| Library / Tipiṭaka / д̇ибидага • Tipiṭaka / ж̇аад̇ага-адтагат̇аа • Jātaka-aṭṭhakathā |
[504] 8. бхаллаад̇ияаж̇аад̇агаван̣н̣анаа
[504] 8. Bhallātiyajātakavaṇṇanā
бхаллаад̇ияо наама ахоси рааж̇аад̇и ид̣̇ам̣ сад̇т̇аа ж̇зд̇аванз вихаранд̇о маллигам̣ д̣̇звим̣ аараб̣бха гат̇зси. д̇ассаа гира згад̣̇ивасам̣ ран̃н̃аа сад̣̇д̇хим̣ саяанам̣ ниссааяа галахо ахоси. рааж̇аа гуж̇жхид̇ваа нам̣ на ологзси. саа жинд̇зси ‘‘нану д̇ат̇ааг̇ад̇о ран̃н̃о маяи гуд̣̇д̇хабхаавам̣ на ж̇аанаад̇ий’’д̇и. сад̇т̇аа д̇ам̣ гааран̣ам̣ н̃ад̇ваа бунад̣̇ивасз бхигкусан̇гхабаривуд̇о саавад̇т̇им̣ бин̣д̣ааяа бависид̇ваа ран̃н̃о г̇зхад̣̇ваарам̣ г̇ад̇о. рааж̇аа бажжуг̇г̇анд̇ваа бад̇д̇ам̣ г̇ахзд̇ваа сад̇т̇аарам̣ баасаад̣̇ам̣ ааробзд̇ваа бадибаадияаа бхигкусан̇гхам̣ нисийд̣̇аабзд̇ваа д̣̇агкин̣од̣̇агам̣ д̣̇ад̇ваа бан̣ийд̇знаахаарзна баривисид̇ваа бхад̇д̇агижжаавасаанз згаманд̇ам̣ нисийд̣̇и. сад̇т̇аа ‘‘гим̣ ну ко, махаарааж̇а, маллигаа на бан̃н̃ааяад̇ий’’д̇и бужчид̇ваа ‘‘ад̇д̇ано сукамад̣̇амад̇д̇ад̇ааяаа’’д̇и вуд̇д̇з ‘‘нану, махаарааж̇а, д̇вам̣ буб̣б̣з гиннараяонияам̣ ниб̣б̣ад̇д̇ид̇ваа згарад̇д̇им̣ гиннарияаа винаа худ̇ваа сад̇д̇а вассасад̇аани барид̣̇звамаано вижарий’’д̇и вад̇ваа д̇зна яаажид̇о ад̇ийд̇ам̣ аахари.
Bhallātiyonāma ahosi rājāti idaṃ satthā jetavane viharanto mallikaṃ deviṃ ārabbha kathesi. Tassā kira ekadivasaṃ raññā saddhiṃ sayanaṃ nissāya kalaho ahosi. Rājā kujjhitvā naṃ na olokesi. Sā cintesi ‘‘nanu tathāgato rañño mayi kuddhabhāvaṃ na jānātī’’ti. Satthā taṃ kāraṇaṃ ñatvā punadivase bhikkhusaṅghaparivuto sāvatthiṃ piṇḍāya pavisitvā rañño gehadvāraṃ gato. Rājā paccuggantvā pattaṃ gahetvā satthāraṃ pāsādaṃ āropetvā paṭipāṭiyā bhikkhusaṅghaṃ nisīdāpetvā dakkhiṇodakaṃ datvā paṇītenāhārena parivisitvā bhattakiccāvasāne ekamantaṃ nisīdi. Satthā ‘‘kiṃ nu kho, mahārāja, mallikā na paññāyatī’’ti pucchitvā ‘‘attano sukhamadamattatāyā’’ti vutte ‘‘nanu, mahārāja, tvaṃ pubbe kinnarayoniyaṃ nibbattitvā ekarattiṃ kinnariyā vinā hutvā satta vassasatāni paridevamāno vicarī’’ti vatvā tena yācito atītaṃ āhari.
ад̇ийд̇з б̣аараан̣асияам̣ бхаллаад̇ияо наама рааж̇аа раж̇ж̇ам̣ гаарзнд̇о ‘‘ан̇г̇аарабаггамиг̇амам̣сам̣ каад̣̇иссаамий’’д̇и раж̇ж̇ам̣ амажжаанам̣ нияяаад̣̇зд̇ваа саннад̣̇д̇хабан̃жаавуд̇хо сусигкид̇аголзяяагасун̣акаг̇ан̣абаривуд̇о наг̇араа нигкамид̇ваа химаванд̇ам̣ бависид̇ваа ануг̇ан̇г̇ам̣ г̇анд̇ваа убари абхирухид̇ум̣ асаггонд̇о згам̣ г̇ан̇г̇ам̣ од̇ин̣н̣анад̣̇им̣ д̣̇исваа д̇ад̣̇анусаарзна г̇ажчанд̇о миг̇асуугараад̣̇аяо вад̇хид̇ваа ан̇г̇аарабаггамам̣сам̣ каад̣̇анд̇о ужжадтаанам̣ абхирухи. д̇ад̇т̇а раман̣ийяаа над̣̇игаа барибун̣н̣агаалз т̇анабамаан̣од̣̇агаа худ̇ваа санд̣̇ад̇и, ан̃н̃ад̣̇аа ж̇ан̣н̣угабамаан̣од̣̇агаа ход̇и. д̇ад̇т̇а наанаббагаарагаа мажчагажчабаа вижаранд̇и. уд̣̇агабарияанд̇з раж̇ад̇абаддаван̣н̣аваалугаа убхосу д̇ийрзсу наанаабубпапалабхарид̇авинамид̇аа ругкаа бубпапаларасамад̇д̇зхи наанаавихан̇г̇амабхамараг̇ан̣зхи самбаригин̣н̣аа вивид̇хамиг̇асан̇гханисзвид̇аа сийд̇ажчааяаа. звам̣ раман̣ийяааяа хзмавад̇анад̣̇ияаа д̇ийрз д̣̇вз гиннараа ан̃н̃аман̃н̃ам̣ аалин̇г̇ид̇ваа барижумб̣ид̇ваа наанаббагаарзхи барид̣̇званд̇аа род̣̇анд̇и.
Atīte bārāṇasiyaṃ bhallātiyo nāma rājā rajjaṃ kārento ‘‘aṅgārapakkamigamaṃsaṃ khādissāmī’’ti rajjaṃ amaccānaṃ niyyādetvā sannaddhapañcāvudho susikkhitakoleyyakasuṇakhagaṇaparivuto nagarā nikkhamitvā himavantaṃ pavisitvā anugaṅgaṃ gantvā upari abhiruhituṃ asakkonto ekaṃ gaṅgaṃ otiṇṇanadiṃ disvā tadanusārena gacchanto migasūkarādayo vadhitvā aṅgārapakkamaṃsaṃ khādanto uccaṭṭhānaṃ abhiruhi. Tattha ramaṇīyā nadikā paripuṇṇakāle thanapamāṇodakā hutvā sandati, aññadā jaṇṇukapamāṇodakā hoti. Tattha nānappakārakā macchakacchapā vicaranti. Udakapariyante rajatapaṭṭavaṇṇavālukā ubhosu tīresu nānāpupphaphalabharitavinamitā rukkhā pupphaphalarasamattehi nānāvihaṅgamabhamaragaṇehi samparikiṇṇā vividhamigasaṅghanisevitā sītacchāyā. Evaṃ ramaṇīyāya hemavatanadiyā tīre dve kinnarā aññamaññaṃ āliṅgitvā paricumbitvā nānappakārehi paridevantā rodanti.
рааж̇аа д̇ассаа над̣̇ияаа д̇ийрзна г̇анд̇хамаад̣̇анам̣ абхируханд̇о д̇з гиннарз д̣̇исваа ‘‘гим̣ ну ко зд̇з звам̣ барид̣̇званд̇и, бужчиссаами нз’’д̇и жинд̇зд̇ваа сунакз ологзд̇ваа ажчарам̣ бахари. сусигкид̇аголзяяагасунакаа д̇ааяа сан̃н̃ааяа г̇умб̣ам̣ бависид̇ваа урзна нибаж̇ж̇им̣су. со д̇зсам̣ бадисаллийнабхаавам̣ н̃ад̇ваа д̇ханугалаабан̃жзва сзсаавуд̇хаани жа ругкам̣ ниссааяа табзд̇ваа бад̣̇асад̣̇д̣̇ам̣ агаронд̇о сан̣игам̣ д̇зсам̣ санд̇игам̣ г̇анд̇ваа ‘‘гим̣гааран̣аа д̇умхз род̣̇ат̇аа’’д̇и гиннарз бужчи. д̇амад̇т̇ам̣ багаасзнд̇о сад̇т̇аа д̇иссо г̇аат̇аа абхааси –
Rājā tassā nadiyā tīrena gandhamādanaṃ abhiruhanto te kinnare disvā ‘‘kiṃ nu kho ete evaṃ paridevanti, pucchissāmi ne’’ti cintetvā sunakhe oloketvā accharaṃ pahari. Susikkhitakoleyyakasunakhā tāya saññāya gumbaṃ pavisitvā urena nipajjiṃsu. So tesaṃ paṭisallīnabhāvaṃ ñatvā dhanukalāpañceva sesāvudhāni ca rukkhaṃ nissāya ṭhapetvā padasaddaṃ akaronto saṇikaṃ tesaṃ santikaṃ gantvā ‘‘kiṃkāraṇā tumhe rodathā’’ti kinnare pucchi. Tamatthaṃ pakāsento satthā tisso gāthā abhāsi –
186.
186.
‘‘бхаллаад̇ияо наама ахоси рааж̇аа, радтам̣ бахааяа миг̇авам̣ ажаари со;
‘‘Bhallātiyo nāma ahosi rājā, raṭṭhaṃ pahāya migavaṃ acāri so;
аг̇амаа г̇ириварам̣ г̇анд̇хамаад̣̇анам̣, субубпид̇ам̣ гимбурисаанужин̣н̣ам̣.
Agamā girivaraṃ gandhamādanaṃ, supupphitaṃ kimpurisānuciṇṇaṃ.
187.
187.
‘‘саал̣уурасан̇гхан̃жа нисзд̇хаяид̇ваа, д̇ханум̣ галаабан̃жа со нигкибид̇ваа;
‘‘Sāḷūrasaṅghañca nisedhayitvā, dhanuṃ kalāpañca so nikkhipitvā;
убааг̇ами важанам̣ вад̇д̇угаамо, яад̇т̇адтид̇аа гимбурисаа ахзсум̣.
Upāgami vacanaṃ vattukāmo, yatthaṭṭhitā kimpurisā ahesuṃ.
188.
188.
‘‘химажжаяз хзмавад̇ааяа д̇ийрз, гимид̇хадтид̇аа манд̇аяавхо абхин̣хам̣;
‘‘Himaccaye hemavatāya tīre, kimidhaṭṭhitā mantayavho abhiṇhaṃ;
бужчаами во маанусад̣̇зхаван̣н̣з, гат̇ам̣ во ж̇аананд̇и мануссалогз’’д̇и.
Pucchāmi vo mānusadehavaṇṇe, kathaṃ vo jānanti manussaloke’’ti.
д̇ад̇т̇а саал̣уурасан̇гханд̇и сунакаг̇ан̣ам̣. химажжаязд̇и жад̇уннам̣ хзманд̇амаасаанам̣ ад̇иггамз. хзмавад̇ааяаад̇и имиссаа хзмавад̇ааяа над̣̇ияаа д̇ийрз.
Tattha sāḷūrasaṅghanti sunakhagaṇaṃ. Himaccayeti catunnaṃ hemantamāsānaṃ atikkame. Hemavatāyāti imissā hemavatāya nadiyā tīre.
ран̃н̃о важанам̣ суд̇ваа гиннаро д̇ун̣хий ахоси, гиннарий бана ран̃н̃аа сад̣̇д̇хим̣ саллаби –
Rañño vacanaṃ sutvā kinnaro tuṇhī ahosi, kinnarī pana raññā saddhiṃ sallapi –
189.
189.
‘‘маллам̣ г̇ирим̣ бан̣д̣арагам̣ д̇игуудам̣, сийд̇од̣̇агаа анувижараама наж̇ж̇о;
‘‘Mallaṃ giriṃ paṇḍarakaṃ tikūṭaṃ, sītodakā anuvicarāma najjo;
миг̇аа мануссаава нибхаасаван̣н̣аа, ж̇аананд̇и но гимбурисаад̇и луд̣̇д̣̇аа’’д̇и.
Migā manussāva nibhāsavaṇṇā, jānanti no kimpurisāti luddā’’ti.
д̇ад̇т̇а маллам̣ г̇иринд̇и самма луд̣̇д̣̇ага, маяам̣ имам̣ маллаг̇ирин̃жа бан̣д̣араган̃жа д̇игуудан̃жа имаа жа наж̇ж̇о анувижараама. ‘‘маалааг̇ири’’нд̇иби баато. нибхаасаван̣н̣аад̇и нибхаасамаанаван̣н̣аа, д̣̇иссамаанасарийраад̇и ад̇т̇о.
Tattha mallaṃ girinti samma luddaka, mayaṃ imaṃ mallagiriñca paṇḍarakañca tikūṭañca imā ca najjo anuvicarāma. ‘‘Mālāgiri’’ntipi pāṭho. Nibhāsavaṇṇāti nibhāsamānavaṇṇā, dissamānasarīrāti attho.
д̇ад̇о рааж̇аа д̇иссо г̇аат̇аа абхааси –
Tato rājā tisso gāthā abhāsi –
190.
190.
‘‘сугижчаруубам̣ барид̣̇зваяавхо, аалин̇г̇ид̇о жааси бияо бияааяа;
‘‘Sukiccharūpaṃ paridevayavho, āliṅgito cāsi piyo piyāya;
бужчаами во маанусад̣̇зхаван̣н̣з, гимид̇ха ванз род̣̇ат̇а аббад̇ийд̇аа.
Pucchāmi vo mānusadehavaṇṇe, kimidha vane rodatha appatītā.
191.
191.
‘‘сугижчаруубам̣ барид̣̇зваяавхо, аалин̇г̇ид̇о жааси бияо бияааяа;
‘‘Sukiccharūpaṃ paridevayavho, āliṅgito cāsi piyo piyāya;
бужчаами во маанусад̣̇зхаван̣н̣з, гимид̇ха ванз вилабат̇а аббад̇ийд̇аа.
Pucchāmi vo mānusadehavaṇṇe, kimidha vane vilapatha appatītā.
192.
192.
‘‘сугижчаруубам̣ барид̣̇зваяавхо, аалин̇г̇ид̇о жааси бияо бияааяа;
‘‘Sukiccharūpaṃ paridevayavho, āliṅgito cāsi piyo piyāya;
бужчаами во маанусад̣̇зхаван̣н̣з, гимид̇ха ванз сожат̇а аббад̇ийд̇аа’’д̇и.
Pucchāmi vo mānusadehavaṇṇe, kimidha vane socatha appatītā’’ti.
д̇ад̇т̇а сугижчаруубанд̇и судту д̣̇угкаббад̇д̇аа вияа худ̇ваа. аалин̇г̇ид̇о жааси бияо бияааяаад̇и д̇аяаа бияааяа д̇ава бияо аалин̇г̇ид̇о жа ааси. ‘‘аалин̇г̇ияо жаасий’’д̇иби баато, аяамзвад̇т̇о. гимид̇ха ванзд̇и гим̣гааран̣аа ид̇ха ванз анд̇аранд̇араа аалин̇г̇ид̇ваа барижумб̣ид̇ваа бияагат̇ам̣ гат̇зд̇ваа буна аббад̇ийд̇аа род̣̇ат̇аад̇и.
Tattha sukiccharūpanti suṭṭhu dukkhappattā viya hutvā. Āliṅgito cāsi piyo piyāyāti tayā piyāya tava piyo āliṅgito ca āsi. ‘‘Āliṅgiyo cāsī’’tipi pāṭho, ayamevattho. Kimidha vaneti kiṃkāraṇā idha vane antarantarā āliṅgitvā paricumbitvā piyakathaṃ kathetvā puna appatītā rodathāti.
д̇ад̇о бараа убхиннамби аалаабасаллаабаг̇аат̇аа хонд̇и –
Tato parā ubhinnampi ālāpasallāpagāthā honti –
193.
193.
‘‘маязгарад̇д̇ам̣ виббавасимха луд̣̇д̣̇а, агаамагаа ан̃н̃аман̃н̃ам̣ саранд̇аа;
‘‘Mayekarattaṃ vippavasimha ludda, akāmakā aññamaññaṃ sarantā;
д̇амзгарад̇д̇ам̣ ануд̇аббамаанаа, сожаама ‘саа рад̇д̇и бунам̣ на хоссад̇и’.
Tamekarattaṃ anutappamānā, socāma ‘sā ratti punaṃ na hossati’.
194.
194.
‘‘яамзгарад̇д̇ам̣ ануд̇аббат̇зд̇ам̣, д̇ханам̣ва надтам̣ бид̇арам̣ва бзд̇ам̣;
‘‘Yamekarattaṃ anutappathetaṃ, dhanaṃva naṭṭhaṃ pitaraṃva petaṃ;
бужчаами во маанусад̣̇зхаван̣н̣з, гат̇ам̣ винаа ваасамагаббаяид̇т̇а.
Pucchāmi vo mānusadehavaṇṇe, kathaṃ vinā vāsamakappayittha.
195.
195.
‘‘яамимам̣ над̣̇им̣ бассаси сийгхасод̇ам̣, наанаад̣̇умажчаад̣̇анам̣ сзлагуулам̣;
‘‘Yamimaṃ nadiṃ passasi sīghasotaṃ, nānādumacchādanaṃ selakūlaṃ;
д̇ам̣ мз бияо уд̇д̇ари вассагаалз, маман̃жа ман̃н̃ам̣ ануб̣анд̇хад̇ийд̇и.
Taṃ me piyo uttari vassakāle, mamañca maññaṃ anubandhatīti.
196.
196.
‘‘ахан̃жа ан̇голагаможинаами, ад̇имуд̇д̇агам̣ сад̇д̇алияот̇иган̃жа;
‘‘Ahañca aṅkolakamocināmi, atimuttakaṃ sattaliyothikañca;
‘бияо жа мз хзхид̇и маалабхаарий, ахан̃жа нам̣ маалиний аж̇жхубзссам̣’.
‘Piyo ca me hehiti mālabhārī, ahañca naṃ mālinī ajjhupessaṃ’.
197.
197.
‘‘ахан̃жид̣̇ам̣ гуравагаможинаами, уд̣̇д̣̇аалагаа баадалисинд̇хуваарагаа;
‘‘Ahañcidaṃ kuravakamocināmi, uddālakā pāṭalisindhuvārakā;
‘бияо жа мз хзхид̇и маалабхаарий, ахан̃жа нам̣ маалиний аж̇жхубзссам̣’.
‘Piyo ca me hehiti mālabhārī, ahañca naṃ mālinī ajjhupessaṃ’.
198.
198.
‘‘ахан̃жа сааласса субубпид̇асса, ожзяяа бубпаани гароми маалам̣;
‘‘Ahañca sālassa supupphitassa, oceyya pupphāni karomi mālaṃ;
‘бияо жа мз хзхид̇и маалабхаарий, ахан̃жа нам̣ маалиний аж̇жхубзссам̣’.
‘Piyo ca me hehiti mālabhārī, ahañca naṃ mālinī ajjhupessaṃ’.
199.
199.
‘‘ахан̃жа сааласса субубпид̇асса, ожзяяа бубпаани гароми бхаарам̣;
‘‘Ahañca sālassa supupphitassa, oceyya pupphāni karomi bhāraṃ;
ид̣̇ан̃жа но хзхид̇и сант̇арад̇т̇ам̣, яад̇т̇аж̇ж̇имам̣ вихариссаама рад̇д̇им̣.
Idañca no hehiti santharatthaṃ, yatthajjimaṃ viharissāma rattiṃ.
200.
200.
‘‘ахан̃жа ко аг̇ал̣ум̣ жанд̣̇анан̃жа, силааяа бим̣саами бамад̇д̇аруубаа;
‘‘Ahañca kho agaḷuṃ candanañca, silāya piṃsāmi pamattarūpā;
‘бияо жа мз хзхид̇и росид̇ан̇г̇о, ахан̃жа нам̣ росид̇аа аж̇жхубзссам̣’.
‘Piyo ca me hehiti rositaṅgo, ahañca naṃ rositā ajjhupessaṃ’.
201.
201.
‘‘ат̇ааг̇амаа салилам̣ сийгхасод̇ам̣, нуд̣̇ам̣ саалз салал̣з ган̣н̣игаарз;
‘‘Athāgamā salilaṃ sīghasotaṃ, nudaṃ sāle salaḷe kaṇṇikāre;
аабуурат̇а д̇зна мухуд̇д̇агзна, сааяам̣ над̣̇ий ааси маяаа суд̣̇уд̇д̇араа.
Āpūratha tena muhuttakena, sāyaṃ nadī āsi mayā suduttarā.
202.
202.
‘‘убхосу д̇ийрзсу маяам̣ д̇ад̣̇аа тид̇аа, самбассанд̇аа убхаяо ан̃н̃аман̃н̃ам̣;
‘‘Ubhosu tīresu mayaṃ tadā ṭhitā, sampassantā ubhayo aññamaññaṃ;
сагимби род̣̇аама сагим̣ хасаама, гижчзна но ааг̇амаа сам̣варий саа.
Sakimpi rodāma sakiṃ hasāma, kicchena no āgamā saṃvarī sā.
203.
203.
‘‘баад̇ова ко уг̇г̇ад̇з суурияамхи, жад̇уггам̣ над̣̇им̣ уд̇д̇арияаана луд̣̇д̣̇а;
‘‘Pātova kho uggate sūriyamhi, catukkaṃ nadiṃ uttariyāna ludda;
аалин̇г̇ияаа ан̃н̃аман̃н̃ам̣ маяам̣ убхо, сагимби род̣̇аама сагим̣ хасаама.
Āliṅgiyā aññamaññaṃ mayaṃ ubho, sakimpi rodāma sakiṃ hasāma.
204.
204.
‘‘д̇ийхуунагам̣ сад̇д̇а сад̇аани луд̣̇д̣̇а, яамид̇ха маяам̣ виббавасимха буб̣б̣з;
‘‘Tīhūnakaṃ satta satāni ludda, yamidha mayaṃ vippavasimha pubbe;
вассзгимам̣ ж̇ийвид̇ам̣ бхуумибаала, го нийд̇ха ганд̇ааяа винаа васзяяа.
Vassekimaṃ jīvitaṃ bhūmipāla, ko nīdha kantāya vinā vaseyya.
205.
205.
‘‘ааяун̃жа во гийвад̇аго ну самма, сажзби ж̇аанаат̇а вад̣̇зт̇а ааяум̣;
‘‘Āyuñca vo kīvatako nu samma, sacepi jānātha vadetha āyuṃ;
ануссаваа вуд̣дхад̇о ааг̇амаа ваа, агкаат̇а мзд̇ам̣ авигамбамаанаа.
Anussavā vuḍḍhato āgamā vā, akkhātha metaṃ avikampamānā.
206.
206.
‘‘ааяун̃жа но вассасахассам̣ луд̣̇д̣̇а, на жанд̇араа баабаго ад̇т̇и рог̇о;
‘‘Āyuñca no vassasahassaṃ ludda, na cantarā pāpako atthi rogo;
аббан̃жа д̣̇угкам̣ сукамзва бхияяо, авийд̇арааг̇аа виж̇ахаама ж̇ийвид̇а’’нд̇и.
Appañca dukkhaṃ sukhameva bhiyyo, avītarāgā vijahāma jīvita’’nti.
д̇ад̇т̇а маязгарад̇д̇анд̇и маяам̣ згарад̇д̇ам̣. виббавасимхаад̇и виббаяуд̇д̇аа худ̇ваа васимха. ануд̇аббамаанаад̇и ‘‘анижчамаанаанам̣ но згарад̇д̇о ад̇ийд̇о’’д̇и д̇ам̣ згарад̇д̇ам̣ анужинд̇аяамаанаа. бунам̣ на хзссад̇ийд̇и буна на бхависсад̇и нааг̇амиссад̇ийд̇и сожаама. д̇ханам̣ва надтам̣ бид̇арам̣ва бзд̇анд̇и д̇ханам̣ ваа надтам̣ бид̇арам̣ ваа маад̇арам̣ ваабзд̇ам̣ гаалагад̇ам̣ гим̣ ну ко д̇умхз жинд̇аяамаанаа гзна гааран̣зна д̇ам̣ згарад̇д̇ам̣ винаа ваасам̣ агаббаяид̇т̇а, ид̣̇ам̣ мз аажигкат̇аад̇и бужчад̇и. яамиманд̇и яам̣ имам̣. сзлагууланд̇и д̣̇виннам̣ сзлаанам̣ анд̇арз санд̣̇амаанам̣. вассагаалзд̇и згасса мзгхасса удтааяа вассанагаалз . амхааган̃хи имасмим̣ ванасан̣д̣з рад̇ивасзна жаранд̇аанам̣ зго мзгхо удтахи. ат̇а мз бияасаамиго гиннаромам̣ ‘‘бажчад̇о ааг̇ажчад̇ий’’д̇и ман̃н̃амаано зд̇ам̣ над̣̇им̣ уд̇д̇арийд̇и ааха.
Tattha mayekarattanti mayaṃ ekarattaṃ. Vippavasimhāti vippayuttā hutvā vasimha. Anutappamānāti ‘‘anicchamānānaṃ no ekaratto atīto’’ti taṃ ekarattaṃ anucintayamānā. Punaṃ na hessatīti puna na bhavissati nāgamissatīti socāma. Dhanaṃva naṭṭhaṃ pitaraṃva petanti dhanaṃ vā naṭṭhaṃ pitaraṃ vā mātaraṃ vāpetaṃ kālakataṃ kiṃ nu kho tumhe cintayamānā kena kāraṇena taṃ ekarattaṃ vinā vāsaṃ akappayittha, idaṃ me ācikkhathāti pucchati. Yamimanti yaṃ imaṃ. Selakūlanti dvinnaṃ selānaṃ antare sandamānaṃ. Vassakāleti ekassa meghassa uṭṭhāya vassanakāle . Amhākañhi imasmiṃ vanasaṇḍe rativasena carantānaṃ eko megho uṭṭhahi. Atha me piyasāmiko kinnaromaṃ ‘‘pacchato āgacchatī’’ti maññamāno etaṃ nadiṃ uttarīti āha.
ахан̃жаад̇и ахам̣ банзд̇асса барад̇ийрам̣ г̇ад̇абхаавам̣ аж̇аананд̇ий субубпид̇аани ан̇голагаад̣̇ийни бубпаани ожинаами. д̇ад̇т̇а сад̇д̇алияот̇иган̃жаад̇и гунд̣̇аалабубпан̃жа суван̣н̣аяот̇иган̃жа ожинанд̇ий бана ‘‘бияо жа мз маалабхаарий бхависсад̇и, ахан̃жа нам̣ маалиний худ̇ваа аж̇жхубзсса’’нд̇и иминаа гааран̣зна ожинаами. уд̣̇д̣̇аалагаа баадалисинд̇хуваарагаад̇и д̇зби маяаа ожид̇ааязваад̇и вад̣̇ад̇и. ожзяяаад̇и ожинид̇ваа. аг̇ал̣ум̣ жанд̣̇анан̃жаад̇и гаал̣ааг̇ал̣ун̃жа рад̇д̇ажанд̣̇анан̃жа. росид̇ан̇г̇од̇и вилид̇д̇асарийро. росид̇аад̇и вилид̇д̇аа худ̇ваа. аж̇жхубзссанд̇и саяанз убаг̇амиссаами. нуд̣̇ам̣ саалз салал̣з ган̣н̣игаарзд̇и зд̇аани маяаа ожинид̇ваа д̇ийрз табид̇аани бубпаани нуд̣̇анд̇ам̣ харанд̇ам̣. суд̣̇уд̇д̇араад̇и д̇ассаа хи оримад̇ийрз тид̇агаалзязва над̣̇ияаа уд̣̇агам̣ ааг̇ад̇ам̣, д̇ан̇кан̣ан̃н̃зва суурияо ад̇т̇ан̇г̇ад̇о, виж̇ж̇улад̇аа нижчаранд̇и, гиннараа наама уд̣̇агабхийругаа хонд̇и, ид̇и саа од̇арид̇ум̣ на висахи. д̇знааха ‘‘сааяам̣ над̣̇ий ааси маяаа суд̣̇уд̇д̇араа’’д̇и.
Ahañcāti ahaṃ panetassa paratīraṃ gatabhāvaṃ ajānantī supupphitāni aṅkolakādīni pupphāni ocināmi. Tattha sattaliyothikañcāti kundālapupphañca suvaṇṇayothikañca ocinantī pana ‘‘piyo ca me mālabhārī bhavissati, ahañca naṃ mālinī hutvā ajjhupessa’’nti iminā kāraṇena ocināmi. Uddālakā pāṭalisindhuvārakāti tepi mayā ocitāyevāti vadati. Oceyyāti ocinitvā. Agaḷuṃ candanañcāti kāḷāgaḷuñca rattacandanañca. Rositaṅgoti vilittasarīro. Rositāti vilittā hutvā. Ajjhupessanti sayane upagamissāmi. Nudaṃ sāle salaḷe kaṇṇikāreti etāni mayā ocinitvā tīre ṭhapitāni pupphāni nudantaṃ harantaṃ. Suduttarāti tassā hi orimatīre ṭhitakāleyeva nadiyā udakaṃ āgataṃ, taṅkhaṇaññeva sūriyo atthaṅgato, vijjulatā niccharanti, kinnarā nāma udakabhīrukā honti, iti sā otarituṃ na visahi. Tenāha ‘‘sāyaṃ nadī āsi mayā suduttarā’’ti.
самбассанд̇аад̇и виж̇ж̇улад̇аанижчаран̣агаалз бассанд̇аа. род̣̇аамаад̇и анд̇хагаарагаалз абассанд̇аа род̣̇аама, виж̇ж̇улад̇аанижчаран̣агаалз бассанд̇аа хасаама. сам̣варийд̇и рад̇д̇и. жад̇угганд̇и д̇ужчам̣. уд̇д̇арияаанаад̇и уд̇д̇арид̇ваа. д̇ийхуунаганд̇и д̇ийхи уунаани сад̇д̇а вассасад̇аани. яамид̇ха маяанд̇и яам̣ гаалам̣ ид̇ха маяам̣ виббавасимха, со ид̇о д̇ийхи уунагаани сад̇д̇а вассасад̇аани хонд̇ийд̇и вад̣̇ад̇и. вассзгиманд̇и вассам̣ згам̣ имам̣, д̇умхаагам̣ згамзва вассасад̇ам̣ имам̣ ж̇ийвид̇анд̇и вад̣̇ад̇и. го нийд̇хаад̇и звам̣ барид̇д̇агз ж̇ийвид̇з го ну ид̇ха ганд̇ааяа винаа бхавзяяа, аяуд̇д̇ам̣ д̇ава бияабхарияааяа винаа бхавид̇унд̇и д̣̇ийбзд̇и.
Sampassantāti vijjulatāniccharaṇakāle passantā. Rodāmāti andhakārakāle apassantā rodāma, vijjulatāniccharaṇakāle passantā hasāma. Saṃvarīti ratti. Catukkanti tucchaṃ. Uttariyānāti uttaritvā. Tīhūnakanti tīhi ūnāni satta vassasatāni. Yamidha mayanti yaṃ kālaṃ idha mayaṃ vippavasimha, so ito tīhi ūnakāni satta vassasatāni hontīti vadati. Vassekimanti vassaṃ ekaṃ imaṃ, tumhākaṃ ekameva vassasataṃ imaṃ jīvitanti vadati. Ko nīdhāti evaṃ parittake jīvite ko nu idha kantāya vinā bhaveyya, ayuttaṃ tava piyabhariyāya vinā bhavitunti dīpeti.
гийвад̇аго нууд̇и рааж̇аа гиннарияаа важанам̣ суд̇ваа ‘‘имзсам̣ ааяуббамаан̣ам̣ бужчиссаамий’’д̇и жинд̇зд̇ваа ‘‘д̇умхаагам̣ гид̇д̇аго ааяуу’’д̇и бужчад̇и. ануссаваад̇и сажз во гассажи вад̣̇анд̇асса ваа суд̇ам̣, маад̇аабид̇уунам̣ ваа вуд̣дхаанам̣ махаллагаанам̣ санд̇игаа ааг̇амо ад̇т̇и, ат̇а мз д̇ад̇о ануссаваа вуд̣дхад̇о ааг̇амаа ваа зд̇ам̣ авигамбамаанаа агкаат̇а. на жанд̇араад̇и амхаагам̣ вассасахассам̣ ааяу, анд̇араа жа но баабаго ж̇ийвид̇анд̇арааяагаро рог̇оби над̇т̇и. авийд̇арааг̇аад̇и ан̃н̃аман̃н̃ам̣ авиг̇ад̇абзмаава худ̇ваа.
Kīvatako nūti rājā kinnariyā vacanaṃ sutvā ‘‘imesaṃ āyuppamāṇaṃ pucchissāmī’’ti cintetvā ‘‘tumhākaṃ kittako āyū’’ti pucchati. Anussavāti sace vo kassaci vadantassa vā sutaṃ, mātāpitūnaṃ vā vuḍḍhānaṃ mahallakānaṃ santikā āgamo atthi, atha me tato anussavā vuḍḍhato āgamā vā etaṃ avikampamānā akkhātha. Na cantarāti amhākaṃ vassasahassaṃ āyu, antarā ca no pāpako jīvitantarāyakaro rogopi natthi. Avītarāgāti aññamaññaṃ avigatapemāva hutvā.
д̇ам̣ суд̇ваа рааж̇аа ‘‘имз хи наама д̇иражчаанаг̇ад̇аа худ̇ваа згарад̇д̇им̣ виббаяог̇зна сад̇д̇а вассасад̇аани род̣̇анд̇аа вижаранд̇и, ахам̣ бана д̇ияож̇анасад̇игз раж̇ж̇з махаасамбад̇д̇им̣ бахааяа аран̃н̃з вижараами, ахо агижжагааримхий’’д̇и д̇ад̇ова нивад̇д̇о б̣аараан̣асим̣ г̇анд̇ваа ‘‘гим̣ д̇з, махаарааж̇а, химаванд̇з ажчарияам̣ д̣̇идта’’нд̇и амажжзхи будто саб̣б̣ам̣ аарожзд̇ваа д̇ад̇о бадтааяа д̣̇аанаани д̣̇ад̣̇анд̇о бхог̇з бхун̃ж̇и. д̇амад̇т̇ам̣ багаасзнд̇о сад̇т̇аа –
Taṃ sutvā rājā ‘‘ime hi nāma tiracchānagatā hutvā ekarattiṃ vippayogena satta vassasatāni rodantā vicaranti, ahaṃ pana tiyojanasatike rajje mahāsampattiṃ pahāya araññe vicarāmi, aho akiccakārimhī’’ti tatova nivatto bārāṇasiṃ gantvā ‘‘kiṃ te, mahārāja, himavante acchariyaṃ diṭṭha’’nti amaccehi puṭṭho sabbaṃ ārocetvā tato paṭṭhāya dānāni dadanto bhoge bhuñji. Tamatthaṃ pakāsento satthā –
207.
207.
‘‘ид̣̇ан̃жа суд̇ваана амаанусаанам̣, бхаллаад̇ияо ид̇д̇арам̣ ж̇ийвид̇анд̇и;
‘‘Idañca sutvāna amānusānaṃ, bhallātiyo ittaraṃ jīvitanti;
нивад̇д̇ат̇а на миг̇авам̣ ажари, ад̣̇ааси д̣̇аанаани абхун̃ж̇и бхог̇з’’д̇и. –
Nivattatha na migavaṃ acari, adāsi dānāni abhuñji bhoge’’ti. –
имам̣ г̇аат̇ам̣ вад̇ваа буна овад̣̇анд̇о д̣̇вз г̇аат̇аа абхааси –
Imaṃ gāthaṃ vatvā puna ovadanto dve gāthā abhāsi –
208.
208.
‘‘ид̣̇ан̃жа суд̇ваана амаанусаанам̣, саммод̣̇ат̇а маа галахам̣ агад̇т̇а;
‘‘Idañca sutvāna amānusānaṃ, sammodatha mā kalahaṃ akattha;
маа во д̇абий ад̇д̇агаммаабараад̇хо, яат̇ааби д̇з гимбурисзгарад̇д̇ам̣.
Mā vo tapī attakammāparādho, yathāpi te kimpurisekarattaṃ.
209.
209.
‘‘ид̣̇ан̃жа суд̇ваана амаанусаанам̣, саммод̣̇ат̇а маа виваад̣̇ам̣ агад̇т̇а;
‘‘Idañca sutvāna amānusānaṃ, sammodatha mā vivādaṃ akattha;
маа во д̇абий ад̇д̇агаммаабараад̇хо, яат̇ааби д̇з гимбурисзгарад̇д̇а’’нд̇и.
Mā vo tapī attakammāparādho, yathāpi te kimpurisekaratta’’nti.
д̇ад̇т̇а амаанусаананд̇и гиннараанам̣. ад̇д̇агаммаабараад̇ход̇и ад̇д̇ано гаммад̣̇осо. гимбурисзгарад̇д̇анд̇и яат̇аа д̇з гимбурисз згарад̇д̇им̣ гад̇о ад̇д̇ано гаммад̣̇осо д̇аби, д̇ат̇аа д̇умхзби маа д̇абийд̇и ад̇т̇о.
Tattha amānusānanti kinnarānaṃ. Attakammāparādhoti attano kammadoso. Kimpurisekarattanti yathā te kimpurise ekarattiṃ kato attano kammadoso tapi, tathā tumhepi mā tapīti attho.
маллигаа д̣̇звий д̇ат̇ааг̇ад̇асса д̇хаммад̣̇зсанам̣ суд̇ваа удтааяаасанаа ан̃ж̇алим̣ баг̇г̇аяха д̣̇асаб̣аласса т̇уд̇им̣ гаронд̇ий осаанаг̇аат̇амааха –
Mallikā devī tathāgatassa dhammadesanaṃ sutvā uṭṭhāyāsanā añjaliṃ paggayha dasabalassa thutiṃ karontī osānagāthamāha –
210.
210.
‘‘вивид̇хам̣ ад̇химанаа сун̣омахам̣, важанабат̇ам̣ д̇ава ад̇т̇асам̣хид̇ам̣;
‘‘Vividhaṃ adhimanā suṇomahaṃ, vacanapathaṃ tava atthasaṃhitaṃ;
мун̃жам̣ г̇ирам̣ нуд̣̇асзва мз д̣̇арам̣, саман̣а сукааваха ж̇ийва мз жира’’нд̇и.
Muñcaṃ giraṃ nudaseva me daraṃ, samaṇa sukhāvaha jīva me cira’’nti.
д̇ад̇т̇а вивид̇хам̣ ад̇химанаа сун̣омаханд̇и бханд̇з, д̇умхзхи вивид̇хзхи наанаагааран̣зхи алан̇гарид̇ваа д̣̇зсид̇ам̣ д̇хаммад̣̇зсанам̣ ахам̣ ад̇химанаа басаннажид̇д̇аа худ̇ваа сун̣оми. важанабат̇анд̇и д̇ам̣ д̇умхзхи вуд̇д̇ам̣ вивид̇хаважанам̣. мун̃жам̣ г̇ирам̣ нуд̣̇асзва мз д̣̇аранд̇и ган̣н̣асукам̣ мад̇хурам̣ г̇ирам̣ мун̃жанд̇о мама хад̣̇аяз согад̣̇арат̇ам̣ нуд̣̇асиязва харасиязва. саман̣а сукааваха ж̇ийва мз жиранд̇и бханд̇з б̣уд̣̇д̇хасаман̣а, д̣̇иб̣б̣амаанусалогияалогуд̇д̇арасукааваха мама саами д̇хаммарааж̇а, жирам̣ ж̇ийваад̇и.
Tattha vividhaṃ adhimanā suṇomahanti bhante, tumhehi vividhehi nānākāraṇehi alaṅkaritvā desitaṃ dhammadesanaṃ ahaṃ adhimanā pasannacittā hutvā suṇomi. Vacanapathanti taṃ tumhehi vuttaṃ vividhavacanaṃ. Muñcaṃ giraṃ nudaseva me daranti kaṇṇasukhaṃ madhuraṃ giraṃ muñcanto mama hadaye sokadarathaṃ nudasiyeva harasiyeva. Samaṇasukhāvaha jīva me ciranti bhante buddhasamaṇa, dibbamānusalokiyalokuttarasukhāvaha mama sāmi dhammarāja, ciraṃ jīvāti.
госаларааж̇аа д̇ад̇о бадтааяа д̇ааяа сад̣̇д̇хим̣ самаг̇г̇аваасам̣ васи.
Kosalarājā tato paṭṭhāya tāya saddhiṃ samaggavāsaṃ vasi.
сад̇т̇аа имам̣ д̇хаммад̣̇зсанам̣ аахарид̇ваа ж̇аад̇агам̣ самод̇хаанзси – ‘‘д̇ад̣̇аа гиннаро госаларааж̇аа ахоси, гиннарий маллигаа д̣̇звий, бхаллаад̇ияарааж̇аа ахамзва ахоси’’нд̇и.
Satthā imaṃ dhammadesanaṃ āharitvā jātakaṃ samodhānesi – ‘‘tadā kinnaro kosalarājā ahosi, kinnarī mallikā devī, bhallātiyarājā ahameva ahosi’’nti.
бхаллаад̇ияаж̇аад̇агаван̣н̣анаа адтамаа.
Bhallātiyajātakavaṇṇanā aṭṭhamā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / ж̇аад̇агабаал̣и • Jātakapāḷi / 504. бхаллаад̇ияаж̇аад̇агам̣ • 504. Bhallātiyajātakaṃ
