| Library / Tipiṭaka / তিপিটক • Tipiṭaka / অপদান-অট্ঠকথা • Apadāna-aṭṭhakathā |
৫. উপালিৰগ্গো
5. Upālivaggo
১. ভাগিনেয্যুপালিত্থেরঅপদানৰণ্ণনা
1. Bhāgineyyupālittheraapadānavaṇṇanā
খীণাসৰসহস্সেহীতিআদিকং আযস্মতো উপালিত্থেরস্স ভাগিনেয্যুপালিত্থেরস্স অপদানং। এসো হি থেরো পুরিমবুদ্ধেসু কতাধিকারো তস্মিং তস্মিং ভৰে পুঞ্ঞানি উপচিনন্তো পদুমুত্তরস্স ভগৰতো কালে একস্মিং কুলে নিব্বত্তো ৰুদ্ধিমন্ৰায ঘরাৰাসে আদীনৰং দিস্ৰা গেহং পহায ইসিপব্বজ্জং পব্বজিত্ৰা পঞ্চাভিঞ্ঞাঅট্ঠসমাপত্তিলাভী হুত্ৰা হিমৰন্তে ৰাসং কপ্পেসি। তস্মিং সমযে পদুমুত্তরো ভগৰা ৰিৰেককামো হিমৰন্তং পাৰিসি। তাপসো ভগৰন্তং পুণ্ণচন্দমিৰ ৰিরোচমানং দূরতোৰ দিস্ৰা পসন্নমানসো অজিনচম্মং অংসে কত্ৰা অঞ্জলিং পগ্গয্হ ৰন্দিত্ৰা ঠিতকোৰ দসনখসমোধানঞ্জলিং সিরসি পতিট্ঠপেত্ৰা অনেকাহি উপমাহি অনেকেহি থুতিৰচনেহি ভগৰন্তং থোমেসি। তং সুত্ৰা ভগৰা – ‘‘অযং তাপসো অনাগতে গোতমস্স নাম ভগৰতো সাসনে পব্বজিত্ৰা ৰিনযে তিখিণপঞ্ঞানং অগ্গো ভৰিস্সতী’’তি ব্যাকরণমদাসি। সো যাৰতাযুকং ঠত্ৰা অপরিহীনজ্ঝানো ব্রহ্মলোকে নিব্বত্তি। ততো চুতো দেৰমনুস্সেসু সংসরন্তো সম্পত্তিযো অনুভৰিত্ৰা ইমস্মিং বুদ্ধুপ্পাদে কপিলৰত্থুনগরে উপালিত্থেরস্স ভাগিনেয্যো হুত্ৰা নিব্বত্তি। সো কমেন ৰুদ্ধিপ্পত্তো মাতুলস্স উপালিত্থেরস সন্তিকে পব্বজিত্ৰা কম্মট্ঠানং গহেত্ৰা ৰিপস্সনং ৰড্ঢেত্ৰা নচিরস্সেৰ অরহা অহোসি। সো অত্তনো আচরিযস্স সমীপে ৰসিতত্তা ৰিনযপঞ্হে তিখিণঞাণো অহোসি। অথ ভগৰা ‘‘এতদগ্গং, ভিক্খৰে, মম সাৰকানং ভিক্খূনং ৰিনযপঞ্হে তিখিণপঞ্ঞানং ভিক্খূনং যদিদং ভাগিনেয্যুপালী’’তি তং এতদগ্গট্ঠানে ঠপেসি।
Khīṇāsavasahassehītiādikaṃ āyasmato upālittherassa bhāgineyyupālittherassa apadānaṃ. Eso hi thero purimabuddhesu katādhikāro tasmiṃ tasmiṃ bhave puññāni upacinanto padumuttarassa bhagavato kāle ekasmiṃ kule nibbatto vuddhimanvāya gharāvāse ādīnavaṃ disvā gehaṃ pahāya isipabbajjaṃ pabbajitvā pañcābhiññāaṭṭhasamāpattilābhī hutvā himavante vāsaṃ kappesi. Tasmiṃ samaye padumuttaro bhagavā vivekakāmo himavantaṃ pāvisi. Tāpaso bhagavantaṃ puṇṇacandamiva virocamānaṃ dūratova disvā pasannamānaso ajinacammaṃ aṃse katvā añjaliṃ paggayha vanditvā ṭhitakova dasanakhasamodhānañjaliṃ sirasi patiṭṭhapetvā anekāhi upamāhi anekehi thutivacanehi bhagavantaṃ thomesi. Taṃ sutvā bhagavā – ‘‘ayaṃ tāpaso anāgate gotamassa nāma bhagavato sāsane pabbajitvā vinaye tikhiṇapaññānaṃ aggo bhavissatī’’ti byākaraṇamadāsi. So yāvatāyukaṃ ṭhatvā aparihīnajjhāno brahmaloke nibbatti. Tato cuto devamanussesu saṃsaranto sampattiyo anubhavitvā imasmiṃ buddhuppāde kapilavatthunagare upālittherassa bhāgineyyo hutvā nibbatti. So kamena vuddhippatto mātulassa upālittherasa santike pabbajitvā kammaṭṭhānaṃ gahetvā vipassanaṃ vaḍḍhetvā nacirasseva arahā ahosi. So attano ācariyassa samīpe vasitattā vinayapañhe tikhiṇañāṇo ahosi. Atha bhagavā ‘‘etadaggaṃ, bhikkhave, mama sāvakānaṃ bhikkhūnaṃ vinayapañhe tikhiṇapaññānaṃ bhikkhūnaṃ yadidaṃ bhāgineyyupālī’’ti taṃ etadaggaṭṭhāne ṭhapesi.
১. সো এৰং এতদগ্গট্ঠানং পত্ৰা অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো খীণাসৰসহস্সেহীতিআদিমাহ। তত্থ আ সমন্ততো যাৰভৰগ্গা সৰন্তি পৰত্তন্তীতি আসৰা। কামাসৰাদযো চত্তারো আসৰা, তে খীণা সোসিতা ৰিসোসিতা ৰিদ্ধংসিতা যেহি তেতি খীণাসৰা, তেযেৰ সহস্সা খীণাসৰসহস্সা, তেহি খীণাসৰসহস্সেহি । পরেতো পরিৰুতো লোকনাযকো লোকস্স নিব্বানপাপনকো ৰিৰেকং অনুযুত্তো পটিসল্লিতুং একীভৰিতুং গচ্ছতেতি সম্বন্ধো।
1. So evaṃ etadaggaṭṭhānaṃ patvā attano pubbakammaṃ saritvā somanassajāto pubbacaritāpadānaṃ pakāsento khīṇāsavasahassehītiādimāha. Tattha ā samantato yāvabhavaggā savanti pavattantīti āsavā. Kāmāsavādayo cattāro āsavā, te khīṇā sositā visositā viddhaṃsitā yehi teti khīṇāsavā, teyeva sahassā khīṇāsavasahassā, tehi khīṇāsavasahassehi . Pareto parivuto lokanāyako lokassa nibbānapāpanako vivekaṃ anuyutto paṭisallituṃ ekībhavituṃ gacchateti sambandho.
২. অজিনেন নিৰত্থোহন্তি অহং অজিনমিগচম্মেন পটিচ্ছন্নো, অজিনচম্মৰসনোতি অত্থো। তিদণ্ডপরিধারকোতি কুণ্ডিকট্ঠপনত্থায তিদণ্ডং গহেত্ৰা ধারেন্তোতি অত্থো। ভিক্খুসঙ্ঘেন পরিব্যূল়্হং পরিৰারিতং লোকনাযকং অদ্দসন্তি সম্বন্ধো। সেসং পাকটমেৰাতি।
2.Ajinena nivatthohanti ahaṃ ajinamigacammena paṭicchanno, ajinacammavasanoti attho. Tidaṇḍaparidhārakoti kuṇḍikaṭṭhapanatthāya tidaṇḍaṃ gahetvā dhārentoti attho. Bhikkhusaṅghena paribyūḷhaṃ parivāritaṃ lokanāyakaṃ addasanti sambandho. Sesaṃ pākaṭamevāti.
ভাগিনেয্যুপালিত্থেরঅপদানৰণ্ণনা সমত্তা।
Bhāgineyyupālittheraapadānavaṇṇanā samattā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / অপদানপাল়ি • Apadānapāḷi / ১. ভাগিনেয্যুপালিত্থেরঅপদানং • 1. Bhāgineyyupālittheraapadānaṃ
