| Library / Tipiṭaka / ತಿಪಿಟಕ • Tipiṭaka / ಮಹಾವಗ್ಗಪಾಳಿ • Mahāvaggapāḷi |
೧೧. ಭದ್ದವಗ್ಗಿಯವತ್ಥು
11. Bhaddavaggiyavatthu
೩೬. ಅಥ ಖೋ ಭಗವಾ ಬಾರಾಣಸಿಯಂ ಯಥಾಭಿರನ್ತಂ ವಿಹರಿತ್ವಾ ಯೇನ ಉರುವೇಲಾ ತೇನ ಚಾರಿಕಂ ಪಕ್ಕಾಮಿ। ಅಥ ಖೋ ಭಗವಾ ಮಗ್ಗಾ ಓಕ್ಕಮ್ಮ ಯೇನ ಅಞ್ಞತರೋ ವನಸಣ್ಡೋ ತೇನುಪಸಙ್ಕಮಿ, ಉಪಸಙ್ಕಮಿತ್ವಾ ತಂ ವನಸಣ್ಡಂ ಅಜ್ಝೋಗಾಹೇತ್ವಾ ಅಞ್ಞತರಸ್ಮಿಂ ರುಕ್ಖಮೂಲೇ ನಿಸೀದಿ। ತೇನ ಖೋ ಪನ ಸಮಯೇನ ತಿಂಸಮತ್ತಾ ಭದ್ದವಗ್ಗಿಯಾ ಸಹಾಯಕಾ ಸಪಜಾಪತಿಕಾ ತಸ್ಮಿಂ ವನಸಣ್ಡೇ ಪರಿಚಾರೇನ್ತಿ। ಏಕಸ್ಸ ಪಜಾಪತಿ ನಾಹೋಸಿ; ತಸ್ಸ ಅತ್ಥಾಯ ವೇಸೀ ಆನೀತಾ ಅಹೋಸಿ। ಅಥ ಖೋ ಸಾ ವೇಸೀ ತೇಸು ಪಮತ್ತೇಸು ಪರಿಚಾರೇನ್ತೇಸು ಭಣ್ಡಂ ಆದಾಯ ಪಲಾಯಿತ್ಥ। ಅಥ ಖೋ ತೇ ಸಹಾಯಕಾ ಸಹಾಯಕಸ್ಸ ವೇಯ್ಯಾವಚ್ಚಂ ಕರೋನ್ತಾ, ತಂ ಇತ್ಥಿಂ ಗವೇಸನ್ತಾ, ತಂ ವನಸಣ್ಡಂ ಆಹಿಣ್ಡನ್ತಾ ಅದ್ದಸಂಸು ಭಗವನ್ತಂ ಅಞ್ಞತರಸ್ಮಿಂ ರುಕ್ಖಮೂಲೇ ನಿಸಿನ್ನಂ। ದಿಸ್ವಾನ ಯೇನ ಭಗವಾ ತೇನುಪಸಙ್ಕಮಿಂಸು, ಉಪಸಙ್ಕಮಿತ್ವಾ ಭಗವನ್ತಂ ಏತದವೋಚುಂ – ‘‘ಅಪಿ, ಭನ್ತೇ, ಭಗವಾ ಏಕಂ ಇತ್ಥಿಂ ಪಸ್ಸೇಯ್ಯಾ’’ತಿ? ‘‘ಕಿಂ ಪನ ವೋ, ಕುಮಾರಾ, ಇತ್ಥಿಯಾ’’ತಿ? ‘‘ಇಧ ಮಯಂ, ಭನ್ತೇ, ತಿಂಸಮತ್ತಾ ಭದ್ದವಗ್ಗಿಯಾ ಸಹಾಯಕಾ ಸಪಜಾಪತಿಕಾ ಇಮಸ್ಮಿಂ ವನಸಣ್ಡೇ ಪರಿಚಾರಿಮ್ಹಾ। ಏಕಸ್ಸ ಪಜಾಪತಿ ನಾಹೋಸಿ; ತಸ್ಸ ಅತ್ಥಾಯ ವೇಸೀ ಆನೀತಾ ಅಹೋಸಿ। ಅಥ ಖೋ ಸಾ, ಭನ್ತೇ , ವೇಸೀ ಅಮ್ಹೇಸು ಪಮತ್ತೇಸು ಪರಿಚಾರೇನ್ತೇಸು ಭಣ್ಡಂ ಆದಾಯ ಪಲಾಯಿತ್ಥ। ತೇ ಮಯಂ, ಭನ್ತೇ, ಸಹಾಯಕಾ ಸಹಾಯಕಸ್ಸ ವೇಯ್ಯಾವಚ್ಚಂ ಕರೋನ್ತಾ, ತಂ ಇತ್ಥಿಂ ಗವೇಸನ್ತಾ, ಇಮಂ ವನಸಣ್ಡಂ ಆಹಿಣ್ಡಾಮಾ’’ತಿ। ‘‘ತಂ ಕಿಂ ಮಞ್ಞಥ ವೋ, ಕುಮಾರಾ, ಕತಮಂ ನು ಖೋ ತುಮ್ಹಾಕಂ ವರಂ – ಯಂ ವಾ ತುಮ್ಹೇ ಇತ್ಥಿಂ ಗವೇಸೇಯ್ಯಾಥ, ಯಂ ವಾ ಅತ್ತಾನಂ ಗವೇಸೇಯ್ಯಾಥಾ’’ತಿ? ‘‘ಏತದೇವ, ಭನ್ತೇ, ಅಮ್ಹಾಕಂ ವರಂ ಯಂ ಮಯಂ ಅತ್ತಾನಂ ಗವೇಸೇಯ್ಯಾಮಾ’’ತಿ। ‘‘ತೇನ ಹಿ ವೋ, ಕುಮಾರಾ, ನಿಸೀದಥ, ಧಮ್ಮಂ ವೋ ದೇಸೇಸ್ಸಾಮೀ’’ತಿ। ‘‘ಏವಂ, ಭನ್ತೇ’’ತಿ ಖೋ ತೇ ಭದ್ದವಗ್ಗಿಯಾ ಸಹಾಯಕಾ ಭಗವನ್ತಂ ಅಭಿವಾದೇತ್ವಾ ಏಕಮನ್ತಂ ನಿಸೀದಿಂಸು। ತೇಸಂ ಭಗವಾ ಅನುಪುಬ್ಬಿಂ ಕಥಂ ಕಥೇಸಿ, ಸೇಯ್ಯಥಿದಂ – ದಾನಕಥಂ ಸೀಲಕಥಂ ಸಗ್ಗಕಥಂ ಕಾಮಾನಂ ಆದೀನವಂ ಓಕಾರಂ ಸಂಕಿಲೇಸಂ ನೇಕ್ಖಮ್ಮೇ ಆನಿಸಂಸಂ ಪಕಾಸೇಸಿ, ಯದಾ ತೇ ಭಗವಾ ಅಞ್ಞಾಸಿ ಕಲ್ಲಚಿತ್ತೇ ಮುದುಚಿತ್ತೇ ವಿನೀವರಣಚಿತ್ತೇ ಉದಗ್ಗಚಿತ್ತೇ ಪಸನ್ನಚಿತ್ತೇ, ಅಥ ಯಾ ಬುದ್ಧಾನಂ ಸಾಮುಕ್ಕಂಸಿಕಾ ಧಮ್ಮದೇಸನಾ, ತಂ ಪಕಾಸೇಸಿ ದುಕ್ಖಂ ಸಮುದಯಂ ನಿರೋಧಂ ಮಗ್ಗಂ, ಸೇಯ್ಯಥಾಪಿ ನಾಮ ಸುದ್ಧಂ ವತ್ಥಂ ಅಪಗತಕಾಳಕಂ ಸಮ್ಮದೇವ ರಜನಂ ಪಟಿಗ್ಗಣ್ಹೇಯ್ಯ, ಏವಮೇವ ತೇಸಂ ತಸ್ಮಿಂಯೇವ ಆಸನೇ ವಿರಜಂ ವೀತಮಲಂ ಧಮ್ಮಚಕ್ಖುಂ ಉದಪಾದಿ ‘‘ಯಂ ಕಿಞ್ಚಿ ಸಮುದಯಧಮ್ಮಂ, ಸಬ್ಬಂ ತಂ ನಿರೋಧಧಮ್ಮ’’ನ್ತಿ। ತೇ ದಿಟ್ಠಧಮ್ಮಾ ಪತ್ತಧಮ್ಮಾ ವಿದಿತಧಮ್ಮಾ ಪರಿಯೋಗಾಳ್ಹಧಮ್ಮಾ ತಿಣ್ಣವಿಚಿಕಿಚ್ಛಾ ವಿಗತಕಥಂಕಥಾ ವೇಸಾರಜ್ಜಪ್ಪತ್ತಾ ಅಪರಪ್ಪಚ್ಚಯಾ ಸತ್ಥುಸಾಸನೇ ಭಗವನ್ತಂ ಏತದವೋಚುಂ – ‘‘ಲಭೇಯ್ಯಾಮ ಮಯಂ, ಭನ್ತೇ, ಭಗವತೋ ಸನ್ತಿಕೇ ಪಬ್ಬಜ್ಜಂ, ಲಭೇಯ್ಯಾಮ ಉಪಸಮ್ಪದ’’ನ್ತಿ। ‘‘ಏಥ ಭಿಕ್ಖವೋ’’ತಿ ಭಗವಾ ಅವೋಚ – ‘‘ಸ್ವಾಕ್ಖಾತೋ ಧಮ್ಮೋ, ಚರಥ ಬ್ರಹ್ಮಚರಿಯಂ ಸಮ್ಮಾ ದುಕ್ಖಸ್ಸ ಅನ್ತಕಿರಿಯಾಯಾ’’ತಿ। ಸಾವ ತೇಸಂ ಆಯಸ್ಮನ್ತಾನಂ ಉಪಸಮ್ಪದಾ ಅಹೋಸಿ।
36. Atha kho bhagavā bārāṇasiyaṃ yathābhirantaṃ viharitvā yena uruvelā tena cārikaṃ pakkāmi. Atha kho bhagavā maggā okkamma yena aññataro vanasaṇḍo tenupasaṅkami, upasaṅkamitvā taṃ vanasaṇḍaṃ ajjhogāhetvā aññatarasmiṃ rukkhamūle nisīdi. Tena kho pana samayena tiṃsamattā bhaddavaggiyā sahāyakā sapajāpatikā tasmiṃ vanasaṇḍe paricārenti. Ekassa pajāpati nāhosi; tassa atthāya vesī ānītā ahosi. Atha kho sā vesī tesu pamattesu paricārentesu bhaṇḍaṃ ādāya palāyittha. Atha kho te sahāyakā sahāyakassa veyyāvaccaṃ karontā, taṃ itthiṃ gavesantā, taṃ vanasaṇḍaṃ āhiṇḍantā addasaṃsu bhagavantaṃ aññatarasmiṃ rukkhamūle nisinnaṃ. Disvāna yena bhagavā tenupasaṅkamiṃsu, upasaṅkamitvā bhagavantaṃ etadavocuṃ – ‘‘api, bhante, bhagavā ekaṃ itthiṃ passeyyā’’ti? ‘‘Kiṃ pana vo, kumārā, itthiyā’’ti? ‘‘Idha mayaṃ, bhante, tiṃsamattā bhaddavaggiyā sahāyakā sapajāpatikā imasmiṃ vanasaṇḍe paricārimhā. Ekassa pajāpati nāhosi; tassa atthāya vesī ānītā ahosi. Atha kho sā, bhante , vesī amhesu pamattesu paricārentesu bhaṇḍaṃ ādāya palāyittha. Te mayaṃ, bhante, sahāyakā sahāyakassa veyyāvaccaṃ karontā, taṃ itthiṃ gavesantā, imaṃ vanasaṇḍaṃ āhiṇḍāmā’’ti. ‘‘Taṃ kiṃ maññatha vo, kumārā, katamaṃ nu kho tumhākaṃ varaṃ – yaṃ vā tumhe itthiṃ gaveseyyātha, yaṃ vā attānaṃ gaveseyyāthā’’ti? ‘‘Etadeva, bhante, amhākaṃ varaṃ yaṃ mayaṃ attānaṃ gaveseyyāmā’’ti. ‘‘Tena hi vo, kumārā, nisīdatha, dhammaṃ vo desessāmī’’ti. ‘‘Evaṃ, bhante’’ti kho te bhaddavaggiyā sahāyakā bhagavantaṃ abhivādetvā ekamantaṃ nisīdiṃsu. Tesaṃ bhagavā anupubbiṃ kathaṃ kathesi, seyyathidaṃ – dānakathaṃ sīlakathaṃ saggakathaṃ kāmānaṃ ādīnavaṃ okāraṃ saṃkilesaṃ nekkhamme ānisaṃsaṃ pakāsesi, yadā te bhagavā aññāsi kallacitte muducitte vinīvaraṇacitte udaggacitte pasannacitte, atha yā buddhānaṃ sāmukkaṃsikā dhammadesanā, taṃ pakāsesi dukkhaṃ samudayaṃ nirodhaṃ maggaṃ, seyyathāpi nāma suddhaṃ vatthaṃ apagatakāḷakaṃ sammadeva rajanaṃ paṭiggaṇheyya, evameva tesaṃ tasmiṃyeva āsane virajaṃ vītamalaṃ dhammacakkhuṃ udapādi ‘‘yaṃ kiñci samudayadhammaṃ, sabbaṃ taṃ nirodhadhamma’’nti. Te diṭṭhadhammā pattadhammā viditadhammā pariyogāḷhadhammā tiṇṇavicikicchā vigatakathaṃkathā vesārajjappattā aparappaccayā satthusāsane bhagavantaṃ etadavocuṃ – ‘‘labheyyāma mayaṃ, bhante, bhagavato santike pabbajjaṃ, labheyyāma upasampada’’nti. ‘‘Etha bhikkhavo’’ti bhagavā avoca – ‘‘svākkhāto dhammo, caratha brahmacariyaṃ sammā dukkhassa antakiriyāyā’’ti. Sāva tesaṃ āyasmantānaṃ upasampadā ahosi.
ಭದ್ದವಗ್ಗಿಯಸಹಾಯಕಾನಂ ವತ್ಥು ನಿಟ್ಠಿತಂ।
Bhaddavaggiyasahāyakānaṃ vatthu niṭṭhitaṃ.
ದುತಿಯಭಾಣವಾರೋ।
Dutiyabhāṇavāro.
Related texts:
ಅಟ್ಠಕಥಾ • Aṭṭhakathā / ವಿನಯಪಿಟಕ (ಅಟ್ಠಕಥಾ) • Vinayapiṭaka (aṭṭhakathā) / ಮಹಾವಗ್ಗ-ಅಟ್ಠಕಥಾ • Mahāvagga-aṭṭhakathā / ಭದ್ದವಗ್ಗಿಯಕಥಾ • Bhaddavaggiyakathā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā / ಭದ್ದವಗ್ಗಿಯಕಥಾವಣ್ಣನಾ • Bhaddavaggiyakathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಿಮತಿವಿನೋದನೀ-ಟೀಕಾ • Vimativinodanī-ṭīkā / ಭದ್ದವಗ್ಗಿಯಕಥಾವಣ್ಣನಾ • Bhaddavaggiyakathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi / ೧೧. ಭದ್ದವಗ್ಗಿಯಕಥಾ • 11. Bhaddavaggiyakathā
