| Library / Tipiṭaka / д̇ибидага • Tipiṭaka / ж̇аад̇ага-адтагат̇аа • Jātaka-aṭṭhakathā |
[465] 2. бхад̣̇д̣̇асаалаж̇аад̇агаван̣н̣анаа
[465] 2. Bhaddasālajātakavaṇṇanā
гаа д̇вам̣ суд̣̇д̇хзхи вад̇т̇зхийд̇и ид̣̇ам̣ сад̇т̇аа ж̇зд̇аванз вихаранд̇о н̃аад̇ад̇т̇ажарияам̣ аараб̣бха гат̇зси. саавад̇т̇ияан̃хи анаат̇абин̣д̣игасса нивзсанз бан̃жаннам̣ бхигкусад̇аанам̣ ниб̣ад̣̇д̇хабхож̇анам̣ бавад̇д̇ад̇и, д̇ат̇аа висаакааяа жа госаларан̃н̃о жа. д̇ад̇т̇а бана гин̃жааби наанаг̇г̇арасабхож̇анам̣ д̣̇ийяад̇и, бхигкуунам̣ банзд̇т̇а гожи виссаасиго над̇т̇и, д̇асмаа бхигкуу рааж̇анивзсанз на бхун̃ж̇анд̇и, бхад̇д̇ам̣ г̇ахзд̇ваа анаат̇абин̣д̣игасса ваа висаакааяа ваа ан̃н̃зсам̣ ваа виссаасигаанам̣ гхарам̣ г̇анд̇ваа бхун̃ж̇анд̇и. рааж̇аа згад̣̇ивасам̣ бан̣н̣аагаарам̣ аахадам̣ ‘‘бхигкуунам̣ д̣̇зт̇аа’’д̇и бхад̇д̇аг̇г̇ам̣ бзсзд̇ваа ‘‘бхад̇д̇аг̇г̇з бхигкуу над̇т̇ий’’д̇и вуд̇д̇з ‘‘гахам̣ г̇ад̇аа’’д̇и бужчид̇ваа ‘‘ад̇д̇ано виссаасигаг̇зхзсу нисийд̣̇ид̇ваа бхун̃ж̇анд̇ий’’д̇и суд̇ваа бхуд̇д̇абаад̇араасо сад̇т̇у санд̇игам̣ г̇анд̇ваа ‘‘бханд̇з, бхож̇анам̣ наама гим̣ барама’’нд̇и бужчи. виссаасабарамам̣ махаарааж̇а, ган̃ж̇игамад̇д̇агамби виссаасигзна д̣̇иннам̣ мад̇хурам̣ ход̇ийд̇и. бханд̇з, гзна бана сад̣̇д̇хим̣ бхигкуунам̣ виссаасо ход̇ийд̇и? ‘‘н̃аад̇ийхи ваа сзгкагулзхи ваа, махаарааж̇аа’’д̇и. д̇ад̇о рааж̇аа жинд̇зси ‘‘згам̣ сагяад̇хийд̇арам̣ аанзд̇ваа аг̇г̇амахзсим̣ гариссаами, звам̣ маяаа сад̣̇д̇хим̣ бхигкуунам̣ н̃аад̇агз вияа виссаасо бхависсад̇ий’’д̇и. со удтааяаасанаа ад̇д̇ано нивзсанам̣ г̇анд̇ваа габилавад̇т̇ум̣ д̣̇ууд̇ам̣ бзсзси ‘‘д̇хийд̇арам̣ мз д̣̇зт̇а, ахам̣ д̇умхзхи сад̣̇д̇хим̣ н̃аад̇ибхаавам̣ ижчаамий’’д̇и.
Kā tvaṃ suddhehi vatthehīti idaṃ satthā jetavane viharanto ñātatthacariyaṃ ārabbha kathesi. Sāvatthiyañhi anāthapiṇḍikassa nivesane pañcannaṃ bhikkhusatānaṃ nibaddhabhojanaṃ pavattati, tathā visākhāya ca kosalarañño ca. Tattha pana kiñcāpi nānaggarasabhojanaṃ dīyati, bhikkhūnaṃ panettha koci vissāsiko natthi, tasmā bhikkhū rājanivesane na bhuñjanti, bhattaṃ gahetvā anāthapiṇḍikassa vā visākhāya vā aññesaṃ vā vissāsikānaṃ gharaṃ gantvā bhuñjanti. Rājā ekadivasaṃ paṇṇākāraṃ āhaṭaṃ ‘‘bhikkhūnaṃ dethā’’ti bhattaggaṃ pesetvā ‘‘bhattagge bhikkhū natthī’’ti vutte ‘‘kahaṃ gatā’’ti pucchitvā ‘‘attano vissāsikagehesu nisīditvā bhuñjantī’’ti sutvā bhuttapātarāso satthu santikaṃ gantvā ‘‘bhante, bhojanaṃ nāma kiṃ parama’’nti pucchi. Vissāsaparamaṃ mahārāja, kañjikamattakampi vissāsikena dinnaṃ madhuraṃ hotīti. Bhante, kena pana saddhiṃ bhikkhūnaṃ vissāso hotīti? ‘‘Ñātīhi vā sekkhakulehi vā, mahārājā’’ti. Tato rājā cintesi ‘‘ekaṃ sakyadhītaraṃ ānetvā aggamahesiṃ karissāmi, evaṃ mayā saddhiṃ bhikkhūnaṃ ñātake viya vissāso bhavissatī’’ti. So uṭṭhāyāsanā attano nivesanaṃ gantvā kapilavatthuṃ dūtaṃ pesesi ‘‘dhītaraṃ me detha, ahaṃ tumhehi saddhiṃ ñātibhāvaṃ icchāmī’’ti.
саагияаа д̣̇ууд̇аважанам̣ суд̇ваа саннибад̇ид̇ваа манд̇аяим̣су ‘‘маяам̣ госаларан̃н̃о аан̣аабавад̇д̇идтаанз васаама, сажз д̣̇ааригам̣ на д̣̇ассаама, маханд̇ам̣ взрам̣ бхависсад̇и, сажз д̣̇ассаама, гулавам̣со но бхиж̇ж̇иссад̇и, гим̣ ну ко гаад̇аб̣б̣а’’нд̇и. ат̇а нз махаанаамо ааха – ‘‘маа жинд̇аяид̇т̇а, мама д̇хийд̇аа ваасабхакад̇д̇ияаа наама нааг̇амун̣д̣ааяа наама д̣̇аасияаа гужчисмим̣ ниб̣б̣ад̇д̇и. саа сол̣асавассуд̣̇д̣̇зсигаа уд̇д̇амаруубад̇хараа собхаг̇г̇аббад̇д̇аа бид̇у вам̣сзна кад̇д̇ияаж̇аад̇игаа, д̇амасса ‘кад̇д̇ияаган̃н̃аа’д̇и бзсзссаамаа’’д̇и. саагияаа ‘‘саад̇хуу’’д̇и самбадижчид̇ваа д̣̇ууд̇з баггосаабзд̇ваа ‘‘саад̇ху, д̣̇ааригам̣ д̣̇ассаама, ид̣̇аанзва нам̣ г̇ахзд̇ваа г̇ажчат̇аа’’д̇и аахам̣су. д̣̇ууд̇аа жинд̇зсум̣ ‘‘имз саагияаа наама ж̇аад̇им̣ ниссааяа ад̇имаанино, ‘сад̣̇исий но’д̇и вад̇ваа асад̣̇исимби д̣̇ад̣̇зяяум̣, зд̇зхи сад̣̇д̇хим̣ згад̇о бхун̃ж̇амаанамзва г̇ан̣хиссаамаа’’д̇и. д̇з звамаахам̣су ‘‘маяам̣ г̇ахзд̇ваа г̇ажчанд̇аа яаа д̇умхзхи сад̣̇д̇хим̣ згад̇о бхун̃ж̇ад̇и, д̇ам̣ г̇ахзд̇ваа г̇амиссаамаа’’д̇и. саагияаа д̇зсам̣ ниваасадтаанам̣ д̣̇аабзд̇ваа ‘‘гим̣ гариссаамаа’’д̇и жинд̇аяим̣су. махаанаамо ааха – ‘‘д̇умхз маа жинд̇аяид̇т̇а, ахам̣ убааяам̣ гариссаами, д̇умхз мама бхож̇анагаалз ваасабхакад̇д̇ияам̣ алан̇гарид̇ваа аанзд̇ваа маяаа згасмим̣ габ̣ал̣з г̇ахид̇амад̇д̇з ‘д̣̇зва, асугарааж̇аа бан̣н̣ам̣ бахин̣и, имам̣ д̇аава саасанам̣ сун̣аат̇аа’д̇и бан̣н̣ам̣ д̣̇ассзяяаат̇аа’’д̇и. д̇з ‘‘саад̇хуу’’д̇и самбадижчид̇ваа д̇асмим̣ бхун̃ж̇амаанз гумааригам̣ алан̇гарим̣су.
Sākiyā dūtavacanaṃ sutvā sannipatitvā mantayiṃsu ‘‘mayaṃ kosalarañño āṇāpavattiṭṭhāne vasāma, sace dārikaṃ na dassāma, mahantaṃ veraṃ bhavissati, sace dassāma, kulavaṃso no bhijjissati, kiṃ nu kho kātabba’’nti. Atha ne mahānāmo āha – ‘‘mā cintayittha, mama dhītā vāsabhakhattiyā nāma nāgamuṇḍāya nāma dāsiyā kucchismiṃ nibbatti. Sā soḷasavassuddesikā uttamarūpadharā sobhaggappattā pitu vaṃsena khattiyajātikā, tamassa ‘khattiyakaññā’ti pesessāmā’’ti. Sākiyā ‘‘sādhū’’ti sampaṭicchitvā dūte pakkosāpetvā ‘‘sādhu, dārikaṃ dassāma, idāneva naṃ gahetvā gacchathā’’ti āhaṃsu. Dūtā cintesuṃ ‘‘ime sākiyā nāma jātiṃ nissāya atimānino, ‘sadisī no’ti vatvā asadisimpi dadeyyuṃ, etehi saddhiṃ ekato bhuñjamānameva gaṇhissāmā’’ti. Te evamāhaṃsu ‘‘mayaṃ gahetvā gacchantā yā tumhehi saddhiṃ ekato bhuñjati, taṃ gahetvā gamissāmā’’ti. Sākiyā tesaṃ nivāsaṭṭhānaṃ dāpetvā ‘‘kiṃ karissāmā’’ti cintayiṃsu. Mahānāmo āha – ‘‘tumhe mā cintayittha, ahaṃ upāyaṃ karissāmi, tumhe mama bhojanakāle vāsabhakhattiyaṃ alaṅkaritvā ānetvā mayā ekasmiṃ kabaḷe gahitamatte ‘deva, asukarājā paṇṇaṃ pahiṇi, imaṃ tāva sāsanaṃ suṇāthā’ti paṇṇaṃ dasseyyāthā’’ti. Te ‘‘sādhū’’ti sampaṭicchitvā tasmiṃ bhuñjamāne kumārikaṃ alaṅkariṃsu.
махаанаамо ‘‘д̇хийд̇арам̣ мз аанзт̇а, маяаа сад̣̇д̇хим̣ бхун̃ж̇ад̇уу’’д̇и ааха. ат̇а нам̣ алан̇гарид̇ваа д̇аавад̣̇зва т̇огам̣ бабан̃жам̣ гад̇ваа аанаяим̣су. саа ‘‘бид̇араа сад̣̇д̇хим̣ бхун̃ж̇иссаамий’’д̇и згабаад̇ияам̣ хад̇т̇ам̣ од̇аарзси. махаанаамоби д̇ааяа сад̣̇д̇хим̣ згабин̣д̣ам̣ г̇ахзд̇ваа мукз табзси. д̣̇уд̇ияабин̣д̣ааяа хад̇т̇з басаарид̇з ‘‘д̣̇зва, асугаран̃н̃аа бан̣н̣ам̣ бахид̇ам̣, имам̣ д̇аава саасанам̣ сун̣аат̇аа’’д̇и бан̣н̣ам̣ убанаамзсум̣. махаанаамо ‘‘амма, д̇вам̣ бхун̃ж̇аахий’’д̇и д̣̇агкин̣ахад̇т̇ам̣ баад̇ияааязва гад̇ваа ваамахад̇т̇зна г̇ахзд̇ваа бан̣н̣ам̣ ологзси. д̇асса д̇ам̣ саасанам̣ убад̇хаарзнд̇ассзва ид̇араа бхун̃ж̇и. со д̇ассаа бхуд̇д̇агаалз хад̇т̇ам̣ д̇ховид̇ваа мукам̣ вигкаалзси. д̇ам̣ д̣̇исваа д̣̇ууд̇аа ‘‘нижчаязнзсаа зд̇асса д̇хийд̇аа’’д̇и нидтамагам̣су, на д̇ам̣ анд̇арам̣ ж̇аанид̇ум̣ сагким̣су. махаанаамо маханд̇зна бариваарзна д̇хийд̇арам̣ бзсзси. д̣̇ууд̇ааби нам̣ саавад̇т̇им̣ нзд̇ваа ‘‘аяам̣ гумааригаа ж̇аад̇исамбаннаа махаанаамасса д̇хийд̇аа’’д̇и вад̣̇им̣су. рааж̇аа д̇уссид̇ваа сагаланаг̇арам̣ алан̇гаараабзд̇ваа д̇ам̣ рад̇анараасимхи табзд̇ваа аг̇г̇амахзсидтаанз абхисин̃жаабзси. саа ран̃н̃о бияаа ахоси манаабаа.
Mahānāmo ‘‘dhītaraṃ me ānetha, mayā saddhiṃ bhuñjatū’’ti āha. Atha naṃ alaṅkaritvā tāvadeva thokaṃ papañcaṃ katvā ānayiṃsu. Sā ‘‘pitarā saddhiṃ bhuñjissāmī’’ti ekapātiyaṃ hatthaṃ otāresi. Mahānāmopi tāya saddhiṃ ekapiṇḍaṃ gahetvā mukhe ṭhapesi. Dutiyapiṇḍāya hatthe pasārite ‘‘deva, asukaraññā paṇṇaṃ pahitaṃ, imaṃ tāva sāsanaṃ suṇāthā’’ti paṇṇaṃ upanāmesuṃ. Mahānāmo ‘‘amma, tvaṃ bhuñjāhī’’ti dakkhiṇahatthaṃ pātiyāyeva katvā vāmahatthena gahetvā paṇṇaṃ olokesi. Tassa taṃ sāsanaṃ upadhārentasseva itarā bhuñji. So tassā bhuttakāle hatthaṃ dhovitvā mukhaṃ vikkhālesi. Taṃ disvā dūtā ‘‘nicchayenesā etassa dhītā’’ti niṭṭhamakaṃsu, na taṃ antaraṃ jānituṃ sakkhiṃsu. Mahānāmo mahantena parivārena dhītaraṃ pesesi. Dūtāpi naṃ sāvatthiṃ netvā ‘‘ayaṃ kumārikā jātisampannā mahānāmassa dhītā’’ti vadiṃsu. Rājā tussitvā sakalanagaraṃ alaṅkārāpetvā taṃ ratanarāsimhi ṭhapetvā aggamahesiṭṭhāne abhisiñcāpesi. Sā rañño piyā ahosi manāpā.
ат̇ассаа на жирассзва г̇аб̣бхо бад̇идтахи. рааж̇аа г̇аб̣бхабарихаарамад̣̇ааси. саа д̣̇асамаасажжаязна суван̣н̣аван̣н̣ам̣ буд̇д̇ам̣ виж̇ааяи. ат̇асса наамаг̇г̇ахан̣ад̣̇ивасз рааж̇аа ад̇д̇ано аяяагасса санд̇игам̣ бзсзси ‘‘сагяарааж̇ад̇хийд̇аа ваасабхакад̇д̇ияаа буд̇д̇ам̣ виж̇ааяи, гимасса наамам̣ гаромаа’’д̇и. д̇ам̣ бана саасанам̣ г̇ахзд̇ваа г̇ад̇о амажжо т̇огам̣ б̣ад̇хирад̇хаад̇уго, со г̇анд̇ваа ран̃н̃о аяяагассаарожзси. со д̇ам̣ суд̇ваа ‘‘ваасабхакад̇д̇ияаа буд̇д̇ам̣ авиж̇ааяид̇вааби саб̣б̣ам̣ ж̇анам̣ абхибхавад̇и, ид̣̇аани бана ад̇ивияа ран̃н̃о валлабхаа бхависсад̇ий’’д̇и ааха. со б̣ад̇хираамажжо ‘‘валлабхаа’’д̇и важанам̣ д̣̇уссуд̇ам̣ суд̇ваа ‘‘видадуубхо’’д̇и саллагкзд̇ваа рааж̇аанам̣ убаг̇анд̇ваа ‘‘д̣̇зва, гумаарасса гира ‘видадуубхо’д̇и наамам̣ гарот̇аа’’д̇и ааха. рааж̇аа ‘‘бораан̣агам̣ но гулад̣̇ад̇д̇игам̣ наамам̣ бхависсад̇ий’’д̇и жинд̇зд̇ваа ‘‘видадуубхо’’д̇и наамам̣ агааси. д̇ад̇о бадтааяа гумааро гумаарабарихаарзна вад̣дханд̇о сад̇д̇авассигагаалз ан̃н̃зсам̣ гумаараанам̣ маад̇аамахагулад̇о хад̇т̇ируубагаассаруубагаад̣̇ийни аахарияамаанаани д̣̇исваа маад̇арам̣ бужчи ‘‘амма, ан̃н̃зсам̣ маад̇аамахагулад̇о бан̣н̣аагааро аахарияад̇и, маяхам̣ гожи гин̃жи на бзсзси, гим̣ д̇вам̣ ниммаад̇аа ниббид̇аасий’’д̇и? ат̇а нам̣ саа ‘‘д̇аад̇а, сагяарааж̇аано маад̇аамахаа д̣̇уурз бана васанд̇и, д̇зна д̇з гин̃жи на бзсзнд̇ий’’д̇и вад̇ваа ван̃жзси.
Athassā na cirasseva gabbho patiṭṭhahi. Rājā gabbhaparihāramadāsi. Sā dasamāsaccayena suvaṇṇavaṇṇaṃ puttaṃ vijāyi. Athassa nāmaggahaṇadivase rājā attano ayyakassa santikaṃ pesesi ‘‘sakyarājadhītā vāsabhakhattiyā puttaṃ vijāyi, kimassa nāmaṃ karomā’’ti. Taṃ pana sāsanaṃ gahetvā gato amacco thokaṃ badhiradhātuko, so gantvā rañño ayyakassārocesi. So taṃ sutvā ‘‘vāsabhakhattiyā puttaṃ avijāyitvāpi sabbaṃ janaṃ abhibhavati, idāni pana ativiya rañño vallabhā bhavissatī’’ti āha. So badhiraamacco ‘‘vallabhā’’ti vacanaṃ dussutaṃ sutvā ‘‘viṭaṭūbho’’ti sallakkhetvā rājānaṃ upagantvā ‘‘deva, kumārassa kira ‘viṭaṭūbho’ti nāmaṃ karothā’’ti āha. Rājā ‘‘porāṇakaṃ no kuladattikaṃ nāmaṃ bhavissatī’’ti cintetvā ‘‘viṭaṭūbho’’ti nāmaṃ akāsi. Tato paṭṭhāya kumāro kumāraparihārena vaḍḍhanto sattavassikakāle aññesaṃ kumārānaṃ mātāmahakulato hatthirūpakaassarūpakādīni āhariyamānāni disvā mātaraṃ pucchi ‘‘amma, aññesaṃ mātāmahakulato paṇṇākāro āhariyati, mayhaṃ koci kiñci na pesesi, kiṃ tvaṃ nimmātā nippitāsī’’ti? Atha naṃ sā ‘‘tāta, sakyarājāno mātāmahā dūre pana vasanti, tena te kiñci na pesentī’’ti vatvā vañcesi.
буна сол̣асавассигагаалз ‘‘амма, маад̇аамахагулам̣ бассид̇угаамомхий’’д̇и вад̇ваа ‘‘алам̣ д̇аад̇а, гим̣ д̇ад̇т̇а г̇анд̇ваа гариссасий’’д̇и ваарияамааноби бунаббунам̣ яаажи. ат̇асса маад̇аа ‘‘д̇зна хи г̇ажчаахий’’д̇и самбадижчи. со бид̇у аарожзд̇ваа маханд̇зна бариваарзна нигками. ваасабхакад̇д̇ияаа бурзд̇арам̣ бан̣н̣ам̣ бзсзси ‘‘ахам̣ ид̇ха сукам̣ васаами, саамино гин̃жи анд̇арам̣ маа д̣̇ассаяим̣суу’’д̇и. саагияаа видадуубхасса ааг̇аманам̣ н̃ад̇ваа ‘‘ванд̣̇ид̇ум̣ на саггаа’’д̇и д̇асса д̣̇ахарад̣̇ахарз гумаарагз ж̇анабад̣̇ам̣ бахин̣им̣су. гумаарз габилавад̇т̇ум̣ самбад̇д̇з саагияаа сант̇ааг̇аарз саннибад̇им̣су. гумааро сант̇ааг̇аарам̣ г̇анд̇ваа адтааси. ат̇а нам̣ ‘‘аяам̣ д̇з, д̇аад̇а, маад̇аамахо, аяам̣ маад̇уло’’д̇и вад̣̇им̣су со саб̣б̣з ванд̣̇амаано вижари. со яаавабидтияаа руж̇анаббамаан̣аа ванд̣̇ид̇ваа згамби ад̇д̇аанам̣ ванд̣̇амаанам̣ ад̣̇исваа ‘‘гим̣ ну ко мам̣ ванд̣̇анд̇аа над̇т̇ий’’д̇и бужчи. саагияаа ‘‘д̇аад̇а, д̇ава ганидтагумаараа ж̇анабад̣̇ам̣ г̇ад̇аа’’д̇и вад̇ваа д̇асса маханд̇ам̣ саггаарам̣ гарим̣су. со гад̇ибаахам̣ васид̇ваа маханд̇зна бариваарзна нигками. ат̇згаа д̣̇аасий сант̇ааг̇аарз д̇зна нисиннапалагам̣ ‘‘ид̣̇ам̣ ваасабхакад̇д̇ияааяа д̣̇аасияаа буд̇д̇асса нисиннапалага’’нд̇и аггосид̇ваа барибхаасид̇ваа кийрод̣̇агзна д̇хови. зго бурисо ад̇д̇ано аавуд̇хам̣ бамуссид̇ваа нивад̇д̇о д̇ам̣ г̇ан̣ханд̇о видадуубхагумаарасса аггосанасад̣̇д̣̇ам̣ суд̇ваа д̇ам̣ анд̇арам̣ бужчид̇ваа ‘‘ваасабхакад̇д̇ияаа д̣̇аасияаа гужчисмим̣ махаанаамасаггасса ж̇аад̇аа’’д̇и н̃ад̇ваа г̇анд̇ваа б̣алагааяасса гат̇зси. ‘‘ваасабхакад̇д̇ияаа гира д̣̇аасияаа д̇хийд̇аа’’д̇и махааголаахалам̣ ахоси.
Puna soḷasavassikakāle ‘‘amma, mātāmahakulaṃ passitukāmomhī’’ti vatvā ‘‘alaṃ tāta, kiṃ tattha gantvā karissasī’’ti vāriyamānopi punappunaṃ yāci. Athassa mātā ‘‘tena hi gacchāhī’’ti sampaṭicchi. So pitu ārocetvā mahantena parivārena nikkhami. Vāsabhakhattiyā puretaraṃ paṇṇaṃ pesesi ‘‘ahaṃ idha sukhaṃ vasāmi, sāmino kiñci antaraṃ mā dassayiṃsū’’ti. Sākiyā viṭaṭūbhassa āgamanaṃ ñatvā ‘‘vandituṃ na sakkā’’ti tassa daharadahare kumārake janapadaṃ pahiṇiṃsu. Kumāre kapilavatthuṃ sampatte sākiyā santhāgāre sannipatiṃsu. Kumāro santhāgāraṃ gantvā aṭṭhāsi. Atha naṃ ‘‘ayaṃ te, tāta, mātāmaho, ayaṃ mātulo’’ti vadiṃsu so sabbe vandamāno vicari. So yāvapiṭṭhiyā rujanappamāṇā vanditvā ekampi attānaṃ vandamānaṃ adisvā ‘‘kiṃ nu kho maṃ vandantā natthī’’ti pucchi. Sākiyā ‘‘tāta, tava kaniṭṭhakumārā janapadaṃ gatā’’ti vatvā tassa mahantaṃ sakkāraṃ kariṃsu. So katipāhaṃ vasitvā mahantena parivārena nikkhami. Athekā dāsī santhāgāre tena nisinnaphalakaṃ ‘‘idaṃ vāsabhakhattiyāya dāsiyā puttassa nisinnaphalaka’’nti akkositvā paribhāsitvā khīrodakena dhovi. Eko puriso attano āvudhaṃ pamussitvā nivatto taṃ gaṇhanto viṭaṭūbhakumārassa akkosanasaddaṃ sutvā taṃ antaraṃ pucchitvā ‘‘vāsabhakhattiyā dāsiyā kucchismiṃ mahānāmasakkassa jātā’’ti ñatvā gantvā balakāyassa kathesi. ‘‘Vāsabhakhattiyā kira dāsiyā dhītā’’ti mahākolāhalaṃ ahosi.
гумааро д̇ам̣ суд̇ваа ‘‘зд̇з д̇аава мама нисиннапалагам̣ кийрод̣̇агзна д̇хованд̇у, ахам̣ бана раж̇ж̇з бад̇идтид̇агаалз зд̇зсам̣ г̇алалохид̇ам̣ г̇ахзд̇ваа мама нисиннапалагам̣ д̇ховиссаамий’’д̇и жид̇д̇ам̣ бадтабзси. д̇асмим̣ саавад̇т̇им̣ г̇ад̇з амажжаа саб̣б̣ам̣ бавад̇д̇им̣ ран̃н̃о аарожзсум̣. рааж̇аа ‘‘саб̣б̣з маяхам̣ д̣̇аасид̇хийд̇арам̣ ад̣̇ам̣суу’’д̇и саагияаанам̣ гуж̇жхид̇ваа ваасабхакад̇д̇ияааяа жа буд̇д̇асса жа д̣̇иннабарихаарам̣ ажчинд̣̇ид̇ваа д̣̇аасад̣̇аасийхи лад̣̇д̇хаб̣б̣абарихаарамад̇д̇амзва д̣̇аабзси. д̇ад̇о гад̇ибаахажжаязна сад̇т̇аа рааж̇анивзсанам̣ ааг̇анд̇ваа нисийд̣̇и. рааж̇аа сад̇т̇аарам̣ ванд̣̇ид̇ваа ‘‘бханд̇з, д̇умхаагам̣ гира н̃аад̇агзхи д̣̇аасид̇хийд̇аа маяхам̣ д̣̇иннаа, д̇знассаа ахам̣ сабуд̇д̇ааяа барихаарам̣ ажчинд̣̇ид̇ваа д̣̇аасад̣̇аасийхи лад̣̇д̇хаб̣б̣абарихаарамад̇д̇амзва д̣̇аабзси’’нд̇и ааха. сад̇т̇аа ‘‘аяуд̇д̇ам̣, махаарааж̇а, саагиязхи гад̇ам̣, д̣̇ад̣̇анд̇зхи наама самаанаж̇аад̇игаа д̣̇аад̇аб̣б̣аа асса. д̇ам̣ бана махаарааж̇а, вад̣̇аами ваасабхакад̇д̇ияаа кад̇д̇ияарааж̇ад̇хийд̇аа кад̇д̇ияасса ран̃н̃о г̇зхз абхисзгам̣ лабхи, видадуубхоби кад̇д̇ияарааж̇аанамзва бадижжа ж̇аад̇о, маад̇уг̇од̇д̇ам̣ наама гим̣ гариссад̇и, бид̇уг̇од̇д̇амзва бамаан̣анд̇и бораан̣агабан̣д̣ид̇аа д̣̇алид̣̇д̣̇ид̇т̇ияаа гадтахааригааяаби аг̇г̇амахзсидтаанам̣ ад̣̇ам̣су, д̇ассаа жа гужчимхи ж̇аад̇агумааро д̣̇ваад̣̇асаяож̇анигааяа б̣аараан̣асияаа раж̇ж̇ам̣ гад̇ваа гадтавааханарааж̇аа наама ж̇аад̇о’’д̇и гадтавааханаж̇аад̇агам̣ (ж̇аа. 1.1.7) гат̇зси . рааж̇аа сад̇т̇у д̇хаммагат̇ам̣ суд̇ваа ‘‘бид̇уг̇од̇д̇амзва гира бамаан̣а’’нд̇и суд̇ваа д̇уссид̇ваа маад̇аабуд̇д̇аанам̣ багад̇ибарихаарамзва д̣̇аабзси.
Kumāro taṃ sutvā ‘‘ete tāva mama nisinnaphalakaṃ khīrodakena dhovantu, ahaṃ pana rajje patiṭṭhitakāle etesaṃ galalohitaṃ gahetvā mama nisinnaphalakaṃ dhovissāmī’’ti cittaṃ paṭṭhapesi. Tasmiṃ sāvatthiṃ gate amaccā sabbaṃ pavattiṃ rañño ārocesuṃ. Rājā ‘‘sabbe mayhaṃ dāsidhītaraṃ adaṃsū’’ti sākiyānaṃ kujjhitvā vāsabhakhattiyāya ca puttassa ca dinnaparihāraṃ acchinditvā dāsadāsīhi laddhabbaparihāramattameva dāpesi. Tato katipāhaccayena satthā rājanivesanaṃ āgantvā nisīdi. Rājā satthāraṃ vanditvā ‘‘bhante, tumhākaṃ kira ñātakehi dāsidhītā mayhaṃ dinnā, tenassā ahaṃ saputtāya parihāraṃ acchinditvā dāsadāsīhi laddhabbaparihāramattameva dāpesi’’nti āha. Satthā ‘‘ayuttaṃ, mahārāja, sākiyehi kataṃ, dadantehi nāma samānajātikā dātabbā assa. Taṃ pana mahārāja, vadāmi vāsabhakhattiyā khattiyarājadhītā khattiyassa rañño gehe abhisekaṃ labhi, viṭaṭūbhopi khattiyarājānameva paṭicca jāto, mātugottaṃ nāma kiṃ karissati, pitugottameva pamāṇanti porāṇakapaṇḍitā dalidditthiyā kaṭṭhahārikāyapi aggamahesiṭṭhānaṃ adaṃsu, tassā ca kucchimhi jātakumāro dvādasayojanikāya bārāṇasiyā rajjaṃ katvā kaṭṭhavāhanarājā nāma jāto’’ti kaṭṭhavāhanajātakaṃ (jā. 1.1.7) kathesi . Rājā satthu dhammakathaṃ sutvā ‘‘pitugottameva kira pamāṇa’’nti sutvā tussitvā mātāputtānaṃ pakatiparihārameva dāpesi.
ран̃н̃о бана б̣анд̇хуло наама сзнаабад̇и маллигам̣ наама ад̇д̇ано бхарияам̣ ван̃жхам̣ ‘‘д̇ава гулагхарамзва г̇ажчаахий’’д̇и гусинаарамзва бзсзси. саа ‘‘сад̇т̇аарам̣ д̣̇исваава г̇амиссаамий’’д̇и ж̇зд̇аванам̣ бависид̇ваа д̇ат̇ааг̇ад̇ам̣ ванд̣̇ид̇ваа згаманд̇ам̣ тид̇аа ‘‘гахам̣ г̇ажчасий’’д̇и жа будтаа ‘‘саамиго мз, бханд̇з, гулагхарам̣ бзсзсий’’д̇и вад̇ваа ‘‘гасмаа’’д̇и вуд̇д̇аа ‘‘ван̃жхаа абуд̇д̇игаа, бханд̇з’’д̇и вад̇ваа сад̇т̇аараа ‘‘яад̣̇и звам̣ г̇аманагижжам̣ над̇т̇и, нивад̇д̇аахий’’д̇и вуд̇д̇аа д̇удтаа сад̇т̇аарам̣ ванд̣̇ид̇ваа нивзсанамзва буна аг̇амааси. ‘‘гасмаа нивад̇д̇асий’’д̇и будтаа ‘‘д̣̇асаб̣алзна нивад̇д̇ид̇аамхий’’д̇и ааха. сзнаабад̇и ‘‘д̣̇идтам̣ бхависсад̇и д̇ат̇ааг̇ад̇зна гааран̣а’’нд̇и ааха. саа на жирассзва г̇аб̣бхам̣ бадилабхид̇ваа уббаннад̣̇охал̣аа ‘‘д̣̇охал̣о мз уббанно’’д̇и аарожзси. ‘‘гим̣ д̣̇охал̣о’’д̇и? ‘‘взсаалияаа наг̇арз лижчавирааж̇аанам̣ абхисзгаман̇г̇алабогкаран̣им̣ од̇арид̇ваа нхад̇ваа баанийяам̣ бивид̇угаамаамхи, саамий’’д̇и. сзнаабад̇и ‘‘саад̇хуу’’д̇и вад̇ваа сахассат̇аамад̇ханум̣ г̇ахзд̇ваа д̇ам̣ рат̇ам̣ ааробзд̇ваа саавад̇т̇ид̇о нигкамид̇ваа рат̇ам̣ бааж̇знд̇о взсаалим̣ баависи.
Rañño pana bandhulo nāma senāpati mallikaṃ nāma attano bhariyaṃ vañjhaṃ ‘‘tava kulagharameva gacchāhī’’ti kusinārameva pesesi. Sā ‘‘satthāraṃ disvāva gamissāmī’’ti jetavanaṃ pavisitvā tathāgataṃ vanditvā ekamantaṃ ṭhitā ‘‘kahaṃ gacchasī’’ti ca puṭṭhā ‘‘sāmiko me, bhante, kulagharaṃ pesesī’’ti vatvā ‘‘kasmā’’ti vuttā ‘‘vañjhā aputtikā, bhante’’ti vatvā satthārā ‘‘yadi evaṃ gamanakiccaṃ natthi, nivattāhī’’ti vuttā tuṭṭhā satthāraṃ vanditvā nivesanameva puna agamāsi. ‘‘Kasmā nivattasī’’ti puṭṭhā ‘‘dasabalena nivattitāmhī’’ti āha. Senāpati ‘‘diṭṭhaṃ bhavissati tathāgatena kāraṇa’’nti āha. Sā na cirasseva gabbhaṃ paṭilabhitvā uppannadohaḷā ‘‘dohaḷo me uppanno’’ti ārocesi. ‘‘Kiṃ dohaḷo’’ti? ‘‘Vesāliyā nagare licchavirājānaṃ abhisekamaṅgalapokkharaṇiṃ otaritvā nhatvā pānīyaṃ pivitukāmāmhi, sāmī’’ti. Senāpati ‘‘sādhū’’ti vatvā sahassathāmadhanuṃ gahetvā taṃ rathaṃ āropetvā sāvatthito nikkhamitvā rathaṃ pājento vesāliṃ pāvisi.
д̇асмин̃жа гаалз госаларан̃н̃о б̣анд̇хуласзнаабад̇инаа сад̣̇д̇хим̣ згаажарияагулз уг̇г̇ахид̇асиббо махаали наама лижчавий анд̇хо лижчавийнам̣ ад̇т̇ан̃жа д̇хамман̃жа анусаасанд̇о д̣̇ваарасамийбз васад̇и. со рат̇асса уммаарз бадигхадданасад̣̇д̣̇ам̣ суд̇ваа ‘‘б̣анд̇хуламалласса рат̇абад̇анасад̣̇д̣̇о зсо, аж̇ж̇а лижчавийнам̣ бхаяам̣ уббаж̇ж̇иссад̇ий’’д̇и ааха. богкаран̣ияаа анд̇о жа б̣ахи жа аарагкаа б̣алаваа, убари лохаж̇аалам̣ бад̇т̇адам̣, сагун̣аанамби огаасо над̇т̇и. сзнаабад̇и бана рат̇аа од̇арид̇ваа аарагкагз каг̇г̇зна бахаранд̇о балаабзд̇ваа лохаж̇аалам̣ чинд̣̇ид̇ваа анд̇обогкаран̣ияам̣ бхарияам̣ од̇аарзд̇ваа нхаабзд̇ваа бааязд̇ваа саяамби нхад̇ваа маллигам̣ рат̇ам̣ ааробзд̇ваа наг̇араа нигкамид̇ваа ааг̇ад̇амаг̇г̇знзва бааяааси. аарагкагаа г̇анд̇ваа лижчавийнам̣ аарожзсум̣. лижчавирааж̇аано гуж̇жхид̇ваа бан̃жа рат̇асад̇аани ааруяха ‘‘б̣анд̇хуламаллам̣ г̇ан̣хиссаамаа’’д̇и нигкамим̣су. д̇ам̣ бавад̇д̇им̣ махаалисса аарожзсум̣. махаали ‘‘маа г̇амид̇т̇а, со хи во саб̣б̣з гхаад̇аяиссад̇ий’’д̇и ааха. д̇зби ‘‘маяам̣ г̇амиссаамаязваа’’д̇и вад̣̇им̣су. д̇зна хи жаггасса яаава наабхид̇о бат̇авим̣ бавидтадтаанам̣ д̣̇исваа нивад̇д̇зяяаат̇а, д̇ад̇о анивад̇д̇анд̇аа бурад̇о асанисад̣̇д̣̇ам̣ вияа сун̣иссат̇а, д̇амхаа таанаа нивад̇д̇зяяаат̇а, д̇ад̇о анивад̇д̇анд̇аа д̇умхаагам̣ рат̇ад̇хурзсу чид̣̇д̣̇ам̣ бассиссат̇а, д̇амхаа таанаа нивад̇д̇зяяаат̇а, бурад̇о мааг̇амид̇т̇аад̇и. д̇з д̇асса важанзна анивад̇д̇ид̇ваа д̇ам̣ ануб̣анд̇хим̣суязва.
Tasmiñca kāle kosalarañño bandhulasenāpatinā saddhiṃ ekācariyakule uggahitasippo mahāli nāma licchavī andho licchavīnaṃ atthañca dhammañca anusāsanto dvārasamīpe vasati. So rathassa ummāre paṭighaṭṭanasaddaṃ sutvā ‘‘bandhulamallassa rathapatanasaddo eso, ajja licchavīnaṃ bhayaṃ uppajjissatī’’ti āha. Pokkharaṇiyā anto ca bahi ca ārakkhā balavā, upari lohajālaṃ patthaṭaṃ, sakuṇānampi okāso natthi. Senāpati pana rathā otaritvā ārakkhake khaggena paharanto palāpetvā lohajālaṃ chinditvā antopokkharaṇiyaṃ bhariyaṃ otāretvā nhāpetvā pāyetvā sayampi nhatvā mallikaṃ rathaṃ āropetvā nagarā nikkhamitvā āgatamaggeneva pāyāsi. Ārakkhakā gantvā licchavīnaṃ ārocesuṃ. Licchavirājāno kujjhitvā pañca rathasatāni āruyha ‘‘bandhulamallaṃ gaṇhissāmā’’ti nikkhamiṃsu. Taṃ pavattiṃ mahālissa ārocesuṃ. Mahāli ‘‘mā gamittha, so hi vo sabbe ghātayissatī’’ti āha. Tepi ‘‘mayaṃ gamissāmayevā’’ti vadiṃsu. Tena hi cakkassa yāva nābhito pathaviṃ paviṭṭhaṭṭhānaṃ disvā nivatteyyātha, tato anivattantā purato asanisaddaṃ viya suṇissatha, tamhā ṭhānā nivatteyyātha, tato anivattantā tumhākaṃ rathadhuresu chiddaṃ passissatha, tamhā ṭhānā nivatteyyātha, purato māgamitthāti. Te tassa vacanena anivattitvā taṃ anubandhiṃsuyeva.
маллигаа д̣̇исваа ‘‘рат̇аа, саами, бан̃н̃ааяанд̇ий’’д̇и ааха. д̇зна хи згасса рат̇асса вияа бан̃н̃ааяанагаалз мама аарожзяяаасийд̇и. саа яад̣̇аа саб̣б̣з зго вияа худ̇ваа бан̃н̃ааяим̣су, д̇ад̣̇аа ‘‘згамзва саами рат̇асийсам̣ бан̃н̃ааяад̇ий’’д̇и ааха. б̣анд̇хуло ‘‘д̇зна хи имаа расмияо г̇ан̣хаахий’’д̇и д̇ассаа расмияо д̣̇ад̇ваа рат̇з тид̇ова д̇ханум̣ ааробзд̇и, рат̇ажаггам̣ яаава наабхид̇о бат̇авим̣ баависи, лижчавино д̇ам̣ таанам̣ д̣̇исвааби на нивад̇д̇им̣су. ид̇аро т̇огам̣ г̇анд̇ваа ж̇ияам̣ бот̇зси, асанисад̣̇д̣̇о вияа ахоси. д̇з д̇ад̇оби на нивад̇д̇им̣су, ануб̣анд̇ханд̇аа г̇ажчанд̇зва. б̣анд̇хуло рат̇з тид̇агова згам̣ сарам̣ киби. со бан̃жаннам̣ рат̇асад̇аанам̣ рат̇асийсам̣ чид̣̇д̣̇ам̣ гад̇ваа бан̃жа рааж̇асад̇аани баригараб̣анд̇ханадтаанз виж̇жхид̇ваа бат̇авим̣ баависи. д̇з ад̇д̇ано вид̣̇д̇хабхаавам̣ аж̇аанид̇ваа ‘‘д̇идта рз, д̇идта рз’’д̇и вад̣̇анд̇аа ануб̣анд̇хим̣суязва. б̣анд̇хуло рат̇ам̣ табзд̇ваа ‘‘д̇умхз мад̇агаа, мад̇агзхи сад̣̇д̇хим̣ маяхам̣ яуд̣̇д̇хам̣ наама над̇т̇ий’’д̇и ааха. д̇з ‘‘мад̇агаа наама амхаад̣̇исаа нзва хонд̇ий’’д̇и вад̣̇им̣су. ‘‘д̇зна хи саб̣б̣абажчимасса баригарам̣ можзт̇аа’’д̇и. д̇з можаяим̣су. со муд̇д̇амад̇д̇зязва марид̇ваа бад̇ид̇о. ат̇а нз ‘‘саб̣б̣зби д̇умхз зваруубаа, ад̇д̇ано гхараани г̇анд̇ваа сам̣вид̇хаад̇аб̣б̣ам̣ сам̣вид̣̇ахид̇ваа буд̇д̇ад̣̇аарз анусаасид̇ваа саннаахам̣ можзт̇аа’’д̇и ааха. д̇з д̇ат̇аа гад̇ваа саб̣б̣з ж̇ийвид̇агкаяам̣ бад̇д̇аа.
Mallikā disvā ‘‘rathā, sāmi, paññāyantī’’ti āha. Tena hi ekassa rathassa viya paññāyanakāle mama āroceyyāsīti. Sā yadā sabbe eko viya hutvā paññāyiṃsu, tadā ‘‘ekameva sāmi rathasīsaṃ paññāyatī’’ti āha. Bandhulo ‘‘tena hi imā rasmiyo gaṇhāhī’’ti tassā rasmiyo datvā rathe ṭhitova dhanuṃ āropeti, rathacakkaṃ yāva nābhito pathaviṃ pāvisi, licchavino taṃ ṭhānaṃ disvāpi na nivattiṃsu. Itaro thokaṃ gantvā jiyaṃ pothesi, asanisaddo viya ahosi. Te tatopi na nivattiṃsu, anubandhantā gacchanteva. Bandhulo rathe ṭhitakova ekaṃ saraṃ khipi. So pañcannaṃ rathasatānaṃ rathasīsaṃ chiddaṃ katvā pañca rājasatāni parikarabandhanaṭṭhāne vijjhitvā pathaviṃ pāvisi. Te attano viddhabhāvaṃ ajānitvā ‘‘tiṭṭha re, tiṭṭha re’’ti vadantā anubandhiṃsuyeva. Bandhulo rathaṃ ṭhapetvā ‘‘tumhe matakā, matakehi saddhiṃ mayhaṃ yuddhaṃ nāma natthī’’ti āha. Te ‘‘matakā nāma amhādisā neva hontī’’ti vadiṃsu. ‘‘Tena hi sabbapacchimassa parikaraṃ mocethā’’ti. Te mocayiṃsu. So muttamatteyeva maritvā patito. Atha ne ‘‘sabbepi tumhe evarūpā, attano gharāni gantvā saṃvidhātabbaṃ saṃvidahitvā puttadāre anusāsitvā sannāhaṃ mocethā’’ti āha. Te tathā katvā sabbe jīvitakkhayaṃ pattā.
б̣анд̇хулоби маллигам̣ саавад̇т̇им̣ аанзси. саа сол̣асагкад̇д̇ум̣ яамагз буд̇д̇з виж̇ааяи, саб̣б̣зби суураа т̇аамасамбаннаа ахзсум̣, саб̣б̣асиббз нибпад̇д̇им̣ баабун̣им̣су. згзгассаби бурисасахассабаривааро ахоси . бид̇араа сад̣̇д̇хим̣ рааж̇анивзсанам̣ г̇ажчанд̇зхи д̇зхзва рааж̇ан̇г̇ан̣ам̣ барибуури. ат̇згад̣̇ивасам̣ винижчаяз гуудад̣д̣абарааж̇ид̇аа мануссаа б̣анд̇хулам̣ ааг̇ажчанд̇ам̣ д̣̇исваа махааравам̣ вираванд̇аа винижчаяаамажжаанам̣ гуудад̣д̣агааран̣ам̣ д̇асса аарожзсум̣. соби винижчаяам̣ г̇анд̇ваа д̇ам̣ ад̣д̣ам̣ д̇ийрзд̇ваа саамигамзва саамигам̣, ассаамигамзва ассаамигам̣ агааси. махааж̇ано махаасад̣̇д̣̇зна саад̇хугаарам̣ бавад̇д̇зси. рааж̇аа ‘‘гимид̣̇а’’нд̇и бужчид̇ваа д̇амад̇т̇ам̣ суд̇ваа д̇уссид̇ваа саб̣б̣зби д̇з амажжз хаарзд̇ваа б̣анд̇хулассзва винижчаяам̣ нияяаад̣̇зси. со д̇ад̇о бадтааяа саммаа винижчини. д̇ад̇о бораан̣агавинижчаяигаа лан̃ж̇ам̣ алабханд̇аа аббалаабхаа худ̇ваа ‘‘б̣анд̇хуло раж̇ж̇ам̣ бад̇т̇зд̇ий’’д̇и рааж̇агулз барибхинд̣̇им̣су. рааж̇аа д̇ам̣ гат̇ам̣ г̇ахзд̇ваа жид̇д̇ам̣ ниг̇г̇ахзд̇ум̣ наасагки, ‘‘имасмим̣ ид̇хзва гхаад̇ияамаанз г̇арахаа мз уббаж̇ж̇иссад̇ий’’д̇и буна жинд̇зд̇ваа ‘‘баяуд̇д̇абурисзхи бажжанд̇ам̣ бахараабзд̇ваа д̇з балаабзд̇ваа нивад̇д̇агаалз анд̇араамаг̇г̇з буд̇д̇зхи сад̣̇д̇хим̣ маарзд̇ум̣ ваддад̇ий’’д̇и б̣анд̇хулам̣ баггосаабзд̇ваа ‘‘бажжанд̇о гира губид̇о, д̇ава буд̇д̇зхи сад̣̇д̇хим̣ г̇анд̇ваа жорз г̇ан̣хаахий’’д̇и бахин̣ид̇ваа ‘‘зд̇т̇звасса д̣̇вад̇д̇им̣сааяа буд̇д̇зхи сад̣̇д̇хим̣ сийсам̣ чинд̣̇ид̇ваа аахарат̇аа’’д̇и д̇зхи сад̣̇д̇хим̣ ан̃н̃зби самад̇т̇з махааяод̇хз бзсзси. д̇асмим̣ бажжанд̇ам̣ г̇ажчанд̇зязва ‘‘сзнаабад̇и гира ааг̇ажчад̇ий’’д̇и суд̇ваава баяуд̇д̇агажораа балааяим̣су. со д̇ам̣ бад̣̇зсам̣ ааваасаабзд̇ваа ж̇анабад̣̇ам̣ сан̣табзд̇ваа нивад̇д̇и.
Bandhulopi mallikaṃ sāvatthiṃ ānesi. Sā soḷasakkhattuṃ yamake putte vijāyi, sabbepi sūrā thāmasampannā ahesuṃ, sabbasippe nipphattiṃ pāpuṇiṃsu. Ekekassapi purisasahassaparivāro ahosi . Pitarā saddhiṃ rājanivesanaṃ gacchantehi teheva rājaṅgaṇaṃ paripūri. Athekadivasaṃ vinicchaye kūṭaḍḍaparājitā manussā bandhulaṃ āgacchantaṃ disvā mahāravaṃ viravantā vinicchayaamaccānaṃ kūṭaḍḍakāraṇaṃ tassa ārocesuṃ. Sopi vinicchayaṃ gantvā taṃ aḍḍaṃ tīretvā sāmikameva sāmikaṃ, assāmikameva assāmikaṃ akāsi. Mahājano mahāsaddena sādhukāraṃ pavattesi. Rājā ‘‘kimida’’nti pucchitvā tamatthaṃ sutvā tussitvā sabbepi te amacce hāretvā bandhulasseva vinicchayaṃ niyyādesi. So tato paṭṭhāya sammā vinicchini. Tato porāṇakavinicchayikā lañjaṃ alabhantā appalābhā hutvā ‘‘bandhulo rajjaṃ patthetī’’ti rājakule paribhindiṃsu. Rājā taṃ kathaṃ gahetvā cittaṃ niggahetuṃ nāsakkhi, ‘‘imasmiṃ idheva ghātiyamāne garahā me uppajjissatī’’ti puna cintetvā ‘‘payuttapurisehi paccantaṃ paharāpetvā te palāpetvā nivattakāle antarāmagge puttehi saddhiṃ māretuṃ vaṭṭatī’’ti bandhulaṃ pakkosāpetvā ‘‘paccanto kira kupito, tava puttehi saddhiṃ gantvā core gaṇhāhī’’ti pahiṇitvā ‘‘etthevassa dvattiṃsāya puttehi saddhiṃ sīsaṃ chinditvā āharathā’’ti tehi saddhiṃ aññepi samatthe mahāyodhe pesesi. Tasmiṃ paccantaṃ gacchanteyeva ‘‘senāpati kira āgacchatī’’ti sutvāva payuttakacorā palāyiṃsu. So taṃ padesaṃ āvāsāpetvā janapadaṃ saṇṭhapetvā nivatti.
ат̇асса наг̇арад̇о авид̣̇уурз таанз д̇з яод̇хаа буд̇д̇зхи сад̣̇д̇хим̣ сийсам̣ чинд̣̇им̣су. д̇ам̣ д̣̇ивасам̣ маллигааяа бан̃жахи бхигкусад̇зхи сад̣̇д̇хим̣ д̣̇вз аг̇г̇асаавагаа ниманд̇ид̇аа хонд̇и. ат̇ассаа буб̣б̣ан̣хасамаяз ‘‘саамигасса д̇з сад̣̇д̇хим̣ буд̇д̇зхи сийсам̣ чинд̣̇им̣суу’’д̇и бан̣н̣ам̣ аахарид̇ваа ад̣̇ам̣су. саа д̇ам̣ бавад̇д̇им̣ н̃ад̇ваа гассажи гин̃жи авад̇ваа бан̣н̣ам̣ ужчан̇г̇з гад̇ваа бхигкусан̇гхамзва баривиси. ат̇ассаа барижааригаа бхигкуунам̣ бхад̇д̇ам̣ д̣̇ад̇ваа саббижаадим̣ аахаранд̇ияо т̇зраанам̣ бурад̇о жаадим̣ бхинд̣̇им̣су. д̇хаммасзнаабад̇и ‘‘убаасигз, бхзд̣̇анад̇хаммам̣ бхиннам̣, на жинд̇зд̇аб̣б̣а’’нд̇и ааха. саа ужчан̇г̇ад̇о бан̣н̣ам̣ нийхарид̇ваа ‘‘д̣̇вад̇д̇им̣сабуд̇д̇зхи сад̣̇д̇хим̣ бид̇у сийсам̣ чиннанд̇и мз имам̣ бан̣н̣ам̣ аахарим̣су, ахам̣ ид̣̇ам̣ суд̇вааби на жинд̇зми, саббижаадияаа бхиннааяа гим̣ жинд̇зми, бханд̇з’’д̇и ааха. д̇хаммасзнаабад̇и ‘‘анимид̇д̇аманан̃н̃аад̇а’’нд̇иаад̣̇ийни (су. ни. 579) вад̇ваа д̇хаммам̣ д̣̇зсзд̇ваа удтааяаасанаа вихаарам̣ аг̇амааси. сааби д̣̇вад̇д̇им̣са сун̣исааяо баггосаабзд̇ваа ‘‘д̇умхаагам̣ саамигаа ад̇д̇ано буримагаммапалам̣ лабхим̣су, д̇умхз маа сожид̇т̇а маа барид̣̇звид̇т̇а, ран̃н̃о убари манобад̣̇осам̣ маа гарид̇т̇аа’’д̇и овад̣̇и.
Athassa nagarato avidūre ṭhāne te yodhā puttehi saddhiṃ sīsaṃ chindiṃsu. Taṃ divasaṃ mallikāya pañcahi bhikkhusatehi saddhiṃ dve aggasāvakā nimantitā honti. Athassā pubbaṇhasamaye ‘‘sāmikassa te saddhiṃ puttehi sīsaṃ chindiṃsū’’ti paṇṇaṃ āharitvā adaṃsu. Sā taṃ pavattiṃ ñatvā kassaci kiñci avatvā paṇṇaṃ ucchaṅge katvā bhikkhusaṅghameva parivisi. Athassā paricārikā bhikkhūnaṃ bhattaṃ datvā sappicāṭiṃ āharantiyo therānaṃ purato cāṭiṃ bhindiṃsu. Dhammasenāpati ‘‘upāsike, bhedanadhammaṃ bhinnaṃ, na cintetabba’’nti āha. Sā ucchaṅgato paṇṇaṃ nīharitvā ‘‘dvattiṃsaputtehi saddhiṃ pitu sīsaṃ chinnanti me imaṃ paṇṇaṃ āhariṃsu, ahaṃ idaṃ sutvāpi na cintemi, sappicāṭiyā bhinnāya kiṃ cintemi, bhante’’ti āha. Dhammasenāpati ‘‘animittamanaññāta’’ntiādīni (su. ni. 579) vatvā dhammaṃ desetvā uṭṭhāyāsanā vihāraṃ agamāsi. Sāpi dvattiṃsa suṇisāyo pakkosāpetvā ‘‘tumhākaṃ sāmikā attano purimakammaphalaṃ labhiṃsu, tumhe mā socittha mā paridevittha, rañño upari manopadosaṃ mā karitthā’’ti ovadi.
ран̃н̃о жарабурисаа д̇ам̣ гат̇ам̣ суд̇ваа д̇зсам̣ нид̣̇д̣̇осабхаавам̣ ран̃н̃о гат̇аяим̣су. рааж̇аа сам̣взг̇аббад̇д̇о д̇ассаа нивзсанам̣ г̇анд̇ваа маллиган̃жа сун̣исааяо жассаа камаабзд̇ваа маллигааяа варам̣ ад̣̇ааси. саа ‘‘г̇ахид̇о мз ход̇уу’’д̇и вад̇ваа д̇асмим̣ г̇ад̇з мад̇агабхад̇д̇ам̣ д̣̇ад̇ваа нхад̇ваа рааж̇аанам̣ убасан̇гамид̇ваа ванд̣̇ид̇ваа ‘‘д̣̇зва, д̇умхзхи мз варо д̣̇инно, маяхан̃жа ан̃н̃зна ад̇т̇о над̇т̇и, д̣̇вад̇д̇им̣сааяа мз сун̣исаанам̣ мама жа гулагхараг̇аманам̣ ануж̇аанаат̇аа’’д̇и ааха. рааж̇аа самбадижчи. саа д̣̇вад̇д̇им̣сааяа сун̣исаанам̣ сагагулам̣ бзсзд̇ваа саяам̣ гусинааранаг̇арз ад̇д̇ано гулагхарам̣ аг̇амааси. рааж̇аа б̣анд̇хуласзнаабад̇ино бхааг̇инзяяасса д̣̇ийгхагаарааяанасса наама сзнаабад̇идтаанам̣ ад̣̇ааси. со бана ‘‘маад̇уло мз иминаа маарид̇о’’д̇и ран̃н̃о од̇аарам̣ г̇авзсанд̇о вижарад̇и. рааж̇ааби ниббараад̇хасса б̣анд̇хуласса маарид̇агаалад̇о бадтааяа виббадисаарий жид̇д̇ассаад̣̇ам̣ на лабхад̇и, раж̇ж̇асукам̣ наанубход̇и.
Rañño carapurisā taṃ kathaṃ sutvā tesaṃ niddosabhāvaṃ rañño kathayiṃsu. Rājā saṃvegappatto tassā nivesanaṃ gantvā mallikañca suṇisāyo cassā khamāpetvā mallikāya varaṃ adāsi. Sā ‘‘gahito me hotū’’ti vatvā tasmiṃ gate matakabhattaṃ datvā nhatvā rājānaṃ upasaṅkamitvā vanditvā ‘‘deva, tumhehi me varo dinno, mayhañca aññena attho natthi, dvattiṃsāya me suṇisānaṃ mama ca kulagharagamanaṃ anujānāthā’’ti āha. Rājā sampaṭicchi. Sā dvattiṃsāya suṇisānaṃ sakakulaṃ pesetvā sayaṃ kusināranagare attano kulagharaṃ agamāsi. Rājā bandhulasenāpatino bhāgineyyassa dīghakārāyanassa nāma senāpatiṭṭhānaṃ adāsi. So pana ‘‘mātulo me iminā mārito’’ti rañño otāraṃ gavesanto vicarati. Rājāpi nipparādhassa bandhulassa māritakālato paṭṭhāya vippaṭisārī cittassādaṃ na labhati, rajjasukhaṃ nānubhoti.
д̇ад̣̇аа сад̇т̇аа саагияаанам̣ взл̣ум̣ наама ниг̇амам̣ убаниссааяа вихарад̇и. рааж̇аа д̇ад̇т̇а г̇анд̇ваа аараамад̇о авид̣̇уурз канд̇хааваарам̣ ниваасзд̇ваа ‘‘маханд̇зна бариваарзна сад̇т̇аарам̣ ванд̣̇иссаамаа’’д̇и вихаарам̣ г̇анд̇ваа бан̃жа рааж̇агагуд̇хабхан̣д̣аани д̣̇ийгхагаарааяанасса д̣̇ад̇ваа згагова г̇анд̇хагудим̣ баависи. саб̣б̣ам̣ д̇хаммажзд̇ияасуд̇д̇анияаамзнзва (ма. ни. 2.364 аад̣̇аяо) взд̣̇ид̇аб̣б̣ам̣. д̇асмим̣ г̇анд̇хагудим̣ бавидтз д̣̇ийгхагаарааяано д̇аани бан̃жа рааж̇агагуд̇хабхан̣д̣аани г̇ахзд̇ваа видадуубхам̣ рааж̇аанам̣ гад̇ваа ран̃н̃о згам̣ ассам̣ зган̃жа убадтаанагааригам̣ маад̇уг̇аамам̣ нивад̇д̇зд̇ваа саавад̇т̇им̣ аг̇амааси. рааж̇аа сад̇т̇аараа сад̣̇д̇хим̣ бияагат̇ам̣ гат̇зд̇ваа нигканд̇о сзнам̣ ад̣̇исваа д̇ам̣ маад̇уг̇аамам̣ бужчид̇ваа д̇ам̣ бавад̇д̇им̣ суд̇ваа ‘‘ахам̣ бхааг̇инзяяам̣ аж̇аад̇асад̇д̇ум̣ аад̣̇ааяа ааг̇анд̇ваа видадуубхам̣ г̇ахзссаамий’’д̇и рааж̇аг̇аханаг̇арам̣ г̇ажчанд̇о вигаалз д̣̇ваарзсу бихид̇зсу наг̇арам̣ бависид̇умасаггонд̇о згиссааяа саалааяа нибаж̇ж̇ид̇ваа ваад̇аад̇абзна гиланд̇о рад̇д̇ибхааг̇з д̇ад̇т̇зва гааламагааси. вибхаад̇ааяа рад̇д̇ияаа ‘‘д̣̇зва госаланаринд̣̇а, ид̣̇аани анаат̇оси ж̇аад̇о’’д̇и вилабанд̇ияаа д̇ассаа ид̇т̇ияаа сад̣̇д̣̇ам̣ суд̇ваа ран̃н̃о аарожзсум̣. со маад̇уласса маханд̇зна саггаарзна сарийрагижжам̣ гаарзси.
Tadā satthā sākiyānaṃ veḷuṃ nāma nigamaṃ upanissāya viharati. Rājā tattha gantvā ārāmato avidūre khandhāvāraṃ nivāsetvā ‘‘mahantena parivārena satthāraṃ vandissāmā’’ti vihāraṃ gantvā pañca rājakakudhabhaṇḍāni dīghakārāyanassa datvā ekakova gandhakuṭiṃ pāvisi. Sabbaṃ dhammacetiyasuttaniyāmeneva (ma. ni. 2.364 ādayo) veditabbaṃ. Tasmiṃ gandhakuṭiṃ paviṭṭhe dīghakārāyano tāni pañca rājakakudhabhaṇḍāni gahetvā viṭaṭūbhaṃ rājānaṃ katvā rañño ekaṃ assaṃ ekañca upaṭṭhānakārikaṃ mātugāmaṃ nivattetvā sāvatthiṃ agamāsi. Rājā satthārā saddhiṃ piyakathaṃ kathetvā nikkhanto senaṃ adisvā taṃ mātugāmaṃ pucchitvā taṃ pavattiṃ sutvā ‘‘ahaṃ bhāgineyyaṃ ajātasattuṃ ādāya āgantvā viṭaṭūbhaṃ gahessāmī’’ti rājagahanagaraṃ gacchanto vikāle dvāresu pihitesu nagaraṃ pavisitumasakkonto ekissāya sālāya nipajjitvā vātātapena kilanto rattibhāge tattheva kālamakāsi. Vibhātāya rattiyā ‘‘deva kosalanarinda, idāni anāthosi jāto’’ti vilapantiyā tassā itthiyā saddaṃ sutvā rañño ārocesuṃ. So mātulassa mahantena sakkārena sarīrakiccaṃ kāresi.
видадуубхоби раж̇ж̇ам̣ лабхид̇ваа д̇ам̣ взрам̣ сарид̇ваа ‘‘саб̣б̣зби саагияз маарзссаамий’’д̇и махад̇ияаа сзнааяа нигками. д̇ам̣ д̣̇ивасам̣ сад̇т̇аа бажжуусасамаяз логам̣ вологзнд̇о н̃аад̇исан̇гхасса винаасам̣ д̣̇исваа ‘‘н̃аад̇исан̇г̇ахам̣ гаад̇ум̣ ваддад̇ий’’д̇и жинд̇зд̇ваа буб̣б̣ан̣хасамаяз бин̣д̣ааяа жарид̇ваа бин̣д̣абаад̇абадигганд̇о г̇анд̇хагудияам̣ сийхасзяяам̣ габбзд̇ваа сааяанхасамаяз аагаасзна г̇анд̇ваа габилавад̇т̇усааманд̇з згасмим̣ габ̣аражчааяз ругкамуулз нисийд̣̇и. д̇ад̇о авид̣̇уурз видадуубхасса раж̇ж̇асиймааяа анд̇о санд̣̇ажчааяо ниг̇род̇харугко ад̇т̇и, видадуубхо сад̇т̇аарам̣ д̣̇исваа убасан̇гамид̇ваа ванд̣̇ид̇ваа ‘‘бханд̇з, гим̣гааран̣аа зваруубааяа ун̣хавзлааяа имасмим̣ габ̣аражчааяз ругкамуулз нисийд̣̇ат̇а, зд̇асмим̣ санд̣̇ажчааяз ниг̇род̇харугкамуулз нисийд̣̇ат̇а, бханд̇з’’д̇и вад̇ваа ‘‘ход̇у, махаарааж̇а, н̃аад̇агаанам̣ чааяаа наама сийд̇алаа’’д̇и вуд̇д̇з ‘‘н̃аад̇агаанам̣ рагкан̣ад̇т̇ааяа сад̇т̇аа ааг̇ад̇о бхависсад̇ий’’д̇и жинд̇зд̇ваа сад̇т̇аарам̣ ванд̣̇ид̇ваа саавад̇т̇имзва бажжааг̇ами. сад̇т̇ааби уббад̇ид̇ваа ж̇зд̇аванамзва г̇ад̇о.
Viṭaṭūbhopi rajjaṃ labhitvā taṃ veraṃ saritvā ‘‘sabbepi sākiye māressāmī’’ti mahatiyā senāya nikkhami. Taṃ divasaṃ satthā paccūsasamaye lokaṃ volokento ñātisaṅghassa vināsaṃ disvā ‘‘ñātisaṅgahaṃ kātuṃ vaṭṭatī’’ti cintetvā pubbaṇhasamaye piṇḍāya caritvā piṇḍapātapaṭikkanto gandhakuṭiyaṃ sīhaseyyaṃ kappetvā sāyanhasamaye ākāsena gantvā kapilavatthusāmante ekasmiṃ kabaracchāye rukkhamūle nisīdi. Tato avidūre viṭaṭūbhassa rajjasīmāya anto sandacchāyo nigrodharukkho atthi, viṭaṭūbho satthāraṃ disvā upasaṅkamitvā vanditvā ‘‘bhante, kiṃkāraṇā evarūpāya uṇhavelāya imasmiṃ kabaracchāye rukkhamūle nisīdatha, etasmiṃ sandacchāye nigrodharukkhamūle nisīdatha, bhante’’ti vatvā ‘‘hotu, mahārāja, ñātakānaṃ chāyā nāma sītalā’’ti vutte ‘‘ñātakānaṃ rakkhaṇatthāya satthā āgato bhavissatī’’ti cintetvā satthāraṃ vanditvā sāvatthimeva paccāgami. Satthāpi uppatitvā jetavanameva gato.
рааж̇аа саагияаанам̣ д̣̇осам̣ сарид̇ваа д̣̇уд̇ияам̣ нигкамид̇ваа д̇ат̇зва сад̇т̇аарам̣ бассид̇ваа буна нивад̇д̇ид̇ваа д̇ад̇ияаваарз нигкамид̇ваа д̇ад̇т̇зва сад̇т̇аарам̣ бассид̇ваа нивад̇д̇и. жад̇уд̇т̇аваарз бана д̇асмим̣ нигканд̇з сад̇т̇аа саагияаанам̣ буб̣б̣агаммам̣ ологзд̇ваа д̇зсам̣ над̣̇ияам̣ висабагкибанабаабагаммасса аббадиб̣аахирабхаавам̣ н̃ад̇ваа жад̇уд̇т̇аваарз на аг̇амааси. видадуубхарааж̇аа кийрабааяагз д̣̇аарагз аад̣̇им̣ гад̇ваа саб̣б̣з саагияз гхаад̇зд̇ваа г̇алалохид̇зна нисиннапалагам̣ д̇ховид̇ваа бажжааг̇ами. сад̇т̇ари д̇ад̇ияаваарз г̇аманад̇о бажжааг̇анд̇ваа бунад̣̇ивасз бин̣д̣ааяа жарид̇ваа нидтаабид̇абхад̇д̇агижжз г̇анд̇хагудияам̣ бависанд̇з д̣̇исаахи саннибад̇ид̇аа бхигкуу д̇хаммасабхааяам̣ нисийд̣̇ид̇ваа ‘‘аавусо, сад̇т̇аа ад̇д̇аанам̣ д̣̇ассзд̇ваа рааж̇аанам̣ нивад̇д̇аабзд̇ваа н̃аад̇агз маран̣абхаяаа можзси, звам̣ н̃аад̇агаанам̣ ад̇т̇ажаро сад̇т̇аа’’д̇и бхаг̇авад̇о г̇ун̣агат̇ам̣ гат̇аяим̣су. сад̇т̇аа ааг̇анд̇ваа ‘‘гааяа нуд̇т̇а, бхигкавз, зд̇арахи гат̇ааяа саннисиннаа’’д̇и бужчид̇ваа ‘‘имааяа наамаа’’д̇и вуд̇д̇з ‘‘на, бхигкавз, ид̣̇аанзва д̇ат̇ааг̇ад̇о н̃аад̇агаанам̣ ад̇т̇ам̣ жарад̇и, буб̣б̣зби жариязваа’’д̇и вад̇ваа ад̇ийд̇ам̣ аахари.
Rājā sākiyānaṃ dosaṃ saritvā dutiyaṃ nikkhamitvā tatheva satthāraṃ passitvā puna nivattitvā tatiyavāre nikkhamitvā tattheva satthāraṃ passitvā nivatti. Catutthavāre pana tasmiṃ nikkhante satthā sākiyānaṃ pubbakammaṃ oloketvā tesaṃ nadiyaṃ visapakkhipanapāpakammassa appaṭibāhirabhāvaṃ ñatvā catutthavāre na agamāsi. Viṭaṭūbharājā khīrapāyake dārake ādiṃ katvā sabbe sākiye ghātetvā galalohitena nisinnaphalakaṃ dhovitvā paccāgami. Satthari tatiyavāre gamanato paccāgantvā punadivase piṇḍāya caritvā niṭṭhāpitabhattakicce gandhakuṭiyaṃ pavisante disāhi sannipatitā bhikkhū dhammasabhāyaṃ nisīditvā ‘‘āvuso, satthā attānaṃ dassetvā rājānaṃ nivattāpetvā ñātake maraṇabhayā mocesi, evaṃ ñātakānaṃ atthacaro satthā’’ti bhagavato guṇakathaṃ kathayiṃsu. Satthā āgantvā ‘‘kāya nuttha, bhikkhave, etarahi kathāya sannisinnā’’ti pucchitvā ‘‘imāya nāmā’’ti vutte ‘‘na, bhikkhave, idāneva tathāgato ñātakānaṃ atthaṃ carati, pubbepi cariyevā’’ti vatvā atītaṃ āhari.
ад̇ийд̇з б̣аараан̣асияам̣ б̣рахмад̣̇ад̇д̇о наама рааж̇аа д̣̇аса рааж̇ад̇хаммз агобзд̇ваа д̇хаммзна раж̇ж̇ам̣ гаарзнд̇о згад̣̇ивасам̣ жинд̇зси ‘‘ж̇амб̣уд̣̇ийбад̇алз рааж̇аано б̣ахут̇амбхзсу баасаад̣̇зсу васанд̇и, д̇асмаа б̣ахуухи т̇амбхзхи баасаад̣̇агаран̣ам̣ наама анажчарияам̣, яам̣нуунаахам̣ згат̇амбхагам̣ баасаад̣̇ам̣ гаарзяяам̣, звам̣ саб̣б̣арааж̇уунам̣ аг̇г̇арааж̇аа бхависсаамий’’д̇и. со вад̣дхагий баггосаабзд̇ваа ‘‘маяхам̣ собхаг̇г̇аббад̇д̇ам̣ згат̇амбхагам̣ баасаад̣̇ам̣ гарот̇аа’’д̇и ааха. д̇з ‘‘саад̇хуу’’д̇и самбадижчид̇ваа аран̃н̃ам̣ бависид̇ваа уж̇уу маханд̇з згат̇амбхагабаасаад̣̇аарахз б̣ахуу ругкз д̣̇исваа ‘‘имз ругкаа санд̇и, маг̇г̇о бана висамо, на саггаа од̇аарзд̇ум̣, ран̃н̃о аажигкиссаамаа’’д̇и жинд̇зд̇ваа д̇ат̇аа агам̣су. рааж̇аа ‘‘гзнажи убааязна сан̣игам̣ од̇аарзт̇аа’’д̇и вад̇ваа ‘‘д̣̇зва, язна гзнажи убааязна на саггаа’’д̇и вуд̇д̇з ‘‘д̇зна хи мама уяяаанз згам̣ ругкам̣ убад̇хаарзт̇аа’’д̇и ааха. вад̣дхагий уяяаанам̣ г̇анд̇ваа згам̣ суж̇аад̇ам̣ уж̇угам̣ г̇ааманиг̇амабууж̇ид̇ам̣ рааж̇агулад̇оби лад̣̇д̇хаб̣алигаммам̣ ман̇г̇аласааларугкам̣ д̣̇исваа ран̃н̃о санд̇игам̣ г̇анд̇ваа д̇амад̇т̇ам̣ аарожзсум̣. рааж̇аа ‘‘уяяаанз ругко наама мама бадиб̣ад̣̇д̇хо, г̇ажчат̇а бхо д̇ам̣ чинд̣̇ат̇аа’’д̇и ааха. д̇з ‘‘саад̇хуу’’д̇и самбадижчид̇ваа г̇анд̇хамаалаад̣̇ихад̇т̇аа уяяаанам̣ г̇анд̇ваа ругкз г̇анд̇хабан̃жан̇г̇улигам̣ д̣̇ад̇ваа суд̇д̇зна баригкибид̇ваа бубпаган̣н̣игам̣ б̣анд̇хид̇ваа д̣̇ийбам̣ ж̇аалзд̇ваа б̣алигаммам̣ гад̇ваа ‘‘ид̇о сад̇д̇амз д̣̇ивасз ааг̇анд̇ваа ругкам̣ чинд̣̇иссаама, рааж̇аа чинд̣̇аабзд̇и, имасмим̣ ругкз ниб̣б̣ад̇д̇ад̣̇звад̇аа ан̃н̃ад̇т̇а г̇ажчад̇у, амхаагам̣ д̣̇осо над̇т̇ий’’д̇и саавзсум̣.
Atīte bārāṇasiyaṃ brahmadatto nāma rājā dasa rājadhamme akopetvā dhammena rajjaṃ kārento ekadivasaṃ cintesi ‘‘jambudīpatale rājāno bahuthambhesu pāsādesu vasanti, tasmā bahūhi thambhehi pāsādakaraṇaṃ nāma anacchariyaṃ, yaṃnūnāhaṃ ekathambhakaṃ pāsādaṃ kāreyyaṃ, evaṃ sabbarājūnaṃ aggarājā bhavissāmī’’ti. So vaḍḍhakī pakkosāpetvā ‘‘mayhaṃ sobhaggappattaṃ ekathambhakaṃ pāsādaṃ karothā’’ti āha. Te ‘‘sādhū’’ti sampaṭicchitvā araññaṃ pavisitvā ujū mahante ekathambhakapāsādārahe bahū rukkhe disvā ‘‘ime rukkhā santi, maggo pana visamo, na sakkā otāretuṃ, rañño ācikkhissāmā’’ti cintetvā tathā akaṃsu. Rājā ‘‘kenaci upāyena saṇikaṃ otārethā’’ti vatvā ‘‘deva, yena kenaci upāyena na sakkā’’ti vutte ‘‘tena hi mama uyyāne ekaṃ rukkhaṃ upadhārethā’’ti āha. Vaḍḍhakī uyyānaṃ gantvā ekaṃ sujātaṃ ujukaṃ gāmanigamapūjitaṃ rājakulatopi laddhabalikammaṃ maṅgalasālarukkhaṃ disvā rañño santikaṃ gantvā tamatthaṃ ārocesuṃ. Rājā ‘‘uyyāne rukkho nāma mama paṭibaddho, gacchatha bho taṃ chindathā’’ti āha. Te ‘‘sādhū’’ti sampaṭicchitvā gandhamālādihatthā uyyānaṃ gantvā rukkhe gandhapañcaṅgulikaṃ datvā suttena parikkhipitvā pupphakaṇṇikaṃ bandhitvā dīpaṃ jāletvā balikammaṃ katvā ‘‘ito sattame divase āgantvā rukkhaṃ chindissāma, rājā chindāpeti, imasmiṃ rukkhe nibbattadevatā aññattha gacchatu, amhākaṃ doso natthī’’ti sāvesuṃ.
ат̇а д̇асмим̣ ниб̣б̣ад̇д̇о д̣̇звабуд̇д̇о д̇ам̣ важанам̣ суд̇ваа ‘‘ниссам̣саяам̣ имз вад̣дхагий имам̣ ругкам̣ чинд̣̇иссанд̇и, вимаанам̣ мз нассиссад̇и, вимаанабарияанд̇игамзва ко бана маяхам̣ ж̇ийвид̇ам̣, иман̃жа рагкам̣ бариваарзд̇ваа тид̇зсу д̇арун̣асааларугкзсу ниб̣б̣ад̇д̇аанам̣ мама н̃аад̇ид̣̇звад̇аанамби б̣ахууни вимаанаани нассиссанд̇и. вимаанабарияанд̇игамзва мама н̃аад̇ийнам̣ д̣̇звад̇аанамби ж̇ийвид̇ам̣, на ко бана мам̣ д̇ат̇аа ад̇д̇ано винаасо б̣аад̇хад̇и, яат̇аа н̃аад̇ийнам̣, д̇асмаа нзсам̣ маяаа ж̇ийвид̇ам̣ д̣̇аад̇ум̣ ваддад̇ий’’д̇и жинд̇зд̇ваа ад̣дхарад̇д̇асамаяз д̣̇иб̣б̣аалан̇гаарабадиман̣д̣ид̇о ран̃н̃о сириг̇аб̣бхам̣ бависид̇ваа сагалаг̇аб̣бхам̣ згобхаасам̣ гад̇ваа уссисагабассз род̣̇амаано адтааси. рааж̇аа д̇ам̣ д̣̇исваа бхийд̇ад̇асид̇о д̇зна сад̣̇д̇хим̣ саллабанд̇о батамам̣ г̇аат̇амааха –
Atha tasmiṃ nibbatto devaputto taṃ vacanaṃ sutvā ‘‘nissaṃsayaṃ ime vaḍḍhakī imaṃ rukkhaṃ chindissanti, vimānaṃ me nassissati, vimānapariyantikameva kho pana mayhaṃ jīvitaṃ, imañca rakkhaṃ parivāretvā ṭhitesu taruṇasālarukkhesu nibbattānaṃ mama ñātidevatānampi bahūni vimānāni nassissanti. Vimānapariyantikameva mama ñātīnaṃ devatānampi jīvitaṃ, na kho pana maṃ tathā attano vināso bādhati, yathā ñātīnaṃ, tasmā nesaṃ mayā jīvitaṃ dātuṃ vaṭṭatī’’ti cintetvā aḍḍharattasamaye dibbālaṅkārapaṭimaṇḍito rañño sirigabbhaṃ pavisitvā sakalagabbhaṃ ekobhāsaṃ katvā ussisakapasse rodamāno aṭṭhāsi. Rājā taṃ disvā bhītatasito tena saddhiṃ sallapanto paṭhamaṃ gāthamāha –
13.
13.
‘‘гаа д̇вам̣ суд̣̇д̇хзхи вад̇т̇зхи, агхз взхааяасам̣ тид̇аа;
‘‘Kā tvaṃ suddhehi vatthehi, aghe vehāyasaṃ ṭhitā;
гзна д̇яаассууни вад̇д̇анд̇и, гуд̇о д̇ам̣ бхаяамааг̇ад̇а’’нд̇и.
Kena tyāssūni vattanti, kuto taṃ bhayamāgata’’nti.
д̇ад̇т̇а гаа д̇ванд̇и нааг̇аяагкасубан̣н̣асаггаад̣̇ийсу гаа наама д̇ванд̇и бужчад̇и. вад̇т̇зхийд̇и важанамад̇д̇амзвзд̇ам̣, саб̣б̣зби бана д̣̇иб̣б̣аалан̇гаарз санд̇хааязвамааха. агхзд̇и аббадигхз аагаасз. взхааяасанд̇и д̇ассзва взважанам̣. гзна д̇яаассууни вад̇д̇анд̇ийд̇и гзна гааран̣зна д̇ава ассууни вад̇д̇анд̇и. гуд̇од̇и н̃аад̇ивияог̇ад̇ханавинаасаад̣̇ийнам̣ гим̣ ниссааяа д̇ам̣ бхаяамааг̇ад̇анд̇и бужчад̇и.
Tattha kā tvanti nāgayakkhasupaṇṇasakkādīsu kā nāma tvanti pucchati. Vatthehīti vacanamattamevetaṃ, sabbepi pana dibbālaṅkāre sandhāyevamāha. Agheti appaṭighe ākāse. Vehāyasanti tasseva vevacanaṃ. Kena tyāssūni vattantīti kena kāraṇena tava assūni vattanti. Kutoti ñātiviyogadhanavināsādīnaṃ kiṃ nissāya taṃ bhayamāgatanti pucchati.
д̇ад̇о д̣̇зварааж̇аа д̣̇вз г̇аат̇аа абхааси –
Tato devarājā dve gāthā abhāsi –
14.
14.
‘‘д̇авзва д̣̇зва виж̇ид̇з, бхад̣̇д̣̇асаалод̇и мам̣ вид̣̇уу;
‘‘Taveva deva vijite, bhaddasāloti maṃ vidū;
садти вассасахассаани, д̇идтад̇о бууж̇ид̇асса мз.
Saṭṭhi vassasahassāni, tiṭṭhato pūjitassa me.
15.
15.
‘‘гаараяанд̇аа наг̇араани, аг̇аарз жа д̣̇исамбад̇и;
‘‘Kārayantā nagarāni, agāre ca disampati;
вивид̇хз жааби баасаад̣̇з, на мам̣ д̇з ажжаман̃н̃исум̣;
Vividhe cāpi pāsāde, na maṃ te accamaññisuṃ;
яат̇зва мам̣ д̇з бууж̇зсум̣, д̇ат̇зва д̇вамби бууж̇аяаа’’д̇и.
Yatheva maṃ te pūjesuṃ, tatheva tvampi pūjayā’’ti.
д̇ад̇т̇а д̇идтад̇од̇и сагалаб̣аараан̣асинаг̇арзхи жзва г̇ааманиг̇амзхи жа д̇аяаа жа бууж̇ид̇асса нижжам̣ б̣алигамман̃жа саггааран̃жа лабханд̇асса маяхам̣ имасмим̣ уяяаанз д̇идтанд̇асса зд̇д̇аго гаало г̇ад̇од̇и д̣̇ассзд̇и. наг̇араанийд̇и наг̇арабадисан̇каран̣агаммаани. аг̇аарзжаад̇и бхуумиг̇зхаани. д̣̇исамбад̇ийд̇и д̣̇исаанам̣ бад̇и, махаарааж̇а. на мам̣ д̇зд̇и д̇з наг̇арабадисан̇каран̣аад̣̇ийни гаронд̇аа имасмим̣ наг̇арз бораан̣агарааж̇аано мам̣ наад̇иман̃н̃исум̣ наад̇иггамим̣су на вихзтаяим̣су, мама ниваасаругкам̣ чинд̣̇ид̇ваа ад̇д̇ано гаммам̣ на гарим̣су, маяхам̣ бана саггаарамзва гарим̣сууд̇и аважа. яат̇зваад̇и д̇асмаа яат̇зва д̇з бораан̣агарааж̇аано мам̣ бууж̇аяим̣су, згоби имам̣ ругкам̣ на чинд̣̇аабзси, д̇ван̃жааби мам̣ д̇ат̇зва бууж̇аяа, маа мз ругкам̣ чзд̣̇аяийд̇и.
Tattha tiṭṭhatoti sakalabārāṇasinagarehi ceva gāmanigamehi ca tayā ca pūjitassa niccaṃ balikammañca sakkārañca labhantassa mayhaṃ imasmiṃ uyyāne tiṭṭhantassa ettako kālo gatoti dasseti. Nagarānīti nagarapaṭisaṅkharaṇakammāni. Agārecāti bhūmigehāni. Disampatīti disānaṃ pati, mahārāja. Na maṃ teti te nagarapaṭisaṅkharaṇādīni karontā imasmiṃ nagare porāṇakarājāno maṃ nātimaññisuṃ nātikkamiṃsu na viheṭhayiṃsu, mama nivāsarukkhaṃ chinditvā attano kammaṃ na kariṃsu, mayhaṃ pana sakkārameva kariṃsūti avaca. Yathevāti tasmā yatheva te porāṇakarājāno maṃ pūjayiṃsu, ekopi imaṃ rukkhaṃ na chindāpesi, tvañcāpi maṃ tatheva pūjaya, mā me rukkhaṃ chedayīti.
д̇ад̇о рааж̇аа д̣̇вз г̇аат̇аа абхааси –
Tato rājā dve gāthā abhāsi –
16.
16.
‘‘д̇ам̣ иваахам̣ на бассаами, т̇уулам̣ гааязна д̇з д̣̇умам̣;
‘‘Taṃ ivāhaṃ na passāmi, thūlaṃ kāyena te dumaṃ;
аарохабарин̣аахзна, абхируубоси ж̇аад̇ияаа.
Ārohapariṇāhena, abhirūposi jātiyā.
17.
17.
‘‘баасаад̣̇ам̣ гаараяиссаами, згад̇т̇амбхам̣ манорамам̣;
‘‘Pāsādaṃ kārayissāmi, ekatthambhaṃ manoramaṃ;
д̇ад̇т̇а д̇ам̣ убанзссаами, жирам̣ д̇з яагка ж̇ийвид̇а’’нд̇и.
Tattha taṃ upanessāmi, ciraṃ te yakkha jīvita’’nti.
д̇ад̇т̇а гааязнаад̇и бамаан̣зна. ид̣̇ам̣ вуд̇д̇ам̣ ход̇и – д̇ава бамаан̣зна д̇ам̣ вияа т̇уулам̣ маханд̇ам̣ ан̃н̃ам̣ д̣̇умам̣ на бассаами, д̇ван̃н̃зва бана аарохабарин̣аахзна суж̇аад̇асан̇каад̇ааяа самасан̣таанауж̇убхааваббагаарааяа ж̇аад̇ияаа жа абхируубо собхаг̇г̇аббад̇д̇о згат̇амбхабаасаад̣̇аараход̇и. баасаад̣̇анд̇и д̇асмаа д̇ам̣ чзд̣̇аабзд̇ваа ахам̣ баасаад̣̇ам̣ гаараабзссаамзва. д̇ад̇т̇а д̇анд̇и д̇ам̣ банаахам̣ самма д̣̇зварааж̇а, д̇ад̇т̇а баасаад̣̇з убанзссаами, со д̇вам̣ маяаа сад̣̇д̇хим̣ згад̇о васанд̇о аг̇г̇аг̇анд̇хамаалаад̣̇ийни лабханд̇о саггаараббад̇д̇о сукам̣ ж̇ийвиссаси, ниваасадтаанаабхаавзна мз винаасо бхависсад̇ийд̇и маа жинд̇аяи, жирам̣ д̇з яагка ж̇ийвид̇ам̣ бхависсад̇ийд̇и.
Tattha kāyenāti pamāṇena. Idaṃ vuttaṃ hoti – tava pamāṇena taṃ viya thūlaṃ mahantaṃ aññaṃ dumaṃ na passāmi, tvaññeva pana ārohapariṇāhena sujātasaṅkhātāya samasaṇṭhānaujubhāvappakārāya jātiyā ca abhirūpo sobhaggappatto ekathambhapāsādārahoti. Pāsādanti tasmā taṃ chedāpetvā ahaṃ pāsādaṃ kārāpessāmeva. Tattha tanti taṃ panāhaṃ samma devarāja, tattha pāsāde upanessāmi, so tvaṃ mayā saddhiṃ ekato vasanto aggagandhamālādīni labhanto sakkārappatto sukhaṃ jīvissasi, nivāsaṭṭhānābhāvena me vināso bhavissatīti mā cintayi, ciraṃ te yakkha jīvitaṃ bhavissatīti.
д̇ам̣ суд̇ваа д̣̇зварааж̇аа д̣̇вз г̇аат̇аа абхааси –
Taṃ sutvā devarājā dve gāthā abhāsi –
18.
18.
‘‘звам̣ жид̇д̇ам̣ уд̣̇абаад̣̇и, сарийрзна винаабхааво;
‘‘Evaṃ cittaṃ udapādi, sarīrena vinābhāvo;
бут̇усо мам̣ виганд̇ид̇ваа, кан̣д̣асо аваганд̇ат̇а.
Puthuso maṃ vikantitvā, khaṇḍaso avakantatha.
19.
19.
‘‘аг̇г̇з жа чзд̇ваа маж̇жхз жа, бажчаа мууламхи чинд̣̇ат̇а;
‘‘Agge ca chetvā majjhe ca, pacchā mūlamhi chindatha;
звам̣ мз чиж̇ж̇амаанасса, на д̣̇угкам̣ маран̣ам̣ сияаа’’д̇и.
Evaṃ me chijjamānassa, na dukkhaṃ maraṇaṃ siyā’’ti.
д̇ад̇т̇а звам̣ жид̇д̇ам̣ уд̣̇абаад̣̇ийд̇и яад̣̇и звам̣ жид̇д̇ам̣ д̇ава уббаннам̣. сарийрзна винаабхаавод̇и яад̣̇и д̇з мама сарийрзна бхад̣̇д̣̇асааларугкзна сад̣̇д̇хим̣ мама винаабхааво бад̇т̇ид̇о. бут̇усод̇и б̣ахуд̇хаа. виганд̇ид̇ваад̇и чинд̣̇ид̇ваа. кан̣д̣асод̇и кан̣д̣аакан̣д̣ам̣ гад̇ваа аваганд̇ат̇а. аг̇г̇з жаад̇и аваганд̇анд̇аа бана батамам̣ аг̇г̇з, д̇ад̇о маж̇жхз чзд̇ваа саб̣б̣абажчаа муулз чинд̣̇ат̇а. зван̃хи мз чиж̇ж̇амаанасса на д̣̇угкам̣ маран̣ам̣ сияаа, сукам̣ ну кан̣д̣асо бхавзяяаад̇и яаажад̇и.
Tattha evaṃ cittaṃ udapādīti yadi evaṃ cittaṃ tava uppannaṃ. Sarīrena vinābhāvoti yadi te mama sarīrena bhaddasālarukkhena saddhiṃ mama vinābhāvo patthito. Puthusoti bahudhā. Vikantitvāti chinditvā. Khaṇḍasoti khaṇḍākhaṇḍaṃ katvā avakantatha. Agge cāti avakantantā pana paṭhamaṃ agge, tato majjhe chetvā sabbapacchā mūle chindatha. Evañhi me chijjamānassa na dukkhaṃ maraṇaṃ siyā, sukhaṃ nu khaṇḍaso bhaveyyāti yācati.
д̇ад̇о рааж̇аа д̣̇вз г̇аат̇аа абхааси –
Tato rājā dve gāthā abhāsi –
20.
20.
‘‘хад̇т̇абаад̣̇ам̣ яат̇аа чинд̣̇з, ган̣н̣анаасан̃жа ж̇ийвад̇о;
‘‘Hatthapādaṃ yathā chinde, kaṇṇanāsañca jīvato;
д̇ад̇о бажчаа сиро чинд̣̇з, д̇ам̣ д̣̇угкам̣ маран̣ам̣ сияаа.
Tato pacchā siro chinde, taṃ dukkhaṃ maraṇaṃ siyā.
21.
21.
‘‘сукам̣ ну кан̣д̣асо чиннам̣, бхад̣̇д̣̇асаала ванаббад̇и;
‘‘Sukhaṃ nu khaṇḍaso chinnaṃ, bhaddasāla vanappati;
гим̣хзд̇у гим̣ убаад̣̇ааяа, кан̣д̣асо чиннамижчасий’’д̇и.
Kiṃhetu kiṃ upādāya, khaṇḍaso chinnamicchasī’’ti.
д̇ад̇т̇а хад̇т̇абаад̣̇анд̇и хад̇т̇з жа баад̣̇з жа. д̇ам̣ д̣̇угканд̇и звам̣ бадибаадияаа чиж̇ж̇анд̇асса жорасса д̇ам̣ маран̣ам̣ д̣̇угкам̣ сияаа. сукам̣ нууд̇и самма бхад̣̇д̣̇асаала, важ̇жхаббад̇д̇аа жораа сукзна марид̇угаамаа сийсажчзд̣̇ам̣ яаажанд̇и, на кан̣д̣асо чзд̣̇анам̣, д̇вам̣ бана звам̣ яаажаси, д̇зна д̇ам̣ бужчаами ‘‘сукам̣ ну кан̣д̣асо чинна’’нд̇и. гим̣хзд̇ууд̇и кан̣д̣асо чиннам̣ наама на сукам̣, гааран̣зна банзд̇т̇а бхавид̇аб̣б̣анд̇и д̇ам̣ бужчанд̇о звамааха.
Tattha hatthapādanti hatthe ca pāde ca. Taṃ dukkhanti evaṃ paṭipāṭiyā chijjantassa corassa taṃ maraṇaṃ dukkhaṃ siyā. Sukhaṃ nūti samma bhaddasāla, vajjhappattā corā sukhena maritukāmā sīsacchedaṃ yācanti, na khaṇḍaso chedanaṃ, tvaṃ pana evaṃ yācasi, tena taṃ pucchāmi ‘‘sukhaṃ nu khaṇḍaso chinna’’nti. Kiṃhetūti khaṇḍaso chinnaṃ nāma na sukhaṃ, kāraṇena panettha bhavitabbanti taṃ pucchanto evamāha.
ат̇асса аажигканд̇о бхад̣̇д̣̇асаало д̣̇вз г̇аат̇аа абхааси –
Athassa ācikkhanto bhaddasālo dve gāthā abhāsi –
22.
22.
‘‘яан̃жа хзд̇умубаад̣̇ааяа, хзд̇ум̣ д̇хаммуубасам̣хид̇ам̣;
‘‘Yañca hetumupādāya, hetuṃ dhammūpasaṃhitaṃ;
кан̣д̣асо чиннамижчаами, махаарааж̇а сун̣охи мз.
Khaṇḍaso chinnamicchāmi, mahārāja suṇohi me.
23.
23.
‘‘н̃аад̇ий мз сукасам̣вад̣̇д̇хаа, мама бассз ниваад̇аж̇аа;
‘‘Ñātī me sukhasaṃvaddhā, mama passe nivātajā;
д̇збихам̣ убахим̣сзяяа, барзсам̣ асукожид̇а’’нд̇и.
Tepihaṃ upahiṃseyya, paresaṃ asukhocita’’nti.
д̇ад̇т̇а хзд̇ум̣ д̇хаммуубасам̣хид̇анд̇и махаарааж̇а, яам̣ хзд̇усабхааваяуд̇д̇амзва, на хзд̇убад̇ируубагам̣, хзд̇ум̣ убаад̣̇ааяа аараб̣бха санд̇хааяаахам̣ кан̣д̣асо чиннамижчаами, д̇ам̣ охид̇асод̇о сун̣охийд̇и ад̇т̇о. н̃аад̇ий мзд̇и мама бхад̣̇д̣̇асааларугкасса чааяааяа сукасам̣вад̣̇д̇хаа мама бассз д̇арун̣асааларугкзсу ниб̣б̣ад̇д̇аа маяаа гад̇аваад̇абарид̇д̇аан̣ад̇д̇аа ниваад̇аж̇аа мама н̃аад̇агаа д̣̇звасан̇гхаа ад̇т̇и, д̇з ахам̣ висааласаакавидабо муулз чинд̣̇ид̇ваа бад̇анд̇о убахим̣сзяяам̣, сам̣бхаг̇г̇авимаанз гаронд̇о винаасзяяанд̇и ад̇т̇о. барзсам̣ асукожид̇анд̇и звам̣ санд̇з маяаа д̇зсам̣ барзсам̣ н̃аад̇ид̣̇звасан̇гхаанам̣ асукам̣ д̣̇угкам̣ ожид̇ам̣ вад̣дхид̇ам̣, на жаахам̣ д̇зсам̣ д̣̇угкагаамо, д̇асмаа бхад̣̇д̣̇асаалам̣ кан̣д̣асо кан̣д̣асо чинд̣̇аабзмийд̇и аяамзд̇т̇аад̇хиббааяо.
Tattha hetuṃ dhammūpasaṃhitanti mahārāja, yaṃ hetusabhāvayuttameva, na hetupatirūpakaṃ, hetuṃ upādāya ārabbha sandhāyāhaṃ khaṇḍaso chinnamicchāmi, taṃ ohitasoto suṇohīti attho. Ñātīmeti mama bhaddasālarukkhassa chāyāya sukhasaṃvaddhā mama passe taruṇasālarukkhesu nibbattā mayā katavātaparittāṇattā nivātajā mama ñātakā devasaṅghā atthi, te ahaṃ visālasākhaviṭapo mūle chinditvā patanto upahiṃseyyaṃ, saṃbhaggavimāne karonto vināseyyanti attho. Paresaṃ asukhocitanti evaṃ sante mayā tesaṃ paresaṃ ñātidevasaṅghānaṃ asukhaṃ dukkhaṃ ocitaṃ vaḍḍhitaṃ, na cāhaṃ tesaṃ dukkhakāmo, tasmā bhaddasālaṃ khaṇḍaso khaṇḍaso chindāpemīti ayametthādhippāyo.
д̇ам̣ суд̇ваа рааж̇аа ‘‘д̇хаммиго вад̇ааяам̣, д̣̇звабуд̇д̇о, ад̇д̇ано вимаанавинаасад̇оби н̃аад̇ийнам̣ вимаанавинаасам̣ на ижчад̇и, н̃аад̇ийнам̣ ад̇т̇ажарияам̣ жарад̇и, абхаяамасса д̣̇ассаамий’’д̇и д̇уссид̇ваа осаанаг̇аат̇амааха –
Taṃ sutvā rājā ‘‘dhammiko vatāyaṃ, devaputto, attano vimānavināsatopi ñātīnaṃ vimānavināsaṃ na icchati, ñātīnaṃ atthacariyaṃ carati, abhayamassa dassāmī’’ti tussitvā osānagāthamāha –
24.
24.
‘‘жзд̇зяяаруубам̣ жзд̇зси, бхад̣̇д̣̇асаала ванаббад̇и;
‘‘Ceteyyarūpaṃ cetesi, bhaddasāla vanappati;
хид̇агаамоси н̃аад̇ийнам̣, абхаяам̣ самма д̣̇амми д̇з’’д̇и.
Hitakāmosi ñātīnaṃ, abhayaṃ samma dammi te’’ti.
д̇ад̇т̇а жзд̇зяяаруубам̣ жзд̇зсийд̇и н̃аад̇ийсу муд̣̇ужид̇д̇ад̇ааяа жинд̇знд̇о жинд̇зд̇аб̣б̣аяуд̇д̇агамзва жинд̇зси. чзд̣̇зяяаруубам̣ чзд̣̇зсийд̇иби баато. д̇ассад̇т̇о – кан̣д̣асо чиннамижчанд̇о чзд̣̇зд̇аб̣б̣аяуд̇д̇агамзва чзд̣̇зсийд̇и. абхаяанд̇и зд̇асмим̣ д̇з самма, г̇ун̣з басийд̣̇ид̇ваа абхаяам̣ д̣̇ад̣̇аами, на мз баасаад̣̇знад̇т̇о, наахам̣ д̇ам̣ чзд̣̇аабзссаами, г̇ажча н̃аад̇исан̇гхабаривуд̇о саггад̇аг̇аругад̇о сукам̣ ж̇ийваад̇и ааха.
Tattha ceteyyarūpaṃ cetesīti ñātīsu muducittatāya cintento cintetabbayuttakameva cintesi. Chedeyyarūpaṃ chedesītipi pāṭho. Tassattho – khaṇḍaso chinnamicchanto chedetabbayuttakameva chedesīti. Abhayanti etasmiṃ te samma, guṇe pasīditvā abhayaṃ dadāmi, na me pāsādenattho, nāhaṃ taṃ chedāpessāmi, gaccha ñātisaṅghaparivuto sakkatagarukato sukhaṃ jīvāti āha.
д̣̇зварааж̇аа ран̃н̃о д̇хаммам̣ д̣̇зсзд̇ваа аг̇амааси. рааж̇аа д̇ассоваад̣̇з тад̇ваа д̣̇аанаад̣̇ийни бун̃н̃аани гад̇ваа саг̇г̇абурам̣ буурзси.
Devarājā rañño dhammaṃ desetvā agamāsi. Rājā tassovāde ṭhatvā dānādīni puññāni katvā saggapuraṃ pūresi.
сад̇т̇аа имам̣ д̇хаммад̣̇зсанам̣ аахарид̇ваа ‘‘звам̣, бхигкавз, буб̣б̣зби д̇ат̇ааг̇ад̇о н̃аад̇ад̇т̇ажарияам̣ ажариязваа’’д̇и вад̇ваа ж̇аад̇агам̣ самод̇хаанзси – ‘‘д̇ад̣̇аа рааж̇аа аананд̣̇о ахоси, д̇арун̣асаалзсу ниб̣б̣ад̇д̇ад̣̇звад̇аа б̣уд̣̇д̇хабарисаа, бхад̣̇д̣̇асаалад̣̇зварааж̇аа бана ахамзва ахоси’’нд̇и.
Satthā imaṃ dhammadesanaṃ āharitvā ‘‘evaṃ, bhikkhave, pubbepi tathāgato ñātatthacariyaṃ acariyevā’’ti vatvā jātakaṃ samodhānesi – ‘‘tadā rājā ānando ahosi, taruṇasālesu nibbattadevatā buddhaparisā, bhaddasāladevarājā pana ahameva ahosi’’nti.
бхад̣̇д̣̇асаалаж̇аад̇агаван̣н̣анаа д̣̇уд̇ияаа.
Bhaddasālajātakavaṇṇanā dutiyā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / ж̇аад̇агабаал̣и • Jātakapāḷi / 465. бхад̣̇д̣̇асаалаж̇аад̇агам̣ • 465. Bhaddasālajātakaṃ
