமுக²ஸ்ஸ பி⁴க்கு²ஸங்க⁴ஸ்ஸ மஹாதா³னங் பவத்தேஸுங். ப⁴த்³த³ஜித்தே²ரோ ஸத்தா²ரா அனுமோத³னாய ஆரத்³த⁴மத்தாய ப³ஹிகா³மங் க³ந்த்வா ‘‘க³ங்கா³தீரே மக்³க³ஸமீபே ஸத்து² ஆக³தகாலே வுட்ட²ஹிஸ்ஸாமீ’’தி காலபரிச்சே²த³ங் கத்வா அஞ்ஞதரஸ்மிங் ருக்க²மூலே ஸமாபத்திங் ஸமாபஜ்ஜித்வா நிஸீதி³. மஹாதே²ரேஸு ஆக³ச்ச²ந்தேஸுபி அவுட்ட²ஹித்வா ஸத்து² ஆக³தகாலேயேவ வுட்டா²ஸி. புது²ஜ்ஜனா பி⁴க்கூ² – ‘‘அயங் அது⁴னா பப்³ப³ஜிதோ, மஹாதே²ரேஸு ஆக³ச்ச²ந்தேஸு மானத²த்³தோ⁴ ஹுத்வா ந வுட்டா²ஸீ’’தி உஜ்ஜா²யிங்ஸு.
Tadā satthā sāvatthiyaṃ vasitvā bhaddajikumāraṃ saṅgaṇhanatthāya mahatā bhikkhusaṅghena saddhiṃ bhaddiyanagaraṃ gantvā jātiyāvane vasi tassa ñāṇaparipākaṃ āgamayamāno. Sopi uparipāsāde nisinno sīhapañjaraṃ vivaritvā olokento bhagavato santike dhammaṃ sotuṃ gacchantaṃ mahājanaṃ disvā, ‘‘katthāyaṃ mahājano gacchatī’’ti pucchitvā taṃ kāraṇaṃ sutvā sayampi mahatā parivārena satthu santikaṃ gantvā dhammaṃ suṇanto sabbābharaṇapaṭimaṇḍitova sabbakilese khepetvā arahattaṃ pāpuṇi. Arahatte pana tena adhigate satthā bhaddiyaseṭṭhiṃ āmantesi – ‘‘tava putto alaṅkatapaṭiyatto dhammaṃ suṇanto arahatte patiṭṭhāsi, tenassa idāneva pabbajituṃ yuttaṃ, no ce pabbajissati, parinibbāyissatī’’ti. Seṭṭhi ‘‘na mayhaṃ puttassa daharasseva sato parinibbānena kiccaṃ atthi, pabbājetha na’’nti āha. Taṃ satthā pabbājetvā upasampādetvā tattha sattāhaṃ vasitvā koṭigāmaṃ pāpuṇi, so ca gāmo gaṅgātīre ahosi . Koṭigāmavāsino ca buddhappamukhassa bhikkhusaṅghassa mahādānaṃ pavattesuṃ. Bhaddajitthero satthārā anumodanāya āraddhamattāya bahigāmaṃ gantvā ‘‘gaṅgātīre maggasamīpe satthu āgatakāle vuṭṭhahissāmī’’ti kālaparicchedaṃ katvā aññatarasmiṃ rukkhamūle samāpattiṃ samāpajjitvā nisīdi. Mahātheresu āgacchantesupi avuṭṭhahitvā satthu āgatakāleyeva vuṭṭhāsi. Puthujjanā bhikkhū – ‘‘ayaṃ adhunā pabbajito, mahātheresu āgacchantesu mānathaddho hutvā na vuṭṭhāsī’’ti ujjhāyiṃsu.
கோடிகா³மவாஸினோ ஸத்து² பி⁴க்கு²ஸங்க⁴ஸ்ஸ ச ப³ஹூ நாவாஸங்கா⁴டே ப³ந்தி⁴ங்ஸு. ஸத்தா² ‘‘ப⁴த்³த³ஜிஸ்ஸானுபா⁴வங் பகாஸேமீ’’தி நாவாய ட²த்வா ‘‘கஹங் ப⁴த்³த³ஜீ’’தி புச்சி². ப⁴த்³த³ஜித்தே²ரோ – ‘‘ஸோஹங், ப⁴ந்தே’’தி ஸத்தா²ரங் உபஸங்கமித்வா அஞ்ஜலிங் கத்வா அட்டா²ஸி. ஸத்தா² ‘‘ஏஹி, ப⁴த்³த³ஜி, அம்ஹேஹி ஸத்³தி⁴ங் ஏகனாவங் அபி⁴ருஹா’’தி. ஸோ உப்பதித்வா ஸத்து² டி²தனாவாயங் அட்டா²ஸி. ஸத்தா² க³ங்கா³ய மஜ்ஜே² க³தகாலே, ‘‘ப⁴த்³த³ஜி, தயா மஹாபனாத³காலே அஜ்ஜா²வுட்ட²ரதனபாஸாதோ³ கஹ’’ந்தி ஆஹ. ‘‘இமஸ்மிங் டா²னே நிமுக்³கோ³, ப⁴ந்தே’’தி. ‘‘தேன ஹி, ப⁴த்³த³ஜி, ஸப்³ரஹ்மசாரீனங் கங்க²ங் சி²ந்தா³’’தி. தஸ்மிங் க²ணே தே²ரோ ஸத்தா²ரங் வந்தி³த்வா இத்³தி⁴ப³லேன க³ந்த்வா பாஸாத³தூ²பிகங் பாத³ங்கு³லந்தரேன ஸன்னிருஜ்ஜி²த்வா பஞ்சவீஸதியோஜனங் பாஸாத³ங் க³ஹெத்வா ஆகாஸே உப்பதி, உப்பதந்தோ ச பஞ்ஞாஸயோஜனானி உக்கி²பி. அத²ஸ்ஸ புரிமப⁴வே ஞாதகா பாஸாத³க³தேன லோபே⁴ன மச்ச²கச்ச²பமண்டூ³கா ஹுத்வா நிப்³ப³த்தா தஸ்மிங் பாஸாதே³ உட்ட²ஹந்தே பரிவத்தித்வா பதிங்ஸு. ஸத்தா² தே ஸம்பதந்தே தி³ஸ்வா ‘‘ஞாதகா தே, ப⁴த்³த³ஜி, கிலமந்தீ’’தி ஆஹ. தே²ரோ ஸத்து² வசனேன பாஸாத³ங் விஸ்ஸஜ்ஜேஸி. பாஸாதோ³ யதா²டா²னேயேவ பதிட்ட²ஹி. ஸத்தா² பாரங்க³தோ பி⁴க்கூ²ஹி – ‘‘கதா³, ப⁴ந்தே, ப⁴த்³த³ஜித்தே²ரேன அயங் பாஸாதோ³ அஜ்ஜா²வுட்டோ²’’தி புட்டோ² மஹாபனாத³ஜாதகங் (ஜா॰ 1.3.40 ஆத³யோ) கதெ²த்வா ப³ஹுஜனங் த⁴ம்மாமதங் பாயேஸி.
Koṭigāmavāsino satthu bhikkhusaṅghassa ca bahū nāvāsaṅghāṭe bandhiṃsu. Satthā ‘‘bhaddajissānubhāvaṃ pakāsemī’’ti nāvāya ṭhatvā ‘‘kahaṃ bhaddajī’’ti pucchi. Bhaddajitthero – ‘‘sohaṃ, bhante’’ti satthāraṃ upasaṅkamitvā añjaliṃ katvā aṭṭhāsi. Satthā ‘‘ehi, bhaddaji, amhehi saddhiṃ ekanāvaṃ abhiruhā’’ti. So uppatitvā satthu ṭhitanāvāyaṃ aṭṭhāsi. Satthā gaṅgāya majjhe gatakāle, ‘‘bhaddaji, tayā mahāpanādakāle ajjhāvuṭṭharatanapāsādo kaha’’nti āha. ‘‘Imasmiṃ ṭhāne nimuggo, bhante’’ti. ‘‘Tena hi, bhaddaji, sabrahmacārīnaṃ kaṅkhaṃ chindā’’ti. Tasmiṃ khaṇe thero satthāraṃ vanditvā iddhibalena gantvā pāsādathūpikaṃ pādaṅgulantarena sannirujjhitvā pañcavīsatiyojanaṃ pāsādaṃ gahetvā ākāse uppati, uppatanto ca paññāsayojanāni ukkhipi. Athassa purimabhave ñātakā pāsādagatena lobhena macchakacchapamaṇḍūkā hutvā nibbattā tasmiṃ pāsāde uṭṭhahante parivattitvā patiṃsu. Satthā te sampatante disvā ‘‘ñātakā te, bhaddaji, kilamantī’’ti āha. Thero satthu vacanena pāsādaṃ vissajjesi. Pāsādo yathāṭhāneyeva patiṭṭhahi. Satthā pāraṅgato bhikkhūhi – ‘‘kadā, bhante, bhaddajittherena ayaṃ pāsādo ajjhāvuṭṭho’’ti puṭṭho mahāpanādajātakaṃ (jā. 1.3.40 ādayo) kathetvā bahujanaṃ dhammāmataṃ pāyesi.
98. தே²ரோ பன அரஹத்தங் பத்தோ புப்³ப³ஸம்பா⁴ரங் ஸரித்வா ஸோமனஸ்ஸஜாதோ புப்³ப³சரிதாபதா³னங் பகாஸேதுங் ஓக³ய்ஹாஹங் பொக்க²ரணிந்திஆதி³மாஹ. தத்த² ஓக³ய்ஹாஹங் பொக்க²ரணிந்தி புது²னானாஅனேகமஹோகே⁴ஹி க²ணிதத்தா ‘‘பொக்க²ரணீ’’தி லத்³த⁴னாமங் ஜலாஸயங் ஓக³ய்ஹ ஓக³ஹெத்வா பவிஸித்வா அஜ்ஜோ²கா³ஹெத்வா கா⁴ஸஹேதுகா²த³னத்தா²ய தத்த² பொக்க²ரணியங் பவிஸித்வா பி⁴ஸங் பது³மபுண்ட³ரீகமூலங் உத்³த⁴ராமீதி அத்தோ². ஸேஸங் ஹெட்டா² வுத்தனயத்தா உத்தானபத³த்த²த்தா ச நயானுஸாரேன ஸுவிஞ்ஞெய்யமேவாதி.
98. Thero pana arahattaṃ patto pubbasambhāraṃ saritvā somanassajāto pubbacaritāpadānaṃ pakāsetuṃ ogayhāhaṃ pokkharaṇintiādimāha. Tattha ogayhāhaṃ pokkharaṇinti puthunānāanekamahoghehi khaṇitattā ‘‘pokkharaṇī’’ti laddhanāmaṃ jalāsayaṃ ogayha ogahetvā pavisitvā ajjhogāhetvā ghāsahetukhādanatthāya tattha pokkharaṇiyaṃ pavisitvā bhisaṃ padumapuṇḍarīkamūlaṃ uddharāmīti attho. Sesaṃ heṭṭhā vuttanayattā uttānapadatthattā ca nayānusārena suviññeyyamevāti.
ப⁴த்³த³ஜித்தே²ரஅபதா³னவண்ணனா ஸமத்தா.
Bhaddajittheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 8. ப⁴த்³த³ஜித்தே²ரஅபதா³னங் • 8. Bhaddajittheraapadānaṃ
