| Library / Tipiṭaka / ติปิฎก • Tipiṭaka / มิลินฺทปญฺหปาฬิ • Milindapañhapāḷi |
๔. ภควโต พฺรหฺมจาริปโญฺห
4. Bhagavato brahmacāripañho
๔. ราชา อาห ‘‘ภเนฺต นาคเสน, พุโทฺธ พฺรหฺมจารี’’ติ? ‘‘อาม, มหาราช, ภควา พฺรหฺมจารี’’ติฯ ‘‘เตน หิ, ภเนฺต นาคเสน, พุโทฺธ พฺรหฺมุโน สิโสฺส’’ติ? ‘‘อตฺถิ ปน เต, มหาราช, หตฺถิปาโมโกฺข’’ติ? ‘‘อตฺถิ , ภเนฺต’’ติฯ ‘‘กิํนุ โข, มหาราช, โส หตฺถี กทาจิ กรหจิ โกญฺจนาทํ นทตีติ? ‘‘อาม, ภเนฺต, นทตี’’ติ ‘‘เตน หิ, มหาราช, โส หตฺถี โกญฺจสกุณสฺส สิโสฺส’’ติ? ‘‘น หิ, ภเนฺต’’ติฯ ‘‘กิํ ปน, มหาราช, พฺรหฺมา สพุทฺธิโก อพุทฺธิโก’’ติ? ‘‘สพุทฺธิโก, ภเนฺต’’ติฯ ‘‘เตน หิ, มหาราช, พฺรหฺมา ภควโต สิโสฺส’’ติฯ
4. Rājā āha ‘‘bhante nāgasena, buddho brahmacārī’’ti? ‘‘Āma, mahārāja, bhagavā brahmacārī’’ti. ‘‘Tena hi, bhante nāgasena, buddho brahmuno sisso’’ti? ‘‘Atthi pana te, mahārāja, hatthipāmokkho’’ti? ‘‘Atthi , bhante’’ti. ‘‘Kiṃnu kho, mahārāja, so hatthī kadāci karahaci koñcanādaṃ nadatīti? ‘‘Āma, bhante, nadatī’’ti ‘‘tena hi, mahārāja, so hatthī koñcasakuṇassa sisso’’ti? ‘‘Na hi, bhante’’ti. ‘‘Kiṃ pana, mahārāja, brahmā sabuddhiko abuddhiko’’ti? ‘‘Sabuddhiko, bhante’’ti. ‘‘Tena hi, mahārāja, brahmā bhagavato sisso’’ti.
‘‘กโลฺลสิ, ภเนฺต นาคเสนา’’ติฯ
‘‘Kallosi, bhante nāgasenā’’ti.
ภควโต พฺรหฺมจาริปโญฺห จตุโตฺถฯ
Bhagavato brahmacāripañho catuttho.
