| Library / Tipiṭaka / తిపిటక • Tipiṭaka / విమతివినోదనీ-టీకా • Vimativinodanī-ṭīkā |
భజతివారవణ్ణనా
Bhajativāravaṇṇanā
౩౧౮. తదనన్తరవారే పన వివాదాధికరణం చతున్నం అధికరణానన్తిఆది అధికరణానం వుత్తనయేన అఞ్ఞమఞ్ఞపచ్చయత్తేపి సంసగ్గభావదస్సనత్థం వుత్తం. వివాదాధికరణం చతున్నం అధికరణానం వివాదాధికరణం భజతీతిఆదీసు వివాదాధికరణం చతూసు అధికరణేసు వివాదాధికరణభావమేవ భజతి, నాఞ్ఞాధికరణభావం, చతూసు అధికరణేసు వివాదాధికరణత్తమేవ నిస్సితం వివాదాధికరణమేవ పరియాపన్నం వివాదాధికరణభావేనేవ సఙ్గహితన్తి ఏవమత్థో గహేతబ్బో.
318. Tadanantaravāre pana vivādādhikaraṇaṃ catunnaṃ adhikaraṇānantiādi adhikaraṇānaṃ vuttanayena aññamaññapaccayattepi saṃsaggabhāvadassanatthaṃ vuttaṃ. Vivādādhikaraṇaṃ catunnaṃ adhikaraṇānaṃ vivādādhikaraṇaṃ bhajatītiādīsu vivādādhikaraṇaṃ catūsu adhikaraṇesu vivādādhikaraṇabhāvameva bhajati, nāññādhikaraṇabhāvaṃ, catūsu adhikaraṇesu vivādādhikaraṇattameva nissitaṃ vivādādhikaraṇameva pariyāpannaṃ vivādādhikaraṇabhāveneva saṅgahitanti evamattho gahetabbo.
౩౧౯. వివాదాధికరణం సత్తన్నం సమథానం కతి సమథే భజతీతిఆది పన చతున్నం అధికరణానం వూపసమనే సతి నియతసమథే దస్సేతుం వుత్తం. తత్థ కతి సమథే భజతీతి అత్తనో ఉపసమత్థాయ కిత్తకే సమథే ఉపగచ్ఛతి, కిత్తకే సమథే ఆగమ్మ వూపసమం గచ్ఛతీతి అత్థో. కతి సమథపరియాపన్నన్తి అత్తానం వూపసమేతుం కతిసు సమథేసు తేహి సమానవసేన పవిట్ఠం. కతిహి సమథేహి సఙ్గహితన్తి వూపసమం కరోన్తేహి కతిహి సమథేహి వూపసమకరణత్థం సఙ్గహితం.
319.Vivādādhikaraṇaṃ sattannaṃ samathānaṃ kati samathe bhajatītiādi pana catunnaṃ adhikaraṇānaṃ vūpasamane sati niyatasamathe dassetuṃ vuttaṃ. Tattha kati samathe bhajatīti attano upasamatthāya kittake samathe upagacchati, kittake samathe āgamma vūpasamaṃ gacchatīti attho. Kati samathapariyāpannanti attānaṃ vūpasametuṃ katisu samathesu tehi samānavasena paviṭṭhaṃ. Katihi samathehi saṅgahitanti vūpasamaṃ karontehi katihi samathehi vūpasamakaraṇatthaṃ saṅgahitaṃ.
భజతివారవణ్ణనా నిట్ఠితా.
Bhajativāravaṇṇanā niṭṭhitā.
Related texts:
తిపిటక (మూల) • Tipiṭaka (Mūla) / వినయపిటక • Vinayapiṭaka / పరివారపాళి • Parivārapāḷi / ౨౧. భజతివారో • 21. Bhajativāro
టీకా • Tīkā / వినయపిటక (టీకా) • Vinayapiṭaka (ṭīkā) / సారత్థదీపనీ-టీకా • Sāratthadīpanī-ṭīkā / భజతివారకథావణ్ణనా • Bhajativārakathāvaṇṇanā
టీకా • Tīkā / వినయపిటక (టీకా) • Vinayapiṭaka (ṭīkā) / వజిరబుద్ధి-టీకా • Vajirabuddhi-ṭīkā / సంసట్ఠవారాదివణ్ణనా • Saṃsaṭṭhavārādivaṇṇanā
