| Library / Tipiṭaka / තිපිටක • Tipiṭaka / චූළනිද්‌දෙස-අට්‌ඨකථා • Cūḷaniddesa-aṭṭhakathā |
12. භද්‍රාවුධමාණවසුත්‌තනිද්‌දෙසවණ්‌ණනා
12. Bhadrāvudhamāṇavasuttaniddesavaṇṇanā
70. ද්‌වාදසමෙ භද්‍රාවුධසුත්‌තෙ – ඔකඤ්‌ජහන්‌ති ආලයං ජහං. තණ්‌හච්‌ඡිදන්‌ති තණ්‌හාකායච්‌ඡිදං. අනෙජන්‌ති ලොකධම්‌මෙසු නික්‌කම්‌පං. නන්‌දිඤ්‌ජහන්‌ති අනාගතරූපාදිපත්‌ථනාජහං. එකා එව හි සා තණ්‌හා, ථුතිවසෙන ඉධ නානප්‌පකාරතො වුත්‌තා. කප්‌පඤ්‌ජහන්‌ති දුවිධං කප්‌පජහං. අභියාචෙති අතිවිය යාචාමි. සුත්‌වාන නාගස්‌ස අපනමිස්‌සන්‌ති ඉතොති නාගස්‌ස තව භගවතො වචනං සුත්‌වා ඉතො පාසාණකචෙතියතො බහුජනා පක්‌කමිස්‌සන්‌තීති අධිප්‌පායො.
70. Dvādasame bhadrāvudhasutte – okañjahanti ālayaṃ jahaṃ. Taṇhacchidanti taṇhākāyacchidaṃ. Anejanti lokadhammesu nikkampaṃ. Nandiñjahanti anāgatarūpādipatthanājahaṃ. Ekā eva hi sā taṇhā, thutivasena idha nānappakārato vuttā. Kappañjahanti duvidhaṃ kappajahaṃ. Abhiyāceti ativiya yācāmi. Sutvāna nāgassa apanamissanti itoti nāgassa tava bhagavato vacanaṃ sutvā ito pāsāṇakacetiyato bahujanā pakkamissantīti adhippāyo.
යෙ උපයුපාදානාති තණ්‌හාදිට්‌ඨීහි උපගන්‌ත්‌වා ගහිතා. චෙතසො අධිට්‌ඨානාති චිත්‌තෙ පතිට්‌ඨිතා. අභිනිවෙසානුසයාති පතිට්‌ඨහිත්‌වා ආගන්‌ත්‌වා සයිතා.
Yeupayupādānāti taṇhādiṭṭhīhi upagantvā gahitā. Cetaso adhiṭṭhānāti citte patiṭṭhitā. Abhinivesānusayāti patiṭṭhahitvā āgantvā sayitā.
71. ජනපදෙහි සඞ්‌ගතාති අඞ්‌ගාදීහි ජනපදෙහි ඉධ සමාගතා. වියාකරොහීති ධම්‌මං දෙසෙහි.
71.Janapadehi saṅgatāti aṅgādīhi janapadehi idha samāgatā. Viyākarohīti dhammaṃ desehi.
සඞ්‌ගතාති එතෙ ඛත්‌තියාදයො එකීභූතා. සමාගතාති වුත්‌තප්‌පකාරෙහි ජනපදෙහි ආගතා. සමොහිතාති රාසීභූතා. සන්‌නිපතිතාති අධියොගා.
Saṅgatāti ete khattiyādayo ekībhūtā. Samāgatāti vuttappakārehi janapadehi āgatā. Samohitāti rāsībhūtā. Sannipatitāti adhiyogā.
72. අථස්‌ස ආසයානුලොමෙන ධම්‌මං දෙසෙන්‌තො භගවා උපරූපරිගාථායො අභාසි. තත්‌ථ ආදානතණ්‌හන්‌ති රූපාදීනං ආදායිකං ගහණතණ්‌හං, තණ්‌හුපාදානන්‌ති වුත්‌තං හොති. යං යඤ්‌හි ලොකස්‌මිමුපාදියන්‌තීති එතෙසු උද්‌ධාදිභෙදෙසු යං යං ගණ්‌හන්‌ති. තෙනෙව මාරො අන්‌වෙති ජන්‌තුන්‌ති තෙනෙව උපාදානපච්‌චයනිබ්‌බත්‌තකම්‌මාභිසඞ්‌ඛාරනිබ්‌බත්‌තවසෙන පටිසන්‌ධික්‌ඛන්‌ධමාරො තං සත්‌තං අනුගච්‌ඡති.
72. Athassa āsayānulomena dhammaṃ desento bhagavā uparūparigāthāyo abhāsi. Tattha ādānataṇhanti rūpādīnaṃ ādāyikaṃ gahaṇataṇhaṃ, taṇhupādānanti vuttaṃ hoti. Yaṃ yañhi lokasmimupādiyantīti etesu uddhādibhedesu yaṃ yaṃ gaṇhanti. Teneva māro anvetijantunti teneva upādānapaccayanibbattakammābhisaṅkhāranibbattavasena paṭisandhikkhandhamāro taṃ sattaṃ anugacchati.
73. තස්‌මා පජානන්‌ති තස්‌මා එතමාදීනවං අනිච්‌චාදිවසෙන වා සඞ්‌ඛාරෙ පජානන්‌තො. ආදානසත්‌තෙ ඉති පෙක්‌ඛමානො, පජං ඉමං මච්‌චුධෙය්‍යෙ විසත්‌තන්‌ති ආදාතබ්‌බට්‌ඨෙන ආදානෙසු රූපාදීසු සත්‌තෙ සබ්‌බලොකෙ ඉමං පජං මච්‌චුධෙය්‍යෙ ලග්‌ගං පෙක්‌ඛමානො , ආදානසත්‌තෙ වා ආදානාභිනිවිට්‌ඨෙ පුග්‌ගලෙ ආදානසඞ්‌ගහෙතුඤ්‌ච ඉමං පජං මච්‌චුධෙය්‍යෙ ලග්‌ගං තතො වීතික්‌කමිතුං අසමත්‌ථං ඉති පෙක්‌ඛමානො කිඤ්‌චනං සබ්‌බලොකෙ න උපාදියෙථාති. සෙසං සබ්‌බත්‌ථ පාකටමෙව.
73.Tasmā pajānanti tasmā etamādīnavaṃ aniccādivasena vā saṅkhāre pajānanto. Ādānasatte iti pekkhamāno, pajaṃ imaṃ maccudheyye visattanti ādātabbaṭṭhena ādānesu rūpādīsu satte sabbaloke imaṃ pajaṃ maccudheyye laggaṃ pekkhamāno , ādānasatte vā ādānābhiniviṭṭhe puggale ādānasaṅgahetuñca imaṃ pajaṃ maccudheyye laggaṃ tato vītikkamituṃ asamatthaṃ iti pekkhamāno kiñcanaṃ sabbaloke na upādiyethāti. Sesaṃ sabbattha pākaṭameva.
එවං භගවා ඉදම්‌පි සුත්‌තං අරහත්‌තනිකූටෙනෙව දෙසෙසි, දෙසනාපරියොසානෙ ච පුබ්‌බසදිසො එව ධම්‌මාභිසමයො අහොසීති.
Evaṃ bhagavā idampi suttaṃ arahattanikūṭeneva desesi, desanāpariyosāne ca pubbasadiso eva dhammābhisamayo ahosīti.
සද්‌ධම්‌මප්‌පජ්‌ජොතිකාය චූළනිද්‌දෙස-අට්‌ඨකථාය
Saddhammappajjotikāya cūḷaniddesa-aṭṭhakathāya
භද්‍රාවුධසුත්‌තනිද්‌දෙසවණ්‌ණනා නිට්‌ඨිතා.
Bhadrāvudhasuttaniddesavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / ඛුද්‌දකනිකාය • Khuddakanikāya / චූළනිද්‌දෙසපාළි • Cūḷaniddesapāḷi
12. භද්‍රාවුධමාණවපුච්‌ඡා • 12. Bhadrāvudhamāṇavapucchā
12. භද්‍රාවුධමාණවපුච්‌ඡානිද්‌දෙසො • 12. Bhadrāvudhamāṇavapucchāniddeso
