| Library / Tipiṭaka / तिपिटक • Tipiṭaka / चूळनिद्देस-अट्ठकथा • Cūḷaniddesa-aṭṭhakathā |
१२. भद्रावुधमाणवसुत्तनिद्देसवण्णना
12. Bhadrāvudhamāṇavasuttaniddesavaṇṇanā
७०. द्वादसमे भद्रावुधसुत्ते – ओकञ्जहन्ति आलयं जहं। तण्हच्छिदन्ति तण्हाकायच्छिदं। अनेजन्ति लोकधम्मेसु निक्कम्पं। नन्दिञ्जहन्ति अनागतरूपादिपत्थनाजहं। एका एव हि सा तण्हा, थुतिवसेन इध नानप्पकारतो वुत्ता। कप्पञ्जहन्ति दुविधं कप्पजहं। अभियाचेति अतिविय याचामि। सुत्वान नागस्स अपनमिस्सन्ति इतोति नागस्स तव भगवतो वचनं सुत्वा इतो पासाणकचेतियतो बहुजना पक्कमिस्सन्तीति अधिप्पायो।
70. Dvādasame bhadrāvudhasutte – okañjahanti ālayaṃ jahaṃ. Taṇhacchidanti taṇhākāyacchidaṃ. Anejanti lokadhammesu nikkampaṃ. Nandiñjahanti anāgatarūpādipatthanājahaṃ. Ekā eva hi sā taṇhā, thutivasena idha nānappakārato vuttā. Kappañjahanti duvidhaṃ kappajahaṃ. Abhiyāceti ativiya yācāmi. Sutvāna nāgassa apanamissanti itoti nāgassa tava bhagavato vacanaṃ sutvā ito pāsāṇakacetiyato bahujanā pakkamissantīti adhippāyo.
ये उपयुपादानाति तण्हादिट्ठीहि उपगन्त्वा गहिता। चेतसो अधिट्ठानाति चित्ते पतिट्ठिता। अभिनिवेसानुसयाति पतिट्ठहित्वा आगन्त्वा सयिता।
Yeupayupādānāti taṇhādiṭṭhīhi upagantvā gahitā. Cetaso adhiṭṭhānāti citte patiṭṭhitā. Abhinivesānusayāti patiṭṭhahitvā āgantvā sayitā.
७१. जनपदेहि सङ्गताति अङ्गादीहि जनपदेहि इध समागता। वियाकरोहीति धम्मं देसेहि।
71.Janapadehi saṅgatāti aṅgādīhi janapadehi idha samāgatā. Viyākarohīti dhammaṃ desehi.
सङ्गताति एते खत्तियादयो एकीभूता। समागताति वुत्तप्पकारेहि जनपदेहि आगता। समोहिताति रासीभूता। सन्निपतिताति अधियोगा।
Saṅgatāti ete khattiyādayo ekībhūtā. Samāgatāti vuttappakārehi janapadehi āgatā. Samohitāti rāsībhūtā. Sannipatitāti adhiyogā.
७२. अथस्स आसयानुलोमेन धम्मं देसेन्तो भगवा उपरूपरिगाथायो अभासि। तत्थ आदानतण्हन्ति रूपादीनं आदायिकं गहणतण्हं, तण्हुपादानन्ति वुत्तं होति। यं यञ्हि लोकस्मिमुपादियन्तीति एतेसु उद्धादिभेदेसु यं यं गण्हन्ति। तेनेव मारो अन्वेति जन्तुन्ति तेनेव उपादानपच्चयनिब्बत्तकम्माभिसङ्खारनिब्बत्तवसेन पटिसन्धिक्खन्धमारो तं सत्तं अनुगच्छति।
72. Athassa āsayānulomena dhammaṃ desento bhagavā uparūparigāthāyo abhāsi. Tattha ādānataṇhanti rūpādīnaṃ ādāyikaṃ gahaṇataṇhaṃ, taṇhupādānanti vuttaṃ hoti. Yaṃ yañhi lokasmimupādiyantīti etesu uddhādibhedesu yaṃ yaṃ gaṇhanti. Teneva māro anvetijantunti teneva upādānapaccayanibbattakammābhisaṅkhāranibbattavasena paṭisandhikkhandhamāro taṃ sattaṃ anugacchati.
७३. तस्मा पजानन्ति तस्मा एतमादीनवं अनिच्चादिवसेन वा सङ्खारे पजानन्तो। आदानसत्ते इति पेक्खमानो, पजं इमं मच्चुधेय्ये विसत्तन्ति आदातब्बट्ठेन आदानेसु रूपादीसु सत्ते सब्बलोके इमं पजं मच्चुधेय्ये लग्गं पेक्खमानो , आदानसत्ते वा आदानाभिनिविट्ठे पुग्गले आदानसङ्गहेतुञ्च इमं पजं मच्चुधेय्ये लग्गं ततो वीतिक्कमितुं असमत्थं इति पेक्खमानो किञ्चनं सब्बलोके न उपादियेथाति। सेसं सब्बत्थ पाकटमेव।
73.Tasmā pajānanti tasmā etamādīnavaṃ aniccādivasena vā saṅkhāre pajānanto. Ādānasatte iti pekkhamāno, pajaṃ imaṃ maccudheyye visattanti ādātabbaṭṭhena ādānesu rūpādīsu satte sabbaloke imaṃ pajaṃ maccudheyye laggaṃ pekkhamāno , ādānasatte vā ādānābhiniviṭṭhe puggale ādānasaṅgahetuñca imaṃ pajaṃ maccudheyye laggaṃ tato vītikkamituṃ asamatthaṃ iti pekkhamāno kiñcanaṃ sabbaloke na upādiyethāti. Sesaṃ sabbattha pākaṭameva.
एवं भगवा इदम्पि सुत्तं अरहत्तनिकूटेनेव देसेसि, देसनापरियोसाने च पुब्बसदिसो एव धम्माभिसमयो अहोसीति।
Evaṃ bhagavā idampi suttaṃ arahattanikūṭeneva desesi, desanāpariyosāne ca pubbasadiso eva dhammābhisamayo ahosīti.
सद्धम्मप्पज्जोतिकाय चूळनिद्देस-अट्ठकथाय
Saddhammappajjotikāya cūḷaniddesa-aṭṭhakathāya
भद्रावुधसुत्तनिद्देसवण्णना निट्ठिता।
Bhadrāvudhasuttaniddesavaṇṇanā niṭṭhitā.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / खुद्दकनिकाय • Khuddakanikāya / चूळनिद्देसपाळि • Cūḷaniddesapāḷi
१२. भद्रावुधमाणवपुच्छा • 12. Bhadrāvudhamāṇavapucchā
१२. भद्रावुधमाणवपुच्छानिद्देसो • 12. Bhadrāvudhamāṇavapucchāniddeso
