| Library / Tipiṭaka / တိပိဋက • Tipiṭaka / ပာစိတ္ယာဒိယောဇနာပာဠိ • Pācityādiyojanāpāḷi |
၂၁၄. ဘဏ္ဍာဂာရသမ္မုတိအာဒိကထာ
214. Bhaṇḍāgārasammutiādikathā
၃၄၃. ယော ဝိဟာရော ဝာ ယော အဍ္ဎယောဂော ဝာ ဟောတိ, သော ဝိဟာရာဒိကော သမ္မနိတဗ္ဗောတိ ယောဇနာ။ ‘‘အာရာမိကသာမဏေရာဒီဟီ’’တိ ပဒံ ဝိဝိတ္တတ္ထေ အပာဒာနံ, ကရဏမ္ပိ ယုဇ္ဇတိ။ ပစ္စန္တသေနာသနံ ပန န သမ္မနိတဗ္ဗံ စောရာဒိဥပဒ္ဒဝတ္တာ။ ဝိဟာရမဇ္ဈေယေဝာတိ ဘဏ္ဍာဂာရဝိဟာရမဇ္ဈေယေဝ။
343. Yo vihāro vā yo aḍḍhayogo vā hoti, so vihārādiko sammanitabboti yojanā. ‘‘Ārāmikasāmaṇerādīhī’’ti padaṃ vivittatthe apādānaṃ, karaṇampi yujjati. Paccantasenāsanaṃ pana na sammanitabbaṃ corādiupaddavattā. Vihāramajjheyevāti bhaṇḍāgāravihāramajjheyeva.
ယသ္သာတိ ဘဏ္ဍာဂာရသ္သ။ ဣဒံ ပဒံ ‘‘ဆဒနာဒီသူ’’တိ ပဒေ သာမီ, ‘‘နတ္ထီ’’တိ ပဒေ သမ္ပဒာနံ ။ ယသ္သ ပနာတိ ဘဏ္ဍာဂာရသ္သ ပန။ ယတ္ထ ကတ္ထစီတိ ယသ္မိံ ကသ္မိံစိ ဌာနေ။ ယေနာတိ ပတိတဟေတုနာ။ မူသိတ္ဝာ ခာဒတီတိ မူသိကော။ အာဒိသဒ္ဒေန ဂောဓာမင္ဂုသာဒယော သင္ဂဏ္ဟာတိ။ ဥပ ဘုသံ, ဥပဂုဟိတ္ဝာ ဝာ စိနန္တီတိ ဥပစိကာ။ တန္တိ ဩဝသ္သနာဒိံ။ ဟီတိ သစ္စံ, ယသ္မာ ဝာ။ ဧဝန္တိအာဒိ နိဂမနံ။
Yassāti bhaṇḍāgārassa. Idaṃ padaṃ ‘‘chadanādīsū’’ti pade sāmī, ‘‘natthī’’ti pade sampadānaṃ . Yassa panāti bhaṇḍāgārassa pana. Yattha katthacīti yasmiṃ kasmiṃci ṭhāne. Yenāti patitahetunā. Mūsitvā khādatīti mūsiko. Ādisaddena godhāmaṅgusādayo saṅgaṇhāti. Upa bhusaṃ, upaguhitvā vā cinantīti upacikā. Tanti ovassanādiṃ. Hīti saccaṃ, yasmā vā. Evantiādi nigamanaṃ.
စီဝရပဋိဂ္ဂာဟကာဒီဟီတိ အာဒိသဒ္ဒေန စီဝရနိဒဟကဘဏ္ဍာဂာရိကေ သင္ဂဏ္ဟာတိ။ တတ္ထာတိ တေသု။ စီဝရပဋိဂ္ဂာဟကေန န ဂဏ္ဟိတဗ္ဗန္တိ သမ္ဗန္ဓော။ တာဝာတိ စီဝရနိဒဟကဘဏ္ဍာဂာရိကာနံ, တေဟိ ဝာ ပဌမံ။ ယံ ယန္တိ စီဝရံ။ တထေဝာတိ ယထာ ဝိသုံ ဝိသုံ ကတ္ဝာ ဂဏ္ဟတိ, တထေဝ။ စီဝရနိဒဟကေနာပီတိ ပိသဒ္ဒော န ကေဝလံ ပဋိဂ္ဂာဟကေနေဝ, အထ ခော နိဒဟကေနပီတိ သမ္ပိဏ္ဍေတိ။ တထေဝာတိ ယထာ နိဒဟကော အာစိက္ခတိ, တထေဝ။ တတောတိ တေဟိ စီဝရေဟိ, ဝိဘတ္တအပာဒာနံ, တေသု စီဝရေသု ဝာ နိဒ္ဓာရဏံ။ တဒေဝာတိ သင္ဃေန ဝုတ္တစီဝရမေဝ။
Cīvarapaṭiggāhakādīhīti ādisaddena cīvaranidahakabhaṇḍāgārike saṅgaṇhāti. Tatthāti tesu. Cīvarapaṭiggāhakena na gaṇhitabbanti sambandho. Tāvāti cīvaranidahakabhaṇḍāgārikānaṃ, tehi vā paṭhamaṃ. Yaṃ yanti cīvaraṃ. Tathevāti yathā visuṃ visuṃ katvā gaṇhati, tatheva. Cīvaranidahakenāpīti pisaddo na kevalaṃ paṭiggāhakeneva, atha kho nidahakenapīti sampiṇḍeti. Tathevāti yathā nidahako ācikkhati, tatheva. Tatoti tehi cīvarehi, vibhattaapādānaṃ, tesu cīvaresu vā niddhāraṇaṃ. Tadevāti saṅghena vuttacīvarameva.
ဣတီတိအာဒိ နိဂမနံ။ ဘဂဝတာ အနုညာတောတိ သမ္ဗန္ဓော။ ဘဏ္ဍာဂာရန္တိ ဘဏ္ဍသ္သ ဌပနောကာသံ အဂာရံ။ ဘဏ္ဍာဂာရိကောတိ ဘဏ္ဍာဂာရေ နိယုတ္တော။ ဗာဟုလ္လိကတာယာတိ ပစ္စယဗာဟုလ္လေန နိယုတ္တဘာဝတ္ထံ။ ဧဝံ သန္တေ ကိမတ္ထာယ အနုညာတောတိ အာဟ ‘‘အပိ စာ’’တိအာဒိ။ အနုဂ္ဂဟာယ အနုညာတောတိ သမ္ဗန္ဓော။ ဟီတိ ဝိတ္ထာရော။ နေဝ ဇာနေယ္ယုန္တိ ယောဇနာ။ ဒ္ဝေ ဒ္ဝေ ဝာ စီဝရေတိ သမ္ဗန္ဓော။ သင္ဂဟံ ကာတုန္တိ သင္ဃေန သင္ဂဟံ ကာတုံ။
Itītiādi nigamanaṃ. Bhagavatā anuññātoti sambandho. Bhaṇḍāgāranti bhaṇḍassa ṭhapanokāsaṃ agāraṃ. Bhaṇḍāgārikoti bhaṇḍāgāre niyutto. Bāhullikatāyāti paccayabāhullena niyuttabhāvatthaṃ. Evaṃ sante kimatthāya anuññātoti āha ‘‘api cā’’tiādi. Anuggahāya anuññātoti sambandho. Hīti vitthāro. Neva jāneyyunti yojanā. Dve dve vā cīvareti sambandho. Saṅgahaṃ kātunti saṅghena saṅgahaṃ kātuṃ.
န ဝုဋ္ဌာပေတဗ္ဗောတိ ဧတ္ထ အတ္ထုဒ္ဓာရဝသေန အညေပိ အဝုဋ္ဌာပနီယေ ဒသ္သေန္တော အာဟ ‘‘အညေပီ’’တိအာဒိ။ ဟီတိ ဝိတ္ထာရော။ တတ္ထာတိ စတူသု။ သင္ဃော ပန ဒေတီတိ သမ္ဗန္ဓော။ ဥပကာရတာယ စာတိ သင္ဃသ္သ ဥပကာရတာယ စ။ ဧတ္ထ စ ပုရိမေသု တီသု ဧကောယေဝ ဟေတု, ပစ္ဆိမေ ပန ဒ္ဝေ ဟေတဝောတိ ဒဋ္ဌဗ္ဗံ။
Na vuṭṭhāpetabboti ettha atthuddhāravasena aññepi avuṭṭhāpanīye dassento āha ‘‘aññepī’’tiādi. Hīti vitthāro. Tatthāti catūsu. Saṅgho pana detīti sambandho. Upakāratāya cāti saṅghassa upakāratāya ca. Ettha ca purimesu tīsu ekoyeva hetu, pacchime pana dve hetavoti daṭṭhabbaṃ.
သမ္မုခီဘူတေနာတိ အညမညသ္သ မုခေ သံဝိဇ္ဇမာနော, သန္နိပတိတော ဝာ သမ္မုခော, သမ္မုခော ဟုတ္ဝာ ဘူတော သမ္မုခီဘူတော။ ဘူသဒ္ဒယောဂတ္တာ အကာရသ္သီကာရော ဟောတိ, အန္တောဥပစာရသီမာယံ ဌိတော သင္ဃော ။ တမတ္ထံ ဒသ္သေန္တော အာဟ ‘‘အန္တောဥပစာရသီမာယံ ဌိတေနာ’’တိ။ ကောလာဟလန္တိ ဗဟုဇနေဟိ သန္နိပတိတ္ဝာ ဧကတော ကတံ အဗ္ယတ္တသဒ္ဒံ။ တဒာကာရံ ဒသ္သေန္တော အာဟ ‘‘အမ္ဟာက’’န္တိအာဒိ။ ‘‘စီဝရဘာဇကေသူ’’တိအာဒိနာ အဂတိဂမနာကာရံ ဒသ္သေတိ, တံ သုဝိညေယ္ယမေဝ။ တုလာဘူတောတိ တုလာယ သဒိသော ဟုတ္ဝာ ဘူတော, တုလာယ သဒိသဘာဝံ ပတ္တော ဝာ။ မဇ္ဈတ္တောတိ မဇ္ဈေ ဌိတော အတ္တာ သဘာဝော ဧတသ္သာတိ မဇ္ဈတ္တော။
Sammukhībhūtenāti aññamaññassa mukhe saṃvijjamāno, sannipatito vā sammukho, sammukho hutvā bhūto sammukhībhūto. Bhūsaddayogattā akārassīkāro hoti, antoupacārasīmāyaṃ ṭhito saṅgho . Tamatthaṃ dassento āha ‘‘antoupacārasīmāyaṃ ṭhitenā’’ti. Kolāhalanti bahujanehi sannipatitvā ekato kataṃ abyattasaddaṃ. Tadākāraṃ dassento āha ‘‘amhāka’’ntiādi. ‘‘Cīvarabhājakesū’’tiādinā agatigamanākāraṃ dasseti, taṃ suviññeyyameva. Tulābhūtoti tulāya sadiso hutvā bhūto, tulāya sadisabhāvaṃ patto vā. Majjhattoti majjhe ṭhito attā sabhāvo etassāti majjhatto.
ဣဒန္တိ စီဝရံ။ ဃနန္တိ နိရန္တရံ။ တနုကန္တိ ဝိရဠံ။ ဧတ္ထ ‘‘ဥစ္စိနိတ္ဝာ’’တိ ဣမိနာ ဝတ္ထသ္သ ပမာဏေန ဥစ္စိနနံ ဒသ္သေတိ။ ‘‘တုလယိတ္ဝာ’’တိ ဣမိနာ အဂ္ဃေန တုလနံ ဒသ္သေတိ။ ဝဏ္ဏာဝဏ္ဏံ ကတ္ဝာတိ ဝဏ္ဏဉ္စ အဝဏ္ဏဉ္စ ခုဒ္ဒကဉ္စ ပမာဏံ, မဟန္တဉ္စ ပမာဏံ ကတ္ဝာတိ အတ္ထော။ ဧကစ္စာနိ စီဝရာနိ အပ္ပဂ္ဃာနိ ဟောန္တိ, ဧကစ္စာနိ မဟဂ္ဃာနီတိ ဝုတ္တံ ဟောတိ။ ဒသဒသအဂ္ဃနကန္တိ ဒသဟိ ဒသဟိ ကဟာပဏေဟိ အဂ္ဃနကံ။ ယန္တိ စီဝရံ, ဗန္ဓိတ္ဝာတိ နဝဂ္ဃနကံ ဧကဂ္ဃနကေန, အဋ္ဌဂ္ဃနကဉ္စ ဒ္ဝိအဂ္ဃနကေန ဗန္ဓိတ္ဝာတိ အတ္ထော။ သမေ ပဋိဝီသေတိ သမပမာဏေ ပဋိဝီသေ ဌပေတ္ဝာ, ဣမိနာ ‘‘ဝဏ္ဏာဝဏ္ဏ’’န္တိ ဧတ္ထ ဝဏ္ဏသဒ္ဒော ပမာဏတ္ထောတိ ဒီပေတိ။ ဒသ ဒသ ဘိက္ခူတိ ဣဒံ ဥပလက္ခဏဝသေန ဝုတ္တံ အညေနာကာရေနာပိ ဂဏေတုံ သက္ကုဏေယ္ယတ္တာ။ ဘဏ္ဍိကန္တိ စီဝရဘဏ္ဍေန နိယုတ္တံ ပုဋံ။ ကုသောတိ သလာကဒဏ္ဍော။
Idanti cīvaraṃ. Ghananti nirantaraṃ. Tanukanti viraḷaṃ. Ettha ‘‘uccinitvā’’ti iminā vatthassa pamāṇena uccinanaṃ dasseti. ‘‘Tulayitvā’’ti iminā agghena tulanaṃ dasseti. Vaṇṇāvaṇṇaṃ katvāti vaṇṇañca avaṇṇañca khuddakañca pamāṇaṃ, mahantañca pamāṇaṃ katvāti attho. Ekaccāni cīvarāni appagghāni honti, ekaccāni mahagghānīti vuttaṃ hoti. Dasadasaagghanakanti dasahi dasahi kahāpaṇehi agghanakaṃ. Yanti cīvaraṃ, bandhitvāti navagghanakaṃ ekagghanakena, aṭṭhagghanakañca dviagghanakena bandhitvāti attho. Same paṭivīseti samapamāṇe paṭivīse ṭhapetvā, iminā ‘‘vaṇṇāvaṇṇa’’nti ettha vaṇṇasaddo pamāṇatthoti dīpeti. Dasa dasa bhikkhūti idaṃ upalakkhaṇavasena vuttaṃ aññenākārenāpi gaṇetuṃ sakkuṇeyyattā. Bhaṇḍikanti cīvarabhaṇḍena niyuttaṃ puṭaṃ. Kusoti salākadaṇḍo.
အတ္တိသ္သရာတိ အတ္တနာဝ အတ္တာနံ ဣသ္သရာ။ အညေသံ ဝတ္တပဋိပတ္တိန္တိ သမ္ဗန္ဓော။ ဥပဍ္ဎဘာဂောတိ ဘိက္ခူနံ လဒ္ဓဘာဂတော ဥပဍ္ဎော ဘာဂော။ ယေ ပနာတိ သာမဏေရာ ပန။ သမဘာဂောတိ ဘိက္ခူနံ ဘာဂေန သမော ဘာဂော။ ဣဒဉ္စာတိ ‘‘ဥပဍ္ဎပဋိဝီသ’’န္တိ ဝစနဉ္စ, ကထိတန္တိ သမ္ဗန္ဓော။ သမကမေဝာတိ ဘိက္ခုသာမဏေရာနံ သမပမာဏမေဝ။ တတ္ရုပ္ပာဒဝသ္သာဝာသိကန္တိ တသ္မိံ ဝိဟာရေ ဥပ္ပာဒေန မူလေန ဥပ္ပာဒိတံ ဝသ္သာဝာသိကံ။ ဖာတိကမ္မန္တိ ဝဍ္ဎနကမ္မံ ‘‘ယတ္တကေန ဝိနယာဂတေန သမ္မုဉ္ဇနိဗန္ဓနာဒိနာ ဟတ္ထကမ္မေန ဝိဟာရသ္သ ဦနတာ န ဟောတိ, တတ္တကံ ကတ္ဝာတိ အတ္ထော။ ဧတန္တိ ဖာတိကမ္မံ ကတ္ဝာ ဂဟဏံ ။ ဟီတိ သစ္စံ။ ဧတ္ထာတိ တတ္ရုပ္ပာဒဝသ္သာဝာသိကဂဟဏေ။ သဗ္ဗေသန္တိ အခိလာနံ ဘိက္ခုသာမဏေရာနံ။ ဘဏ္ဍာဂာရိကစီဝရေပီတိ ဘဏ္ဍာဂာရေ ဌပိတေ အကာလစီဝရေပိ။ ပိသဒ္ဒေန တတ္ရုပ္ပာဒဝသ္သာဝာသိကမပေက္ခတိ။ သာမဏေရာ ဥက္ကုဋ္ဌိံ ကရောန္တီတိ သမ္ဗန္ဓော။ အပဟရိတကန္တိ ဟရိတဝိရဟိတံ။ ရင္ဂဆလ္လိန္တိ ရဇနစ္ဆဝိံ။ ဧတန္တိ ဥက္ကုဋ္ဌိကရဏတော သမဘာဂဒာနံ, ဝုတ္တန္တိ သမ္ဗန္ဓော။ ယေ စာတိ သာမဏေရာ စ။ ဝိရဇ္ဈိတ္ဝာ ကရောန္တီတိ ကတ္တဗ္ဗကာလေသု အကတ္ဝာ ယထိစ္ဆိတက္ခဏေ ကရောန္တိ။ တေတိ သာမဏေရေ။ သမပဋိဝီသော ဒာတဗ္ဗောတိ ‘‘ကရိသ္သာမာ’’တိ ပဋိညာတမတ္တေန သမော ပဋိဝီသော ဒာတဗ္ဗော။
Attissarāti attanāva attānaṃ issarā. Aññesaṃ vattapaṭipattinti sambandho. Upaḍḍhabhāgoti bhikkhūnaṃ laddhabhāgato upaḍḍho bhāgo. Ye panāti sāmaṇerā pana. Samabhāgoti bhikkhūnaṃ bhāgena samo bhāgo. Idañcāti ‘‘upaḍḍhapaṭivīsa’’nti vacanañca, kathitanti sambandho. Samakamevāti bhikkhusāmaṇerānaṃ samapamāṇameva. Tatruppādavassāvāsikanti tasmiṃ vihāre uppādena mūlena uppāditaṃ vassāvāsikaṃ. Phātikammanti vaḍḍhanakammaṃ ‘‘yattakena vinayāgatena sammuñjanibandhanādinā hatthakammena vihārassa ūnatā na hoti, tattakaṃ katvāti attho. Etanti phātikammaṃ katvā gahaṇaṃ . Hīti saccaṃ. Etthāti tatruppādavassāvāsikagahaṇe. Sabbesanti akhilānaṃ bhikkhusāmaṇerānaṃ. Bhaṇḍāgārikacīvarepīti bhaṇḍāgāre ṭhapite akālacīvarepi. Pisaddena tatruppādavassāvāsikamapekkhati. Sāmaṇerā ukkuṭṭhiṃ karontīti sambandho. Apaharitakanti haritavirahitaṃ. Raṅgachallinti rajanacchaviṃ. Etanti ukkuṭṭhikaraṇato samabhāgadānaṃ, vuttanti sambandho. Ye cāti sāmaṇerā ca. Virajjhitvā karontīti kattabbakālesu akatvā yathicchitakkhaṇe karonti. Teti sāmaṇere. Samapaṭivīso dātabboti ‘‘karissāmā’’ti paṭiññātamattena samo paṭivīso dātabbo.
‘‘သကံ ဘာဂံ ဒာတု’’န္တိ ဣဒံ ဝုတ္တန္တိ သမ္ဗန္ဓော။ ကိံ သန္ဓာယ ဝုတ္တန္တိ အာဟ ‘‘ဘဏ္ဍာဂာရတော။ပေ.။ သန္ဓာယာ’’တိ။ ပဟတာယာတိ ပဟရိတဗ္ဗာယ, ပဟနိတဗ္ဗာယ ဝာ။ တသ္မာတိ ယသ္မာ သန္ဓာယ ဝုတ္တံ, တသ္မာ။ အနီဟဋေသူတိ ဘဏ္ဍာဂာရတော အနီဟရိတေသု။ ဣမသ္သ ဘိက္ခုနောတိ ဥတ္တရိတုကာမသ္သ ဣမသ္သ ဘိက္ခုနော။ တုလာယာတိ မာနေန။
‘‘Sakaṃ bhāgaṃ dātu’’nti idaṃ vuttanti sambandho. Kiṃ sandhāya vuttanti āha ‘‘bhaṇḍāgārato…pe… sandhāyā’’ti. Pahatāyāti paharitabbāya, pahanitabbāya vā. Tasmāti yasmā sandhāya vuttaṃ, tasmā. Anīhaṭesūti bhaṇḍāgārato anīharitesu. Imassa bhikkhunoti uttaritukāmassa imassa bhikkhuno. Tulāyāti mānena.
တေသူတိ သာဋကေသု, ဧကော သာဋကောတိ ယောဇနာ။ သဗ္ဗေသု ပာတိတေသူတိ သမ္ဗန္ဓော။ ဧတ္တကေနာတိ ဒ္ဝာဒသဂ္ဃနကေန။ တံ သုတ္ဝာတိ ဘိက္ခူနံ တံ ဝစနံ သုတ္ဝာ။ သဗ္ဗတ္ထာတိ သဗ္ဗသ္မိံ သင္ဃဂဏသန္တကေ။ အနုပ္ပဒာနေန ခိပိယတိ ပက္ခိပိယတီတိ အနုက္ခေပန္တိ ဒသ္သေန္တော အာဟ ‘‘အနုက္ခေပံ နာမာ’’တိအာဒိ။ ယတ္တကံ အဂ္ဃန္တိ သမ္ဗန္ဓော။ တတ္တကေန အဂ္ဃေန အဂ္ဃနကေတိ ယောဇနာ။ ဝိကလ္လကာတိ ဝိကလသ္သ ဘာဝော ဝိကလ္လံ, စီဝရပုဂ္ဂလာနံ အပဟောနကဘာဝော, တဒေဝ ဝိကလ္လကာ။ ‘‘တတ္ထာ’’တိ ပာဌသေသော, တေသု ဒ္ဝီသု ဝိကလ္လကေသူတိ အတ္ထော။ အတ္ထီတိ သံဝိဇ္ဇန္တိ, နိပာတောယံ။ ဆိန္ဒန္တေဟိ စ ဒာတဗ္ဗာနီတိ သမ္ဗန္ဓော။ ဒာတဗ္ဗာနီတိ စ ဆိန္ဒိတဗ္ဗာနိ။ ဒာသဒ္ဒော ဟိ အဝခဏ္ဍနတ္ထော။ ဒာတုန္တိ အဝခဏ္ဍိတုံ။ ဧဝန္တိအာဒိ နိဂမနံ။ ဧတ္ထာတိ ဧတေသု ဝိကလ္လကေသု။ တန္တိ စီဝရံ ။ အထာတိ တောသိတတော ပရံ။ တတ္ထာတိ ဧကသ္သ ဘိက္ခုနော ကောဋ္ဌာသေ။ သာမဏကန္တိ သမဏသ္သ အနုရူပံ။ ယောတိ ဘိက္ခု။ တေနာတိ ပရိက္ခာရေန။ ဣဒမ္ပီတိ အညံ သာမဏကသ္သ ပရိက္ခာရသ္သ ဌပနမ္ပိ။ ပိသဒ္ဒေန ပုရိမံ ဝတ္ထဆိန္ဒနမပေက္ခတိ။
Tesūti sāṭakesu, eko sāṭakoti yojanā. Sabbesu pātitesūti sambandho. Ettakenāti dvādasagghanakena. Taṃ sutvāti bhikkhūnaṃ taṃ vacanaṃ sutvā. Sabbatthāti sabbasmiṃ saṅghagaṇasantake. Anuppadānena khipiyati pakkhipiyatīti anukkhepanti dassento āha ‘‘anukkhepaṃ nāmā’’tiādi. Yattakaṃ agghanti sambandho. Tattakena agghena agghanaketi yojanā. Vikallakāti vikalassa bhāvo vikallaṃ, cīvarapuggalānaṃ apahonakabhāvo, tadeva vikallakā. ‘‘Tatthā’’ti pāṭhaseso, tesu dvīsu vikallakesūti attho. Atthīti saṃvijjanti, nipātoyaṃ. Chindantehi ca dātabbānīti sambandho. Dātabbānīti ca chinditabbāni. Dāsaddo hi avakhaṇḍanattho. Dātunti avakhaṇḍituṃ. Evantiādi nigamanaṃ. Etthāti etesu vikallakesu. Tanti cīvaraṃ . Athāti tositato paraṃ. Tatthāti ekassa bhikkhuno koṭṭhāse. Sāmaṇakanti samaṇassa anurūpaṃ. Yoti bhikkhu. Tenāti parikkhārena. Idampīti aññaṃ sāmaṇakassa parikkhārassa ṭhapanampi. Pisaddena purimaṃ vatthachindanamapekkhati.
ဝဂ္ဂန္တိ သမူဟံ။ အဋ္ဌ ဝာ နဝ ဝာ ဘိက္ခူ ဟောန္တီတိ ယောဇနာ။ တေသန္တိ အဋ္ဌန္နံ ဝာ နဝန္နံ ဝာ။ ဧဝန္တိအာဒိ နိဂမနံ။ အယံ အပဟောနကဘာဝောတိ ယောဇနာ။ ပုန စီဝရသ္သေဝ ဝိကလ္လကဘာဝံ ဒသ္သေန္တော အာဟ ‘‘အထဝာ’’တိအာဒိ။ ဧတ္ထ ပုရိမနယေ စီဝရသ္သ စ ပုဂ္ဂလသ္သ စ ဝိကလ္လကံ ဟောတိ, ပစ္ဆိမေ စီဝရသ္သေဝာတိ အယမေတေသံ ဝိသေသော။
Vagganti samūhaṃ. Aṭṭha vā nava vā bhikkhū hontīti yojanā. Tesanti aṭṭhannaṃ vā navannaṃ vā. Evantiādi nigamanaṃ. Ayaṃ apahonakabhāvoti yojanā. Puna cīvarasseva vikallakabhāvaṃ dassento āha ‘‘athavā’’tiādi. Ettha purimanaye cīvarassa ca puggalassa ca vikallakaṃ hoti, pacchime cīvarassevāti ayametesaṃ viseso.
Related texts:
တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / မဟာဝဂ္ဂပာဠိ • Mahāvaggapāḷi / ၂၁၄. ဘဏ္ဍာဂာရသမ္မုတိအာဒိကထာ • 214. Bhaṇḍāgārasammutiādikathā
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / မဟာဝဂ္ဂ-အဋ္ဌကထာ • Mahāvagga-aṭṭhakathā / ဘဏ္ဍာဂာရသမ္မုတိအာဒိကထာ • Bhaṇḍāgārasammutiādikathā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / စီဝရပဋိဂ္ဂာဟကသမ္မုတိအာဒိကထာဝဏ္ဏနာ • Cīvarapaṭiggāhakasammutiādikathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / ဘဏ္ဍာဂာရသမ္မုတိအာဒိကထာဝဏ္ဏနာ • Bhaṇḍāgārasammutiādikathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / ဘဏ္ဍာဂာရသမ္မုတိအာဒိကထာဝဏ္ဏနာ • Bhaṇḍāgārasammutiādikathāvaṇṇanā
