| Library / Tipiṭaka / တိပိဋက • Tipiṭaka / အင္ဂုတ္တရနိကာယ • Aṅguttaranikāya |
၃. ဘဒ္ဒိယသုတ္တံ
3. Bhaddiyasuttaṃ
၁၉၃. ဧကံ သမယံ ဘဂဝာ ဝေသာလိယံ ဝိဟရတိ မဟာဝနေ ကူဋာဂာရသာလာယံ။ အထ ခော ဘဒ္ဒိယော လိစ္ဆဝိ ယေန ဘဂဝာ တေနုပသင္ကမိ; ဥပသင္ကမိတ္ဝာ ဘဂဝန္တံ အဘိဝာဒေတ္ဝာ ဧကမန္တံ နိသီဒိ။ ဧကမန္တံ နိသိန္နော ခော ဘဒ္ဒိယော လိစ္ဆဝိ ဘဂဝန္တံ ဧတဒဝောစ –
193. Ekaṃ samayaṃ bhagavā vesāliyaṃ viharati mahāvane kūṭāgārasālāyaṃ. Atha kho bhaddiyo licchavi yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho bhaddiyo licchavi bhagavantaṃ etadavoca –
‘‘သုတံ မေတံ, ဘန္တေ – ‘မာယာဝီ သမဏော ဂောတမော အာဝဋ္ဋနိံ မာယံ 1 ဇာနာတိ ယာယ အညတိတ္ထိယာနံ သာဝကေ အာဝဋ္ဋေတီ’တိ။ ယေ တေ, ဘန္တေ, ဧဝမာဟံသု – ‘မာယာဝီ သမဏော ဂောတမော အာဝဋ္ဋနိံ မာယံ ဇာနာတိ ယာယ အညတိတ္ထိယာနံ သာဝကေ အာဝဋ္ဋေတီ’တိ, ကစ္စိ တေ, ဘန္တေ, ဘဂဝတော ဝုတ္တဝာဒိနော, န စ ဘဂဝန္တံ အဘူတေန အဗ္ဘာစိက္ခန္တိ, ဓမ္မသ္သ စ အနုဓမ္မံ ဗ္ယာကရောန္တိ, န စ ကောစိ သဟဓမ္မိကော ဝာဒာနုပာတော ဂာရယ္ဟံ ဌာနံ အာဂစ္ဆတိ, အနဗ္ဘက္ခာတုကာမာ ဟိ မယံ, ဘန္တေ, ဘဂဝန္တ’’န္တိ?
‘‘Sutaṃ metaṃ, bhante – ‘māyāvī samaṇo gotamo āvaṭṭaniṃ māyaṃ 2 jānāti yāya aññatitthiyānaṃ sāvake āvaṭṭetī’ti. Ye te, bhante, evamāhaṃsu – ‘māyāvī samaṇo gotamo āvaṭṭaniṃ māyaṃ jānāti yāya aññatitthiyānaṃ sāvake āvaṭṭetī’ti, kacci te, bhante, bhagavato vuttavādino, na ca bhagavantaṃ abhūtena abbhācikkhanti, dhammassa ca anudhammaṃ byākaronti, na ca koci sahadhammiko vādānupāto gārayhaṃ ṭhānaṃ āgacchati, anabbhakkhātukāmā hi mayaṃ, bhante, bhagavanta’’nti?
‘‘ဧထ တုမ္ဟေ, ဘဒ္ဒိယ, မာ အနုသ္သဝေန, မာ ပရမ္ပရာယ, မာ ဣတိကိရာယ, မာ ပိဋကသမ္ပဒာနေန, မာ တက္ကဟေတု, မာ နယဟေတု, မာ အာကာရပရိဝိတက္ကေန, မာ ဒိဋ္ဌိနိဇ္ဈာနက္ခန္တိယာ, မာ ဘဗ္ဗရူပတာယ, မာ ‘သမဏော နော ဂရူ’တိ။ ယဒာ တုမ္ဟေ, ဘဒ္ဒိယ, အတ္တနာဝ ဇာနေယ္ယာထ – ‘ဣမေ ဓမ္မာ အကုသလာ, ဣမေ ဓမ္မာ သာဝဇ္ဇာ, ဣမေ ဓမ္မာ ဝိညုဂရဟိတာ, ဣမေ ဓမ္မာ သမတ္တာ သမာဒိန္နာ အဟိတာယ ဒုက္ခာယ သံဝတ္တန္တီ’တိ, အထ တုမ္ဟေ, ဘဒ္ဒိယ, ပဇဟေယ္ယာထ။
‘‘Etha tumhe, bhaddiya, mā anussavena, mā paramparāya, mā itikirāya, mā piṭakasampadānena, mā takkahetu, mā nayahetu, mā ākāraparivitakkena, mā diṭṭhinijjhānakkhantiyā, mā bhabbarūpatāya, mā ‘samaṇo no garū’ti. Yadā tumhe, bhaddiya, attanāva jāneyyātha – ‘ime dhammā akusalā, ime dhammā sāvajjā, ime dhammā viññugarahitā, ime dhammā samattā samādinnā ahitāya dukkhāya saṃvattantī’ti, atha tumhe, bhaddiya, pajaheyyātha.
‘‘တံ ကိံ မညထ, ဘဒ္ဒိယ, လောဘော ပုရိသသ္သ အဇ္ဈတ္တံ ဥပ္ပဇ္ဇမာနော ဥပ္ပဇ္ဇတိ ဟိတာယ ဝာ အဟိတာယ ဝာ’’တိ? ‘‘အဟိတာယ, ဘန္တေ’’။ ‘‘လုဒ္ဓော ပနာယံ, ဘဒ္ဒိယ, ပုရိသပုဂ္ဂလော လောဘေန အဘိဘူတော ပရိယာဒိန္နစိတ္တော ပာဏမ္ပိ ဟနတိ, အဒိန္နမ္ပိ အာဒိယတိ, ပရဒာရမ္ပိ ဂစ္ဆတိ, မုသာပိ ဘဏတိ, ပရမ္ပိ တထတ္တာယ 3 သမာဒပေတိ ယံသ ဟောတိ ဒီဃရတ္တံ အဟိတာယ ဒုက္ခာယာ’’တိ။ ‘‘ဧဝံ, ဘန္တေ’’။
‘‘Taṃ kiṃ maññatha, bhaddiya, lobho purisassa ajjhattaṃ uppajjamāno uppajjati hitāya vā ahitāya vā’’ti? ‘‘Ahitāya, bhante’’. ‘‘Luddho panāyaṃ, bhaddiya, purisapuggalo lobhena abhibhūto pariyādinnacitto pāṇampi hanati, adinnampi ādiyati, paradārampi gacchati, musāpi bhaṇati, parampi tathattāya 4 samādapeti yaṃsa hoti dīgharattaṃ ahitāya dukkhāyā’’ti. ‘‘Evaṃ, bhante’’.
‘‘တံ ကိံ မညထ, ဘဒ္ဒိယ, ဒောသော ပုရိသသ္သ။ပေ.။ မောဟော ပုရိသသ္သ။ပေ.။ သာရမ္ဘော ပုရိသသ္သ အဇ္ဈတ္တံ ဥပ္ပဇ္ဇမာနော ဥပ္ပဇ္ဇတိ ဟိတာယ ဝာ အဟိတာယ ဝာ’’တိ? ‘‘အဟိတာယ, ဘန္တေ’’။ ‘‘သာရဒ္ဓော ပနာယံ, ဘဒ္ဒိယ, ပုရိသပုဂ္ဂလော သာရမ္ဘေန အဘိဘူတော ပရိယာဒိန္နစိတ္တော ပာဏမ္ပိ ဟနတိ, အဒိန္နမ္ပိ အာဒိယတိ, ပရဒာရမ္ပိ ဂစ္ဆတိ, မုသာပိ ဘဏတိ, ပရမ္ပိ တထတ္တာယ သမာဒပေတိ ယံသ ဟောတိ ဒီဃရတ္တံ အဟိတာယ ဒုက္ခာယာ’’တိ။ ‘‘ဧဝံ, ဘန္တေ’’။
‘‘Taṃ kiṃ maññatha, bhaddiya, doso purisassa…pe… moho purisassa…pe… sārambho purisassa ajjhattaṃ uppajjamāno uppajjati hitāya vā ahitāya vā’’ti? ‘‘Ahitāya, bhante’’. ‘‘Sāraddho panāyaṃ, bhaddiya, purisapuggalo sārambhena abhibhūto pariyādinnacitto pāṇampi hanati, adinnampi ādiyati, paradārampi gacchati, musāpi bhaṇati, parampi tathattāya samādapeti yaṃsa hoti dīgharattaṃ ahitāya dukkhāyā’’ti. ‘‘Evaṃ, bhante’’.
‘‘တံ ကိံ မညထ, ဘဒ္ဒိယ, ဣမေ ဓမ္မာ ကုသလာ ဝာ အကုသလာ ဝာ’’တိ? ‘‘အကုသလာ, ဘန္တေ’’။ ‘‘သာဝဇ္ဇာ ဝာ အနဝဇ္ဇာ ဝာ’’တိ? ‘‘သာဝဇ္ဇာ, ဘန္တေ’’။ ‘‘ဝိညုဂရဟိတာ ဝာ ဝိညုပ္ပသတ္ထာ ဝာ’’တိ? ‘‘ဝိညုဂရဟိတာ, ဘန္တေ’’။ ‘‘သမတ္တာ သမာဒိန္နာ အဟိတာယ ဒုက္ခာယ သံဝတ္တန္တိ, နော ဝာ? ကထံ ဝာ ဧတ္ထ ဟောတီ’’တိ? ‘‘သမတ္တာ, ဘန္တေ, သမာဒိန္နာ အဟိတာယ ဒုက္ခာယ သံဝတ္တန္တိ။ ဧဝံ နော ဧတ္ထ ဟောတီ’’တိ။
‘‘Taṃ kiṃ maññatha, bhaddiya, ime dhammā kusalā vā akusalā vā’’ti? ‘‘Akusalā, bhante’’. ‘‘Sāvajjā vā anavajjā vā’’ti? ‘‘Sāvajjā, bhante’’. ‘‘Viññugarahitā vā viññuppasatthā vā’’ti? ‘‘Viññugarahitā, bhante’’. ‘‘Samattā samādinnā ahitāya dukkhāya saṃvattanti, no vā? Kathaṃ vā ettha hotī’’ti? ‘‘Samattā, bhante, samādinnā ahitāya dukkhāya saṃvattanti. Evaṃ no ettha hotī’’ti.
‘‘ဣတိ ခော, ဘဒ္ဒိယ, ယံ တံ တေ အဝောစုမ္ဟာ – ဧထ တုမ္ဟေ, ဘဒ္ဒိယ, မာ အနုသ္သဝေန, မာ ပရမ္ပရာယ, မာ ဣတိကိရာယ, မာ ပိဋကသမ္ပဒာနေန, မာ တက္ကဟေတု, မာ နယဟေတု, မာ အာကာရပရိဝိတက္ကေန, မာ ဒိဋ္ဌိနိဇ္ဈာနက္ခန္တိယာ, မာ ဘဗ္ဗရူပတာယ, မာ ‘သမဏော နော ဂရူ’တိ။ ယဒာ တုမ္ဟေ, ဘဒ္ဒိယ, အတ္တနာဝ ဇာနေယ္ယာထ – ‘ဣမေ ဓမ္မာ အကုသလာ, ဣမေ ဓမ္မာ သာဝဇ္ဇာ, ဣမေ ဓမ္မာ ဝိညုဂရဟိတာ, ဣမေ ဓမ္မာ သမတ္တာ သမာဒိန္နာ အဟိတာယ ဒုက္ခာယ သံဝတ္တန္တီတိ, အထ တုမ္ဟေ, ဘဒ္ဒိယ, ပဇဟေယ္ယာထာ’တိ, ဣတိ ယံ တံ ဝုတ္တံ ဣဒမေတံ ပဋိစ္စ ဝုတ္တံ။
‘‘Iti kho, bhaddiya, yaṃ taṃ te avocumhā – etha tumhe, bhaddiya, mā anussavena, mā paramparāya, mā itikirāya, mā piṭakasampadānena, mā takkahetu, mā nayahetu, mā ākāraparivitakkena, mā diṭṭhinijjhānakkhantiyā, mā bhabbarūpatāya, mā ‘samaṇo no garū’ti. Yadā tumhe, bhaddiya, attanāva jāneyyātha – ‘ime dhammā akusalā, ime dhammā sāvajjā, ime dhammā viññugarahitā, ime dhammā samattā samādinnā ahitāya dukkhāya saṃvattantīti, atha tumhe, bhaddiya, pajaheyyāthā’ti, iti yaṃ taṃ vuttaṃ idametaṃ paṭicca vuttaṃ.
‘‘ဧထ တုမ္ဟေ, ဘဒ္ဒိယ, မာ အနုသ္သဝေန, မာ ပရမ္ပရာယ, မာ ဣတိကိရာယ, မာ ပိဋကသမ္ပဒာနေန, မာ တက္ကဟေတု, မာ နယဟေတု, မာ အာကာရပရိဝိတက္ကေန, မာ ဒိဋ္ဌိနိဇ္ဈာနက္ခန္တိယာ, မာ ဘဗ္ဗရူပတာယ, မာ ‘သမဏော နော ဂရူ’တိ။ ယဒာ တုမ္ဟေ, ဘဒ္ဒိယ, အတ္တနာဝ ဇာနေယ္ယာထ – ‘ဣမေ ဓမ္မာ ကုသလာ, ဣမေ ဓမ္မာ အနဝဇ္ဇာ, ဣမေ ဓမ္မာ ဝိညုပ္ပသတ္ထာ, ဣမေ ဓမ္မာ သမတ္တာ သမာဒိန္နာ ဟိတာယ သုခာယ သံဝတ္တန္တီ’တိ, အထ တုမ္ဟေ, ဘဒ္ဒိယ, ဥပသမ္ပဇ္ဇ ဝိဟရေယ္ယာထာ’’တိ။
‘‘Etha tumhe, bhaddiya, mā anussavena, mā paramparāya, mā itikirāya, mā piṭakasampadānena, mā takkahetu, mā nayahetu, mā ākāraparivitakkena, mā diṭṭhinijjhānakkhantiyā, mā bhabbarūpatāya, mā ‘samaṇo no garū’ti. Yadā tumhe, bhaddiya, attanāva jāneyyātha – ‘ime dhammā kusalā, ime dhammā anavajjā, ime dhammā viññuppasatthā, ime dhammā samattā samādinnā hitāya sukhāya saṃvattantī’ti, atha tumhe, bhaddiya, upasampajja vihareyyāthā’’ti.
‘‘တံ ကိံ မညထ, ဘဒ္ဒိယ, အလောဘော ပုရိသသ္သ အဇ္ဈတ္တံ ဥပ္ပဇ္ဇမာနော ဥပ္ပဇ္ဇတိ ဟိတာယ ဝာ အဟိတာယ ဝာ’’တိ? ‘‘ဟိတာယ, ဘန္တေ’’။ ‘‘အလုဒ္ဓော ပနာယံ, ဘဒ္ဒိယ, ပုရိသပုဂ္ဂလော လောဘေန အနဘိဘူတော အပရိယာဒိန္နစိတ္တော နေဝ ပာဏံ ဟနတိ, န အဒိန္နံ အာဒိယတိ, န ပရဒာရံ ဂစ္ဆတိ, န မုသာ ဘဏတိ, ပရမ္ပိ တထတ္တာယ န သမာဒပေတိ ယံ’သ ဟောတိ ဒီဃရတ္တံ ဟိတာယ သုခာယာ’’တိ။ ‘‘ဧဝံ, ဘန္တေ’’။
‘‘Taṃ kiṃ maññatha, bhaddiya, alobho purisassa ajjhattaṃ uppajjamāno uppajjati hitāya vā ahitāya vā’’ti? ‘‘Hitāya, bhante’’. ‘‘Aluddho panāyaṃ, bhaddiya, purisapuggalo lobhena anabhibhūto apariyādinnacitto neva pāṇaṃ hanati, na adinnaṃ ādiyati, na paradāraṃ gacchati, na musā bhaṇati, parampi tathattāya na samādapeti yaṃ’sa hoti dīgharattaṃ hitāya sukhāyā’’ti. ‘‘Evaṃ, bhante’’.
‘‘တံ ကိံ မညထ, ဘဒ္ဒိယ, အဒောသော ပုရိသသ္သ။ပေ.။ အမောဟော ပုရိသသ္သ။ပေ.။ အသာရမ္ဘော ပုရိသသ္သ အဇ္ဈတ္တံ ဥပ္ပဇ္ဇမာနော ဥပ္ပဇ္ဇတိ ဟိတာယ ဝာ အဟိတာယ ဝာ’’တိ? ‘‘ဟိတာယ, ဘန္တေ’’။ ‘‘အသာရဒ္ဓော ပနာယံ, ဘဒ္ဒိယ, ပုရိသပုဂ္ဂလော သာရမ္ဘေန အနဘိဘူတော အပရိယာဒိန္နစိတ္တော နေဝ ပာဏံ ဟနတိ, န အဒိန္နံ အာဒိယတိ, န ပရဒာရံ ဂစ္ဆတိ, န မုသာ ဘဏတိ , ပရမ္ပိ တထတ္တာယ န သမာဒပေတိ ယံ’သ ဟောတိ ဒီဃရတ္တံ ဟိတာယ သုခာယာ’’တိ။ ‘‘ဧဝံ, ဘန္တေ’’။
‘‘Taṃ kiṃ maññatha, bhaddiya, adoso purisassa…pe… amoho purisassa…pe… asārambho purisassa ajjhattaṃ uppajjamāno uppajjati hitāya vā ahitāya vā’’ti? ‘‘Hitāya, bhante’’. ‘‘Asāraddho panāyaṃ, bhaddiya, purisapuggalo sārambhena anabhibhūto apariyādinnacitto neva pāṇaṃ hanati, na adinnaṃ ādiyati, na paradāraṃ gacchati, na musā bhaṇati , parampi tathattāya na samādapeti yaṃ’sa hoti dīgharattaṃ hitāya sukhāyā’’ti. ‘‘Evaṃ, bhante’’.
‘‘တံ ကိံ မညထ, ဘဒ္ဒိယ, ဣမေ ဓမ္မာ ကုသလာ ဝာ အကုသလာ ဝာ’’တိ? ‘‘ကုသလာ, ဘန္တေ’’။ ‘‘သာဝဇ္ဇာ ဝာ အနဝဇ္ဇာ ဝာ’’တိ? ‘‘အနဝဇ္ဇာ, ဘန္တေ’’။ ‘‘ဝိညုဂရဟိတာ ဝာ ဝိညုပ္ပသတ္ထာ ဝာ’’တိ? ‘‘ဝိညုပ္ပသတ္ထာ, ဘန္တေ’’။ ‘‘သမတ္တာ သမာဒိန္နာ ဟိတာယ သုခာယ သံဝတ္တန္တိ နော ဝာ? ကထံ ဝာ ဧတ္ထ ဟောတီ’’တိ? ‘‘သမတ္တာ, ဘန္တေ, သမာဒိန္နာ ဟိတာယ သုခာယ သံဝတ္တန္တိ။ ဧဝံ နော ဧတ္ထ ဟောတီ’’တိ။
‘‘Taṃ kiṃ maññatha, bhaddiya, ime dhammā kusalā vā akusalā vā’’ti? ‘‘Kusalā, bhante’’. ‘‘Sāvajjā vā anavajjā vā’’ti? ‘‘Anavajjā, bhante’’. ‘‘Viññugarahitā vā viññuppasatthā vā’’ti? ‘‘Viññuppasatthā, bhante’’. ‘‘Samattā samādinnā hitāya sukhāya saṃvattanti no vā? Kathaṃ vā ettha hotī’’ti? ‘‘Samattā, bhante, samādinnā hitāya sukhāya saṃvattanti. Evaṃ no ettha hotī’’ti.
‘‘ဣတိ ခော, ဘဒ္ဒိယ, ယံ တံ တေ အဝောစုမ္ဟာ – ဧထ တုမ္ဟေ, ဘဒ္ဒိယ, မာ အနုသ္သဝေန, မာ ပရမ္ပရာယ, မာ ဣတိကိရာယ, မာ ပိဋကသမ္ပဒာနေန, မာ တက္ကဟေတု, မာ နယဟေတု, မာ အာကာရပရိဝိတက္ကေန, မာ ဒိဋ္ဌိနိဇ္ဈာနက္ခန္တိယာ, မာ ဘဗ္ဗရူပတာယ, မာ ‘သမဏော နော ဂရူ’တိ။ ယဒာ တုမ္ဟေ, ဘဒ္ဒိယ, အတ္တနာဝ ဇာနေယ္ယာထ – ‘ဣမေ ဓမ္မာ ကုသလာ, ဣမေ ဓမ္မာ အနဝဇ္ဇာ, ဣမေ ဓမ္မာ ဝိညုပ္ပသတ္ထာ, ဣမေ ဓမ္မာ သမတ္တာ သမာဒိန္နာ ဟိတာယ သုခာယ သံဝတ္တန္တီတိ , အထ တုမ္ဟေ, ဘဒ္ဒိယ, ဥပသမ္ပဇ္ဇ ဝိဟရေယ္ယာထာ’တိ, ဣတိ ယံ တံ ဝုတ္တံ ဣဒမေတံ ပဋိစ္စ ဝုတ္တံ။
‘‘Iti kho, bhaddiya, yaṃ taṃ te avocumhā – etha tumhe, bhaddiya, mā anussavena, mā paramparāya, mā itikirāya, mā piṭakasampadānena, mā takkahetu, mā nayahetu, mā ākāraparivitakkena, mā diṭṭhinijjhānakkhantiyā, mā bhabbarūpatāya, mā ‘samaṇo no garū’ti. Yadā tumhe, bhaddiya, attanāva jāneyyātha – ‘ime dhammā kusalā, ime dhammā anavajjā, ime dhammā viññuppasatthā, ime dhammā samattā samādinnā hitāya sukhāya saṃvattantīti , atha tumhe, bhaddiya, upasampajja vihareyyāthā’ti, iti yaṃ taṃ vuttaṃ idametaṃ paṭicca vuttaṃ.
‘‘ယေ ခော တေ, ဘဒ္ဒိယ, လောကေ သန္တော သပ္ပုရိသာ တေ သာဝကံ ဧဝံ သမာဒပေန္တိ – ‘ဧဟိ တ္ဝံ, အမ္ဘော ပုရိသ, လောဘံ ဝိနေယ္ယ 5 ဝိဟရာဟိ။ လောဘံ ဝိနေယ္ယ ဝိဟရန္တော န လောဘဇံ ကမ္မံ ကရိသ္သသိ ကာယေန ဝာစာယ မနသာ။ ဒောသံ ဝိနေယ္ယ ဝိဟရာဟိ။ ဒောသံ ဝိနေယ္ယ ဝိဟရန္တော န ဒောသဇံ ကမ္မံ ကရိသ္သသိ ကာယေန ဝာစာယ မနသာ။ မောဟံ ဝိနေယ္ယ ဝိဟရာဟိ။ မောဟံ ဝိနေယ္ယ ဝိဟရန္တော န မောဟဇံ ကမ္မံ ကရိသ္သသိ ကာယေန ဝာစာယ မနသာ။ သာရမ္ဘံ ဝိနေယ္ယ ဝိဟရာဟိ။ သာရမ္ဘံ ဝိနေယ္ယ ဝိဟရန္တော န သာရမ္ဘဇံ ကမ္မံ ကရိသ္သသိ ကာယေန ဝာစာယ မနသာ’’’တိ။
‘‘Ye kho te, bhaddiya, loke santo sappurisā te sāvakaṃ evaṃ samādapenti – ‘ehi tvaṃ, ambho purisa, lobhaṃ vineyya 6 viharāhi. Lobhaṃ vineyya viharanto na lobhajaṃ kammaṃ karissasi kāyena vācāya manasā. Dosaṃ vineyya viharāhi. Dosaṃ vineyya viharanto na dosajaṃ kammaṃ karissasi kāyena vācāya manasā. Mohaṃ vineyya viharāhi. Mohaṃ vineyya viharanto na mohajaṃ kammaṃ karissasi kāyena vācāya manasā. Sārambhaṃ vineyya viharāhi. Sārambhaṃ vineyya viharanto na sārambhajaṃ kammaṃ karissasi kāyena vācāya manasā’’’ti.
ဧဝံ ဝုတ္တေ ဘဒ္ဒိယော လိစ္ဆဝိ ဘဂဝန္တံ ဧတဒဝောစ – ‘‘အဘိက္ကန္တံ, ဘန္တေ။ပေ.။ ဥပာသကံ မံ, ဘန္တေ, ဘဂဝာ ဓာရေတု အဇ္ဇတဂ္ဂေ ပာဏုပေတံ သရဏံ ဂတ’’န္တိ။
Evaṃ vutte bhaddiyo licchavi bhagavantaṃ etadavoca – ‘‘abhikkantaṃ, bhante…pe… upāsakaṃ maṃ, bhante, bhagavā dhāretu ajjatagge pāṇupetaṃ saraṇaṃ gata’’nti.
‘‘အပိ နု တာဟံ, ဘဒ္ဒိယ, ဧဝံ အဝစံ – ‘ဧဟိ မေ တ္ဝံ, ဘဒ္ဒိယ, သာဝကော ဟောဟိ; အဟံ သတ္ထာ ဘဝိသ္သာမီ’’’တိ? ‘‘နော ဟေတံ, ဘန္တေ’’။ ‘‘ဧဝံဝာဒိံ ခော မံ, ဘဒ္ဒိယ, ဧဝမက္ခာယိံ ဧကေ သမဏဗ္ရာဟ္မဏာ အသတာ တုစ္ဆာ မုသာ အဘူတေန အဗ္ဘာစိက္ခန္တိ – ‘မာယာဝီ သမဏော ဂောတမော အာဝဋ္ဋနိံ မာယံ ဇာနာတိ ယာယ အညတိတ္ထိယာနံ သာဝကေ အာဝဋ္ဋေတီ’’’တိ။ ‘‘ဘဒ္ဒိကာ , ဘန္တေ, အာဝဋ္ဋနီ မာယာ။ ကလ္ယာဏီ, ဘန္တေ, အာဝဋ္ဋနီ မာယာ။ ပိယာ မေ, ဘန္တေ, ဉာတိသာလောဟိတာ ဣမာယ အာဝဋ္ဋနိယာ အာဝဋ္ဋေယ္ယုံ, ပိယာနမ္ပိ မေ အသ္သ ဉာတိသာလောဟိတာနံ ဒီဃရတ္တံ ဟိတာယ သုခာယ။ သဗ္ဗေ စေပိ, ဘန္တေ, ခတ္တိယာ ဣမာယ အာဝဋ္ဋနိယာ အာဝဋ္ဋေယ္ယုံ, သဗ္ဗေသမ္ပိသ္သ ခတ္တိယာနံ ဒီဃရတ္တံ ဟိတာယ သုခာယ။ သဗ္ဗေ စေပိ, ဘန္တေ, ဗ္ရာဟ္မဏာ။ ဝေသ္သာ ။ သုဒ္ဒာ ဣမာယ အာဝဋ္ဋနိယာ အာဝဋ္ဋေယ္ယုံ, သဗ္ဗေသမ္ပိသ္သ သုဒ္ဒာနံ ဒီဃရတ္တံ ဟိတာယ သုခာယာ’’တိ။
‘‘Api nu tāhaṃ, bhaddiya, evaṃ avacaṃ – ‘ehi me tvaṃ, bhaddiya, sāvako hohi; ahaṃ satthā bhavissāmī’’’ti? ‘‘No hetaṃ, bhante’’. ‘‘Evaṃvādiṃ kho maṃ, bhaddiya, evamakkhāyiṃ eke samaṇabrāhmaṇā asatā tucchā musā abhūtena abbhācikkhanti – ‘māyāvī samaṇo gotamo āvaṭṭaniṃ māyaṃ jānāti yāya aññatitthiyānaṃ sāvake āvaṭṭetī’’’ti. ‘‘Bhaddikā , bhante, āvaṭṭanī māyā. Kalyāṇī, bhante, āvaṭṭanī māyā. Piyā me, bhante, ñātisālohitā imāya āvaṭṭaniyā āvaṭṭeyyuṃ, piyānampi me assa ñātisālohitānaṃ dīgharattaṃ hitāya sukhāya. Sabbe cepi, bhante, khattiyā imāya āvaṭṭaniyā āvaṭṭeyyuṃ, sabbesampissa khattiyānaṃ dīgharattaṃ hitāya sukhāya. Sabbe cepi, bhante, brāhmaṇā… vessā … suddā imāya āvaṭṭaniyā āvaṭṭeyyuṃ, sabbesampissa suddānaṃ dīgharattaṃ hitāya sukhāyā’’ti.
‘‘ဧဝမေတံ, ဘဒ္ဒိယ, ဧဝမေတံ, ဘဒ္ဒိယ! သဗ္ဗေ စေပိ, ဘဒ္ဒိယ, ခတ္တိယာ ဣမာယ အာဝဋ္ဋနိယာ အာဝဋ္ဋေယ္ယုံ အကုသလဓမ္မပ္ပဟာနာယ ကုသလဓမ္မူပသမ္ပဒာယ, သဗ္ဗေသမ္ပိသ္သ ခတ္တိယာနံ ဒီဃရတ္တံ ဟိတာယ သုခာယ။ သဗ္ဗေ စေပိ, ဘဒ္ဒိယ, ဗ္ရာဟ္မဏာ။ ဝေသ္သာ။ သုဒ္ဒာ အာဝဋ္ဋေယ္ယုံ အကုသလဓမ္မပ္ပဟာနာယ ကုသလဓမ္မူပသမ္ပဒာယ, သဗ္ဗေသမ္ပိသ္သ သုဒ္ဒာနံ ဒီဃရတ္တံ ဟိတာယ သုခာယ။ သဒေဝကော စေပိ, ဘဒ္ဒိယ, လောကော သမာရကော သဗ္ရဟ္မကော သသ္သမဏဗ္ရာဟ္မဏီ ပဇာ သဒေဝမနုသ္သာ ဣမာယ အာဝဋ္ဋနိယာ အာဝဋ္ဋေယ္ယုံ 7 အကုသလဓမ္မပ္ပဟာနာယ ကုသလဓမ္မူပသမ္ပဒာယ, သဒေဝကသ္သပိသ္သ လောကသ္သ သမာရကသ္သ သဗ္ရဟ္မကသ္သ သသ္သမဏဗ္ရာဟ္မဏိယာ ပဇာယ သဒေဝမနုသ္သာယ ဒီဃရတ္တံ ဟိတာယ သုခာယ။ ဣမေ စေပိ, ဘဒ္ဒိယ, မဟာသာလာ ဣမာယ အာဝဋ္ဋနိယာ အာဝဋ္ဋေယ္ယုံ အကုသလဓမ္မပ္ပဟာနာယ ကုသလဓမ္မူပသမ္ပဒာယ, ဣမေသမ္ပိသ္သ မဟာသာလာနံ ဒီဃရတ္တံ ဟိတာယ သုခာယ ( ) 8။ ကော ပန ဝာဒော မနုသ္သဘူတသ္သာ’’တိ! တတိယံ။
‘‘Evametaṃ, bhaddiya, evametaṃ, bhaddiya! Sabbe cepi, bhaddiya, khattiyā imāya āvaṭṭaniyā āvaṭṭeyyuṃ akusaladhammappahānāya kusaladhammūpasampadāya, sabbesampissa khattiyānaṃ dīgharattaṃ hitāya sukhāya. Sabbe cepi, bhaddiya, brāhmaṇā… vessā… suddā āvaṭṭeyyuṃ akusaladhammappahānāya kusaladhammūpasampadāya, sabbesampissa suddānaṃ dīgharattaṃ hitāya sukhāya. Sadevako cepi, bhaddiya, loko samārako sabrahmako sassamaṇabrāhmaṇī pajā sadevamanussā imāya āvaṭṭaniyā āvaṭṭeyyuṃ 9 akusaladhammappahānāya kusaladhammūpasampadāya, sadevakassapissa lokassa samārakassa sabrahmakassa sassamaṇabrāhmaṇiyā pajāya sadevamanussāya dīgharattaṃ hitāya sukhāya. Ime cepi, bhaddiya, mahāsālā imāya āvaṭṭaniyā āvaṭṭeyyuṃ akusaladhammappahānāya kusaladhammūpasampadāya, imesampissa mahāsālānaṃ dīgharattaṃ hitāya sukhāya ( ) 10. Ko pana vādo manussabhūtassā’’ti! Tatiyaṃ.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၃. ဘဒ္ဒိယသုတ္တဝဏ္ဏနာ • 3. Bhaddiyasuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၃. ဘဒ္ဒိယသုတ္တဝဏ္ဏနာ • 3. Bhaddiyasuttavaṇṇanā
