| Library / Tipiṭaka / তিপিটক • Tipiṭaka / মজ্ঝিমনিকায (টীকা) • Majjhimanikāya (ṭīkā) |
৫. ভদ্দালিসুত্তৰণ্ণনা
5. Bhaddālisuttavaṇṇanā
১৩৪. অসিযতীতি অসনং, ভুঞ্জনং ভোজনং, অসনস্স ভোজনং অসনভোজনং, আহারপরিভোগো, একস্মিং কালে অসনভোজনং একাসনভোজনং। সো পন কালো সব্ববুদ্ধানং সব্বপচ্চেকবুদ্ধানং আচিণ্ণসমাচিণ্ণৰসেন পুব্বণ্হো এৰ ইধাধিপ্পেতোতি আহ ‘‘একস্মিং পুরেভত্তে অসনভোজন’’ন্তি। ৰিপ্পটিসারকুক্কুচ্চন্তি ‘‘অযুত্তং ৰত মযা কতং, যো অত্তনো সরীরপকতিং অজানন্তো একাসনভোজনং ভুঞ্জি, যেন মে ইদং সরীরং কিসং জাতং ব্রহ্মচরিযানুগ্গহো নাহোসী’’তি এৰং ৰিপ্পটিসারকুক্কুচ্চং ভৰেয্য। এতং সন্ধায সত্থা আহ, ন ভদ্দালিমেৰ তাদিসং কিরিযং অনুজানন্তো। ইতরথাতি যদি একংযেৰ ভত্তং দ্ৰিধা কত্ৰা ততো একস্স ভাগস্স ভুঞ্জনং একদেসভুঞ্জনং অধিপ্পেতং। কো সক্কোতীতি কো এৰং যাপেতুং সক্কোতি। অতীতজাতিপরিচযোপি নাম ইমেসং সত্তানংযেৰ অনুবন্ধতীতি আহ ‘‘অতীতে’’তিআদি। ৰিরৰন্তস্সেৰাতি অনাদরে সামিৰচনং। তং মদ্দিত্ৰাতি ‘‘অযং সিক্খা সব্বেসম্পি বুদ্ধানং সাসনে আচিণ্ণং, অযঞ্চ ভিক্খু ইমং সিক্খতেৰা’’তি ৰত্ৰা তং ভদ্দালিং তস্স ৰা অনুস্সাহপৰেদনং অভিভৰিত্ৰা। ভিক্খাচারগমনত্থং ন ৰিতক্কমাল়কং অগমাসি, ৰিহারচারিকং চরন্তো তস্স ৰসনট্ঠানং ভগৰা গচ্ছতি।
134. Asiyatīti asanaṃ, bhuñjanaṃ bhojanaṃ, asanassa bhojanaṃ asanabhojanaṃ, āhāraparibhogo, ekasmiṃ kāle asanabhojanaṃ ekāsanabhojanaṃ. So pana kālo sabbabuddhānaṃ sabbapaccekabuddhānaṃ āciṇṇasamāciṇṇavasena pubbaṇho eva idhādhippetoti āha ‘‘ekasmiṃ purebhatte asanabhojana’’nti. Vippaṭisārakukkuccanti ‘‘ayuttaṃ vata mayā kataṃ, yo attano sarīrapakatiṃ ajānanto ekāsanabhojanaṃ bhuñji, yena me idaṃ sarīraṃ kisaṃ jātaṃ brahmacariyānuggaho nāhosī’’ti evaṃ vippaṭisārakukkuccaṃ bhaveyya. Etaṃ sandhāya satthā āha, na bhaddālimeva tādisaṃ kiriyaṃ anujānanto. Itarathāti yadi ekaṃyeva bhattaṃ dvidhā katvā tato ekassa bhāgassa bhuñjanaṃ ekadesabhuñjanaṃ adhippetaṃ. Ko sakkotīti ko evaṃ yāpetuṃ sakkoti. Atītajātiparicayopi nāma imesaṃ sattānaṃyeva anubandhatīti āha ‘‘atīte’’tiādi. Viravantassevāti anādare sāmivacanaṃ. Taṃ madditvāti ‘‘ayaṃ sikkhā sabbesampi buddhānaṃ sāsane āciṇṇaṃ, ayañca bhikkhu imaṃ sikkhatevā’’ti vatvā taṃ bhaddāliṃ tassa vā anussāhapavedanaṃ abhibhavitvā. Bhikkhācāragamanatthaṃ na vitakkamāḷakaṃ agamāsi, vihāracārikaṃ caranto tassa vasanaṭṭhānaṃ bhagavā gacchati.
১৩৫. দূসযন্তি গরহন্তি এতেনাতি দোসো, অপরাধো, সো এৰ কুচ্ছিতভাৰেন দোসকো। গরহায পৰত্তিট্ঠানতো ওকাসো। তেনাহ – ‘‘এতং ওকাসং এতং অপরাধ’’ন্তি। দুক্করতরন্তি পতিকারৰসেন অতিসযেন দুক্করং। অপরাধো হি ন খমাপেন্তং যথাপচ্চযং ৰিত্থারিতো হুত্ৰা দুপ্পতিকারো হোতি। তেনাহ ‘‘ৰস্সঞ্হী’’তিআদি।
135. Dūsayanti garahanti etenāti doso, aparādho, so eva kucchitabhāvena dosako. Garahāya pavattiṭṭhānato okāso. Tenāha – ‘‘etaṃ okāsaṃ etaṃ aparādha’’nti. Dukkarataranti patikāravasena atisayena dukkaraṃ. Aparādho hi na khamāpentaṃ yathāpaccayaṃ vitthārito hutvā duppatikāro hoti. Tenāha ‘‘vassañhī’’tiādi.
অলগ্গিত্ৰাতি ইমম্পি নাম অপনীতং অকাসীতি এৰং অৰিনেত্ৰা, তং তং তস্স হিতপটিপত্তিং নিৰারণং কত্ৰাতি অত্থো। ঞাযপটিপত্তিং অতিচ্চ এতি পৰত্ততীতি অচ্চযো, অপরাধো, পুরিসেন মদ্দিত্ৰা পৰত্তিতো অপরাধো অত্থতো পুরিসং অতিচ্চ অভিভৰিত্ৰা পৰত্তো নাম হোতি। তেনাহ ‘‘অচ্চযো মং, ভন্তে, অচ্চগমা’’তি। অৰসেসপচ্চযানং সমাগমে এতি ফলং এতস্মা উপ্পজ্জতি পৰত্ততি চাতি সমযো, হেতু যথা ‘‘সমুদাযো’’তি আহ ‘‘একং কারণ’’ন্তি। যং পনেত্থ ভদ্দালিত্থেরস্স অপরিপূরকারিতায ভিক্খুআদীনং জাননং, তম্পি কারণং কত্ৰা ‘‘অহং খো, ভন্তে, ন উস্সহামী’’তিআদিনা ৰত্তব্বন্তি দস্সেতি।
Alaggitvāti imampi nāma apanītaṃ akāsīti evaṃ avinetvā, taṃ taṃ tassa hitapaṭipattiṃ nivāraṇaṃ katvāti attho. Ñāyapaṭipattiṃ aticca eti pavattatīti accayo, aparādho, purisena madditvā pavattito aparādho atthato purisaṃ aticca abhibhavitvā pavatto nāma hoti. Tenāha ‘‘accayo maṃ, bhante, accagamā’’ti. Avasesapaccayānaṃ samāgame eti phalaṃ etasmā uppajjati pavattati cāti samayo, hetu yathā ‘‘samudāyo’’ti āha ‘‘ekaṃ kāraṇa’’nti. Yaṃ panettha bhaddālittherassa aparipūrakāritāya bhikkhuādīnaṃ jānanaṃ, tampi kāraṇaṃ katvā ‘‘ahaṃ kho, bhante, na ussahāmī’’tiādinā vattabbanti dasseti.
১৩৬. একচিত্তক্খণিকাতি পঠমমগ্গচিত্তক্খণেন একচিত্তক্খণিকা। এৰং আণাপেতুং ন যুত্তন্তি সঙ্কমত্থায আণাপেতুং ন যুত্তং পযোজনাভাৰতো। অনাচিণ্ণঞ্চেতং বুদ্ধানং, যদিদং পদসা অক্কমনং। তথা হি –
136.Ekacittakkhaṇikāti paṭhamamaggacittakkhaṇena ekacittakkhaṇikā. Evaṃ āṇāpetuṃ na yuttanti saṅkamatthāya āṇāpetuṃ na yuttaṃ payojanābhāvato. Anāciṇṇañcetaṃ buddhānaṃ, yadidaṃ padasā akkamanaṃ. Tathā hi –
‘‘অক্কমিত্ৰান মং বুদ্ধো, সহ সিস্সেহি গচ্ছতু।
‘‘Akkamitvāna maṃ buddho, saha sissehi gacchatu;
মা নং কললং অক্কমিত্থ, হিতায মে ভৰিস্সতী’’তি॥ (বু॰ ৰং॰ ২.৫৩)।
Mā naṃ kalalaṃ akkamittha, hitāya me bhavissatī’’ti. (bu. vaṃ. 2.53);
সুমেধপণ্ডিতেন পচ্চাসীসিতং ন কতং। যথাহ –
Sumedhapaṇḍitena paccāsīsitaṃ na kataṃ. Yathāha –
‘‘দীপঙ্করো লোকৰিদূ, আহুতীনং পটিগ্গহো।
‘‘Dīpaṅkaro lokavidū, āhutīnaṃ paṭiggaho;
উস্সীসকে মং ঠত্ৰান, ইদং ৰচনমব্রৰী’’তি॥ (বু॰ ৰং॰ ২.৬০)।
Ussīsake maṃ ṭhatvāna, idaṃ vacanamabravī’’ti. (bu. vaṃ. 2.60);
ভগৰতা আণত্তে সতি তেসম্পি এৰং কাতুং ন যুত্তন্তি এত্থাপি এসেৰ নযো। এতেসং পটিবাহিতুং যুত্তন্তি ইদং অট্ঠানপরিকপ্পনৰসেনেৰ ৰুত্তং। ন হি বুদ্ধানং কাতুং আরদ্ধং নাম কিচ্চং কেহিচি পটিবাহিতুং যুত্তং নাম অত্থি পটিবাহিতুংযেৰ অকরণতো। সম্মত্তনিযামস্স অনোক্কন্তত্তা ৰুত্তং ‘‘বাহিরকো’’তি।
Bhagavatā āṇatte sati tesampi evaṃ kātuṃ na yuttanti etthāpi eseva nayo. Etesaṃ paṭibāhituṃ yuttanti idaṃ aṭṭhānaparikappanavaseneva vuttaṃ. Na hi buddhānaṃ kātuṃ āraddhaṃ nāma kiccaṃ kehici paṭibāhituṃ yuttaṃ nāma atthi paṭibāhituṃyeva akaraṇato. Sammattaniyāmassa anokkantattā vuttaṃ ‘‘bāhirako’’ti.
১৩৭. ন কম্মট্ঠানং অল্লীযতীতি চিত্তং কম্মট্ঠানং ন ওতরতি।
137.Na kammaṭṭhānaṃ allīyatīti cittaṃ kammaṭṭhānaṃ na otarati.
১৪০. পুনপ্পুনং কারেন্তীতি দণ্ডকম্মপণামনাদিকারণং পুনপ্পুনং কারেন্তি। সম্মাৰত্তম্হি ন ৰত্ততীতি তস্সা তস্সা আপত্তিযা ৰুট্ঠানত্থং ভগৰতা পঞ্ঞত্তসম্মাৰত্তম্হি ন ৰত্ততি। অনুলোমৰত্তে ন ৰত্ততীতি যেন যেন ৰত্তেন সঙ্ঘো অনুলোমিকো হোতি, তস্মিং তস্মিং অনুলোমৰত্তে ন ৰত্ততি ৰিলোমমেৰ গণ্হাতি, পটিলোমেন হোতি। নিত্থারণকৰত্তম্হীতি যেন ৰত্তেন সঙ্ঘো অনুলোমিকো হোতি, সাপত্তিকভাৰতো নিত্থিণ্ণো হোতি, তম্হি নিত্থারণৰত্তস্মিং ন ৰত্ততি। তেনাহ ‘‘আপত্তী’’তিআদি। দুব্বচকরণেতি দুব্বচস্স ভিক্খুনো করণে।
140.Punappunaṃ kārentīti daṇḍakammapaṇāmanādikāraṇaṃ punappunaṃ kārenti. Sammāvattamhi na vattatīti tassā tassā āpattiyā vuṭṭhānatthaṃ bhagavatā paññattasammāvattamhi na vattati. Anulomavatte na vattatīti yena yena vattena saṅgho anulomiko hoti, tasmiṃ tasmiṃ anulomavatte na vattati vilomameva gaṇhāti, paṭilomena hoti. Nitthāraṇakavattamhīti yena vattena saṅgho anulomiko hoti, sāpattikabhāvato nitthiṇṇo hoti, tamhi nitthāraṇavattasmiṃ na vattati. Tenāha ‘‘āpattī’’tiādi. Dubbacakaraṇeti dubbacassa bhikkhuno karaṇe.
১৪৪. যাপেতীতি ৰত্ততি, সাসনে তিট্ঠতীতি অত্থো। অভিঞ্ঞাপত্তাতি ‘‘অসুকো অসুকো চ থেরো সীলৰা কল্যাণধম্মো বহুস্সুতো’’তিআদিনা অভিঞ্ঞাতভাৰং পত্তা অধিগতঅভিঞ্ঞাতা।
144.Yāpetīti vattati, sāsane tiṭṭhatīti attho. Abhiññāpattāti ‘‘asuko asuko ca thero sīlavā kalyāṇadhammo bahussuto’’tiādinā abhiññātabhāvaṃ pattā adhigataabhiññātā.
১৪৫. সত্তেসু হাযমানেসূতি কিলেসবহুলতায পটিপজ্জনকসত্তেসু পরিহাযন্তেসু পটিপথেসু জাযমানেসু। অন্তরধাযতি নাম তদাধারতায। দিট্ঠধম্মিকা পরূপৰাদাদযো। সম্পরাযিকা অপাযদুক্খৰিসেসা। আসৰন্তি তেন তেন পচ্চযেন পৰত্তন্তীতি আসৰা। নেসন্তি পরূপৰাদাদিআসৰানং। তেতি ৰীতিক্কমধম্মা।
145.Sattesu hāyamānesūti kilesabahulatāya paṭipajjanakasattesu parihāyantesu paṭipathesu jāyamānesu. Antaradhāyati nāma tadādhāratāya. Diṭṭhadhammikā parūpavādādayo. Samparāyikā apāyadukkhavisesā. Āsavanti tena tena paccayena pavattantīti āsavā. Nesanti parūpavādādiāsavānaṃ. Teti vītikkamadhammā.
অকালং দস্সেত্ৰাতি সিক্খাপদপঞ্ঞত্তিযা অকালং দস্সেত্ৰা। উপ্পত্তিন্তি আসৰট্ঠানিযানং ধম্মানমুপ্পত্তিং। সিক্খাপদপঞ্ঞত্তিযা কালং, তাৰ সেনাসনানি পহোন্তি, তেন আৰাসমচ্ছরিযাদিহেতুনা সাসনে একচ্চে আসৰট্ঠানিযা ধম্মা ন উপ্পজ্জন্তি। ইমিনা নযেনাতি ইমিনা পন হেতুনা পদসোধম্মসিক্খাপদানং সঙ্গহো দট্ঠব্বো।
Akālaṃ dassetvāti sikkhāpadapaññattiyā akālaṃ dassetvā. Uppattinti āsavaṭṭhāniyānaṃ dhammānamuppattiṃ. Sikkhāpadapaññattiyā kālaṃ, tāvasenāsanāni pahonti, tena āvāsamacchariyādihetunā sāsane ekacce āsavaṭṭhāniyā dhammā na uppajjanti. Iminā nayenāti iminā pana hetunā padasodhammasikkhāpadānaṃ saṅgaho daṭṭhabbo.
যসন্তি কিত্তিসদ্দং পরিৰারঞ্চ। সাগতত্থেরস্স নাগদমনকিত্তিযসাদিৰসেন সুরাপানসঙ্খাতো আসৰট্ঠানিযো ধম্মো উপ্পজ্জি।
Yasanti kittisaddaṃ parivārañca. Sāgatattherassa nāgadamanakittiyasādivasena surāpānasaṅkhāto āsavaṭṭhāniyo dhammo uppajji.
রসেন রসং সংসন্দেত্ৰাতি উপাদিন্নকফস্সরসেন অনুপাদিন্নকফস্সরসং সংসন্দেত্ৰা।
Rasena rasaṃ saṃsandetvāti upādinnakaphassarasena anupādinnakaphassarasaṃ saṃsandetvā.
১৪৬. ন খো, ভদ্দালি, এসেৰ হেতু, অথ খো অঞ্ঞম্পি অত্থীতি দস্সেন্তো ভগৰা ‘‘অপিচা’’তিআদিমাহ। তেন ধম্মস্স সক্কচ্চসৰনে থেরং নিযোজেতি।
146. Na kho, bhaddāli, eseva hetu, atha kho aññampi atthīti dassento bhagavā ‘‘apicā’’tiādimāha. Tena dhammassa sakkaccasavane theraṃ niyojeti.
১৪৭. ৰিসেৰনাচারন্তি অদন্তকিরিযং। পরিনিব্বাযতীতি ৰূপসম্মতি। তত্থ অদন্তকিরিযং পহায দন্তো হোতি। যুগস্সাতি রথধুরস্স।
147.Visevanācāranti adantakiriyaṃ. Parinibbāyatīti vūpasammati. Tattha adantakiriyaṃ pahāya danto hoti. Yugassāti rathadhurassa.
অনুক্কমেতি অনুরূপপরিগমে। তদৰত্থানুরূপং পাদানং উক্খিপনে নিক্খিপনে চ। তেনাহ ‘‘চত্তারো পাদে’’তিআদি। রজ্জুবন্ধনৰিধানেনাতি পাদতো ভূমিযা মোচনৰিধানেন। এৰং করণত্থন্তি যথা অস্সে নিসিন্নস্সেৰ ভূমিং গহেতুং সক্কা, এৰং চত্তারো পাদে তথা কত্ৰা অত্তনো নিচ্চলভাৰকরণত্থং। মণ্ডলেতি মণ্ডলধাৰিকাযং। পথৰীকমনেতি পথৰিং ফুট্ঠমত্তেন গমনে। তেনাহ ‘‘অগ্গগ্গখুরেহী’’তি। ওক্কন্তকরণস্মিন্তি ওক্কন্তেত্ৰা পরসেনাসম্মদ্দন ওক্কন্তকরণে। একস্মিং ঠানেতি চতূসু পাদেসু যত্থ কত্থচি একস্মিং ঠানে গমনং চোদেন্তীতি অত্থো, সো পনেত্থ সীঘতরো অধিপ্পেতো। দৰত্তেতি মরিযাদাকোপনেহি নানপ্পযোজনে, পরসেনায পৰত্তমহানাদপহরণেহি অত্থো। তেনাহ ‘‘যুদ্ধকালস্মি’’ন্তিআদি।
Anukkameti anurūpaparigame. Tadavatthānurūpaṃ pādānaṃ ukkhipane nikkhipane ca. Tenāha ‘‘cattāro pāde’’tiādi. Rajjubandhanavidhānenāti pādato bhūmiyā mocanavidhānena. Evaṃ karaṇatthanti yathā asse nisinnasseva bhūmiṃ gahetuṃ sakkā, evaṃ cattāro pāde tathā katvā attano niccalabhāvakaraṇatthaṃ. Maṇḍaleti maṇḍaladhāvikāyaṃ. Pathavīkamaneti pathaviṃ phuṭṭhamattena gamane. Tenāha ‘‘aggaggakhurehī’’ti. Okkantakaraṇasminti okkantetvā parasenāsammaddana okkantakaraṇe. Ekasmiṃ ṭhāneti catūsu pādesu yattha katthaci ekasmiṃ ṭhāne gamanaṃ codentīti attho, so panettha sīghataro adhippeto. Davatteti mariyādākopanehi nānappayojane, parasenāya pavattamahānādapaharaṇehi attho. Tenāha ‘‘yuddhakālasmi’’ntiādi.
রঞ্ঞা জানিতব্বগুণেতি যথা রাজা অস্সস্স গুণে জানাতি, এৰং তেন জানিতব্বগুণকারণং কারেতি। অস্সরাজৰংসেতি দুস্সহং দুক্খং পত্ৰাপি যথা অযং রাজৰংসানুরূপকিরিযং ন জহিস্সতি, এৰং সিক্খাপনে। সিক্খাপনমেৰ হি সন্ধায সব্বত্থ ‘‘কারণং কারেতী’’তি ৰুত্তং তস্স করণকারাপনপরিযাযত্তা।
Raññā jānitabbaguṇeti yathā rājā assassa guṇe jānāti, evaṃ tena jānitabbaguṇakāraṇaṃ kāreti. Assarājavaṃseti dussahaṃ dukkhaṃ patvāpi yathā ayaṃ rājavaṃsānurūpakiriyaṃ na jahissati, evaṃ sikkhāpane. Sikkhāpanameva hi sandhāya sabbattha ‘‘kāraṇaṃ kāretī’’ti vuttaṃ tassa karaṇakārāpanapariyāyattā.
যথা উত্তমজৰো হোতীতি জৰদস্সনট্ঠানে যথা হযো উত্তমজৰং ন হাপেসি, এৰং সিক্খাপেতি। উত্তমহযভাৰে, যথা উত্তমহযো হোতীতি কম্মকরণকালে অত্তনো উত্তমসভাৰং অনিগুহিত্ৰা অৰজ্জেত্ৰা যথা অত্থসিদ্ধি হোতি, এৰং পরমজৰেন সিক্খাপেতি। যথা কিরিযা ৰিনা দব্বম্পি ৰিনা কিরিযং ন ভৰতি, এৰং দট্ঠব্বন্তি দস্সেতুং ‘‘তত্থ পকতিযা’’তিআদি ৰুত্তং।
Yathāuttamajavo hotīti javadassanaṭṭhāne yathā hayo uttamajavaṃ na hāpesi, evaṃ sikkhāpeti. Uttamahayabhāve, yathā uttamahayo hotīti kammakaraṇakāle attano uttamasabhāvaṃ aniguhitvā avajjetvā yathā atthasiddhi hoti, evaṃ paramajavena sikkhāpeti. Yathā kiriyā vinā dabbampi vinā kiriyaṃ na bhavati, evaṃ daṭṭhabbanti dassetuṃ ‘‘tattha pakatiyā’’tiādi vuttaṃ.
তত্রাতি তস্মিং পকতিযা উত্তমহযস্সেৰ উত্তমহযকারণারহত্তা উত্তমজৰপটিপজ্জনে। মাসখাদকঘোটকানন্তি মাসং খাদিত্ৰা যথা তথা ৰিগুণখলুঙ্গকানং। ৰলঞ্জকদণ্ডন্তি রঞ্ঞা গহেতব্বসুৰণ্ণদণ্ডং। ধাতুপত্থদ্ধোতি অত্তনাৰ সমুপ্পাদিতধাতুযা উপত্থম্ভিতো হুত্ৰা।
Tatrāti tasmiṃ pakatiyā uttamahayasseva uttamahayakāraṇārahattā uttamajavapaṭipajjane. Māsakhādakaghoṭakānanti māsaṃ khāditvā yathā tathā viguṇakhaluṅgakānaṃ. Valañjakadaṇḍanti raññā gahetabbasuvaṇṇadaṇḍaṃ. Dhātupatthaddhoti attanāva samuppāditadhātuyā upatthambhito hutvā.
উত্তমে সাখল্যেতি পরমসখিলভাৰে সখিলৰাচায এৰ দমেতব্বতায। তেনাহ ‘‘মুদুৰাচায হী’’তিআদি।
Uttame sākhalyeti paramasakhilabhāve sakhilavācāya eva dametabbatāya. Tenāha ‘‘muduvācāya hī’’tiādi.
অরহত্তফলসম্মাদিট্ঠিযাতি ফলসমাপত্তিকালে পৰত্তসম্মাঞাণং। সম্মাঞাণং পুব্বে ৰুত্তসম্মাদিট্ঠিযেৰাতি পন ইদং ফলসম্মাদিট্ঠিভাৰসামঞ্ঞেন ৰুত্তং। কেচি পন ‘‘পচ্চৰেক্খণঞাণ’’ন্তি ৰদন্তি, তং ন যুজ্জতি ‘‘অসেক্খেনা’’তি ৰিসেসিতত্তা। তম্পি অসেক্খঞাণন্তি চে? এৰম্পি নিপ্পরিযায সেক্খগ্গহণে পরিযাযসেক্খগ্গহণং ন যুত্তমেৰ, কিচ্চভেদেন ৰা ৰুত্তন্তি দট্ঠব্বং। একা এৰ হি সা পঞ্ঞা নিব্বানস্স পচ্চক্খকিরিযায সম্মাদস্সনকিচ্চং উপাদায ‘‘সম্মাদিট্ঠী’’তি ৰুত্তা, সম্মাজাননকিচ্চং উপাদায ‘‘সম্মাঞাণ’’ন্তি। অঞ্ঞাতাৰিন্দ্রিযৰসেন ৰা সম্মাদিট্ঠি, পঞ্ঞিন্দ্রিযৰসেন সম্মাঞাণন্তি এৰমেত্থ অত্থো দট্ঠব্বো। মগ্গফলাৰহায দেসনায সঙ্খেপতোৰ আগতত্তা ৰুত্তং ‘‘উগ্ঘটিতঞ্ঞুপুগ্গলস্স ৰসেনা’’তি।
Arahattaphalasammādiṭṭhiyāti phalasamāpattikāle pavattasammāñāṇaṃ. Sammāñāṇaṃ pubbe vuttasammādiṭṭhiyevāti pana idaṃ phalasammādiṭṭhibhāvasāmaññena vuttaṃ. Keci pana ‘‘paccavekkhaṇañāṇa’’nti vadanti, taṃ na yujjati ‘‘asekkhenā’’ti visesitattā. Tampi asekkhañāṇanti ce? Evampi nippariyāya sekkhaggahaṇe pariyāyasekkhaggahaṇaṃ na yuttameva, kiccabhedena vā vuttanti daṭṭhabbaṃ. Ekā eva hi sā paññā nibbānassa paccakkhakiriyāya sammādassanakiccaṃ upādāya ‘‘sammādiṭṭhī’’ti vuttā, sammājānanakiccaṃ upādāya ‘‘sammāñāṇa’’nti. Aññātāvindriyavasena vā sammādiṭṭhi, paññindriyavasena sammāñāṇanti evamettha attho daṭṭhabbo. Maggaphalāvahāya desanāya saṅkhepatova āgatattā vuttaṃ ‘‘ugghaṭitaññupuggalassa vasenā’’ti.
ভদ্দালিসুত্তৰণ্ণনায লীনত্থপ্পকাসনা সমত্তা।
Bhaddālisuttavaṇṇanāya līnatthappakāsanā samattā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / মজ্ঝিমনিকায • Majjhimanikāya / ৫. ভদ্দালিসুত্তং • 5. Bhaddālisuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / মজ্ঝিমনিকায (অট্ঠকথা) • Majjhimanikāya (aṭṭhakathā) / ৫. ভদ্দালিসুত্তৰণ্ণনা • 5. Bhaddālisuttavaṇṇanā
