| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
214. ப⁴ண்டா³கா³ரஸம்முதிஆதி³கதா²
214. Bhaṇḍāgārasammutiādikathā
343. யோ விஹாரோ வா யோ அட்³ட⁴யோகோ³ வா ஹோதி, ஸோ விஹாராதி³கோ ஸம்மனிதப்³போ³தி யோஜனா. ‘‘ஆராமிகஸாமணேராதீ³ஹீ’’தி பத³ங் விவித்தத்தே² அபாதா³னங், கரணம்பி யுஜ்ஜதி. பச்சந்தஸேனாஸனங் பன ந ஸம்மனிதப்³ப³ங் சோராதி³உபத்³த³வத்தா. விஹாரமஜ்ஜே²யேவாதி ப⁴ண்டா³கா³ரவிஹாரமஜ்ஜே²யேவ.
343. Yo vihāro vā yo aḍḍhayogo vā hoti, so vihārādiko sammanitabboti yojanā. ‘‘Ārāmikasāmaṇerādīhī’’ti padaṃ vivittatthe apādānaṃ, karaṇampi yujjati. Paccantasenāsanaṃ pana na sammanitabbaṃ corādiupaddavattā. Vihāramajjheyevāti bhaṇḍāgāravihāramajjheyeva.
யஸ்ஸாதி ப⁴ண்டா³கா³ரஸ்ஸ. இத³ங் பத³ங் ‘‘ச²த³னாதீ³ஸூ’’தி பதே³ ஸாமீ, ‘‘நத்தீ²’’தி பதே³ ஸம்பதா³னங் . யஸ்ஸ பனாதி ப⁴ண்டா³கா³ரஸ்ஸ பன. யத்த² கத்த²சீதி யஸ்மிங் கஸ்மிங்சி டா²னே. யேனாதி பதிதஹேதுனா. மூஸித்வா கா²த³தீதி மூஸிகோ. ஆதி³ஸத்³தே³ன கோ³தா⁴மங்கு³ஸாத³யோ ஸங்க³ண்ஹாதி. உப பு⁴ஸங், உபகு³ஹித்வா வா சினந்தீதி உபசிகா. தந்தி ஓவஸ்ஸனாதி³ங். ஹீதி ஸச்சங், யஸ்மா வா. ஏவந்திஆதி³ நிக³மனங்.
Yassāti bhaṇḍāgārassa. Idaṃ padaṃ ‘‘chadanādīsū’’ti pade sāmī, ‘‘natthī’’ti pade sampadānaṃ . Yassa panāti bhaṇḍāgārassa pana. Yattha katthacīti yasmiṃ kasmiṃci ṭhāne. Yenāti patitahetunā. Mūsitvā khādatīti mūsiko. Ādisaddena godhāmaṅgusādayo saṅgaṇhāti. Upa bhusaṃ, upaguhitvā vā cinantīti upacikā. Tanti ovassanādiṃ. Hīti saccaṃ, yasmā vā. Evantiādi nigamanaṃ.
சீவரபடிக்³கா³ஹகாதீ³ஹீதி ஆதி³ஸத்³தே³ன சீவரனித³ஹகப⁴ண்டா³கா³ரிகே ஸங்க³ண்ஹாதி. தத்தா²தி தேஸு. சீவரபடிக்³கா³ஹகேன ந க³ண்ஹிதப்³ப³ந்தி ஸம்ப³ந்தோ⁴. தாவாதி சீவரனித³ஹகப⁴ண்டா³கா³ரிகானங், தேஹி வா பட²மங். யங் யந்தி சீவரங். ததே²வாதி யதா² விஸுங் விஸுங் கத்வா க³ண்ஹதி, ததே²வ. சீவரனித³ஹகேனாபீதி பிஸத்³தோ³ ந கேவலங் படிக்³கா³ஹகேனேவ, அத² கோ² நித³ஹகேனபீதி ஸம்பிண்டே³தி. ததே²வாதி யதா² நித³ஹகோ ஆசிக்க²தி, ததே²வ. ததோதி தேஹி சீவரேஹி, விப⁴த்தஅபாதா³னங், தேஸு சீவரேஸு வா நித்³தா⁴ரணங். ததே³வாதி ஸங்கே⁴ன வுத்தசீவரமேவ.
Cīvarapaṭiggāhakādīhīti ādisaddena cīvaranidahakabhaṇḍāgārike saṅgaṇhāti. Tatthāti tesu. Cīvarapaṭiggāhakena na gaṇhitabbanti sambandho. Tāvāti cīvaranidahakabhaṇḍāgārikānaṃ, tehi vā paṭhamaṃ. Yaṃ yanti cīvaraṃ. Tathevāti yathā visuṃ visuṃ katvā gaṇhati, tatheva. Cīvaranidahakenāpīti pisaddo na kevalaṃ paṭiggāhakeneva, atha kho nidahakenapīti sampiṇḍeti. Tathevāti yathā nidahako ācikkhati, tatheva. Tatoti tehi cīvarehi, vibhattaapādānaṃ, tesu cīvaresu vā niddhāraṇaṃ. Tadevāti saṅghena vuttacīvarameva.
இதீதிஆதி³ நிக³மனங். ப⁴க³வதா அனுஞ்ஞாதோதி ஸம்ப³ந்தோ⁴. ப⁴ண்டா³கா³ரந்தி ப⁴ண்ட³ஸ்ஸ ட²பனோகாஸங் அகா³ரங். ப⁴ண்டா³கா³ரிகோதி ப⁴ண்டா³கா³ரே நியுத்தோ. பா³ஹுல்லிகதாயாதி பச்சயபா³ஹுல்லேன நியுத்தபா⁴வத்த²ங். ஏவங் ஸந்தே கிமத்தா²ய அனுஞ்ஞாதோதி ஆஹ ‘‘அபி சா’’திஆதி³. அனுக்³க³ஹாய அனுஞ்ஞாதோதி ஸம்ப³ந்தோ⁴. ஹீதி வித்தா²ரோ. நேவ ஜானெய்யுந்தி யோஜனா. த்³வே த்³வே வா சீவரேதி ஸம்ப³ந்தோ⁴. ஸங்க³ஹங் காதுந்தி ஸங்கே⁴ன ஸங்க³ஹங் காதுங்.
Itītiādi nigamanaṃ. Bhagavatā anuññātoti sambandho. Bhaṇḍāgāranti bhaṇḍassa ṭhapanokāsaṃ agāraṃ. Bhaṇḍāgārikoti bhaṇḍāgāre niyutto. Bāhullikatāyāti paccayabāhullena niyuttabhāvatthaṃ. Evaṃ sante kimatthāya anuññātoti āha ‘‘api cā’’tiādi. Anuggahāya anuññātoti sambandho. Hīti vitthāro. Neva jāneyyunti yojanā. Dve dve vā cīvareti sambandho. Saṅgahaṃ kātunti saṅghena saṅgahaṃ kātuṃ.
ந வுட்டா²பேதப்³போ³தி எத்த² அத்து²த்³தா⁴ரவஸேன அஞ்ஞேபி அவுட்டா²பனீயே த³ஸ்ஸெந்தோ ஆஹ ‘‘அஞ்ஞேபீ’’திஆதி³. ஹீதி வித்தா²ரோ. தத்தா²தி சதூஸு. ஸங்கோ⁴ பன தே³தீதி ஸம்ப³ந்தோ⁴. உபகாரதாய சாதி ஸங்க⁴ஸ்ஸ உபகாரதாய ச. எத்த² ச புரிமேஸு தீஸு ஏகோயேவ ஹேது, பச்சி²மே பன த்³வே ஹேதவோதி த³ட்ட²ப்³ப³ங்.
Na vuṭṭhāpetabboti ettha atthuddhāravasena aññepi avuṭṭhāpanīye dassento āha ‘‘aññepī’’tiādi. Hīti vitthāro. Tatthāti catūsu. Saṅgho pana detīti sambandho. Upakāratāya cāti saṅghassa upakāratāya ca. Ettha ca purimesu tīsu ekoyeva hetu, pacchime pana dve hetavoti daṭṭhabbaṃ.
ஸம்முகீ²பூ⁴தேனாதி அஞ்ஞமஞ்ஞஸ்ஸ முகே² ஸங்விஜ்ஜமானோ, ஸன்னிபதிதோ வா ஸம்முகோ², ஸம்முகோ² ஹுத்வா பூ⁴தோ ஸம்முகீ²பூ⁴தோ. பூ⁴ஸத்³த³யோக³த்தா அகாரஸ்ஸீகாரோ ஹோதி, அந்தோஉபசாரஸீமாயங் டி²தோ ஸங்கோ⁴ . தமத்த²ங் த³ஸ்ஸெந்தோ ஆஹ ‘‘அந்தோஉபசாரஸீமாயங் டி²தேனா’’தி. கோலாஹலந்தி ப³ஹுஜனேஹி ஸன்னிபதித்வா ஏகதோ கதங் அப்³யத்தஸத்³த³ங். ததா³காரங் த³ஸ்ஸெந்தோ ஆஹ ‘‘அம்ஹாக’’ந்திஆதி³. ‘‘சீவரபா⁴ஜகேஸூ’’திஆதி³னா அக³திக³மனாகாரங் த³ஸ்ஸேதி, தங் ஸுவிஞ்ஞெய்யமேவ. துலாபூ⁴தோதி துலாய ஸதி³ஸோ ஹுத்வா பூ⁴தோ, துலாய ஸதி³ஸபா⁴வங் பத்தோ வா. மஜ்ஜ²த்தோதி மஜ்ஜே² டி²தோ அத்தா ஸபா⁴வோ ஏதஸ்ஸாதி மஜ்ஜ²த்தோ.
Sammukhībhūtenāti aññamaññassa mukhe saṃvijjamāno, sannipatito vā sammukho, sammukho hutvā bhūto sammukhībhūto. Bhūsaddayogattā akārassīkāro hoti, antoupacārasīmāyaṃ ṭhito saṅgho . Tamatthaṃ dassento āha ‘‘antoupacārasīmāyaṃ ṭhitenā’’ti. Kolāhalanti bahujanehi sannipatitvā ekato kataṃ abyattasaddaṃ. Tadākāraṃ dassento āha ‘‘amhāka’’ntiādi. ‘‘Cīvarabhājakesū’’tiādinā agatigamanākāraṃ dasseti, taṃ suviññeyyameva. Tulābhūtoti tulāya sadiso hutvā bhūto, tulāya sadisabhāvaṃ patto vā. Majjhattoti majjhe ṭhito attā sabhāvo etassāti majjhatto.
இத³ந்தி சீவரங். க⁴னந்தி நிரந்தரங். தனுகந்தி விரளங். எத்த² ‘‘உச்சினித்வா’’தி இமினா வத்த²ஸ்ஸ பமாணேன உச்சினநங் த³ஸ்ஸேதி. ‘‘துலயித்வா’’தி இமினா அக்³கே⁴ன துலனங் த³ஸ்ஸேதி. வண்ணாவண்ணங் கத்வாதி வண்ணஞ்ச அவண்ணஞ்ச கு²த்³த³கஞ்ச பமாணங், மஹந்தஞ்ச பமாணங் கத்வாதி அத்தோ². ஏகச்சானி சீவரானி அப்பக்³கா⁴னி ஹொந்தி, ஏகச்சானி மஹக்³கா⁴னீதி வுத்தங் ஹோதி. த³ஸத³ஸஅக்³க⁴னகந்தி த³ஸஹி த³ஸஹி கஹாபணேஹி அக்³க⁴னகங். யந்தி சீவரங், ப³ந்தி⁴த்வாதி நவக்³க⁴னகங் ஏகக்³க⁴னகேன, அட்ட²க்³க⁴னகஞ்ச த்³விஅக்³க⁴னகேன ப³ந்தி⁴த்வாதி அத்தோ². ஸமே படிவீஸேதி ஸமபமாணே படிவீஸே ட²பெத்வா, இமினா ‘‘வண்ணாவண்ண’’ந்தி எத்த² வண்ணஸத்³தோ³ பமாணத்தோ²தி தீ³பேதி. த³ஸ த³ஸ பி⁴க்கூ²தி இத³ங் உபலக்க²ணவஸேன வுத்தங் அஞ்ஞேனாகாரேனாபி க³ணேதுங் ஸக்குணெய்யத்தா. ப⁴ண்டி³கந்தி சீவரப⁴ண்டே³ன நியுத்தங் புடங். குஸோதி ஸலாகத³ண்டோ³.
Idanti cīvaraṃ. Ghananti nirantaraṃ. Tanukanti viraḷaṃ. Ettha ‘‘uccinitvā’’ti iminā vatthassa pamāṇena uccinanaṃ dasseti. ‘‘Tulayitvā’’ti iminā agghena tulanaṃ dasseti. Vaṇṇāvaṇṇaṃ katvāti vaṇṇañca avaṇṇañca khuddakañca pamāṇaṃ, mahantañca pamāṇaṃ katvāti attho. Ekaccāni cīvarāni appagghāni honti, ekaccāni mahagghānīti vuttaṃ hoti. Dasadasaagghanakanti dasahi dasahi kahāpaṇehi agghanakaṃ. Yanti cīvaraṃ, bandhitvāti navagghanakaṃ ekagghanakena, aṭṭhagghanakañca dviagghanakena bandhitvāti attho. Same paṭivīseti samapamāṇe paṭivīse ṭhapetvā, iminā ‘‘vaṇṇāvaṇṇa’’nti ettha vaṇṇasaddo pamāṇatthoti dīpeti. Dasa dasa bhikkhūti idaṃ upalakkhaṇavasena vuttaṃ aññenākārenāpi gaṇetuṃ sakkuṇeyyattā. Bhaṇḍikanti cīvarabhaṇḍena niyuttaṃ puṭaṃ. Kusoti salākadaṇḍo.
அத்திஸ்ஸராதி அத்தனாவ அத்தானங் இஸ்ஸரா. அஞ்ஞேஸங் வத்தபடிபத்திந்தி ஸம்ப³ந்தோ⁴. உபட்³ட⁴பா⁴கோ³தி பி⁴க்கூ²னங் லத்³த⁴பா⁴க³தோ உபட்³டோ⁴ பா⁴கோ³. யே பனாதி ஸாமணேரா பன. ஸமபா⁴கோ³தி பி⁴க்கூ²னங் பா⁴கே³ன ஸமோ பா⁴கோ³. இத³ஞ்சாதி ‘‘உபட்³ட⁴படிவீஸ’’ந்தி வசனஞ்ச, கதி²தந்தி ஸம்ப³ந்தோ⁴. ஸமகமேவாதி பி⁴க்கு²ஸாமணேரானங் ஸமபமாணமேவ. தத்ருப்பாத³வஸ்ஸாவாஸிகந்தி தஸ்மிங் விஹாரே உப்பாதே³ன மூலேன உப்பாதி³தங் வஸ்ஸாவாஸிகங். பா²திகம்மந்தி வட்³ட⁴னகம்மங் ‘‘யத்தகேன வினயாக³தேன ஸம்முஞ்ஜனிப³ந்த⁴னாதி³னா ஹத்த²கம்மேன விஹாரஸ்ஸ ஊனதா ந ஹோதி, தத்தகங் கத்வாதி அத்தோ². ஏதந்தி பா²திகம்மங் கத்வா க³ஹணங் . ஹீதி ஸச்சங். எத்தா²தி தத்ருப்பாத³வஸ்ஸாவாஸிகக³ஹணே. ஸப்³பே³ஸந்தி அகி²லானங் பி⁴க்கு²ஸாமணேரானங். ப⁴ண்டா³கா³ரிகசீவரேபீதி ப⁴ண்டா³கா³ரே ட²பிதே அகாலசீவரேபி. பிஸத்³தே³ன தத்ருப்பாத³வஸ்ஸாவாஸிகமபெக்க²தி. ஸாமணேரா உக்குட்டி²ங் கரொந்தீதி ஸம்ப³ந்தோ⁴. அபஹரிதகந்தி ஹரிதவிரஹிதங். ரங்க³ச²ல்லிந்தி ரஜனச்ச²விங். ஏதந்தி உக்குட்டி²கரணதோ ஸமபா⁴க³தா³னங், வுத்தந்தி ஸம்ப³ந்தோ⁴. யே சாதி ஸாமணேரா ச. விரஜ்ஜி²த்வா கரொந்தீதி கத்தப்³ப³காலேஸு அகத்வா யதி²ச்சி²தக்க²ணே கரொந்தி. தேதி ஸாமணேரே. ஸமபடிவீஸோ தா³தப்³போ³தி ‘‘கரிஸ்ஸாமா’’தி படிஞ்ஞாதமத்தேன ஸமோ படிவீஸோ தா³தப்³போ³.
Attissarāti attanāva attānaṃ issarā. Aññesaṃ vattapaṭipattinti sambandho. Upaḍḍhabhāgoti bhikkhūnaṃ laddhabhāgato upaḍḍho bhāgo. Ye panāti sāmaṇerā pana. Samabhāgoti bhikkhūnaṃ bhāgena samo bhāgo. Idañcāti ‘‘upaḍḍhapaṭivīsa’’nti vacanañca, kathitanti sambandho. Samakamevāti bhikkhusāmaṇerānaṃ samapamāṇameva. Tatruppādavassāvāsikanti tasmiṃ vihāre uppādena mūlena uppāditaṃ vassāvāsikaṃ. Phātikammanti vaḍḍhanakammaṃ ‘‘yattakena vinayāgatena sammuñjanibandhanādinā hatthakammena vihārassa ūnatā na hoti, tattakaṃ katvāti attho. Etanti phātikammaṃ katvā gahaṇaṃ . Hīti saccaṃ. Etthāti tatruppādavassāvāsikagahaṇe. Sabbesanti akhilānaṃ bhikkhusāmaṇerānaṃ. Bhaṇḍāgārikacīvarepīti bhaṇḍāgāre ṭhapite akālacīvarepi. Pisaddena tatruppādavassāvāsikamapekkhati. Sāmaṇerā ukkuṭṭhiṃ karontīti sambandho. Apaharitakanti haritavirahitaṃ. Raṅgachallinti rajanacchaviṃ. Etanti ukkuṭṭhikaraṇato samabhāgadānaṃ, vuttanti sambandho. Ye cāti sāmaṇerā ca. Virajjhitvā karontīti kattabbakālesu akatvā yathicchitakkhaṇe karonti. Teti sāmaṇere. Samapaṭivīso dātabboti ‘‘karissāmā’’ti paṭiññātamattena samo paṭivīso dātabbo.
‘‘ஸகங் பா⁴க³ங் தா³து’’ந்தி இத³ங் வுத்தந்தி ஸம்ப³ந்தோ⁴. கிங் ஸந்தா⁴ய வுத்தந்தி ஆஹ ‘‘ப⁴ண்டா³கா³ரதோ…பே॰… ஸந்தா⁴யா’’தி. பஹதாயாதி பஹரிதப்³பா³ய, பஹனிதப்³பா³ய வா. தஸ்மாதி யஸ்மா ஸந்தா⁴ய வுத்தங், தஸ்மா. அனீஹடேஸூதி ப⁴ண்டா³கா³ரதோ அனீஹரிதேஸு. இமஸ்ஸ பி⁴க்கு²னோதி உத்தரிதுகாமஸ்ஸ இமஸ்ஸ பி⁴க்கு²னோ. துலாயாதி மானேன.
‘‘Sakaṃ bhāgaṃ dātu’’nti idaṃ vuttanti sambandho. Kiṃ sandhāya vuttanti āha ‘‘bhaṇḍāgārato…pe… sandhāyā’’ti. Pahatāyāti paharitabbāya, pahanitabbāya vā. Tasmāti yasmā sandhāya vuttaṃ, tasmā. Anīhaṭesūti bhaṇḍāgārato anīharitesu. Imassa bhikkhunoti uttaritukāmassa imassa bhikkhuno. Tulāyāti mānena.
தேஸூதி ஸாடகேஸு, ஏகோ ஸாடகோதி யோஜனா. ஸப்³பே³ஸு பாதிதேஸூதி ஸம்ப³ந்தோ⁴. எத்தகேனாதி த்³வாத³ஸக்³க⁴னகேன. தங் ஸுத்வாதி பி⁴க்கூ²னங் தங் வசனங் ஸுத்வா. ஸப்³ப³த்தா²தி ஸப்³ப³ஸ்மிங் ஸங்க⁴க³ணஸந்தகே. அனுப்பதா³னேன கி²பியதி பக்கி²பியதீதி அனுக்கே²பந்தி த³ஸ்ஸெந்தோ ஆஹ ‘‘அனுக்கே²பங் நாமா’’திஆதி³. யத்தகங் அக்³க⁴ந்தி ஸம்ப³ந்தோ⁴. தத்தகேன அக்³கே⁴ன அக்³க⁴னகேதி யோஜனா. விகல்லகாதி விகலஸ்ஸ பா⁴வோ விகல்லங், சீவரபுக்³க³லானங் அபஹோனகபா⁴வோ, ததே³வ விகல்லகா. ‘‘தத்தா²’’தி பாட²ஸேஸோ, தேஸு த்³வீஸு விகல்லகேஸூதி அத்தோ². அத்தீ²தி ஸங்விஜ்ஜந்தி, நிபாதோயங். சி²ந்த³ந்தேஹி ச தா³தப்³பா³னீதி ஸம்ப³ந்தோ⁴. தா³தப்³பா³னீதி ச சி²ந்தி³தப்³பா³னி. தா³ஸத்³தோ³ ஹி அவக²ண்ட³னத்தோ². தா³துந்தி அவக²ண்டி³துங். ஏவந்திஆதி³ நிக³மனங். எத்தா²தி ஏதேஸு விகல்லகேஸு. தந்தி சீவரங் . அதா²தி தோஸிததோ பரங். தத்தா²தி ஏகஸ்ஸ பி⁴க்கு²னோ கொட்டா²ஸே. ஸாமணகந்தி ஸமணஸ்ஸ அனுரூபங். யோதி பி⁴க்கு². தேனாதி பரிக்கா²ரேன. இத³ம்பீதி அஞ்ஞங் ஸாமணகஸ்ஸ பரிக்கா²ரஸ்ஸ ட²பனம்பி. பிஸத்³தே³ன புரிமங் வத்த²சி²ந்த³னமபெக்க²தி.
Tesūti sāṭakesu, eko sāṭakoti yojanā. Sabbesu pātitesūti sambandho. Ettakenāti dvādasagghanakena. Taṃ sutvāti bhikkhūnaṃ taṃ vacanaṃ sutvā. Sabbatthāti sabbasmiṃ saṅghagaṇasantake. Anuppadānena khipiyati pakkhipiyatīti anukkhepanti dassento āha ‘‘anukkhepaṃ nāmā’’tiādi. Yattakaṃ agghanti sambandho. Tattakena agghena agghanaketi yojanā. Vikallakāti vikalassa bhāvo vikallaṃ, cīvarapuggalānaṃ apahonakabhāvo, tadeva vikallakā. ‘‘Tatthā’’ti pāṭhaseso, tesu dvīsu vikallakesūti attho. Atthīti saṃvijjanti, nipātoyaṃ. Chindantehi ca dātabbānīti sambandho. Dātabbānīti ca chinditabbāni. Dāsaddo hi avakhaṇḍanattho. Dātunti avakhaṇḍituṃ. Evantiādi nigamanaṃ. Etthāti etesu vikallakesu. Tanti cīvaraṃ . Athāti tositato paraṃ. Tatthāti ekassa bhikkhuno koṭṭhāse. Sāmaṇakanti samaṇassa anurūpaṃ. Yoti bhikkhu. Tenāti parikkhārena. Idampīti aññaṃ sāmaṇakassa parikkhārassa ṭhapanampi. Pisaddena purimaṃ vatthachindanamapekkhati.
வக்³க³ந்தி ஸமூஹங். அட்ட² வா நவ வா பி⁴க்கூ² ஹொந்தீதி யோஜனா. தேஸந்தி அட்ட²ன்னங் வா நவன்னங் வா. ஏவந்திஆதி³ நிக³மனங். அயங் அபஹோனகபா⁴வோதி யோஜனா. புன சீவரஸ்ஸேவ விகல்லகபா⁴வங் த³ஸ்ஸெந்தோ ஆஹ ‘‘அத²வா’’திஆதி³. எத்த² புரிமனயே சீவரஸ்ஸ ச புக்³க³லஸ்ஸ ச விகல்லகங் ஹோதி, பச்சி²மே சீவரஸ்ஸேவாதி அயமேதேஸங் விஸேஸோ.
Vagganti samūhaṃ. Aṭṭha vā nava vā bhikkhū hontīti yojanā. Tesanti aṭṭhannaṃ vā navannaṃ vā. Evantiādi nigamanaṃ. Ayaṃ apahonakabhāvoti yojanā. Puna cīvarasseva vikallakabhāvaṃ dassento āha ‘‘athavā’’tiādi. Ettha purimanaye cīvarassa ca puggalassa ca vikallakaṃ hoti, pacchime cīvarassevāti ayametesaṃ viseso.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 214. ப⁴ண்டா³கா³ரஸம்முதிஆதி³கதா² • 214. Bhaṇḍāgārasammutiādikathā
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / ப⁴ண்டா³கா³ரஸம்முதிஆதி³கதா² • Bhaṇḍāgārasammutiādikathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / சீவரபடிக்³கா³ஹகஸம்முதிஆதி³கதா²வண்ணனா • Cīvarapaṭiggāhakasammutiādikathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / ப⁴ண்டா³கா³ரஸம்முதிஆதி³கதா²வண்ணனா • Bhaṇḍāgārasammutiādikathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / ப⁴ண்டா³கா³ரஸம்முதிஆதி³கதா²வண்ணனா • Bhaṇḍāgārasammutiādikathāvaṇṇanā
