| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
5. உபாலிவக்³கோ³
5. Upālivaggo
1. பா⁴கி³னெய்யுபாலித்தே²ரஅபதா³னவண்ணனா
1. Bhāgineyyupālittheraapadānavaṇṇanā
கீ²ணாஸவஸஹஸ்ஸேஹீதிஆதி³கங் ஆயஸ்மதோ உபாலித்தே²ரஸ்ஸ பா⁴கி³னெய்யுபாலித்தே²ரஸ்ஸ அபதா³னங். ஏஸோ ஹி தே²ரோ புரிமபு³த்³தே⁴ஸு கதாதி⁴காரோ தஸ்மிங் தஸ்மிங் ப⁴வே புஞ்ஞானி உபசினந்தோ பது³முத்தரஸ்ஸ ப⁴க³வதோ காலே ஏகஸ்மிங் குலே நிப்³ப³த்தோ வுத்³தி⁴மன்வாய க⁴ராவாஸே ஆதீ³னவங் தி³ஸ்வா கே³ஹங் பஹாய இஸிபப்³ப³ஜ்ஜங் பப்³ப³ஜித்வா பஞ்சாபி⁴ஞ்ஞாஅட்ட²ஸமாபத்திலாபீ⁴ ஹுத்வா ஹிமவந்தே வாஸங் கப்பேஸி. தஸ்மிங் ஸமயே பது³முத்தரோ ப⁴க³வா விவேககாமோ ஹிமவந்தங் பாவிஸி. தாபஸோ ப⁴க³வந்தங் புண்ணசந்த³மிவ விரோசமானங் தூ³ரதோவ தி³ஸ்வா பஸன்னமானஸோ அஜினசம்மங் அங்ஸே கத்வா அஞ்ஜலிங் பக்³க³ய்ஹ வந்தி³த்வா டி²தகோவ த³ஸனக²ஸமோதா⁴னஞ்ஜலிங் ஸிரஸி பதிட்ட²பெத்வா அனேகாஹி உபமாஹி அனேகேஹி து²திவசனேஹி ப⁴க³வந்தங் தோ²மேஸி. தங் ஸுத்வா ப⁴க³வா – ‘‘அயங் தாபஸோ அனாக³தே கோ³தமஸ்ஸ நாம ப⁴க³வதோ ஸாஸனே பப்³ப³ஜித்வா வினயே திகி²ணபஞ்ஞானங் அக்³கோ³ ப⁴விஸ்ஸதீ’’தி ப்³யாகரணமதா³ஸி. ஸோ யாவதாயுகங் ட²த்வா அபரிஹீனஜ்ஜா²னோ ப்³ரஹ்மலோகே நிப்³ப³த்தி. ததோ சுதோ தே³வமனுஸ்ஸேஸு ஸங்ஸரந்தோ ஸம்பத்தியோ அனுப⁴வித்வா இமஸ்மிங் பு³த்³து⁴ப்பாதே³ கபிலவத்து²னக³ரே உபாலித்தே²ரஸ்ஸ பா⁴கி³னெய்யோ ஹுத்வா நிப்³ப³த்தி. ஸோ கமேன வுத்³தி⁴ப்பத்தோ மாதுலஸ்ஸ உபாலித்தே²ரஸ ஸந்திகே பப்³ப³ஜித்வா கம்மட்டா²னங் க³ஹெத்வா விபஸ்ஸனங் வட்³டெ⁴த்வா நசிரஸ்ஸேவ அரஹா அஹோஸி. ஸோ அத்தனோ ஆசரியஸ்ஸ ஸமீபே வஸிதத்தா வினயபஞ்ஹே திகி²ணஞாணோ அஹோஸி. அத² ப⁴க³வா ‘‘ஏதத³க்³க³ங், பி⁴க்க²வே, மம ஸாவகானங் பி⁴க்கூ²னங் வினயபஞ்ஹே திகி²ணபஞ்ஞானங் பி⁴க்கூ²னங் யதி³த³ங் பா⁴கி³னெய்யுபாலீ’’தி தங் ஏதத³க்³க³ட்டா²னே ட²பேஸி.
Khīṇāsavasahassehītiādikaṃ āyasmato upālittherassa bhāgineyyupālittherassa apadānaṃ. Eso hi thero purimabuddhesu katādhikāro tasmiṃ tasmiṃ bhave puññāni upacinanto padumuttarassa bhagavato kāle ekasmiṃ kule nibbatto vuddhimanvāya gharāvāse ādīnavaṃ disvā gehaṃ pahāya isipabbajjaṃ pabbajitvā pañcābhiññāaṭṭhasamāpattilābhī hutvā himavante vāsaṃ kappesi. Tasmiṃ samaye padumuttaro bhagavā vivekakāmo himavantaṃ pāvisi. Tāpaso bhagavantaṃ puṇṇacandamiva virocamānaṃ dūratova disvā pasannamānaso ajinacammaṃ aṃse katvā añjaliṃ paggayha vanditvā ṭhitakova dasanakhasamodhānañjaliṃ sirasi patiṭṭhapetvā anekāhi upamāhi anekehi thutivacanehi bhagavantaṃ thomesi. Taṃ sutvā bhagavā – ‘‘ayaṃ tāpaso anāgate gotamassa nāma bhagavato sāsane pabbajitvā vinaye tikhiṇapaññānaṃ aggo bhavissatī’’ti byākaraṇamadāsi. So yāvatāyukaṃ ṭhatvā aparihīnajjhāno brahmaloke nibbatti. Tato cuto devamanussesu saṃsaranto sampattiyo anubhavitvā imasmiṃ buddhuppāde kapilavatthunagare upālittherassa bhāgineyyo hutvā nibbatti. So kamena vuddhippatto mātulassa upālittherasa santike pabbajitvā kammaṭṭhānaṃ gahetvā vipassanaṃ vaḍḍhetvā nacirasseva arahā ahosi. So attano ācariyassa samīpe vasitattā vinayapañhe tikhiṇañāṇo ahosi. Atha bhagavā ‘‘etadaggaṃ, bhikkhave, mama sāvakānaṃ bhikkhūnaṃ vinayapañhe tikhiṇapaññānaṃ bhikkhūnaṃ yadidaṃ bhāgineyyupālī’’ti taṃ etadaggaṭṭhāne ṭhapesi.
1. ஸோ ஏவங் ஏதத³க்³க³ட்டா²னங் பத்வா அத்தனோ புப்³ப³கம்மங் ஸரித்வா ஸோமனஸ்ஸஜாதோ புப்³ப³சரிதாபதா³னங் பகாஸெந்தோ கீ²ணாஸவஸஹஸ்ஸேஹீதிஆதி³மாஹ. தத்த² ஆ ஸமந்ததோ யாவப⁴வக்³கா³ ஸவந்தி பவத்தந்தீதி ஆஸவா. காமாஸவாத³யோ சத்தாரோ ஆஸவா, தே கீ²ணா ஸோஸிதா விஸோஸிதா வித்³த⁴ங்ஸிதா யேஹி தேதி கீ²ணாஸவா, தேயேவ ஸஹஸ்ஸா கீ²ணாஸவஸஹஸ்ஸா, தேஹி கீ²ணாஸவஸஹஸ்ஸேஹி . பரேதோ பரிவுதோ லோகனாயகோ லோகஸ்ஸ நிப்³பா³னபாபனகோ விவேகங் அனுயுத்தோ படிஸல்லிதுங் ஏகீப⁴விதுங் க³ச்ச²தேதி ஸம்ப³ந்தோ⁴.
1. So evaṃ etadaggaṭṭhānaṃ patvā attano pubbakammaṃ saritvā somanassajāto pubbacaritāpadānaṃ pakāsento khīṇāsavasahassehītiādimāha. Tattha ā samantato yāvabhavaggā savanti pavattantīti āsavā. Kāmāsavādayo cattāro āsavā, te khīṇā sositā visositā viddhaṃsitā yehi teti khīṇāsavā, teyeva sahassā khīṇāsavasahassā, tehi khīṇāsavasahassehi . Pareto parivuto lokanāyako lokassa nibbānapāpanako vivekaṃ anuyutto paṭisallituṃ ekībhavituṃ gacchateti sambandho.
2. அஜினேன நிவத்தோ²ஹந்தி அஹங் அஜினமிக³சம்மேன படிச்ச²ன்னோ, அஜினசம்மவஸனோதி அத்தோ². தித³ண்ட³பரிதா⁴ரகோதி குண்டி³கட்ட²பனத்தா²ய தித³ண்ட³ங் க³ஹெத்வா தா⁴ரெந்தோதி அத்தோ². பி⁴க்கு²ஸங்கே⁴ன பரிப்³யூள்ஹங் பரிவாரிதங் லோகனாயகங் அத்³த³ஸந்தி ஸம்ப³ந்தோ⁴. ஸேஸங் பாகடமேவாதி.
2.Ajinena nivatthohanti ahaṃ ajinamigacammena paṭicchanno, ajinacammavasanoti attho. Tidaṇḍaparidhārakoti kuṇḍikaṭṭhapanatthāya tidaṇḍaṃ gahetvā dhārentoti attho. Bhikkhusaṅghena paribyūḷhaṃ parivāritaṃ lokanāyakaṃ addasanti sambandho. Sesaṃ pākaṭamevāti.
பா⁴கி³னெய்யுபாலித்தே²ரஅபதா³னவண்ணனா ஸமத்தா.
Bhāgineyyupālittheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 1. பா⁴கி³னெய்யுபாலித்தே²ரஅபதா³னங் • 1. Bhāgineyyupālittheraapadānaṃ
