| Library / Tipiṭaka / तिपिटक • Tipiṭaka / सुत्तनिपातपाळि • Suttanipātapāḷi |
१२. भद्रावुधमाणवपुच्छा
12. Bhadrāvudhamāṇavapucchā
११०७.
1107.
‘‘ओकञ्जहं तण्हच्छिदं अनेजं, (इच्चायस्मा भद्रावुधो)
‘‘Okañjahaṃ taṇhacchidaṃ anejaṃ, (iccāyasmā bhadrāvudho)
नन्दिञ्जहं ओघतिण्णं विमुत्तं।
Nandiñjahaṃ oghatiṇṇaṃ vimuttaṃ;
कप्पञ्जहं अभियाचे सुमेधं, सुत्वान नागस्स अपनमिस्सन्ति इतो॥
Kappañjahaṃ abhiyāce sumedhaṃ, sutvāna nāgassa apanamissanti ito.
११०८.
1108.
‘‘नानाजना जनपदेहि सङ्गता, तव वीर वाक्यं अभिकङ्खमाना।
‘‘Nānājanā janapadehi saṅgatā, tava vīra vākyaṃ abhikaṅkhamānā;
तेसं तुवं साधु वियाकरोहि, तथा हि ते विदितो एस धम्मो’’॥
Tesaṃ tuvaṃ sādhu viyākarohi, tathā hi te vidito esa dhammo’’.
११०९.
1109.
‘‘आदानतण्हं विनयेथ सब्बं, (भद्रावुधाति भगवा)
‘‘Ādānataṇhaṃ vinayetha sabbaṃ, (bhadrāvudhāti bhagavā)
उद्धं अधो तिरियञ्चापि मज्झे।
Uddhaṃ adho tiriyañcāpi majjhe;
यं यञ्हि लोकस्मिमुपादियन्ति, तेनेव मारो अन्वेति जन्तुं॥
Yaṃ yañhi lokasmimupādiyanti, teneva māro anveti jantuṃ.
१११०.
1110.
‘‘तस्मा पजानं न उपादियेथ, भिक्खु सतो किञ्चनं सब्बलोके।
‘‘Tasmā pajānaṃ na upādiyetha, bhikkhu sato kiñcanaṃ sabbaloke;
आदानसत्ते इति पेक्खमानो, पजं इमं मच्चुधेय्ये विसत्त’’न्ति॥
Ādānasatte iti pekkhamāno, pajaṃ imaṃ maccudheyye visatta’’nti.
भद्रावुधमाणवपुच्छा द्वादसमा निट्ठिता।
Bhadrāvudhamāṇavapucchā dvādasamā niṭṭhitā.
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / सुत्तनिपात-अट्ठकथा • Suttanipāta-aṭṭhakathā / १२. भद्रावुधसुत्तवण्णना • 12. Bhadrāvudhasuttavaṇṇanā
