| Library / Tipiṭaka / តិបិដក • Tipiṭaka / ជាតកបាឡិ • Jātakapāḷi |
៥០៤. ភល្លាតិយជាតកំ (៨)
504. Bhallātiyajātakaṃ (8)
១៨៦.
186.
ភល្លាតិយោ 1 នាម អហោសិ រាជា, រដ្ឋំ បហាយ មិគវំ អចារិ សោ;
Bhallātiyo 2 nāma ahosi rājā, raṭṭhaṃ pahāya migavaṃ acāri so;
អគមា គិរិវរំ គន្ធមាទនំ, សុបុប្ផិតំ 3 កិម្បុរិសានុចិណ្ណំ។
Agamā girivaraṃ gandhamādanaṃ, supupphitaṃ 4 kimpurisānuciṇṇaṃ.
១៨៧.
187.
សាឡូរសង្ឃញ្ច និសេធយិត្វា, ធនុំ 5 កលាបញ្ច សោ និក្ខិបិត្វា;
Sāḷūrasaṅghañca nisedhayitvā, dhanuṃ 6 kalāpañca so nikkhipitvā;
ឧបាគមិ វចនំ វត្តុកាមោ, យត្ថដ្ឋិតា កិម្បុរិសា អហេសុំ។
Upāgami vacanaṃ vattukāmo, yatthaṭṭhitā kimpurisā ahesuṃ.
១៨៨.
188.
ហិមច្ចយេ ហេមវតាយ តីរេ, កិមិធដ្ឋិតា មន្តយវ្ហោ អភិណ្ហំ;
Himaccaye hemavatāya tīre, kimidhaṭṭhitā mantayavho abhiṇhaṃ;
បុច្ឆាមិ វោ មានុសទេហវណ្ណេ, កថំ នុ 7 ជានន្តិ មនុស្សលោកេ។
Pucchāmi vo mānusadehavaṇṇe, kathaṃ nu 8 jānanti manussaloke.
១៨៩.
189.
មល្លំ គិរិំ បណ្ឌរកំ តិកូដំ, សីតោទកា 9 អនុវិចរាម នជ្ជោ;
Mallaṃ giriṃ paṇḍarakaṃ tikūṭaṃ, sītodakā 10 anuvicarāma najjo;
មិគា មនុស្សាវ និភាសវណ្ណា, ជានន្តិ នោ កិម្បុរិសាតិ លុទ្ទ។
Migā manussāva nibhāsavaṇṇā, jānanti no kimpurisāti ludda.
១៩០.
190.
សុកិច្ឆរូបំ បរិទេវយវ្ហោ 11, អាលិង្គិតោ ចាសិ បិយោ បិយាយ;
Sukiccharūpaṃ paridevayavho 12, āliṅgito cāsi piyo piyāya;
បុច្ឆាមិ វោ មានុសទេហវណ្ណេ, កិមិធ វនេ រោទថ អប្បតីតា។
Pucchāmi vo mānusadehavaṇṇe, kimidha vane rodatha appatītā.
១៩១.
191.
សុកិច្ឆរូបំ បរិទេវយវ្ហោ, អាលិង្គិតោ ចាសិ បិយោ បិយាយ;
Sukiccharūpaṃ paridevayavho, āliṅgito cāsi piyo piyāya;
បុច្ឆាមិ វោ មានុសទេហវណ្ណេ, កិមិធ វនេ វិលបថ អប្បតីតា។
Pucchāmi vo mānusadehavaṇṇe, kimidha vane vilapatha appatītā.
១៩២.
192.
សុកិច្ឆរូបំ បរិទេវយវ្ហោ, អាលិង្គិតោ ចាសិ បិយោ បិយាយ;
Sukiccharūpaṃ paridevayavho, āliṅgito cāsi piyo piyāya;
បុច្ឆាមិ វោ មានុសទេហវណ្ណេ, កិមិធ វនេ សោចថ អប្បតីតា។
Pucchāmi vo mānusadehavaṇṇe, kimidha vane socatha appatītā.
១៩៣.
193.
មយេករត្តំ 13 វិប្បវសិម្ហ លុទ្ទ, អកាមកា អញ្ញមញ្ញំ សរន្តា;
Mayekarattaṃ 14 vippavasimha ludda, akāmakā aññamaññaṃ sarantā;
តមេករត្តំ អនុតប្បមានា, សោចាម ‘‘សា រត្តិ បុនំ ន ហេស្សតិ’’។
Tamekarattaṃ anutappamānā, socāma ‘‘sā ratti punaṃ na hessati’’.
១៩៤.
194.
យមេករត្តំ អនុតប្បថេតំ, ធនំ វ នដ្ឋំ បិតរំ វ បេតំ;
Yamekarattaṃ anutappathetaṃ, dhanaṃ va naṭṭhaṃ pitaraṃ va petaṃ;
បុច្ឆាមិ វោ មានុសទេហវណ្ណេ, កថំ វិនា វាសមកប្បយិត្ថ។
Pucchāmi vo mānusadehavaṇṇe, kathaṃ vinā vāsamakappayittha.
១៩៥.
195.
តំ មេ បិយោ ឧត្តរិ វស្សកាលេ, មមញ្ច មញ្ញំ អនុពន្ធតីតិ។
Taṃ me piyo uttari vassakāle, mamañca maññaṃ anubandhatīti.
១៩៦.
196.
អហញ្ច អង្កោលកមោចិនាមិ, អតិមុត្តកំ សត្តលិយោថិកញ្ច;
Ahañca aṅkolakamocināmi, atimuttakaṃ sattaliyothikañca;
‘‘បិយោ ច មេ ហេហិតិ មាលភារី, អហញ្ច នំ មាលិនី អជ្ឈុបេស្សំ’’។
‘‘Piyo ca me hehiti mālabhārī, ahañca naṃ mālinī ajjhupessaṃ’’.
១៩៧.
197.
អហញ្ចិទំ កុរវកមោចិនាមិ, ឧទ្ទាលកា បាដលិសិន្ធុវារកា 19;
Ahañcidaṃ kuravakamocināmi, uddālakā pāṭalisindhuvārakā 20;
‘‘បិយោ ច មេ ហេហិតិ មាលភារី, អហញ្ច នំ មាលិនី អជ្ឈុបេស្សំ’’។
‘‘Piyo ca me hehiti mālabhārī, ahañca naṃ mālinī ajjhupessaṃ’’.
១៩៨.
198.
អហញ្ច សាលស្ស សុបុប្ផិតស្ស, ឱចេយ្យ បុប្ផានិ ករោមិ មាលំ;
Ahañca sālassa supupphitassa, oceyya pupphāni karomi mālaṃ;
‘‘បិយោ ច មេ ហេហិតិ មាលភារី, អហញ្ច នំ មាលិនី អជ្ឈុបេស្សំ’’។
‘‘Piyo ca me hehiti mālabhārī, ahañca naṃ mālinī ajjhupessaṃ’’.
១៩៩.
199.
អហញ្ច សាលស្ស សុបុប្ផិតស្ស, ឱចេយ្យ បុប្ផានិ ករោមិ ភារំ;
Ahañca sālassa supupphitassa, oceyya pupphāni karomi bhāraṃ;
២០០.
200.
អហញ្ច ខោ អគឡុំ 25 ចន្ទនញ្ច, សិលាយ បិំសាមិ បមត្តរូបា;
Ahañca kho agaḷuṃ 26 candanañca, silāya piṃsāmi pamattarūpā;
‘‘បិយោ ច មេ ហេហិតិ រោសិតង្គោ, អហញ្ច នំ រោសិតា អជ្ឈុបេស្សំ’’។
‘‘Piyo ca me hehiti rositaṅgo, ahañca naṃ rositā ajjhupessaṃ’’.
២០១.
201.
អថាគមា សលិលំ សីឃសោតំ, នុទំ សាលេ សលឡេ កណ្ណិការេ;
Athāgamā salilaṃ sīghasotaṃ, nudaṃ sāle salaḷe kaṇṇikāre;
អាបូរថ 27 តេន មុហុត្តកេន, សាយំ នទី អាសិ មយា សុទុត្តរា។
Āpūratha 28 tena muhuttakena, sāyaṃ nadī āsi mayā suduttarā.
២០២.
202.
ឧភោសុ តីរេសុ មយំ តទា ឋិតា, សម្បស្សន្តា ឧភយោ អញ្ញមញ្ញំ;
Ubhosu tīresu mayaṃ tadā ṭhitā, sampassantā ubhayo aññamaññaṃ;
សកិម្បិ រោទាម សកិំ ហសាម, កិច្ឆេន នោ អាគមា 29 សំវរី សា។
Sakimpi rodāma sakiṃ hasāma, kicchena no āgamā 30 saṃvarī sā.
២០៣.
203.
បាតោវ 31 ខោ ឧគ្គតេ សូរិយម្ហិ, ចតុក្កំ នទិំ ឧត្តរិយាន លុទ្ទ;
Pātova 32 kho uggate sūriyamhi, catukkaṃ nadiṃ uttariyāna ludda;
អាលិង្គិយា អញ្ញមញ្ញំ មយំ ឧភោ, សកិម្បិ រោទាម សកិំ ហសាម។
Āliṅgiyā aññamaññaṃ mayaṃ ubho, sakimpi rodāma sakiṃ hasāma.
២០៤.
204.
តីហូនកំ សត្តសតានិ លុទ្ទ, យមិធ មយំ វិប្បវសិម្ហ បុព្ពេ;
Tīhūnakaṃ sattasatāni ludda, yamidha mayaṃ vippavasimha pubbe;
វស្សេកិមំ 33 ជីវិតំ ភូមិបាល, កោ នីធ កន្តាយ វិនា វសេយ្យ។
Vassekimaṃ 34 jīvitaṃ bhūmipāla, ko nīdha kantāya vinā vaseyya.
២០៥.
205.
អាយុញ្ច វោ កីវតកោ នុ សម្ម, សចេបិ ជានាថ វទេថ អាយុំ;
Āyuñca vo kīvatako nu samma, sacepi jānātha vadetha āyuṃ;
អនុស្សវា វុឌ្ឍតោ អាគមា វា, អក្ខាថ មេ តំ អវិកម្បមានា។
Anussavā vuḍḍhato āgamā vā, akkhātha me taṃ avikampamānā.
២០៦.
206.
អាយុញ្ច នោ វស្សសហស្សំ លុទ្ទ, ន ចន្តរា បាបកោ អត្ថិ រោគោ;
Āyuñca no vassasahassaṃ ludda, na cantarā pāpako atthi rogo;
អប្បញ្ច 35 ទុក្ខំ សុខមេវ ភិយ្យោ, អវីតរាគា វិជហាម ជីវិតំ។
Appañca 36 dukkhaṃ sukhameva bhiyyo, avītarāgā vijahāma jīvitaṃ.
២០៧.
207.
ឥទញ្ច សុត្វាន អមានុសានំ, ភល្លាតិយោ ឥត្តរ ជីវិតន្តិ;
Idañca sutvāna amānusānaṃ, bhallātiyo ittara jīvitanti;
និវត្តថ ន មិគវំ អចរិ, អទាសិ ទានានិ អភុញ្ជិ ភោគេ។
Nivattatha na migavaṃ acari, adāsi dānāni abhuñji bhoge.
២០៨.
208.
ឥទញ្ច សុត្វាន អមានុសានំ, សម្មោទថ មា កលហំ អកត្ថ;
Idañca sutvāna amānusānaṃ, sammodatha mā kalahaṃ akattha;
មា វោ តបី អត្តកម្មាបរាធោ, យថាបិ តេ កិម្បុរិសេករត្តំ។
Mā vo tapī attakammāparādho, yathāpi te kimpurisekarattaṃ.
២០៩.
209.
ឥទញ្ច សុត្វាន អមានុសានំ, សម្មោទថ មា វិវាទំ អកត្ថ;
Idañca sutvāna amānusānaṃ, sammodatha mā vivādaṃ akattha;
មា វោ តបី អត្តកម្មាបរាធោ, យថាបិ តេ កិម្បុរិសេករត្តំ។
Mā vo tapī attakammāparādho, yathāpi te kimpurisekarattaṃ.
២១០.
210.
វិវិធំ 37 អធិមនា សុណោមហំ, វចនបថំ តវ អត្ថសំហិតំ;
Vividhaṃ 38 adhimanā suṇomahaṃ, vacanapathaṃ tava atthasaṃhitaṃ;
មុញ្ចំ 39 គិរំ នុទសេវ មេ ទរំ, សមណ សុខាវហ ជីវ មេ ចិរន្តិ។
Muñcaṃ 40 giraṃ nudaseva me daraṃ, samaṇa sukhāvaha jīva me ciranti.
ភល្លាតិយជាតកំ អដ្ឋមំ។
Bhallātiyajātakaṃ aṭṭhamaṃ.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / ជាតក-អដ្ឋកថា • Jātaka-aṭṭhakathā / [៥០៤] ៨. ភល្លាតិយជាតកវណ្ណនា • [504] 8. Bhallātiyajātakavaṇṇanā
